Intsha Iyabuza
Ngingayifinyelela kanjani imigomo yami?
KULOKHU okulandelayo ikuphi ongathanda ukuba nakho?
● Ukuzethemba kakhudlwana
● Abangane abengeziwe
● Injabulo enkudlwana
Empeleni, ungaba nakho konke kokuthathu! Kanjani? Ngokuzibekela imigomo bese uyifinyelela. Cabangela okulandelayo.
Ukuzethemba kakhudlwana Uma uzibekela imigomo emincane bese uyifinyelela, uyoba nokuzethemba okukhudlwana kokuzibekela imigomo emikhulu. Uyozethemba nakakhudlwana futhi uma ubhekene nezinselele zansuku zonke—njengokumelana nokucindezela kontanga. Kanti, cishe abanye bayokuqaphela ukuzethemba kwakho futhi bakuhloniphe ngenxa yalokho. Abanye bangase bayeke ukukucindezela kakhulu. Empeleni, bangase baqale ngisho nokukuthanda.—Qhathanisa noMathewu 5:14-16.
Abangane abengeziwe Abantu bayakujabulela ukuba nabantu abazibekela imigomo—abantu abaziyo ukuthi bafunani futhi abazimisele ukukusebenzela. Uma abantu bekhangwa nguwe ngenxa yemigomo yakho, bavame ukuba abasekeli obadingayo ukuze ufinyelele leyo migomo.—UmShumayeli 4:9, 10.
Injabulo enkudlwana Ake sibhekane neqiniso: Akukho okujabulisayo ngokuba nesithukuthezi noma ukulinda ukuba kwenzeke okuthile ekuphileni kwakho. Ngakolunye uhlangothi, uma uzibekela imigomo bese uyifinyelela, uzizwa uneqholo. Yingakho umphostoli uPawulu, umKristu wekhulu lokuqala, ake wathi: “Angigijimi ngingenawo umgomo.” (1 Korinte 9:26, Contemporary English Version) Khumbula, uma umgomo wakho umkhulu, uyozizwa uneqholo nakakhulu lapho uwufinyelela!
Usukulungele ukuqala? Sika iphepha elingakwesokudla ulisonge, bese ulandela lezi zinyathelo ezibaliwe.a
Izihloko ezengeziwe eziwuchungechunge ezithi “Intsha Iyabuza” zingatholakala engosini ye-Internet ethi www.watchtower.org/ype
[Umbhalo waphansi]
a Lokhu kusikisela kuhloselwe imigomo ongayifinyelela phakathi namasonto noma izinyanga ezimbalwa, kodwa lezi zimiso ziyasebenza nasemigomweni emikhulu.
OKUDINGA UKUCATSHANGELWA
● Ingabe umuntu angazibekela imigomo eminingi kakhulu ngesikhathi esisodwa?—Filipi 1:10.
● Ingabe ukuzibekela imigomo kusho ukuhlela umzuzu nomzuzu wokuphila kwakho?—Filipi 4:5.
[Ibhokisi/Izithombe ekhasini 25, 26]
Indlela yokufinyelela imigomo yakho
YICHAZE IzAga 4:25, 26. 1
“Ungesabi ukuzibekela imigomo emikhulu. Uma abanye bake bayifinyelela ngaphambili, nawe ungayifinyelela.”—URoben.
1. Cabanga ngemigomo ongazibekela yona. Kujabulele ukuthatha lesi sinyathelo! Ungacusumbuli; mane ubhale phansi izinto eziningi ngangokunokwenzeka ozicabangayo. Hlola ukuthi ngeke yini ukwazi ukubhala izinto okungenani eziyishumi noma ezingu-20.
2. Hlaziya imibono yakho. Imiphi ebonakala kujabulisa ukuyiphishekela? Imiphi eyinselele kakhulu? Imiphi obungaba neqholo kakhulu uma uyifinyelela? Khumbula, imigomo engcono kakhulu yileyo ebalulekile kuwe.
3. Hlela ukuthi yimiphi eza kuqala. Qala ngokukhetha imigomo ethile yesikhathi esifushane ongayifinyelela ngezinsuku ezimbalwa. Ngokulandelayo, khetha imigomo yesikhathi eside (efinyeleleka ngemva kwamasonto athile noma izinyanga). Bhala izinombolo emigomweni yakho ngokulandelana kwesikhathi ongathanda ukuyifinyelela ngaso.
Izibonelo Zemigomo
Ubungane Ukuzakhela umngane oyedwa ongeyena untanga yami. Ukuvuselela ubungane obudala.
Impilo Ukuzivocavoca imizuzu engu-90 isonto ngalinye. Ukulala okungenani amahora angu-8 njalo ebusuku.
Isikole Ukuthuthukisa amamaki ami ezibalo. Ukumelela ukulunga uma ngicindezelwa ukuba ngikopele ngesikhathi sezivivinyo.
