Iminyaka Engamashumi Amathathu Ngihumusha Ngomshoshaphansi

Njengoba ilandiswa ngu-Ona Mockutė

Ngo-April 1962, ngangiphambi kwenkantolo egcwele abantu eKlaipeda, eLithuania, ngithweswe amacala okuvukela umphakathi. Ngo-October wangonyaka owawandulele, ngangikade ngiboshelwe umsebenzi wenkolo owawubhekwa njengokwephula umthetho weSifundazwe saseSoviet. Ake ngichaze ukuthi yini eyabangela ukuba ngiboshwe ngenxa yokwenza umsebenzi wokuhumusha izincwadi zoFakazi BakaJehova.

NGAZALWA ngo-1930 entshonalanga yeLithuania, bude buduze neBaltic Sea. Ngaphambi kokuba ngizalwe, umama wathandaza ecela ukuba ngibe yindela. Kodwa, ngelinye ilanga wathi kimi: “Angisoze nje ngakhuleka phambi kuka-St. Peter noma ezinye izithombe.” Nginalokhu engqondweni, ngakugwema ukuguqa ngithandaze esontweni, nakuba ngangiguqa phambi kwesiphambano lapho ngisendleleni eya esikoleni.

Kamuva, phakathi neMpi Yezwe II eyaqala ngo-1939 kuya ku-1945, ngabona isihluku esibi kabi, futhi kwangikhathaza kakhulu lokho. Ngelinye ilanga lapho kusabusa amaJalimane, ngangikha amajikijolo ehlathini nomama omncane. Sabona imigodi emibili emikhulu okwakubonakala ukuthi inegazi. Njengoba sasazi ukuthi kwakusanda kubulawa iqembu lamaJuda, kuhlanganise nabangane engangifunda nabo uTese noSara, saphetha ngokuthi sasibona ithuna ababengcwatshwe kulo bonke. Ngimangele, ngamemeza: “Nkulunkulu, umuhle kakhulu! Kodwa kungani uvumela unya olungaka?”

Ngo-1949, ngaqeda isikole eKlaipeda eduze nasekhaya, futhi ngemva kwalokho ngaqhubeka nokufundela umculo. Ngo-1950, ngazihlanganisa neqembu lezitshudeni lezombangazwe elingekho emthethweni, kodwa ngokushesha bangimpimpa futhi ngaboshwa kanye nabanye abangu-12. Ngaboshelwa eKlaipeda, futhi ngahlangana lapho-ke nomunye woFakazi BakaJehova.

Ukufunda Amaqiniso EBhayibheli

Owesifazane othile wavalelwa nathi ejele. Wasibingelela ngokumomotheka mina nabanye besifazane abayisikhombisa. Ngambuza: “Dadewethu, ngokuvamile iziboshwa azijabuli lapho zifakwa ejele, kodwa wena uyamomotheka! Kungani?”

Waphendula: “Kungenxa yeqiniso.”

Ngambuza: “Iqiniso lani?”

Igama lalona wesifazane kwakunguLydia Peldszus. WayengumJalimane onguFakazi BakaJehova owayeboshwe ngenxa yokholo lwakhe. Saxoxa ngezinto eziningi ezingokomoya. Amaqiniso eBhayibheli ajabulisayo uLydia asifundisa wona awashintshanga nje ukuphila kwami kuphela kodwa nokwabanye abathathu esasiboshwe nabo.

Indlela Ulwazi Lwami NgeBhayibheli Olwakhula Ngayo

Ngagwetshwa iminyaka engu-25 ngidonsa ejele, neminye engu-5 ngisekudingisweni ngenxa yemisebenzi yezombangazwe engekho emthethweni ngenkathi yokubusa kweSoviet. Ngosizo loFakazi engahlangana nabo phakathi neminyaka yokuboshwa kwami emajele nasemakamu okugqilazwa eSiberia, ulwazi lwami ngoNkulunkulu nezinjongo zakhe lwakhula. NjengoLydia, labo Fakazi bajeziswa ngenxa yokholo lwabo.

Ngaphandle kokukhula olwazini lweBhayibheli phakathi naleyo minyaka, ngahlanganyela ukholo lwami nabanye. Nakuba ngingabanga nethuba lokubhapathizwa ukuze ngibonise ukuzinikezela kuNkulunkulu, ezinye iziboshwa neziphathimandla zasejele zazingibheka njengomunye woFakazi BakaJehova. Ngo-1958, ngemva kokudonsa iminyaka engu-8 ejele, ngakhululwa. Ngabuyela eLithuania ngigula kodwa nginokholo oluqinile kuJehova.

Ukuqala Komsebenzi Wokuhumusha Ngomshoshaphansi

Ngaleso sikhathi kwakunoFakazi abambalwa kakhulu eLithuania. Abanye babesejele noma bedingiselwe eSiberia. Ngo-1959, kwafika oFakazi ababili bevela eSiberia basikisela ukuba ngihumushele izincwadi zeBhayibheli olimini lwesiLithuania. Ngayamukela ngenjabulo leyo nselele, ngiyibheka njengelungelo.

