Ukuzithoba Ngokwethembeka “Ohlelweni OlungokwaseZulwini
“Bheka, kuhle, kumnandi kangaka ukuba abazalwane bahlalisane ndawonye bemunye. Kufana namazolo aseHermoni ehlela ezintabeni zaseSiyoni.”—IHubo 133:1, 3.
1. IZwi likaJehova liwuchaza kanjani umkhaya wakhe wasemhlabeni wezinceku ezizinikezele?
YEKA indlela enhle lokhu okuchaza ngayo umkhaya walabo, nakuba behlakazeke nomhlaba wonke, abaye banikezela ukuphila kwabo kuMzali wabo oyedwa, uJehova uNkulunkulu! Futhi ngokuqinile wengamela phezu kwalomkhaya wembulunga yonke ngendlela enhle. Ngothando ulungiselela zonke izidingo zethu.—IHubo 145:16.
2. Kusho ukuthini ukuzithoba ohlelweni olungokwasezulwini?
2 Kodwa, ngokuqinisekile uJehova ugcizelela ukuthula nobunye kubo bonke abantwana bakhe abazinikezele. (1 Korinte 1:10) Futhi lemiphumela emihle itholakala ngoba izinceku zikaNkulunkulu zizithoba ngokwethembeka ohlelweni olungokwasezulwini. Kusho ukuthini lokho? Njengoba ubukhosi bukaNkulunkulu buthiwa ukubusa kukaNkulunkulu, ukuzithoba ohlelweni olungokwasezulwini kusho ukulalela imithetho, imiyalo nezimiso eziphuma kuNkulunkulu.—Isaya 33:22.
3. UJesu wayiveza kanjani imizwa yakhe ngokuzithoba ekubuseni kukaNkulunkulu?
3 Isibonelo esihle kakhulu sokuzithoba ngokwethembeka ohlelweni olungokwasezulwini esikaJesu Kristu. Ezulwini wayeyi“zibulo lezidalwa zonke.” (Kolose 1:15) “UJehova wangidala ngingukuqala kwendlela yakhe ngaphambi kwemisebenzi yamandulo. Ngamiswa kwaphakade kwasekuqaleni, umhlaba ungakabikho. . . . Khona nganginaye ngiyingcweti yomsebenzi, ngiyintokozo yakhe imihla ngemihla, ngijabula phambi kwakhe isikhathi sonke.” (IzAga 8:22, 23, 30) Intokozo yakhe yokuzithoba ekubuseni kukaNkulunkulu yayisobala lapho esemhlabeni, ngoba uJesu wachaza: “Ngokuba ngehlé ezulwlni kungengokuba ngenze intando yami, kodwa ukuba ngenze intando yongithumileyo.” (Johane 6:38) Njengenxenye yokwenza intando kaNkulunkulu, wayenakekela kakhulu ukuba afundise okukaNkulunkulu, hhayi okwakhe. UJesu wathi, “imfundiso yami akusiyo eyami kodwa ngeyongithumileyo.” (Johane 7:16) Yeka isimo esihle ngazo zonke izinceku zikaNkulunkulu ukuba zisilingise!
4. Chaza ilungiselelo elingokwasezulwini osukwini lwethu.
4 Ngenxa yokuzithoba kwakhe ngokwethembeka ekubuseni okungokwasezulwini, kuze kube sekufeni, uJesu wavuzwa ngokuphila okungenakufa kwasezulwini. Ngokungaphezulu, wanikwa “amandla onke ezulwini nasemhlabeni.” (Mathewu 28:18) Naye ngokufanayo, wanikela ‘konke okungokwakhe’ kwasemhlabeni (izithakazelo zasemhlabeni zoMbuso wakhe) kwathembekile amaKristu agcotshiwe. Lawa uJesu wawabiza ngokuthi “inceku ethembekileyo neqondayo.” (Mathewu 24:45-47) Umvuzo wawo ngalangalimbe uwukuhlanganyela ukubusa kwasezulwini noKristu ‘njengabapristi’ na‘makhosi’ embusweni wakhe. (IsAmbulo 14:1, 4; 20:6) Namuhla, insali yale‘nceku ethembekileyo’ isaphila emhlabeni. Imisebenzi yayo ihlanganisa ukwamukela nokudlulisela kuzo zonke izinceku zikaJehova zasemhlabeni ukudla okungokomoya ngesikhathi sakho. Isesikhundleni esifanayo nesikaPawulu nezisebenzi ezikanye naye lapho lowomphostoli athi ngamaqiniso amangalisayo uNkulunkulu awanikeza kubantu bakhe: “Ngokuba kithina uNkulunkulu ukwambulile ngoMoya.” (1 Korinte 2:9, 10) Iyahola futhi enkonzweni yokushumayela ngoMbuso okumelwe ifezwe kubo ‘bonke abakhileyo emhlabeni’ ngaphambi kokuphela kwalesimiso sezinto esilahliwe.—Mathewu 24:14.
