Ingabe Yaklanywa?

**I-lens Ezivuselelayo Yeso Lentulo**

● I-newt, intulo encane yasemanzini, iphawuleka ngekhono layo lokuvuselela izingxenye zomzimba ezinjengezicubu, izitho nomsila wayo. Kodwa ingabe izingxenye ezihlume kabusha zisebenza kahle njengezokuqala? Uma kuziwa kuyi-lens yeso lale ntulo, abacwaningi bathi kunjalo ngempela.

Cabanga ngalokhu: Izintulo zivuselela ama-lens asemehlweni azo ngokuguqula amangqamuzana e-iris abe ngamagqamuzana ama-lens. Ukuze zifunde okwengeziwe ngale nqubo, izazi zezinto eziphilayo ziye zachitha iminyaka engu-16 zihlola izintulo zaseJapane. Lezi zazi, zakhipha ama-lens entulo ngayinye izikhathi ezingu-18. Isikhathi ngasinye, ayehluma kabusha njengokulindelekile.

Ngesikhathi kuphela ucwaningo, lezi zintulo zase zineminyaka engaba ngu-30—okuyiminyaka emihlanu ngaphezu kwenkathi yazo yokuphila evamile uma zisendle. Kodwa, zakwazi ukuvuselela kabusha ama-lens ngokushesha nangezinga ezazikwazi ngalo zisencane. Iyunivesithi yaseDayton e-Ohio, e-U.S.A., ibika ukuthi, ngaphezu kwalokho, ama-lens ahlume kabusha “ayefana ncamashí nalawo ayekhishwe ezintulweni esezikhulile angakaze avuselelwe.” UPanagiotis Tsonis, oyisazi sezinto eziphilayo noyilungu leqembu elalicwaninga lezi zintulo, uyavuma: “Ngamangala impela.” Wathi, i-lens entsha “isebenza kahle” kakhulu.

Ososayensi banethemba lokuthi ikhono lentulo lokuhlumisa kabusha izingxenye zomzimba liyobasiza ukuba baqonde indlela yokuvuselela izicubu kubantu. UTsonis, uthi, “Intulo iwumthombo omuhle kakhulu wokuthola izimpendulo zokuvuselela izingxenye zomzimba ikakhulu uma umuntu esekhulile.”

Ucabangani? Ingabe i-lens ezivuselelayo yeso lentulo yaba khona ngokuziphendukela kwemvelo, noma ingabe yaklanywa?

[Umdwebo ekhasini 25]

(Ukuze ubone ukuthi indaba ihlelwe kanjani, bheka encwadini)

Ama-lens “ahluma kabusha” akhula afane ncamashi nawokuqala

[Imithombo Yesithombe ekhasini 25]