Ukwelusa Umhlambi KaNkulunkulu Ngobunye
Abanye bayabuza: ‘Lenganyelwa kanjani ibandla loFakazi BakaJehova lomhlaba wonke?’ Siyaphendula: Ilungiselelo lokwengamela lilandela indlela yebandla lobuKristu lekhulu lokuqala.
Ngawo-1870 uCharles T. Russell nabangane bakhe bathatha isinyathelo kuqala sokusakaza ngezinkulumo nangezincwadi lokho ababekutholile ngokutadisha kwabo iBhayibheli. Kulo lonke izwe, labo abakhetha ukuhlanganyela kulomsebenzi babheka uRussell nabangane bakhe abaseduze njengendikimba yamadoda anokuhlangenwe nakho okuningi ekwenzeni umsebenzi weNkosi nababengafuna kuwo iseluleko ngokuphathelene nemisebenzi yabo.
Ngo-1884 iZion’s Watch Tower Tract Society yamiswa ngokomthetho ngaphansi kwemithetho yoMbuso wasePennsylvania. URussell nabangane bakhe abathembekile babehlanganyela ngokuseduze ekuqondiseni leNhlangano kanye nemisebenzi yabaFundi BeBhayibheli. Ngo-1909 indlunkulu yabo bayithuthela eBrooklyn, eNew York. Kuyo yonke leminyaka abaqondisi beWatch Tower Society namanye amadoda ahlanganyela nabo eduze, afanelekayo ngokomoya, agcotshiwe bebekhonza njengendikimba ebusayo yoFakazi BakaJehova.
INdikimba Ebusayo yakhiwa iqembu lamadoda angamaKristu agcotshiwe (ayi-13 ngo-1986), kuhlanganise nayi-7 akhonza njengesigungu sabaqondisi beWatch Tower Society. Lawa engamela imisebenzi yomhlaba wonke yoFakazi BakaJehova. Awaphefumlelwe uNkulunkulu futhi ngalokho awawona angenaphutha, kodwa athembela eZwini likaNkulunkulu elingenaphutha njengegunya eliphakeme emhlabeni, futhi anokuhlangenwe nakho kwesikhathi eside sokuphila kwawo ekuzithobeni entandweni kaNkulunkulu. Ngayinye inerekhodi lokuba senkonzweni yesikhathi esigcwele noFakazi BakaJehova iminyaka engaphezu kwengama-40.
INdikimba Ebusayo iqondisa lokho iNhlangano ekunyathelisayo. Lokho okulotshwayo kusekelwe ekuqapheleni izidingo zomhlambi ezingokomoya futhi kuwumphumela wokutadisha nokucwaninga ngokucophelela nangomthandazo iZwi likaNkulunkulu. Njengoba lamadoda eqhubeka etadisha iBhayibheli futhi eqaphela ukugcwaliseka okuqhubekayo kwezinjongo zikaNkulunkulu, ukugcwaliseka kwesiprofetho ezenzakalweni zezwe, kanye nesimo sabantu bakaNkulunkulu ezweni, ngezinye izikhathi bangase bakuthole kudingekile ukwenza ushintsho olukhanyiselwe ekuqondweni kwezimfundiso ezithile. Ngalendlela, ulwazi lweqiniso lwanda ngisho nangokwengeziwe.—IHubo 97:11; IzAga 4:18; Daniyeli 12:4.
INdikimba Ebusayo iye yamisa iKomiti leGatsha lamadoda amathathu noma angaphezulu afanelekayo ngokomoya kuwo wonke amagatsha angaphezu kwama-90 kuwo wonke umhlaba ukuba iqondise imisebenzi emazweni angaphezu kwangama-200 nasemaqenjini naseziqhingini. Amagatsha axhumana namabandla angaphansi kokuqondisa kwawo. INdikimba Ebusayo namaKomiti amaGatsha axhumana njalo, futhi amalungu eNdikimba Ebusayo awahambela ngokuqondile amagatsha amaningi unyaka ngamunye ukuze ahlale enolwazi ngezimo.
Lamadoda awasiwo amakhosi okholweni lwabanye kodwa ayizikhonzi ezisebenza kanzima ukuze abanye abaningi bafunde ngeZwi likaNkulunkulu. Awakhonzi ngenxa yenzuzo engokwemali, kodwa izidingo zawo zezinto ezibonakalayo zinakekelwa ngendlela efana neyawo wonke amanye amalungu emikhaya yaseBethel. Ubufakazi bokuthi akhonza ngokwethembeka bubonakala entshisekweni, ebunyeni, ezindinganisweni eziphakeme zokuziphatha, nasekwethembekeni ezimfundisweni zeBhayibheli okubonakaliswa oFakazi BakaJehova kuwo wonke umhlaba.—1 Korinte 3:5-9; 4:1, 2; 2 Korinte 1:24; 3:1-3; 1 Petru 5:2, 3.
• Yiliphi ilungiselelo lokwengamela elenziwa?
• Obani abakhonza njengeNdikimba Ebusayo namuhla, futhi iyini imithwalo yabo yemfanelo?
• Umsebenzi uqondiswa kanjani kwamanye amazwe?
[Ibalazwe ekhasini 26]
(Ukuze ubone ukuthi kumi kanjani bheka encwadini)
Izindawo oFakazi BakaJehova abenza kuzo intando kaNkulunkulu
[Izithombe ekhasini 26]
Abongameli bangaphambili beWatch Tower Society
UC. T. Russell, ngo-1884-1916
UJ. F. Rutherford, ngo-1916-1942
UN. H. Knorr, ngo-1942-1977
UF. W. Franz, ngo-1977-1992
[Izithombe ekhasini 27]
Amahhovisi egatsha ambalwa kwangaphezu kwangama-90 umsebenzi woFakazi BakaJehova emhlabeni wonke oqondiswa ngawo
ECanada
EZambia
EJalimane
EJapane
EAustralia
EBrazil