Izibonelo Zemikhaya Ephumelele Ingxenye Yesibili

Njengoba kubonisiwe esihlokweni esithi “Izibonelo Zemikhaya Ephumelele—Ingxenye Yokuqala,” izimiso zeBhayibheli zingaba isisekelo esiqinile emikhayeni ngezikhathi ezinzima.a Kulabo abaphila ngezindinganiso zakhe, uJehova uNkulunkulu uyathembisa: “Ngizokwenza ube nokuqondisisa ngikufundise indlela okufanele uhambe ngayo. Ngiyonika iseluleko iso lami likubhekile.”—IHubo 32:8.

Ukubhekana nezinkinga zezimali. Izindaba eziphathelene nemali ngokuvamile ziwumthombo wezingxabano ezinkulu emshadweni. Kodwa izimiso zeBhayibheli zingayisiza imikhaya ukuba ibe nombono ofanele ezindabeni zezimali. UJesu wathi: “Yekani ukukhathazeka ngemiphefumulo yenu ngokuqondene nokuthi niyodlani noma niyophuzani, noma ngemizimba yenu ngokuqondene nokuthi niyogqokani. . . . UYihlo wasezulwini uyazi ukuthi niyazidinga zonke lezi zinto.”—Mathewu 6:25, 32.

Ekhasini 23, u-Issachar wase-United States, ulandisa indlela yena nomkhaya wakhe ababhekana ngayo nezinkinga ezingokwezimali ngemva kokuba umuzi wabo ubhujiswe iSiphepho uKatrina.

Lapho ukugula kuhlasela ilungu lomkhaya. Bonke abantu bayagula. Ngokuvamile, kuba yinto yesikhashana bese beyalulama. Kodwa kuthiwani uma ilungu lomkhaya liba nesifo esingelapheki? IBhayibheli lithi uJehova angabasekela labo abagulayo. (IHubo 41:1-3) Umkhaya ungaba kanjani usizo oluvela kuJehova?

Ekhasini 24, uHajime waseJapane, ulandisa indlela yena namadodakazi akhe ababambisane ngayo ekusizeni umkakhe uNoriko, ngemva kokuba kutholakale ukuthi unesifo esibi.

Lapho kushona ingane. Ukushona kwengane kuphakathi kwezinhlekelele ezinkulu kakhulu umkhaya ongabhekana nazo. UJehova uthembisa ukusula izinyembezi zosizi ezibangelwa ukulahlekelwa okunjalo. (IsAmbulo 21:1-4) Ngisho kwamanje, linikeza induduzo kwabashonelwe.—IHubo 147:3.

Ekhasini 25, uFernando noDilma e-United States, balandisa indlela iBhayibheli elabaqinisa ngayo lapho beshonelwe usana lwabo lwentombazane.

IBhayibheli linganika imikhaya enezinkinga isiqondiso esinokwethenjelwa, njengoba ukulandisa okusemakhasini alandelayo kubonisa.

[Umbhalo waphansi]

[Ibhokisi/Izithombe ekhasini 23]

Ukubhekana Nezinkinga Zezimali

Njengoba ilandisa ngu-Issachar Nichols, e-United States

“ISiphepho uKatrina sabhubhisa umuzi wethu, kwasala isisekelo sawo esakhiwe ngosimende. Kwaphela inyanga nesigamu isikole engangifundisa kuso sigcwele amanzi.”

PHAKATHI nehlobo lango-2005, mina nomkami uMichelle, noSydney indodakazi yethu eneminyaka emibili, sasihlala eBay St. Louis eMississippi, e-U.S.A. NjengoFakazi BakaJehova, mina noMichelle sasinomgomo wokuhlanganyela kokugcwele ngangokunokwenzeka enkonzweni yobuKristu. Ngangiwuthisha esikoleni sokufundela umsebenzi futhi sasiseduze neNew Orleans eLouisiana. Isimiso sami sasingivumela ukusebenza izinsuku ezintathu ngesonto bese isikhathi esiningi esisele ngisichitha ekufundiseni abanye ngeBhayibheli. Sasinelisekile ngesimiso sethu. Kwabe sekubikwa ukuthi kwakungase kugadle iSiphepho uKatrina. Sahlela ukuphuma ngokushesha.

Ngemva kwesiphepho, umuzi wethu eBay St. Louis wakhukhuleka ngokufanayo nesikole engangifundisa kuso eNew Orleans. Imali yomshuwalense kanye nekahulumeni yasisiza ukuba sithole enye indawo yokuhlala, kodwa kwaba nzima ukuthola indlela eqondile yokuziphilisa. Ngaphezu kwalokho, umkami waguliswa amanzi anegciwane. Isimiso sakhe somzimba sokuzivikela saba buthaka ngemva kwalokho wangenwa igciwane laseNtshonalanga YeNayile alithola ngokulunywa umiyane. Ngaso leso sikhathi, izindleko zomshuwalense nezokuphila zenyuka.

