INtshumayelo YaseNtabeni

Ngemva kokukhetha abaphostoli abangu-12, uJesu wehlela endaweni okwakuhlangene kuyo abantu abaningi. Laba bantu babevela eGalile, eJudiya, eThire, eSidoni, eSiriya naphesheya kweJordani. Bafika nabantu ababegula nababehlushwa amademoni. UJesu wabelapha bonke. Wabe esehlala phansi waqala ukufundisa. Wachaza ukuthi yini okumele siyenze ukuze sibe abangani bakaNkulunkulu. Wachaza nokuthi kumele siqaphele ukuthi siyamdinga uJehova nokuthi kufanele simthande. Kodwa ngeke sikwazi ukuthanda uNkulunkulu uma singabathandi abanye abantu. Kumele sibe nomusa kubo bonke abantu ngisho nasezitheni zethu.

UJesu wathi: ‘Akwanele ukuthanda abangani bakho kuphela. Kumele uthande nezitha zakho futhi uxolele abantu ngokusuka enhliziyweni. Uma kukhona umuntu omphathe kabi, kufanele usheshe uye kuye uyoxolisa. Kufanele uphathe abanye ngendlela nawe ofuna bakuphathe ngayo.’

UJesu waphinde weluleka abantu mayelana nemali. Wathi: ‘Kubaluleke kakhulu ukuba umngani kaJehova kunokuba nemali eningi. Isigebengu singayintshontsha imali yakho kodwa akekho ongakuphuca ubungani noJehova. Yekani ukukhathazeka ngokuthi nizodlani, nizophuzani noma ukuthi nizogqokani. Bukani izinyoni. UNkulunkulu uhlale ezinika ukudla okwanele. Ukukhathazeka ngeke kunezele ngisho nosuku olulodwa ekuphileni kwakho. Khumbula ukuthi uJehova uyakwazi okudingayo.’

Abantu babengakaze bamuzwe umuntu ofundisa njengoJesu. Abaholi babo benkolo babengakaze babafundise lezi zinto. Yini eyayenza uJesu afundise kahle kangaka? Kungenxa yokuthi yonke into ayeyifundisa yayivela kuJehova.