Ukubuka Okwezwe

“Imali eyachithwa kwezempi emhlabeni wonke ngo-2008 ilinganiselwa [ezigidini zamaRandi eziyizinkulungwane ezingu-11 092]. Lokhu kuwukwanda . . . okungamaphesenti angu-45 kusukela ngo-1999.”—I-STOCKHOLM INTERNATIONAL PEACE RESEARCH INSTITUTE, ESWEDEN.

“Ngokusho kwe-Google, kunezigidigidi ezimbalwa zezingosi ezinezelwa [kuyi-Internet] usuku ngalunye.”—I-NEW SCIENTIST, EBRITHANI.

“Kulinganiselwa ukuthi inani lababulawa yindlala emhlabeni wonke laqopha umlando ngo-2009 njengoba kwakunabantu abayizigidi ezingu-1 020 ababulawa yindlala nsuku zonke.”—I-FOOD AND AGRICULTURE ORGANIZATION YEZIZWE EZIHLANGENE, E-ITALY.

Ikamela Lokuqala Elinezakhi Zofuzo Zokwenziwa

Kusukela ngo-1996, lapho abacwaningi benza imvu yokuqala enezakhi zofuzo zokwenziwa, kuye kwenziwa ezinye izilwane eziningana—kuhlanganise izinkomo, izimbuzi namahhashi—kusetshenziswa inqubo efanayo. Manje ososayensi basesikhungweni sokucwaninga ngezilwane eDubai sebenze ikamela lokuqala elinezakhi zofuzo zokwenziwa. Leli nkonyane eliyinsikazi lethiwa ngo-Injaz, okuyigama lesi-Arabhu elisho “impumelelo.” Iphephandaba lase-Abu Dhabi i-National lithi: “Ukwenziwa kwezilwane ezinezakhi zofuzo zokwenziwa . . . akuseyona nje into evivinywayo kuphela. Esikhathini esizayo, lolu hlelo luzohlola amathuba okusebenzisa izakhi zofuzo zokwenziwa ekukhiqizeni izakhi zamakamela ayintandokazi kwezemijaho nasekukhiqizeni ubisi.”

“Ukungqubuzana” Kweziphuphutheki

I-Science News ibika ukuthi “imizila esemkhathini ngaphezu koMhlaba sekuyiminyaka iminyene, kodwa ngo-February [2009] kwakungokokuqala ngqá ukuba iziphuphutheki zingqubuzane.” Ebangeni elingaba amakhilomitha angu-800 ngaphezu kweSiberia, isiphuphutheki saseMelika sezokuxhumana esasisebenza sangqubuzana nesiphuphutheki sezempi saseRussia esasingasasebenzi. Le ngozi yadala izicucu zezinsimbi ezinkulu ezingaba ngu-700. Uma izicucu zezinsimbi zanda emkhathini, ayanda namathuba okuba kube nenye ingozi. Njangamanje iziteshi zokuthungatha izinto zilinganisela ukuthi kunezicucu ezingaba ngu-18 000 zemfucumfucu esemkhathini enobukhulu obungaphezu kwamasentimitha ayishumi. Kodwa-ke, ukungqubuzana nanoma yini enkulu kunophizi, ehamba ngesivinini sasemkhathini, kungaba inhlekelele eziphuphuthekini noma nakumikhumbi-mkhathi ethwala abantu.

Imishini Eyenza Izimoto Zingadumi

“Bambalwa abantu abangabakhokheli omakhalekhukhwini babo, ngoba bayazi ukuthi ucingo luzoyeka ukusebenza uma bengakhokhi,” kubika i-Wall Street Journal. Manje sekusetshenziswa isimiso esifanayo nasezimotweni. Leli phephandaba lithi: “Abadayisi bezimoto ezingamasekeni bafaka imishini eyenza izimoto zingadumi uma umthengi esilela ekukhokheleni imoto.” Le mishini—efakwe esimisweni sokudumisa imoto—iyingxenye yemibandela yokutshelekwa imali kwamakhasimende anesikweleti futhi ingakhishwa uma umuntu eseyikhokhile imali ayikweletayo. Kodwa leli phephandaba lithi akuvamile ukuba le mishini yenze izimoto zingadumi. Kunalokho, ukubaniza kwezibani zemoto nemisindo eyisixwayiso kuyaphumelela “ekukhuthazeni amakhasimende ukuba akhokhe ngesikhathi.”