Ukuze sizivumelanise nezimo ezintsha, safunda ukonga ngisho nasezintweni eziyisidingo. Kwadingeka ukuba ngingabe ngisakhetha nokuthi ngithatha muphi umsebenzi.

Mangisho ukuthi ukulahlekelwa izinto zethu kwakungelula kithi. Kodwa sibonga ukuthi siyaphila. Konke lokhu kwagcizelela iqiniso lokuthi izinto ezibonakalayo azibalulekile kakhulu. Eqinisweni, sakhumbula amazwi kaJesu athi: “Ngisho nalapho umuntu enensada ukuphila kwakhe akuveli ezintweni anazo.”—Luka 12:15.

Saqaphela nokuthi kungakhathaliseki ukuthi sasizizwa kabuhlungu kangakanani ngokulahlekelwa kwethu, babebaningi ababelahlekelwe kakhulu kunathi—abanye ngisho nawukuphila kwabo. Lokho kungesinye sezizathu esenza ukuba ngibe matasa emsebenzini wokusiza ngokushesha nje ngemva kwenhlekelele, ngiduduza ababelahlekelwe.

Kubo bonke lobu bunzima, iHubo102:17 libe induduzo ngokukhethekile kithi. Libonisa ukuthi uJehova uNkulunkulu “uyophendukela emthandazweni walabo abaphundlwe konke, angawudeleli umthandazo wabo.” Sikuzwile ukusekela kwakhe njengomkhaya!

[Ibhokisi ekhasini 23]

Ngemva kokugadla kweZiphepho uKatrina noRita e-U.S. Gulf Coast ngo-2005, ngokushesha oFakazi BakaJehova bamisa izikhungo zosizo ezingu-13, izindawo zokubeka impahla ezingu-9 namadepho kaphethiloli amane. Kwatheleka amavolontiya angoFakazi angu-17 000 esuka e-United States nakwamanye amazwe angu-13 ezosiza. Alungisa izinkulungwane zemizi.

[Ibhokisi/Izithombe ekhasini 24]

Lapho Ukugula Kuhlasela Ilungu Lomkhaya

Njengoba ilandiswa nguHajime Ito, eJapane

“Sasikuthanda ukupheka ndawonye—kwaze kwaba yilapho uNoriko ehlatshwa ukugula. Manje akasakwazi ukudla noma ukuphuza ngisho nokukhuluma. Usephila ngokuhlala esihlalweni sabakhubazekile futhi uphefumula ngomshini.”

NGO-MAY 2006, umkami uNoriko, waqala ukuba nenkinga yokukhuluma. Ngehlobo lalowo nyaka waqala ukuba nenkinga lapho edla noma ephuza. Ngo-September kwatholakala ukuthi unesifo okuthiwa i-amyotrophic lateral sclerosis (ALS)—isifo esiqhubeka siwohloza umzimba futhi esihlasela amangqamuzana ezinzwa asebuchosheni nomgogodla. Ngemva kwezinyanga ezine nje, ukuphila kwethu kwashintsha ngokuphelele. Lokhu kwakuyisiqalo sezinkinga.

Ngokuhamba kwesikhathi, ulimi lwakhe lwakhubazeka kanye nesandla sakhe sokudla. Inqubo yokuhlinzwa ebizwa ngokuthi i-gastrostomy yamsiza wakwazi ukudla ngepayipi, waxhunywa nepayipi elingena kuqhoqhoqho ukuze akwazi ukuphefumula, okwamenza wangabe esakwazi ukukhuluma. Ngihluleka ngisho nokuchaza ukuthi lokhu kwamzwisa ubuhlungu obunjani uNoriko, ngoba wayekade eyingqabavu. SingoFakazi BakaJehova, futhi uNoriko namadodakazi ami bebelokhu besebenzisa sonke isikhathi sabo enkonzweni yobuKristu. Manje uNoriko usethembele emshinini wokuphefumula, futhi uhlala esembhedeni.

Noma kunjalo, lokhu akumvimbi uNoriko! Ngokwesibonelo, uyaya emihlanganweni yobuKristu ngesihlalo sabakhubazekile, esinomshini wokuphefumula. Akasezwa ezindlebeni, ngakho indodakazi yami imbhalela amaphuzu ngamagama amakhulu phakathi nomhlangano ukuze azuze esimisweni. Nakuba uNoriko engasakwazi ukuqhubeka njengesikhonzi sesikhathi esigcwele, usababhalela izincwadi abantu, abafundise ngesigijimi sethemba esiseBhayibhelini ngokusebenzisa ubuchwepheshe obuthile obufakwe kuyi-computer yethu.—2 Petru 3:13; IsAmbulo 21:1-4.

