Ungakwenza Kanjani Ukuthula Nabanye?

IBHAYIBHELI lithi ngabantu: “Bonke bonile futhi bayasilela enkazimulweni kaNkulunkulu.” (Roma 3:23) Ngenxa yokuthi bonke abantu abangaphezu kwezigidi eziyizinkulungwane ezingu-7 emhlabeni abaphelele, ukungqubuzana kobuntu akunakugwenywa. Singakwenza kanjani ukuthula ngaphansi kwalezi zimo?

IBhayibheli lisinika iseluleko esihle. Lichaza uMdali ngokuthi ‘unguNkulunkulu wokuthula,’ ogama lakhe linguJehova. (Hebheru 13:20; IHubo 83:18) UNkulunkulu ufuna ukuba izingane zakhe zasemhlabeni zibe nobuhlobo obunokuthula. Kanti yena uyahola kulesi sici. Lapho abantu bokuqala bona kuNkulunkulu, beqeda ubuhlobo obunokuthula, ngokushesha wathatha izinyathelo zokubuyisana nezidalwa zakhe ezingabantu. (2 Korinte 5:19) Cabangela izinto ezintathu ongazenza ukuze wenze ukuthula nabanye.

Thethelela Ngokukhululekile

Lithini iBhayibheli? “Qhubekani nibekezelelana futhi nithethelelana ngokukhululekile uma umuntu enesizathu sokukhononda ngomunye. Njengoba nje uJehova anithethelela ngokukhululekile, yenzani kanjalo nani.”—Kolose 3:13.

Iyini inselele? Mhlawumbe ‘unesizathu’ esizwakalayo “sokukhononda” futhi unomuzwa wokuthi kuyafaneleka ukuba ubuqede ubuhlobo nomuntu okonile. Ungase ucabange nokuthi okonile uyena okufanele axolise kuqala. Kodwa uma engazi ukuthi ukonile, noma ekholelwa ukuthi uwena omonile, cishe ingxabano ngeke ixazululeke.

Yini ongayenza? Lalela iseluleko seBhayibheli ngokumthethelela ngokukhululekile okonile, ikakhulu uma kuyinto ewubala. Khumbula, ukube uNkulunkulu ubesibalela amaphutha ethu, besingeke sime phambi kwakhe. (IHubo 130:3) IBhayibheli lithi “uJehova unesihe futhi unomusa, uyephuza ukuthukuthela futhi uchichima umusa wothando. Ngoba yena uyakwazi ukwakheka kwethu, ekhumbula ukuthi siluthuli.”—IHubo 103:8, 14.

Cabangela nalesi saga seBhayibheli: “Ukuqondisisa komuntu ngokuqinisekile kubambezela intukuthelo yakhe, futhi kungubuhle kuye ukweqa isiphambeko.” (IzAga 19:11) Ukuqondisisa kuyasisiza sikwazi ukubona okungalé kwalokho esikubonayo, siqonde ukuthi kungani abantu benza noma bekhuluma ngendlela ethile. Ngakho zibuze, ‘Ingabe lo muntu ongonile ubekhathele, egula noma ecindezelekile?’ Ukuqonda izisusa zangempela zabanye, imizwa yabo nezimo zabo, kungase kuyidambise intukuthelo yakho futhi kukusize ubabonelele.

Khuluma Ngakho

Lithini iBhayibheli? “Uma umfowenu ona, hamba uyomambulela iphutha lakhe phakathi kwakho naye ninodwa. Uma ekulalela, uyobe umzuzile umfowenu.”—Mathewu 18:15.

Iyini inselele? Imizwa engakhi enjengokwesaba, intukuthelo namahloni ingase ikuvimbe ungayi kumuntu okonile ukuze nilungise inkinga. Ungase ulingeke nokuba le nkinga uyixoxele abanye abazozwelana nawe, kanti lokho kungayenza ibe nkulu futhi ishube nakakhulu ingxabano.

Yini ongayenza? Uma inkinga inkulu futhi unomuzwa wokuthi awukwazi ukuyishalazela, iya kulowo muntu nixoxe ngayo. Zama ukusingatha lolo daba ngale ndlela:

(1) Kwenze ngokushesha: Musa ukuzindela. Uma uzindela, inkinga ingase ibe yimbi nakakhulu. Zama ukusebenzisa iseluleko sikaJesu, esithi: “Uma uletha isipho sakho e-altare bese ukhumbula lapho ukuthi umfowenu unokuthile ngawe, shiya isipho sakho lapho phambi kwe-altare, uhambe; okokuqala yenza ukuthula nomfowenu, khona-ke, lapho usubuyile, unikele isipho sakho.”—Mathewu 5:23, 24.

(2) Kwenze ngasese: Gwema isilingo sokuhleba nabanye ngenkinga. “Mela udaba lwakho kanye nomuntu wakini, futhi ungayembuli imfihlo yomunye umuntu.”—IzAga 25:9.

(3) Kwenze ngokuthula: Gwema umkhuba wokulokhu unokondisa ukuthi ubani owenze iphutha nongalenzanga. Umgomo wakho ukwenza ukuthula, hhayi ukunqoba impikiswano. Zama ukusebenzisa igama elithi “ngi-” esikhundleni selithi “wena.” Ukutshela umuntu ukuthi “ngiphatheke kabi ngoba . . . ” kungaba nemiphumela engcono kunokuthi: “Wena ungiphathe kabi!” IBhayibheli lithi: “Masiphishekele izinto ezibangela ukuthula nezinto ezakhayo komunye nomunye.”—Roma 14:19.

Bekezela

Lithini iBhayibheli? “Ningabuyiseli muntu okubi ngokubi. . . . Kodwa, ‘uma isitha sakho silambile, siphe ukudla; uma somile, sinike okokuphuza.’”—Roma 12:17, 20.

Iyini inselele? Uma imizamo yakho yokuqala yokwenza ukuthula ingaphumeleli, ungase ulingeke ukuba udikile.

Yini ongayenza? Bekezela. Isimo sengqondo sabantu kanye nezinga labo lokuvuthwa akufani. Abanye kubathatha isikhathi eside ukwehlisa umoya; abanye basafunda ukubonisa izimfanelo zikaNkulunkulu. Qhubeka ubabonisa umusa nothando. “Ungazivumeli ukuba unqotshwe okubi, kodwa qhubeka unqoba okubi ngokuhle,” kusho iBhayibheli.—Roma 12:21.

Ukuze senze ukuthula nabanye, kudingeka sisebenzele ekuboniseni ukuthobeka, ukuqondisisa, ukubekezela nothando. Ubuhlobo obunokuthula buyakufanelekela ukuba senze kanjalo!

INGABE WAKE WAZIBUZA?

● Yini eyokusiza ukuze uthethelele ngokukhululekile?—Kolose 3:13.

● Yini engakusiza ukuze ukwazi ukuya kumuntu okonile nixazulule inkinga?—Mathewu 5:23, 24.

● Yini ongayenza uma imizamo yakho yokwenza ukuthula ingaphumeleli?—Roma 12:17-21.

[Amazwi acashunwe esihlokweni ekhasini 11]

“Ukuqondisisa komuntu ngokuqinisekile kubambezela intukuthelo yakhe, futhi kungubuhle kuye ukweqa isiphambeko.”—IZAGA 19:11