Ukubonisa Ukwazisa Kwethu KuNkulunkulu
S’yak’bonga Jehova emin’ naseb’suk’,
Ngokusehlisela ukukhanya!
S’yak’bonga ngelungelo lok’khuleka (kuwe),
Ukuze size kuwe ngok’naka!
S’yak’bonga Jehova, ngay’ iNdodana,
Eyanqob’ ukufa neHay’desi!
S’yak’bonga ngokus’hola entandweni (yakho),
Usisiza s’fez’ iz’fungo zethu!
S’yak’bonga Jehova, ngobuzalwane,
Sithol’ izihlobo zeqiniso!
S’yak’bonga ngokusinikez’ umoya (wakho)
Osisiza s’bamb’ inkambo yethu!
S’yak’bonga Nkosi, ngokushumayela
Ngegama lakho nokufundisa!
S’yak’bonga ngokuphela kwez’nkathazo (zezwe),
UMbuso wakho uyoma njalo!
LAWA amazwi engoma ethi “Siyakubonga Jehova!” Avela encwadini ethi “Nihlabelele Nihubele INkosi Enhliziyweni Yenu,” iculo elisetshenziswa oFakazi BakaJehova. Lengoma inikeza ubufakazi besifiso sabo sokubonisa ukwazisa kuNkulunkulu, futhi lokhu kuvumelana nesikhuthazo esingokomBhalo soku‘hlabelela nokuhubela iNkosi enhliziyweni yethu,’ kanjalo si“mbonge njalo uNkulunkulu uYise ngakho konke egameni leNkosi yethu uJesu Kristu.” (Efesu 5:18-20) Kodwa iziphi ezinye zezizathu zokubonga, zokubonisa ukwazisa, kuJehova uNkulunkulu?
Kungani Sibonisa UNkulunkulu Ukwazisa Kwethu?
Ukuphila ngokwakho kuyisipho esivela kuNkulunkulu esimelwe sisibonge. Eqinisweni, uJehova ulungiselela zonke izinto ezinhle neziyinzuzo. (IzEnzo 17:24, 25) Phakathi kwezinto ezinjalo ezinhle ezishiwo eculweni elicashunwe lapha yilezi: ukukhanya okuyigugu okungokomoya (IHubo 43:3; Johane 17:3); ilungelo lokukhuleka (IzAga 15:8); umhlatshelo osusa izono weNdodana kaNkulunkulu, uJesu Kristu (Roma 6:23; 1 Johane 2:1, 2); ukuqondiswa okungokomBhalo ekwenzeni intando yaphezulu (IHubo 40:8; 119:9-16, 105); ubuzalwane bothando bobuKristu (1 Petru 2:17); umoya ongcwele kaNkulunkulu oqondisayo, noma amandla ayisiphekupheku (IHubo 143:10); nezibusiso zombuso zaphakade eziyongena esikhundleni sezinkathazo zomhlaba. (Mathewu 6:9, 10; IsAmbulo 11:15-18; 12:9-12) Lezi ezinye zezinto oFakazi BakaJehova abazibongayo kuNkulunkulu uma becula emhlanganweni webandla.
Kunezizathu eziningi zokubonisa ukwazisa kwethu kuNkulunkulu. Phela, cabanga ngokuvuka ekuseni kukuhle! Ilanga likhanya bhá, uzwa izinyoni zikhala, futhi uhogela iphunga elimnandi lezimbali noma lotshani obusanda kusikwa. Ngokwesasa, uthi: “Kuyinto enkulu ukuba ophilile!” Kodwa, yeka ukuthi kufaneleke kanjani ukubonisa ukwazisa kwakho kuLowo owenza konke lokhu kube nokwenzeka!
UNkulunkulu, ngempela uye wenza amalungiselelo amaningi ngokwenzuzo yesintu nenjabulo. Cabanga ngelanga, inyanga nezinkanyezi ezisinikeza ukukhanya. Kunomoya wokuphefumula nezihlahla eziwuhlanzayo. UJehova uye walungiselela ukudla namanzi ngobuningi. Futhi cabanga ngazo zonke izinyoni nezilwane ezenza uhambo emaphandleni lube olujabulisayo. (Jobe 37:5-16; IHubo 8:3-9; IzEnzo 14:15-17) Futhi, uNkulunkulu uye wasinikeza izinzwa zokubona, zokuzwa, zokuthinta, zokunambitha nokuhogela ezisenza sikwazi ukujabulela lamalungiselelo ngokugcwele. Yeka ukubonga okumelwe sibe nakho!
Okubaluleke ngaphezulu kakhulu kumaKristu azinikezele amalungiselelo kaJehova angokomoya. Iningi lawo lithintwe eculweni elicashunwe ekuqaleni. Ngokuqinisekile kufanele simbonge uNkulunkulu ngezibusiso ezinjalo ezingokomoya.
Futhi kuhle ukuzindla njalo ngawo wonke amalungiselelo amaningi kaJehova uNkulunkulu, angokomoya nangokwenyama. Ngokungangabazeki ukuzindla okunjalo kuyosishukumisela ukuba senze okuthile. Cishe kuyosisunduzela ukuba sibonise ukwazisa kwethu kuNkulunkulu ngamazwi nangezenzo.—IHubo 1:1-3; 77:11, 12.
