Abazali Abashisekayo Baveza Izithunywa Zevangeli
EMINYAKENI engaphezu kwezinkulungwane ezintathu edlule uHana owayengenabantwana owesifazane othembekile kwaIsrayeli, wathembisa ukunikela ngendodana yakhe eyizibulo enkonzweni kaJehova uma enganikwa umntwana. UJehova wayiphendula imikhuleko yakhe yobuqotho naye wasifeza isithembiso sakhe. Indodana yakhe uSamuweli yaba yisikhonzi sikaNkulunkulu sesikhathi esigcwele nomlobi weBhayibheli.—1 Samuweli 1:4-28.
Abazali abaningi abangamaKristu kulezikhathi zanamuhla baye baba yizibonelo enkonzweni kaJehova kubantwana babo futhi baye babakhuthazela ukuba babe yizikhonzi zesikhathi esigcwele njengoSamuweli, kunokuceba umsebenzi wokuziphilisa. Leliphuzu lakhanyiswa ngamandla ngoMarch 7 uma ikilasi lama-72 leWatchtower Bible School of Gilead eseBrooklyn, New York lithola iziqu. Ezinyangeni eziyisihlanu abafundi abangama-42 babeye bathola okwanele ukuqeqeshelwa umsebenzi wokuba yizithunywa zevangeli emasimini akwamanye amazwe. Yini eyadonsela abaningi babo enkonzweni yesikhathi esigcwele? Odade abathathu abayizelamani zakwaRittenbach bangawuphendula lowombuzo—uBrenda, uRhoda noJoDene:
“Sakhuliswa emkhayeni ojabulayo ongokwasezulwini lapho abazali bethu basisiza ukuba sithande futhi siphile ngendlela yeqiniso. Basibekela isibonelo. Ezikhathini ezihlukene, uma izimo zivuma, babethatha inkonzo yobuphayona obusizayo (amahora angama-60 ngenyanga enkonzo yobuKristu) bekanye nathi, ikakhulukazi esikhathini sokuphumula,” kuchaza uBrenda.
“Futhi basifundisa ukuba sibe nombono ongokoqobo ngenkonzo yobuphayona,” kunezela uJoDene, “ngokuhlala nathi phansi babukeze imithwalo yethu yemfanelo ekhaya nasenkonzweni yobuphayona. Basisiza ukuba sihlele izinto ngendlela engokoqobo kunokuba nombono ongewona.”
Njengoba abantwana babo abayisithupha sebekhulile sinjani isimo emkhayeni wakwaRittenbach? Lamadodakazi amathathu masinyane azobe ekhonza eColombia. Amadodana amathathu ashadile (nabafazi bawo) nawo asenkonzweni yesikhathi esigcwele. Benzani omama nobaba? Basebenza isikhathi esigcwele emaPulazini eWatchtower aseNew York!
Akungabazisi ukuthi uJanice Peterson waseOntario, eCanada, wayethonywe ngabazali bakhe ukuba athathe inkonzo yesikhathi esigcwele. “Ubaba wayeyisikhonzi esiyiphayona ngaphambi kokuba ashade. Kuthe eseshadile futhi enabantwana, umgomo wakhe waba ukuphayona kanye nomkhaya akhonze lapho indingeko inkulu khona. Isifiso sakhe sagcwaliseka ngo-1969 lapho sonke, kuhlanganise nomama oyisishosha, sithuthela eNicaragua. Yeka injabulo okwaba yiyo uma sobabili sinobaba sikwazi ukukhonza lapho ndawonye njengamaphayona akhethekile! Manje mina nomyeni wami ngokushesha sizoba sikhonza eSouth America.”
Kwezinye izimo ngisho nabazali babazali balezithunywa baye bakuthonya ukuphila kwazo. Ugogo kaRoss Miller wayeyiphayona engxenyeni yokuqala yalelikhulu leminyaka futhi intshiseko yakhe, yathonya izizukulwane ezimbili. Indodana yakhe, ubaba kaRoss, yayivame ukukhonza njengephayona elikhethekile kuhlanganise naseBethel yaseBrooklyn eyindlunkulu yeWatchtower Society. Umama kaRoss naye ubeyiphayona ensimini yamaMexico. Ngaphandle kokungabaza abazali nezihlobo ezishisekayo bangathonya isizukulwane esilandelayo.
Abaningi kulelikilasi bayabonga ngezibonelo ezinhle nezikhuthazo abazithola kubazali babo, labo abaningi babo ababekhona kulomkhosi wokuthweswa iziqu.
Bonke abayizi-2 044 ababekhona ekuthwesweni kweziqu bajabulela isimiso esihle esasinezinkulumo ezikhuthazayo zabadala baseBethel kuhlanganise nokuhlangenwe nakho okuhlukahlukene okuhle kakhulu, umculo nedrama yeBhayibheli eyayenziwa ngabafundi. Bonke abantu bajabulela kakhulu inkulumo enamandla ngomongameli weWatchtower Society uF. W. Franz, oneminyaka engama-88 ubudala, eyayinesihloko esithi: “Qhubekani Njengamadoda.” Wagcizelela ukuthi wonke amaKristu, abesifazane kanye nabesilisa, afanele akhonze ngesibindi, ikakhulukazi kulezinsuku eziyingozi ezingaphambi kweArmagedoni.—1 Korinte 16:13; AmaHubo 68:11.
Abafundi abangama-42 abavela emazweni ama-5 ahlukene baye babelwa ukukhonza emazweni ayi-18 emazwekazini ama-4. Inkonzo yabo yezithunywa zevangeli ngaphandle kokungabaza iyoba umnikelo omuhle ekwandeni koMbuso.