Ingabe UNkulunkulu Uyakhuluma Ngempela Namuhla?

UMFUNDISI waya phambi kweklasi, elungiselela ukuqala isifundo sakhe. Wabe eseqaphela ukuthi umfundi othile wayebhale okuthile ebhodini: “BUZA IGUNYA!” Ngaphandle kokuvula umlomo, umfundisi wabhala ngaphansi: “Uma igunya liphendula, ingabe uzolalela?”

Lowo umbuzo omuhle. Futhi uyasebenza ngokuhlobene negunya eliphakeme kunawo wonke, uJehova uNkulunkulu. Abaningi bangavuma ukuthi, namuhla, isintu sidinga usizo. Izinto eziningi kangaka seziye zonakala futhi azisabuseki—ukunukubezwa komhlaba, ukwanda kwabantu ngokwedlulele, indlala esakazekile, ukunyuka kwamanani nokwethusayo ukusongela kwempi yenyukliya, yegas noma amagciwane. Ungase ube nomuzwa wokuthi: ‘Ngokuqinisekile, uma uNkulunkulu enokuthile kokukusho esintwini, manje isikhathi esifanelekile ngaye sokukusho!’

Lokhu kuyiqiniso. Kodwa umbuzo kumelwe ubuzwe: Uma uNkulunkulu eye wakhuluma ngempela, ngubani ozolalela? Njengoba umuntu ngokusobala udinga isiqondiso, ingabe uzosamukela uma enikezwa sona?

UNKULUNKULU UYAKHULUMA NGEMPELA

Nokho, okokuqala, cabangela umbuzo othi, Ingabe uNkulunkulu ukhuluma nathi namuhla? Uma engakhulumi, ikusasa lethu likhwantabele. Ngenhlanhla, ubufakazi bubonisa ukuthi uyakhuluma. Kanjani?

Yebo, phela uma enesigijimi esibalulekile ngesintu, yiyiphi indlela eyoba ngcono kakhulu yokusidlulisela? ‘Ngezwi eliphuma ezulwini’ ungase usho njalo. Yiqiniso, lokho kwakungaba indlela elula. Kodwa ingabe yayiyoba ewusizo kangcono?

Umuntu ongumakadebona emsebenzini wobumenenja waphawula: “Lapho nginokwaziswa okubalulekile okufanele ngikusho, angilingi ngikwenze ngezwi lomlomo. Ngaso sonke isikhathi ngibhala phansi. Ngaleyondlela akubibikho ukudideka kamuva.”

Lokhu kunengqondo. Uma uNkulunkulu engakhuluma esezulwini, lokhu ngokungangabazeki kwakuyoba isenzakalo esimangalisayo. Kodwa uma abantu abayizi-1 000 000 bemuzwa ekhuluma, ngokushesha kwakungaba-khona izincazelo eziyizi-1 000 000 zalokho akushilo. Ngakolunye uhlangothi, uma ayengalungiselela ukuba iziyalezo zakhe zibhalwe phansi, kamuva bekungeke kube-khona ukungabaza, ngokuthi isigijimi sakhe sasithini.

Nokho, isigijimi esibhaliwe esivela kuNkulunkulu kwakuyodingeka sibe incwadi ekhetheke kakhulu. Kwakuyofuneka ibe nokuhlakanipha kobuNkulunkulu okusobala, futhi kwakuyodingeka itholakale yonke indawo ukuze wonke umuntu ofuna ukuyifunda ayifunde. Futhi, kwakuyofuneka ikwazi ukunqoba imigoqo eminingi yezilimi zomhlaba.

Ingabe ikhona yini incwadi ethi ivela kuNkulunkulu futhi efeza lezizimo? Yebo, ikhona, futhi iwukuphela kwayo. Lencwadi esakazeke kunazo zonke kuwo wonke umlando, iye yasakazeka ngeziboniselo eziyizigidigidi. Futhi manje itholakala, iphelele noma ingxenye yayo, ngezilimi eziyizi-1 710, ukuze cishe noma yimuphi umuntu ofundile ofuna ukuyifunda afunde okungenani ingxenye yayo ngolimi lwakhe. Iyini leyoncwadi? YiBhayibheli.

INGABE LAPHA UNKULUNKULU NGEMPELA OKHULUMAYO?

Usabela kanjani kulokho kwaziswa? Ingabe unomuzwa wokuthi: ‘Hawu suka, hhayi iBhayibheli! UNkulunkulu angakhuluma kanjani namuhla ngencwadi eyisidala kangaka?’