Amazwi Okwazisa Nezenzo
Umthandazo oqotho ungenye yezindlela ezisobala zokubonisa ukwazisa kwethu kuMniki we“zipho zonke ezinhle neziphiwo zonke ezipheleleyo.” (Jakobe 1:17) Ngakho, siyambonga yini uNkulunkulu njalo ngamazwi omthandazo? Singase sishukunyiswe ukuba senze kanjalo njengoba kwenza umhubi uDavide owathi: “Jehova Nkulunkulu wami, ziningi izimangaliso zakho ozenzileyo, nezizindlo zakho ngathi; akukho okungafaniswa nawe; uma ngiyilanda, ngiyisho, miningi kunokuba ibalwe.”—IHubo 40:5.
UDavide futhi wayezimisela ukubonisa uNkulunkulu ukwazisa kwakhe ngokukhuluma kwabanye. Ngokufanelekile wathi: “Ngiyakumbonga uJehova ngayo yonke inhliziyo yami; ngiyakulanda zonke izimangaliso zakho.” (IHubo 9:1) Kulowomusho ofanayo weculo elithi “Siyakubonga Jehova!” kuthi: “S’yak’bonga Nkosi ngokushumayela ngegama lakho nokufundisa!” Yebo, ngempela, ukukhuluma nabanye ngoNkulunkulu, sisho amazwi ngokuhlanganyela nabo iqiniso elivela eZwini lakhe, ngempela kuyindlela enhle kakhulu yokumbonisa ukubonga kwethu.
Siza ucabange emuva, ngalowo owayephethwe uchoko owabuya ukuba abonge ngenxa yokuphiliswa. Wakwenza kanjani lokhu? Siyatshelwa: “Enye yawo isibona ukuthi iphulukisiwe, yabuya imdumisa uNkulunkulu ngezwi elikhulu, yawa ngobuso ngasezinyaweni zakhe imbonga.” (Luka 17:15, 16) Lendoda ayibonganga nje uJesu Kristu ngokuyisindisa kodwa futhi yadumisa uNkulunkulu, uMthombo wokuphila nokuphulukiswa kweqiniso. Futhi indoda eyayiphulukisiwe yakwenza lokhu “ngezwi elikhulu.” Phela, kumelwe ukuba yamdumisa uJehova futhi yakhuluma ngendaba kwaphela amasonto, ngisho nezinyanga! Lokhu kubonisa kahle indlela esingabonisa ngayo ukubonga kwethu ngokukhuluma ngalokho nesikubonile, esikuzwile esikufundile ngoNkulunkulu.
Ngokuyisisekelo, lokhu kuyisizathu sokuba oFakazi BakaJehova bangene indlu ngendlu. Ukubonga uNkulunkulu kubashukumisela ukuba babe matasa emisebenzini emihle, imisebenzi yokwesaba uNkulunkulu. (Jakobe 2:26) Lemisebenzi ihlanganisa ukumemezela izindaba ezinhle zombuso kaNkulunkulu. OFakazi bazimisela ukutshela abanye ngalokho abakufundile eZwini likaNkulunkulu, iBhayibheli, futhi bachaze indlela ulwazi lwabo olubanikeze ngayo ithemba lesikhathi esizayo. Njengowayephethwe uchoko onokwazisa, nabo, bafuna ukudumisa uNkulunkulu.
Ingabe nawe uzizwa ushukunyiselwe ukuba ukhulume ngezinye zezinto ozifundile emiBhalweni? Ungakwenqabeli okukuqhubayo. Ungase uqale ngokukhuluma namalungu omkhaya, omakhelwane, nosebenza nabo nabangane. Njengoba wenza kanjalo, uyothola ukuthi ukwazisa kwakho siqu ngezinto ezingokomoya kuyokwanda, ukuqonda kwakho kuyojula, futhi isifiso sakho sokufunda ngokwengeziwe siyokhula. Isaga esingokomBhalo sithi: “Siphe isihlakaniphi, siyakwanda ngokuhlakanipha; fundisa olungileyo, uyakwenezela emfundweni.” (IzAga 9:9) Izigidi zabantu ziyashukunyiselwa ukuba zibonise ukwazisa kwazo kuNkulunkulu ngalendlela, futhi zenza lokhu njengoFakazi BakaJehova.
Khona-ke kusobala ukuthi singakwazi futhi simelwe sibonise ukwazisa kuNkulunkulu nakwabanye abantu. Singambonga uNkulunkulu ngomthandazo nangokubabaza udumo lwakhe ngengoma. Ngaphezu kwakho konke, singabonisa ukwazisa kuJehova uNkulunkulu ngokukhuluma nabanye ngemisebenzi yakhe emangalisayo.
Uma ufisa usizo ekufundeni nasekwenzeni intando yaLowo owenza zonke izinto, oFakazi BakaJehova bahlale bekulungele ukukusiza. Kanye nabo, ungayazi injabulo ewumphumela wokubonisa ukwazisa kwakho okuqotho kuNkulunkulu.
[Isithombe ekhasini 8]
“Kuyinto enkulu ukuba ophilile!”