Khulekelani uJehova Njengomndeni

Njengoba ufundile kule ncwajana, iBhayibheli linezimiso eziningi ezingasiza wena nomndeni wakho. UJehova ufuna ujabule. Uthembisa ukuthi uma ukumkhulekela kuza kuqala ekuphileni kwakho, ‘zonke lezi ezinye izinto uyozenezelelwa.’ (Mathewu 6:33) Ufuna ngempela ukuba ube umngane wakhe. Wasebenzise wonke amathuba okwakha ubungane noNkulunkulu. Buyilungelo elikhulu kunawo wonke umuntu angaba nalo.—Mathewu 22:37, 38.

1 QINISA UBUHLOBO BAKHO NOJEHOVA

OKUSHIWO YIBHAYIBHELI: “‘Ngiyoba uyihlo, nina nibe amadodana namadodakazi kimi,’ kusho uJehova.” (2 Korinte 6:18) UNkulunkulu ufuna ube umngane wakhe omkhulu. Umthandazo ungenye indlela yokukwenza lokho. UJehova ukucela ukuba ‘uthandaze ungaphezi.’ (1 Thesalonika 5:17) Uyalangazelela ukuzwa imicabango yakho ejulile nezinto ezikukhathazayo. (Filipi 4:6) Lapho uthandaza nomndeni wakho, umndeni uzobona ukuthi uNkulunkulu ungokoqobo kangakanani kuwe.

Ngaphandle kokukhuluma noNkulunkulu, kudingeka nokuba umlalele. Lokhu ungakwenza ngokutadisha iZwi lakhe nezincwadi ezisekelwe eBhayibhelini. (IHubo 1:1, 2) Zindla ngalokho okufundayo. (IHubo 77:11, 12) Ukulalela uNkulunkulu kudinga nokuba uye njalo emihlanganweni yamaKristu.—IHubo 122:1-4.

Ukukhuluma nabanye ngoJehova kungenye indlela ebalulekile yokuqinisa ubuhlobo bakho naye. Lapho uqhubeka wenza kanjalo, uyozizwa usondela nakakhulu kuye.—Mathewu 28:19, 20.

ONGAKWENZA:

• Nsuku zonke beka isikhathi sokufunda iBhayibheli nokuthandaza

• Njengomndeni, yenzani izinto ezingokomoya zize kuqala ngaphambi kokuzijabulisa nokuphumula

2 JABULELA UKUKHULEKELA KOMKHAYA

OKUSHIWO YIBHAYIBHELI: “Sondelani kuNkulunkulu, naye uyosondela kini.” (Jakobe 4:8) Kudingeka uhlele isimiso sasikhathi sonke sokukhulekela komkhaya futhi usilandele. (Genesise 18:19) Kudingeka nokwengeziwe kodwa. UNkulunkulu kumelwe abe ingxenye yokuphila kwakho kwansuku zonke. Qinisa ubuhlobo bomndeni wakho noNkulunkulu ngokukhuluma ngaye “lapho uhleli endlini yakho nalapho uhamba endleleni nalapho ulala nalapho uvuka.” (Duteronomi 6:6, 7) Kwenze umgomo wakho ukuba njengoJoshuwa, owathi: “Kepha mina nendlu yami, sizokhonza uJehova.”—Joshuwa 24:15.

ONGAKWENZA:

• Yiba nesimiso sokuqeqesha esingaguquguquki esibhekana nezidingo zelungu ngalinye lomndeni