Imiphumela Yenkambo Embi
5, 6. (a) Imiphi imiphumela eyehlela uEva noAdamu ngokungafuni ukubuswa uJehova? (b) UJehova usebenzelana kanjani ne‘zimpisi ezimbathise okwezimvu’?
5 Yeka indlela okubaluleke ngayo ngawo wonke umuntu emkhayeni kaNkulunkulu ukuba azithobe ngokwethembeka ezimfundisweni nasemalungiselelweni oMbusi Omkhulu OngokwaseZulwini, uJehova, neNdodana yakhe eyiNkosi, uKristu Jesu, njengoba kuthunyelwa nge‘nceku ethembekileyo’ emhlabeni! Njengoba uhlelo olungokwasezulwini luqala ngoJehova ngokwakhe lwehle, asinakulokotha sifune ukulingisa uSathane uDeveli ngokuba abangabuswa ukubusa kwasezulwini. Khumbula imiphumela ebuhlungu eyenzeka kuEva lapho elalela ukunxusa kukaSathane okukhohlisayo ukuba angazithobi ohlelweni olungokwasezulwini. Ngendlela efanayo, wathi kuye: ‘Mawungabuswa uNkulunkulu. Zenzele okucabangayo wena siqu. Zinqumele ngokwakho okulungile nokungalungile. Khona-ke uyoba njengoNkulunkulu. Ngempela awuyikufa.’ (Genesise 3:1-5) Lokho kungase ukuba kwezwakala kuheha, kodwa kwakungamanga. (Johane 8:44) Lapho indoda yakhe ihlanganyela naye ekuyekeni ukuzithoba ohlelweni olungokwasezulwini, baxoshwa ensimini yase-Edeni nasemkhayeni kaNkulunkulu wabathembekileyo. Ngesikhathi esifanele, njengoba uJehova ayexwayisile, isigwebo sokufa sehliselwa kubo bobabili.—Genesise 2:17.
6 Ngokufanayo namuhla, noma ubani phakathi kwabantu bakaJehova ovumela imfundiso yokuzibusa nephambene akalingisi uNkulunkulu, kodwa uSathane uDeveli. Nokho, uJehova uyakubona okwenzeka phakathi komkhaya wakhe futhi uthatha isinyathelo. (IzAga 15:3) Akanakuyeka abantu abanjengezimpisi abangashwabadela abakhe abanjengezimvu, kodwa ngesikhathi esifanele wenza isenzo esinqumayo. (Mathewu 7:15-23) Njengobaba onothando, uvikela inhlalakahle engokomoya yomkhaya wakhe.—Hezekeli 34:11-16.
7. (a) Yini uAroni noMiriyamu abahluleka ukuyicabangisisa? (b) Kwaba namiphi imiphumela?
7 Ezinye izibonelo zeBhayibheli ziqokomisa futhi ingozi yokungazithobi ngokwethembeka ohlelweni olungokwasezulwini. Ngokwesibonelo, uMiriyamu noAroni bagabadela ngenxa yobuhlobo babo bomkhaya noMose baze ngisho babekela isikhundla sakhe inselele ebandleni lakwaIsrayeli wasendulo. (Numeri 12:1, 2) Bahluleka ukucabangela ngokungathi sína iqiniso lokuthi uJehova ngokwakhe wayenike uMose igunya elikhethekile, okwafakazelwa izenzakalo ezimangalisayo. UJehova wabakhumbuza: “Inceku yami uMose . . . uthembekile endlini yami yonke; ngiyakhuluma naye umlomo nomlomo ngokusobala, . . . anesabanga ngani ukukhuluma ngenceku yami uMose na?” Khona-ke “intukuthelo kaJehova yabavuthela.” UAroni wasolwa kakhulu, futhi uMiriyamu washaywa ngochoko futhi waxoshwa ekamu lakwaIsrayeli izinsuku eziyisikhombisa.—Numeri 12:7-15.
