‘Ukunqoba Ukuthambekela Kobugovu’
● IGIBRALTAR, esesiqongweni seningizimu eNhlonhlweni ye-Iberian, iye yabhekana nokuvinjezelwa nokuhlaselwa kaningi phakathi nomlando wayo onezinxushunxushu. Kodwa ngenye impelasonto ngo-October 2008, leli dolobha labona “ukuhlasela” okunokuthula kwabantu baseSpain ababecishe babe ngu-1 000. Babezokwakha iHholo LoMbuso elalizoba indawo yokuhlangana yamabandla amabili oFakazi BakaJehova eGibraltar.
Ungqongqoshe omkhulu kahulumeni watshela i-Phaphama! ukuthi iGibraltar yamukele izinkulungwane ezizosebenza kulesi sakhiwo. Wathi “zizobamba iqhaza ekuthuthukiseni umphakathi.” Waphawula ukuthi “oFakazi BakaJehova bahamba phambili ngokuletha abantu abaningi kangaka eGibraltar bezosebenza esakhiweni esisodwa futhi ngokuzithandela.”
Izikhulu zendawo zawusekela zisuka nje lo msebenzi futhi ngomusa zanikeza oFakazi isiza esifanelekayo ukuze kwakhiwe le ndawo yokukhulekela. Yini eyashukumisa lezi zikhulu ukuba zibe nomusa ongaka?
Ungqongqoshe omkhulu wachaza: “Ukwesaba uNkulunkulu isici esihle kunoma yimuphi umphakathi. Zonke izinkolo zinelungelo elingokomthetho lenkululeko yokukhulekela, ngakho uhulumeni unesibopho sokungathathi hlangothi kunoma iziphi izinto ezingokwenkolo. Ngaphezu kwalokho, ukunikeza oFakazi indawo efanelekayo yokwakha indawo yokukhulekela kuzoba usizo olukhulu emphakathini.”
Wenezela: “Sidinga ukunqoba ukuthambekela okuvamile kokuba nobugovu. Iqembu lenu lamavolontiya elikhuthele libonisile ukuthi kungenzeka.”
Naphezu kwesiphepho esabambezela ukuqala komsebenzi, iHholo LoMbuso lase liqediwe ngoMsombuluko, okwakuwusuku lwesithathu lokwakha. USecundino Nogal, owayeqondisa umsebenzi wachaza: “Amavolontiya amaningi ngokuzithandela acela ukuhlala eGibraltar olunye usuku ukuze aqedele umsebenzi. Sikujwayele ukubhekana nezinkinga. Indlela yethu yokwakha ifuna uzivumelanise nezimo. Ngaphezu kwalokho, idinga singazicabangeli ngokweqile futhi yilokho okusilethela ukwaneliseka okungaka.”a
[Umbhalo waphansi]
a I-Gibraltar Chronicle, iphepha lendawo yabika: “Ngempelasonto eyayinesimo sezulu esibi esasicekela phansi izinto, oFakazi BakaJehova baseGibraltar. . . baqeda ukwakha ithempeli [iHholo LoMbuso] ngosizo lwebutho lamavolontiya ngemva nje kwezinsuku ezintathu.”