Ubani Ofuna Ukugibela Urisho?
UMA sifika eDhaka, inhloko-dolobha yaseBangladesh, isivakashi sisheshe siphawule okuthile okuhlukile. Phakathi kwezinkumbi zabantu kunezindimbane zorisho! Iningi labo ligcwala imigwaqo nemihubhe lehla lenyuka lithutha abantu nempahla.
EDhaka, urisho uyindlela ethandwayo yokuhamba. Nakuba isibalo sorisho abasemthethweni singaba ngu-80 000, abaningi banomuzwa wokuthi kunabaningi kunaleli nani emigwaqweni nsuku zonke. Empeleni, kuthiwa iDhaka inorisho abaningi kunawo wonke amanye amadolobha emhlabeni!
Orisho Bokuqala
Njengoba izinhlobo zakudala zezihlalo ezihamba ngamasondo zazisetshenziswa phakathi nokubusa kukaLouis XIV waseFrance (1638-1715), orisho bokuqala abadonswa abantu kuvame ukuthiwa basungulwa uJonathan Gable, isithunywa sevangeli saseMelika esasiseJapane ngawo-1870. Kuthiwa wasungula inqola ngenxa yomkakhe owayenempilo ebuthaka futhi yaba ngeyokuqala amaJapane ayibiza ngokuthi i-jinrikisha, okusho inqola edonswa umuntu. Leli gama lagcina selibizwa ngokuthi “rickshaw” ngesiNgisi. Ngokuhamba kwesikhathi, izinhlobo ezihlukahlukene zorisho zanda kulo lonke elase-Asia njengendlela yokuhamba engabizi. Lapho uCharles Taze Russell (ongakwesokudla), owahola ngentshiseko emsebenzini wabaFundi BeBhayibheli (njengoba oFakazi BakaJehova babebizwa kanjalo), evakashele eJapane ngo-1912, labo ayehamba nabo babehamba ngorisho kule ndawo.
EDhaka, orisho abanamasondo amathathu baqala ukwenziwa ngasekupheleni kwawo-1930. Ngokungafani norisho abadonswa umuntu abanemiphini emibili exhunywe esihlalweni esinamasondo, laba babefana nebhayisekili elinamasondo amathathu. U-wallah, noma umshayeli karisho, wayewushova ehleli phambili. Lokhu kwakumenza akwazi ukuthutha abagibeli noma izimpahla eziya kude, achushe kalula phakathi kwemigwaqo enezimoto eziningi neminyene.
Imihlobiso Yorisho
Urisho ngamunye eDhaka uhlotshiswe yonke indawo. Lavelaphi leli siko lokubahlobisa? Lapho kwenziwa orisho okokuqala eDhaka, kwakufanele bancintisane nezinqola zamahhashi okuthiwa ama-tomtom ezazithutha abagibeli nempahla. Mhlawumbe ukuze bahehe amakhasimende kule ndlela entsha yokuhamba, abanikazi borisho baqala ukubahlobisa. Imidwebo nezikhangiso kamuva kwaphenduka izinto zobuciko obuphawulekayo.
Umphumela walokhu uyamangalisa. Lobu, ubuciko obuhamba ngamasondo. Empeleni uSyed Manzoorul, umSulumane waseBangladesh ongumcusumbuli wezobuciko, uthi orisho baseDhaka “bawumbukiso wezithombe ohambayo.” Yonke ingxenye yawo engaphandle ihlotshiswe ngemiklamo emibalabala nezithombe. Izinsephe eziphephezelayo, nobuhlalu obucwebezelayo kulenga ezinhlangothini noma emiphemeni yayo evalekayo.
Umenzi wobuciko ngamunye unendlela yakhe yokuhlobisa nezinto athanda ukuhlobisa ngazo. Eminye imihlobiso ithi ayifane nezikhangiso ezinkulu, inemifanekiso yamabhayisikobho aseNdiya nawaseBangladesh asendulo nawanamuhla. Izilwane, izinyoni, ukuzingela nohlaza lwezwe kuvamile kule midwebo.
Ngawo-1950 kwakunabadwebi borisho abambalwa kuphela. Namuhla, kunabadwebi abaphakathi kuka-200 no-300 abenza le midwebo engavamile. Ingxenye ngayinye karisho ihlanganiswa ezindaweni ezikhethekile, ngokuvamile ngemikhiqizo yezinto esezike zasetshenziswa. Ngokwesibonelo, bangasika ingxenye ethile kathayela womgqomo wamafutha noma yokuthile okulahliwe, umdwebi usebenzisa upende ukuze adwebe umdwebo omuhle onemibala. Le midwebo yobuciko yenziwa abantu asebekhulile baseBangladesh. Isiyinto ethandwayo nekhangayo.
Umshayeli Karisho
Njengoba wazi, kunzima ukuphila komuntu oshayela urisho. Ake ucabange nje uchitha usuku lonke ushova uthwele abantu noma imithwalo esindayo. Abagibeli bahlanganisa amakhosikazi, izingane zesikole, osomabhizinisi noma abathengi abaphethe izimpahla. Ngokuvamile, abantu ababili, abathathu noma ngaphezulu bampintshana kurisho owodwa. Urisho ungase usetshenziselwe ukuthwala amasaka erayisi, amazambane, u-anyanisi nezinongo ezizodayiswa emakethe. Ngezinye izikhathi umgibeli angase aqhwakele phezu komthwalo wakhe. Kumuntu obukele, kungase kubonakale kungenakwenzeka ukuba umshayeli adonse umthwalo osinda kangaka. Kodwa, ngisho lishisa ilanga noma liyidliva, umshayeli karisho othobekile usebenza kanzima angakhonondi neze.
Abashayeli bakarisho abaningi bafika edolobheni bempofu bevela emaphandleni lapho bengenakukwazi khona ukuziphilisa ngokulima. Njengoba bengakwazi ukuthola imisebenzi eholela kakhulu, iningi lishiya imindeni yalo liyoba abashayeli borisho. Ngokusebenzisa amandla abo, bangahola ama-dollar ambalwa nje ngosuku.
Indlela Yokuhamba Eyingqayizivele
Orisho bayaqhubeka bechuma eDhaka ngenxa yendawo yakhona eyithafa nemihubhe eminingi nezindawo zokuhamba okungelula ukuba zisetshenziswe ezinye izinto zokuhamba. Abantu abaningi babheka le ndlela yokuhamba hhayi njengengayingcolisi imvelo nje kuphela kodwa nokumnandi ukuhamba ngayo.
Emadolobheni amaningi ase-Asia, orisho bayancipha. Kulezi zindawo, isifiso sokuthwala abantu abaningi ngesikhathi esisodwa nendlela yokuphila yesimanje kwenze ukuba orisho bangabe besasetshenziswa. Kodwa, nakuba abantu abaningi bengase bababheke njengabaphelelwe yisikhathi, kwenziwa umzamo wokuba balondolozwe ngokuthuthukisa imiklamo yabo.
Lapho uhamba eDhaka, ungase ukhethe ukuhamba—ngebhasi, itekisi, isithuthuthu, urisho onenjini noma ngoyibhayisekili elinemibalabala. Kodwa awusoze wakhohlwa uhambo olumnandi lukarisho oyibhayisekili emigwaqweni eminyene yaseDhaka!
[Isithombe esigcwele ikhasi ekhasini 23]