8. Indaba yeNkosi uSawule ibonisani?
8 Khona-ke kwakuneNkosi uSawule yakwaIsrayeli wasendulo eyenqaba ukulindela uJehova. Esikhundleni salokho, ngokugabadela yanikela ngemihlatshelo ngisho nakuba yayingeyona umpristi. Izaba zayo ezingasho lutho zaziwukuthi yayisengozini yokulahlekelwa impi yayo ngoqhekeko. Kodwa, yayingekabani impi? EkaSawule noma ekaJehova? Umprofethi uSamuweli wamtshela: “Wenze ngobuwula, awugcinanga umyalo kaJehova uNkulunkulu wakho . . . manje umbuso wakho awuyikuqhubeka.” (1 Samuweli 13:13, 14) Ubukhosi bathathwa kuSawule banikezwa ‘umuntu owayethandeka enhliziyweni kaJehova.’ Kanjalo, uSawule wajeziswa ngenxa yokuntula kwakhe ukuzithoba futhi nangokuntula kwakhe ukuphenduka okuqotho lapho indaba ilethwa kuye. Lokho kubonisa ukuthi uJehova uyasiphawula isenzo sokugabadela, sokuzibusa, sokungekhona okungokwasezulwini phakathi kwabantu bakhe.—IzAga 11:2.
9. Kungani iNkosi u-Uziya yahlaliswa endlini eyahlukanisiweyo?
9 Indaba kaUziya iNkosi yakwaJuda ingefanayo. Nakuba wayeyinkosi phezu kwabantu bakaJehova, wayengenalo igunya lokukhonza kunoma isiphi isikhundla sobupristi. Kodwa waphikelela ekwenzeni umsebenzi wompristi. Abapristi baphikisa ngokunamandla, bathi: “Akusikho okwakho, Uziya, ukushisela uJehova impepho, kungokwabapristi amadodana ka-Aroni, abangcweliselwe ukushisa impepho; phuma endlini engcwele ngokuba wenzé isiphambeko.” Khona-ke, ebonisa ukuntula kwakhe ukuphenduka, u-Uziya wabathukuthelela abapristi enezela esonweni sakhe sokuzikhukhumeza. “Esabathukuthelele abapristi, kwaqhamuka uchoko ebunzini lakhe . . . ngokuba uJehova wayemshayile.” Waqhubeka enochoko kwaze kwaba usuku lokufa kwakhe, engohlukanisiweyo, “ngokuba wanqunywa endlini kaJehova.”—2 IziKronike 26:16-21.
10. UPawulu wabachaza kanjani labo abakubekela inselele ukumiswa kwakhe nguJesu?
10 Umphostoli uPawulu wakhuluma ngabathile abakubekela inselele ukumiswa kwakhe okukhethekile yiNhloko yebandla lobuKristu, uJesu Kristu. (2 Korinte 11:12) Kodwa uPawulu wathi amadoda anjalo ayenga“baphostoli bamanga, izisebenzi ezikhohlisayo, beziguqula abaphostoli bakaKristu. Akumangalisi, ngoba uSathane uqobo uziguqula ingelosi yokukhanya.” (2 Korinte 11:13, 14) Lawomadoda ayenezawo siqu izinjongo zobugovu ayefuna ukuziphumelelisa. UPawulu waxwayisa ngaloluhlobo lomuntu ngokuthi: “Naphakathi kwenu kuzakuvuka amadoda akhuluma okudukisayo, ahunge abafundi ukubalandela. Ngakho lindani.” (IzEnzo 20:30, 31) UPawulu wanxusa abazalwane, kuhlanganise nalabo ababefisa ukuba abaphostoli ukuba bangavumeli ukuxabana nesiyaluyalu kuphazamise ubunye nokuchuma kwebandla lobuKristu. Uma bekhona abahluleka ukugcina iseluleko esiphefumlelwe umoya, khona-ke babebhekene nenhlekelele ethile.—Galathiya 1:7-9.
