Ingabe Uzizwa Ulondekile?
Ikuphi Ukukhululeka Okungenzeka Manje?
UZIZWA ulondeke ngezinga elingakanani maqondana nezinkinga eziphakanyiswe ekhasini lesi-3? Inkosi ewumhubi uDavide isinikeza amazwi angasenza sizizwe silondeke ngokwengeziwe ngisho manje. Yaloba: “Ngimbeké uJehova njalo phambi kwami, ngokuba ungakwesokunene sami, angiyikuzanyazanyiswa. . . . Nenyama iyakuhlala ngokwethemba.”—IHubo 16:8, 9.
‘Ukubeka uJehova phambi kwakho’ kunawo kanjani umphumela ezinkingeni nokwesaba okukuhlaselayo? Make sibukeze imibuzo ephakanyiswe ngaphambili futhi sibone indlela iseluleko sikaJehova esingasiza ngayo.
Ukusebenzisa izimiso zeBhayibheli nsuku zonke kungawathinta amathuba akho omsebenzi. Ukuzisebenzisa kungaveza isisebenzi esiqondiswa unembeza, esiqotho nesikhuthele, ngoba iZwi likaNkulunkulu liyayala: “Owebayo angabe eseba, kepha kunalokho akhuthale asebenze okuhle ngezandla zakhe, ukuze abe-nokokwabela osweleyo.” (Efesu 4:28) Ngokuvamile, abaqashi abanengqondo bayofuna ukusetshenzelwa isisebenzi esinokwethenjelwa. Ngakho-ke inkinga yokuqashwa, nakuba ikhona, akumelwe ibe nkulu kakhulu esisebenzini esiqotho esingumKristu.
Indlela yobuKristu yokuphila ingase yenze ngcono ngisho nemiphumela yokukhuphuka kwamanani. Ngani? Ngoba umKristu uyisebenzisa kahle imali yakhe elinganiselwe. Ingxenye yemali yakhe akayichitheli ekugembuleni, ekubhemeni noma ekusebenziseni kabi uphuzo nemilaliso. Ugwema ukubukisa okukhulu ngengcebo, okuyize, “ngokuba konke okusezweni, inkanuko yenyama, nenkanuko yamehlo, nokuzigabisa ngalokhukuphila, akuveli kuYise [uNkulunkulu], kodwa kuvela ezweni.”—1 Johane 2:16, 17.
Umbono womKristu weqiniso ungasiza kanjani enkingeni ehlale ikhona yobugebengu? IBhayibheli liyayala: “Ungangeni emkhondweni wababi, ungahambi endleleni yabonakeleyo. Yixwaye, ungadluli ngayo; chezuka kuyo, udlule.” (IzAga 4:14, 15) Ngesisekelo seseluleko esinjalo umKristu uthatha izi xwayiso zokuhlakanipha kulezozindawo nezimo ezivama ukubangela ubugebengu. Ugwema ukuzijwayelanisa nabantu abathanda ubugebengu.
Ngisho nakuba amaKristu amaningi, ngenxa yezizathu ezingokomnotho, kumelwe ahlale ezindlini ezingamafuku, izimiso zawo ezisekelwe eBhayibhelini ziyawaqondisa ukuba abe namakhaya ahlanzekile amahle kunawomakhelwane. Ayazi ukuthi ukuhlanzeka okungokomzimba kuyingxenye yokukhulekelwa kweqiniso kukaNkulunkulu ongcwele, uJehova. Umprofethi uIsaya wayala: “Nizihlambulule.”—Isaya 52:11.
AmaKristu afundiswa ukuthandaza: “Usiphe namuhla isinkwa sethu semihla ngemihla.” (Mathewu 6:11) Lokho kunxusa kusikisela isimo esidingweni sokudla kwansuku zonke ukwamukela okwanele usuku ngalunye ngaphandle kokukhathazeka ngokungafanele ngezidingo zakusasa. Uma okholwayo efeza ingxenye yakhe, khona-ke uyazi ukuthi akanakushiywa engenazo izidingo zokuphila zansuku zonke, njengoba umhubi uDavide aloba: “Kade ngimusha, manje sengimdala; angizange ngibone olungileyo eshiyiwe nenzalo yakhe iphanza ukudla.”—IHubo 37:25.
Ingabe kunokwenzeka ukugwema noma ukunciphisa ukuxabana kwasekhaya? IBhayibheli liyaluleka: “Owephuza ukuthukuthela uthulisa ingxabano.” (IzAga 15:18) Futhi: “Konke okubabayo, nentukuthelo, nolaka, nomsindo, nokuhlambalaza makususwe kini kanye nakho konke okubi. Maniphathane ngobumnene, . . . nithethelelane.” (Efesu 4:31, 32) Ingabe yonke imishado ayinakuzuza ngokubonisa lowomoya wobuKristu?
Abazali abaningi babakhathalela kakhulu abantwana babo futhi ikakhulukazi ngenxa yokucindezela kokuziphatha okubi kontanga laba abangaphansi kwakho esikoleni. Emikhayeni yamaKristu ukwethembeka ezimisweni nasemkhayeni kumelwe kugxiliswe ngokujulile ukuze kusizwe abasha bamelane nezilingo zanamuhla. IBhayibheli leluleka abazali ukuba bahlakulele ubungane obuseduze nabantwana babo, balinganisele uthando nesiyalo. Isiyalo sihilela ubungane, ukufundisa, ukuzindla nokuqondisa.—Efesu 6:4; IzAga 1:8.
UmKristu onethemba eliqinisekile ngesikhathi esizayo akanakukhathazwa kakhulu yilezozimo ezibangela ukucindezeleka nobunzima. Ukuba umlutha wemilaliso nokubalekela ubunzima ngemilaliso akunakuba yinto athembele kuyo ekuphileni kwakhe kwansuku zonke. Njengoba umhubi ekubeka: “Ngizakucambalala ngokuthula, ngilale ubuthongo, ngokuba wena-Jehova wedwa ungihlalisa ngokulondeka.”—IHubo 4:8.
Nakuba amaKristu azi ukuthi enye impi phakathi kwezizwe ingenzeka, ayakuqaphela futhi ukuthi umnikazi womhlaba uNkulunkulu, akuyena umuntu. Ayazi ukuthi uNkulunkulu akanakumvumela umuntu ukuba abhubhise umhlaba noma umkhaya wesintu ngokuphelele ngempi yenyukliya ngoba uyena “owawubumba umhlaba, wawenza, . . . wawumbumba ukuba kuhlalwe kuwo.” (Isaya 45:18) Yingakho eye wathembisa futhi waqinisekisa ‘ngamazulu amasha nomhlaba omusha’ esintwini esilalelayo. Kungeyona imbulunga entsha nesibhakabha kodwa isimiso somhlaba sezinto esisha ngokuphelele esisekelwe emfundisweni engokomoya yabo bonke. Lokhu kusekuvumelaneni nesiprofetho esiphefumlelwe sikaIsaya: “Ngokuba umhlaba uyakugcwala ukumazi uJehova njengamanzi asibekela ulwandle.”—Isaya 65:17; 11:9.
Kukanjani futhi kungani kuyolethwa lolushintsho? Ingabe uNkulunkulu uyosebenzisa abaholi bezwe ukuba balethe ukulondeka? Ingabe uyohlanganyela esikhathini esizayo esiqinisekile? Isihloko sokugcina kuloluchungechunge sizoyiphendula lemibuzo.
[Isithombe ekhasini 7]
Ukusebenzisa iseluleko seBhayibheli kuholela emakhayeni ahlanzekile, naphezu komakhelwane