Siye sabambisana njengomkhaya ekumsizeni. Womabili amadodakazi ami athola umsebenzi omusha ukuze akwazi ukusiza ngokwengeziwe ekhaya. Sobathathu siyashintshana ngokwenza imisebenzi eminingi yansuku zonke eyayenziwa uNoriko.

Ngezinye izikhathi lapho ngivuka ekuseni ngimbuka, uyaye abonakale ekhathele. Ngike ngifise sengathi ngingamtshela ukuthi, ‘Ungazikhandli namuhla.’ Kodwa ufuna ukutshela abanye ngesigijimi seBhayibheli. Lapho ngiqala ukumvulela i-computer, amehlo akhe agcwala injabulo! Lapho ebhala, isimo sakhe siba ngcono. Ngiye ngayibona inzuzo ‘yokuba nokuningi kokukwenza emsebenzini weNkosi.’—1 Korinte 15:58.

Okuhlangenwe nakho kukaJason Stuart, ophethwe yi-ALS okukumagazini i-Phaphama! ka-January 2006, kumsize kakhulu uNoriko ukuba angadumali kakhulu. Empeleni, lapho izisebenzi zasesibhedlela zimbuza ukuthi kungani ayenesimo sengqondo esihle kangaka, uNoriko wazitshela ngalesi sihloko, futhi wazinikeza amakhophi aso. Umkami kuye kwamqinisa ukufundisa abanye ngokholo lwakhe.

Sekuphele iminyaka engu-30 mina noNoriko sishadile, phakathi nale minyaka emithathu edlule, ngiye ngazisa izinto ezithile ngaye ebengizithatha kalula ngaphambili. Ngiyajabula ukuthi ngashada naye!

[Ibhokisi/Izithombe ekhasini 25]

Lapho Kushona Ingane

Njengoba ilandiswa nguFernando noDilma Freitas, e-United States

“Ubuhlungu bokushonelwa ingane buyinto engachazeki. Abukho ubuhlungu obudlula lobo.”

INDODAKAZI yethu, esayiqamba ngokuthi uPrecious, yashona ngo-April 16, 2006. Yayinezinsuku eziyishumi nje kuphela izelwe. Lapho nginezinyanga ezintathu ngikhulelwe, kwatholakala ukuthi ingane yethu engakazalwa inenkinga engathi sina ehlobene nenhliziyo. Njengoba isikhathi sokuba ngibelethe sasisondela, kwabonakala ukuthi yayizoshona ngokushesha ngemva kokuzalwa—uma yayiyophila ize izalwe. Lokhu kwaba nzima kakhulu ukukwamukela. Sasinezingane ezintathu eziphile kahle. Kwakunzima ukukholwa ukuthi ingane yethu ingase ishone.

Ngemva kokuzalwa kukaPrecious, udokotela onguchwepheshe wezinkinga zezakhi zofuzo wathi unesifo esingavamile esibizwa ngokuthi i-Trisomy 18, esiphatha ingane eyodwa kwezingu-5 000. Kwakhanya ukuthi ngeke aphile isikhathi eside. Sazizwa singelusizo lwalutho ngoba akukho esasingakwenza. Into eyodwa nje esasingayenza kwakuwukuba naye phakathi naleso sikhashana esifushane ayezosiphila. Yilokho kanye esakwenza.

Siyajabula kakhulu ngezinsuku eziyishumi esazichitha noPrecious. Phakathi naleso sikhathi thina namadodakazi ethu amathathu sasondelana naye. Samgona, sakhuluma naye, samanga futhi sathatha izithombe eziningi ngangokunokwenzeka. Sasize sikhulume nangokuthi ufana nobani kakhulu phakathi kwethu. Lo chwepheshe owayehlonze isifo esasiphethe uPrecious wayesivakashela njalo esibhedlela. Wayekhala kanye nathi asitshele ukuthi udabuka kanjani. Waze wadweba isithombe sikaPrecious ngenkathi esakhuluma nathi ngaye ukuze amkhumbule. Wasipha ikhophi yaso.

Njengoba singoFakazi BakaJehova, sikholelwa ngokuphelele kulokho iBhayibheli elikufundisayo, ukuthi uNkulunkulu uyobuyisela izimo zepharadesi emhlabeni wethu futhi ulangazelela ukubuyisela abafile ekuphileni—kuhlanganise nezinsana ezinjengoPrecious. (Jobe 14:14, 15; Johane 5:28, 29) Sibheke phambili osukwini lapho siyophinde simgone khona futhi simange. Njalo lapho sizwa igama elithi “ipharadesi,” lelo themba liyasijabulisa! Kuze kube yileso sikhathi, sithola induduzo eqinisweni lokuthi uPrecious usenkumbulweni kaNkulunkulu futhi akasahlupheki.—UmShumayeli 9:5, 10.