11. UJehova ukuvikela kanjani ukuzwana komkhaya wakhe wasemhlabeni?
11 Ophefumlelwe umlobi weBhayibheli uJohane wathi: “Lowo oweqisayo engemi ekufundiseni kukaKristu akanaye uNkulunkulu; . . . uma kufika umuntu kini engalethi lokhu kufundisa, ningamamukeli endlini yenu, ningambingeleli; ngokuba ombingelelayo uhlanganyela naye emisebenzini yakhe emibi.” (2 Johane 9-11) Yebo, uJehova uyowuvikela umoya omuhle nokuzwana komkhaya wakhe.
Ukuba Abaqaphile Namuhla
12. UJehova ubaqoqela kuphi bonke abamthandayo?
12 ‘Kulengxenye yokugcina yezinsuku’ uJehova uqoqela bonke abamthandayo kweyodwa inhlangano enobunye nokuzwana. Abantu bazo zonke izizwe balalela isimemo, “wozani sikhuphukele entabeni kaJehova endlini kaNkulunkulu kaJakobe; uyakusifundisa izindlela zakhe, sihambe emikhondweni yakhe.” (Isaya 2:2, 3) Phawula ukuthi uJehova ufundisa abantu izindlela zakhe ukuze bakwazi ukuhamba emikhondweni yakhe, kungabi ngezindlela zabo siqu nangemikhondo yabo siqu.—Jeremiya 10:23, 24.
13. (a) Kungani kumelwe sibe abaqaphile ngokukhethekile manje? (b) Yini esiyidingayo ukuze senze amacebo kaSathane angaphumeleli?
13 Nokho, uSathane manje “unolaka olukhulu.” Uyazi ukuthi “unesikhathi esifushane” kuphela esisele ngaphambi kokuba ayekiswe ukusebenza. Ngakho ‘uhamba njengebhubesi elibhodlayo efuna angamgwinya.’ (IsAmbulo 12:12; 1 Petru 5:8) Ngakho-ke, sidinga ukuba sixwaye noma imiphi imizamo kankulunkulu walelizwe, uSathane uDeveli, yokungenisa ukuxabana nokwahlukana phakathi kwamalungu omkhaya kaJehova. “Ngakho-ke bhekisisani ukuthi nihamba kanjani, kungabi-njengabangahlakaniphile kepha njengabahlakaniphileyo, nithengisise isikhathi, ngokuba izinsuku zimbi. Ngakho-ke ningabi-yiziwula, kodwa qondani okuyintando yeNkosi.” (Efesu 5:15-17) Ngokuthatha usizo lwamalungiselelo kaJehova enhlalakahle yethu engokomoya, siyokwakheka, silolongwe, sihlonyiswe ngokufanele. Ngalendlela siyokwazi ukwenza amaqhinga kaSathane amabi angaphumeleli futhi sinqobe injongo yakhe.—Efesu 6:10-13.
14. Kungani kunengozi ukuzicabangela ngaphezu kokufanele?
14 Isimo sengqondo okumelwe siqashelwe ukuzicabangela ngaphezu kokufanele. (Roma 12:3) Lokho kungaholela umKristu ekukholelweni ukuthi unokuthunywa okukhethekile okuvela kuNkulunkulu ngaphandle kwelungiselelo uNkulunkulu alisebenzisayo ekukhipheni amaqiniso akhe futhi aqondise umkhaya wakhe. Ngokomphumela, kungambeka ebuhlotsheni obungathi bukhethekile noJehova obungajatshulelwa neze yinoma imuphi omunye umzalwane noma udade emkhayeni. Kodwa lolohlobo lokuzehlukanisa lungaholela kuphela ebuthutheni: “Ozahlukanisayo ufuna esakhe isifiso, uphika konke ukuhlakanipha.”—IzAga 18:1.
Ukulindela UJehova
15. (a) Kufanelekile yini ukwenza ukusikisela esigabeni se“nceku” kaJehova? (b) Bonisa ukusebenza kokuzithoba okungokwasezulwini ekhulwini lokuqala.