Phela, yebo, iBhayibheli lidala, ngoba isizwe sabantu naso sidala, futhi uNkulunkulu ubelokhu ekhuluma nesintu isikhathi eside. Kodwa ingabe liyisidala ngempela? Phinde!

Ubungasho yini ukuthi incwadi iyisidala uma iye yabikezela ezinkulungwaneni zeminyaka edlule isimo sabantu namuhla, ukwesaba kwesintu isikhathi esizayo, ingozi yokubhubhisa wonke umhlaba, ngisho nokusongela ngezikhali ekujuleni ezilwandle nasemkhathini ongaphandle? Yebo iBhayibheli liyakwenza lokhu.—Luka 21:25-28; 2 Thim. 3:1-5; IsAm. 6:3-8; 11:18.

Ezinsukwini lapho idivosi nokuwohloka kwemishado kudlangile ingabe ungasho yini ukuthi incwadi iyisidala uma iqukethe lokho okuye kwabonakala kuyiseluleko esiphumelela kunazo zonke eziye zanikezwa ngomshado? Kungase kungabi yiseluleko esithandekayo esizukulwaneni sanamuhla sobu“mina kuqala,” kodwa siyaphumelela. Futhi sibhalwe eBhayibhelini.—Efe. 5:21-23.

Yiqiniso, namuhla kwezinye izindawo kuhlonishwa njengokunengqondo ukubheka iBhayibheli njengeqoqo lezinganekwane nokuhlakanipha kwesizwe esithile. Kodwa ingabe lokhu kusichaza ngempela isizathu sokuba iBhayibheli libe yisimanga eliyiso? Eminyakeni eyizinkulungwane edlule, ngenkathi lihlanganiswa, kwakukhona izincwadi zezinganekwane nokuhlakanipha kwesizwe. Kodwa zakhohlakala kakhulu njengoba isikhathi siqhubeka. Ezinye ziye zatholakala muva nje kuphela ngabavubukuli. Kungani iBhayibheli liye lasinda nakuba zona zingazange?

Phakathi nomlando walo omude iBhayibheli liye lanqoba ukuphikiswa okungavamile kakhulu. Iziboniselo ezingenakubalwa ziye zashiswa. Abantu ngabanye abazama ukuba litholakale kwabanye abantu abavamile bashushiswa baze bafa. Futhi cishe eminyakeni engama-200, liye laba ngaphansi kokuhlaselwa ngenhlakanipho yabacusumbuli abaphakeme, izazi zokuziphendukela kwemvelo nabantu besimanje. Ayikho enye incwadi eye yaphikiswa kanjena. Nokho iBhayibheli liye lanqoba lasinda futhi liyaqhubeka lithonya ukuphila kwezigidigidi zabantu. Ngani, ngoba aliyona nje incwadi yezinganekwane nokuhlakanipha kwesizwe esithile. Ngokuqinisekile liyisigijimi sikaNkulunkulu kithina.

Omunye ongakholelwa ukuthi uNkulunkulu ukhona wathi: “Nganginomuzwa wokuthi kwakungenandaba ukuthi uNkulunkulu ukhona noma akekho njengoba kwakungekho lutho engilubonayo alwenzela isintu.” Khona-ke wabekelwa inselele yokuba afunde iBhayibheli nezinye izincwadi ukuze zimsize azwisise isigijimi salo. Umphumela? “Ngathinteka kakhulu, uma ngisho okuncane nje, ukuthi yonke into . . . yayinengqondo.” Yebo, walalela njengoba uNkulunkulu ekhuluma, futhi akushoyo kunengqondo.

Ngasekupheleni kwekhulu leminyaka ye-19, umfundi weBhayibheli owaziwayo wabhala: “Ngenkathi uColumbus ethola umfula iOrinoco, othile wathi wayethole isiqhingi. Waphendula: ‘Akukho mfula onjengalowo osuka esiqhingini. Leso sikhukhula esinamandla kumelwe ukuba sidonsa amanzi ezwekazi.’ Ngakho-ke ukujula namandla nokuhlakanipha nombono wobufakazi beBhayibheli kusiqinisekisa ukuthi akukho muntu, kodwa uNkulunkulu uMninimandla onke, ongumlobi wamacebo alo nezambulo.”

Sikumemela ukuba uzifundele ngokwakho iBhayibheli. Ake ubone ukuthi awuvumelani yini nokuthi okulapha, ngempela, kuyimicabango kaNkulunkulu ngokwakhe.