Ingokomoya Ukufunda iBhayibheli imizuzu engu-15 usuku ngalunye. Ukutshela engifunda naye ngezinkolelo zami kuleli sonto.
Hlela IzAga 21:5 2
“Kuhle ukuba nemigomo, kodwa udinga nohlelo lokuyifinyelela. Ngalé kwalokho, kuyohlale kuyimigomo engafinyeleleki.”—UDerrick.
Emgomweni ngamunye owukhethile, yenza okulandelayo:
1. Ubhale phansi umgomo wakho.
2. Zibekele isikhathi sokuwufinyelela. Phela, umgomo onganqunyelwe isikhathi uyiphupho nje!
3. Hlela izinyathelo ezihilelekile.
4. Lindela izithiyo. Yibe usucabanga ukuthi uzozinqoba kanjani.
5. Zibophezele kulowo mgomo. Zibophezele ekutheni uyokwenza konke okusemandleni ukuze uwufinyelele lo mgomo. Yibe ususayina ubhale nosuku.
Ngizofunda iSpanishi ukuze ngithathe uhambo oluya eMexico July 1
Izinyathelo
1. Ngizothola incwadi enezinkulumo zalolo limi.
2. Ngizofunda amagama amasha ayishumi isonto ngalinye.
3. Ngizolalela uma abanye abantu bekhuluma iSpanishi.
4. Ngizocela othile alalele indlela engikhuluma ngayo nendlela engiphimisela ngayo amagama.
Okungase kube yizithiyo
Akekho umuntu okhuluma iSpanishi eduze
Indlela engingazinqoba ngayo
Ngizothola izinto eziqoshiwe zeSpanishi engosini ethi www.jw.org.
․․․․․ ․․․․․
Isignesha Usuku
Thatha Isinyathelo! Johane 13:17 3
“Kulula ukuphazamiseka bese ukhohlwa imigomo yakho, ngakho kufanele ugxile kuyo futhi uzikhandle ukuze uyifinyelele.”—U-Erika.
Qala ngokushesha. Zibuze, ‘Yini engingayenza namuhla ukuze ngifinyelele umgomo wami?’ Kuyiqiniso ukuthi ungase ungabi nayo yonke imininingwane, kodwa ungakuvumeli lokho kukuvimbe ungaqali. Njengoba iBhayibheli lisho, “uma ulinda kuze kube yilapho umoya nesimo sezulu kukuhle, ngeke utshale lutho futhi ngeke uvune lutho.” (UmShumayeli 11:4, Today’s English Version) Thola okuthile ongakwenza namuhla—ngisho noma kukuncane—futhi ukwenze.
Hlaziya imigomo yakho nsuku zonke. Zikhumbuze ukuthi kungani umgomo ngamunye ubalulekile kuwe. Landelela intuthuko osuyenzile ngokufaka u-✔ (noma usuku oqede ngalo) eceleni kwesinyathelo ngasinye osusifinyelele.
Vumelana nezimo. Kungakhathaliseki ukuthi imigomo yakho mihle kangakanani, kungase kudingeke ukuba uyishintshe njengoba uqhubeka. Lokho kuyinto enhle. Ungakhathazeki ngokunamathela ngokweqile ohlelweni. Mane uqhubeke uthuthukele ekufinyeleleni umgomo wokugcina.
Sebenzisa isithombe ozakhele sona engqondweni. “Hambela phambili” uzibone ngeso lengqondo usuwufinyelele umgomo wakho. Yizwa umuzwa wokwaneliseka. Ngokulandelayo, “hlehla” ubone isinyathelo ngasinye ngeso lengqondo. Ekugcineni, “dlala” leso sithombe. Zibone uqeda isinyathelo ngasinye, ubone indlela ozojabula ngayo lapho usuwufinyelele umgomo wakho. Usungaqala-ke manje!
[Isithombe]
Imigomo injengepulani—kudinga ukuzikhandla ukuze ibe yinto engokoqobo!
[Ibhokisi/Izithombe ekhasini 25]
LOKHO OKUSHIWO ONTANGA YAKHO
“Kulula ukudumala uma kungenalutho ogxile kulo noma obheke phambili kulo. Kodwa uma uzibekela imigomo futhi uyifinyelele, uyajabula.”—UReed.
“Ungazigxeki uma ungayifinyeleli ngokuphelele imigomo yakho noma ngesikhathi obuzibekele sona. Ukuba nalowo muzwa ngeke kukusize. Mane uqhubeke uzama!”—UCori.
“Xoxa nabantu asebeyifinyelele kakade imigomo ozibekele yona. Bangakukhuthaza futhi bakunikeze ukusikisela okusebenzisekayo. Tshela nabakini ngemigomo yakho ukuze bakwazi ukukusekela.”—UJulia.
[Umdwebo ekhasini 24]
(Ukuze ubone ukuthi indaba ihlelwe kanjani, bheka encwadini)
Sika Lapha
Songa Lapha