15 Ngezinye izikhathi, abathile baletha ekunakekeleni kwesigaba se“nceku” izindaba ezahlukene zezimfundiso noma zenhlangano abanomuzwa wokuthi kudingeka zibukezwe. Ngokuqinisekile, ukusikisela kokuthuthuka kufanelekile, njengoba kuba nemibuzo yokucela ukuchazelwa. Isibonelo salokhu kwakulapho uPawulu, uBarnaba, nabanye bethunyelwa ukuba ‘bakhuphukele eJerusalema kubaphostoli namalunga’ ngokuqondene nokusoka. Lapho labobadala baseJerusalema benquma indaba, ngaphansi kokuqondiswa umoya ongcwele, khona-ke bathumela abazalwane emizini eyahlukene ukuba babanike “izinqumo ezanqunywa abaphostoli namalungu aseJerusalema ukuba bazigcine.” Ukuzithoba ngokwethembeka kulezozimiso kwaletha isibusiso sikaJehova. Kanjalo, “amabandla aqiniswa ekukholweni, anda ngobuningi imihla ngemihla.”—IzEnzo 15:1–16:5.
16. (a) Imuphi umoya okufanele uboniswe ngemva kokwenza ukusikisela? (b) UPawulu weluleka ukuba baphathwe kanjani ababonisa umoya ongalungile?
16 Umoya ofanelekile ngemva kokuveza ukusikisela uwukwaneliswa ukushiyela indaba ekunakekeleni ngomthandazo kwabazalwane abavuthiwe abaqondisa umsebenzi enhlanganweni kaJehova. Kodwa uma labo abenza ukusikisela bengeneliswa yilokho futhi beqhubeka bexoxa ngendaba emabandleni ngokombono wokuthola ukusekela kwabanye, yini eyokwenzeka? Lokho kwakungadala ukwahlukana, futhi kwakungachitha ukholo lwabanye. Ngakho uPawulu weluleka: “Niqaphele ababanga ukwahlukana nokukhubekisa, bephambene nesifundiso enafundiswa sona nina, nahlukane nabo.” UPawulu weluleka futhi uThithu ukuba ‘asole labo ababephikisa,’ enezela: “abamelwe ukuthuliswa, abachitha indlu iphela, befundisa okungafanele . . . Ngalokho-ke ubayalisise.”—Roma 16:17, 18; Thithu 1:9-13.
17. Singasilingisa kanjani isimo esihle sikaDavide namuhla?
17 IZwi likaNkulunkulu lithi: “Ukwazi kuyakhukhumeza, kepha uthando luyakha.” (1 Korinte 8:1) Ngakho yeka ukuthi kungcono kanjani ukuba matasa njalo emsebenzini oyinhloko wokumemezela uMbuso kaNkulunkulu omangalisayo, ukhuluma izinto ezakhayo, uqinisa ukholo lwabanye nolwethu, lapho ngokubekezela ulinde uJehova ukuba afeze intando yakhe ngelungiselelo lakhe alimisile! (Roma 14:19; Filipi 4:8, 9) Lingisa uDavide owathi: “Ngokuba ngithemba wena-Jehova; wena-Nkosi Nkulunkulu wami uzakuphendula.” (IHubo 38:15) Ngaso sonke isikhathi khumbula isici esibalulekile esilotshwe uPawulu okungukuthi, “ukuba nikhulume-zwilinye nonke, kungabikho ukwahlukana phakathi kwenu, kodwa nipheleliswe emqondweni munye nasekuboneni kunye.” (1 Korinte 1:10) Ngoba lesimiso sisetshenziswa umkhaya kaJehova kulo lonke izwe, sibona imiphumela emangalisayo. Ngempela, “kuhle, kumnandi kangaka ukuba abazalwane bahlalisane ndawonye bemunye.”—IHubo 133:1.
Ungayiphendula Lemibuzo:
□ UJesu wasibeka kanjani isibonelo esihle sokuzithoba ohlelweni olungokwasezulwini?
□ Yini engavela ekuntuleni ukuzithoba ohlelweni olungokwasezulwini?
□ Kungani kumelwe sibe abaqaphile ngokukhethekile ngokumelene noSathane namuhla?
□ Ekwenzeni ukusikisela, isiphi isimo okumelwe sibe naso?
[Isithombe ekhasini 18]
Ngenxa yokungazithobi ohlelweni olungokwasezulwini, iNkosi u-Uziya yashaywa ngochoko