Ukholo Lwakhe Lwalungenakunyakaziswa
Eminyakeni emibili uRenata oneminyaka eyi-14 ubudala waseBrazil wayephethwe ikhensa yamathambo edolweni lakhe langakwesobunxele. Ukunqunywa nokwelashwa ngecobalt kwamane nje kwahlehlisa ukufa kwakhe. Unembeza kaRenata wobuKristu wawungenakumvumela ukuba ampontshelwe igazi, naphezu kokunxusa kukadokotela ukuba limpontshelwe. Ngaphambi kokungena kwakhe kokugcina esibhedlela, udokotela nonesi baya kubo kaRenata beyombona.
“Ngiyavuma ukubuyela esibhedlela uma uDr. —— engithembisa ukungayithinti indaba yokufaka igazi futhi. Ngikhathele ukuhlangabezana naleyompikiswano,” kusho uRenata.
Udokotela wavuma futhi wanezela ukuthi, ngisho nakuba uRenata ayephila emizuzwini yakhe yokugcina, ukholo lwakhe lwalungenakunyakaziswa.
Phakathi nezinyanga eziyisishiyagalombili zokugcina uRenata wayengakwazi ukulala ngenxa yobuhlungu obukhulu. Lapho kufika isikhathi somhlangano woFakazi BakaJehova, wakhala futhi wathi: “Ukuba bengingakwazi ukukhuluma nawo wonke umuntu bengingathi, ‘Sebenzisani imilenze yenu ngangokunokwenzeka. Mhlawumbe kusasa niyobe ningakwazi ukuhamba nisebenzele uJehova. Ningalahlekelwa yimihlangano yenu!’”
Imithandazo kaRenata yayiqinile. Ngolunye usuku unina kwenzeka wamuzwa ethandaza: “Jehova, ngiyazi ukuthi ngeke ngibe ngcono futhi. Odokotela bahlulekile ukungelapha, kodwa Wena ungangelapha. Kodwa ngiyazi ukuthi akukakabi yisikhathi sakho; kuphela oHlelweni Olusha. Kodwa ngicela ukuba ungavumeli ukuba ngivuvukale; ngaphandle kwalokho, umama ngeke akwazi ukungiyisa ekamelweni lokugezela.”
Uma abanye, kuhlanganisa nonina, bekhala phambi kwakhe, uRenata wayebakhuthaza ukuba baqine okholweni. Unina uyabhala: “Kodwa ngiyakhumbula ukuthi ngolunye usuku ngemva kokunqunywa umlenze, unesi wathi kuRenata, ‘Kungani wena uqine kanje etafuleni lokuhlinza? Kuyinto enhle ukuthi uzothola umlenze wokwenziwa, akunjalo’? URenata waphendula, ‘Cha, ngilindele ukuba nowenyama negazi, uJehova uNkulunkulu ayonginikeza wona oHlelweni Olusha.’”
[Amazwi acashunwe esihlokweni ekhasini 27]
Ngesikhathi esesibhedlela, uRenata wakhuthaza: “Ningalahlekelwa yimihlangano yenu!”