Ngo-March 1960, ngaqala ukuhumusha, futhi ngo-July ngabhapathizwa ngasese eMfuleni iDubysa. Ngenxa yokuphikiswa ama-KGB (iKomiti Yezokuphepha YaseSoviet Union), ngangingawutholi umsebenzi ukuze ngizondle, ngakho ngahlala nabazali, ababezamukela izinkolelo zami. Ngangilusa izinkomo zikababa nezabanye omakhelwane. Ngangihumusha lapho ngelusile. Nganginehhovisi elihle ngoba ngangihlala esiqwini sesihlahla ngizungezwe ukhaphethi wotshani obuluhlaza. Uphahla lwangaphakathi kwakuyisibhakabhaka esiluhlaza, futhi ngangibhalela emathangeni.

Nokho, ngabona ukuthi ukuhumusha obala kwakungaphephile, ngoba amanxusa ama-KGB noma izimpimpi zawo zazingangibona kalula. Ngakho lapho kutholakala izindawo zokucasha engangingahumushela kuzo, ngathutha ekhaya. Ngezinye izikhathi ngangisebenzela ezingotsheni lapho kwakunezilwane kolunye uhlangothi mina ngibe ngimatasa ngichofoza umshini wokubhala ngakolunye.

Kwakungenagesi, ngakho ngangisebenza emini. Ukuze ngivale umsindo womshini wokubhala, kwakunomshini wokudonsa amanzi owawakhiwe ngokukhethekile owawubanga umsindo ngaphandle. Uma kuhwalala, ngangingena endlini ngiyokudla. Kamuva ngangibuyela engotsheni ngiyolala embhedeni wotshani.

Ngo-October 1961, nginabanye oFakazi ababili, ngaboshwa lapho kutholakala ukuthi ngangenza umsebenzi wokuthuthukisa inkolo. Lokhu kwaholela ekuqulweni kwecala ngo-1962 engikhulume ngalo ekuqaleni kwale ndaba. Iziphathimandla zavuma ukuba icala liqulwe enkantolo yomphakathi, futhi sakujabulela ukuba nethuba lokunikeza ubufakazi phambi kwezilaleli eziningi. (Marku 13:9) Ngagwetshwa iminyaka emithathu futhi ngathunyelwa ejele laseTallinn, e-Estonia. Ngokwazi kwami, ngaleso sikhathi ngangiwukuphela komuntu owayeboshwe ngenxa yokholo. Ngavakashelwa abaphathi-dolobha, futhi ngabatshela ngezinkolelo zami.

Ukuqala Umsebenzi Wokuhumusha Futhi

Lapho ngikhululwa ejele e-Estonia ngo-1964, ngabuyela eLithuania. Lapho, ngaqhubeka ngihumusha izincwadi, ngokuvamile ngizisusa olimini lwesiRashiya ngizihumushela olimini lwesiLithuania. Umsebenzi wawumningi. Nakuba abanye babesiza, kwakuyimi kuphela umhumushi wesikhathi esigcwele wolimi lwesiLithuania. Ngangivame ukusebenza zonke izinsuku zesonto kusukela ekuseni kuze kube sebusuku. Ngaphandle kosizo lukaJehova, ngangingeke ngibe namandla okwenza kanjalo.

Ngenxa yokubona ukuthi lo msebenzi ubalulekile, ngaqapha ngazo zonke izindlela. Abafowethu nodadewethu abangamaKristu babevame ukubeka ukuphila kwabo nokwemikhaya yabo engcupheni, ukuze bangifihle, bangondle futhi bangivikele. Ukubambisana okunjalo kwasenza sasondelana kakhulu. Lapho ngisebenza, umkhaya engangihlala kuwo ngaleso sikhathi wawuqapha ukuze ubone labo abangase bangimpimpe. Ukuze ngixwayiswe, othile wayeshaya amapayipi esitimu kabili ngensimbi. Lapho ngizwa isixwayiso, ngokushesha ngangifihla noma yini eyayingase ingenze ngibanjwe ukuthi kade ngisebenza.

Uma sithola ukuthi umuzi engisebenzela kuwo ubhekiwe, ngangidlula ngokushesha ngiye endaweni elandelayo. Kwakuyicala elibomvu ukuba nomshini wokubhala ngaphandle kwemvume yeziphathimandla, ngakho othile wayewuthatha awuyise endaweni elandelayo. Ngokuvamile ngangithutha ebusuku, ngiye kwenye indawo.

UJehova wangivikela ngempela. Nakuba zazingenabo ubufakazi, iziphathimandla zazazi ukuthi ngenzani. Ngokwesibonelo, ngo-1973, lapho kuqulwa icala loFakazi BakaJehova abangu-8, umshushisi wenkantolo wangibiza nami wazongihloma imibuzo. Wangibuza ngokuqondile, “Mockutė, zingaki izincwadi osuzinyathelisile kuyo yonke le minyaka?”

Ngaphendula ngokuthi anginakukwazi ukuwuphendula lowo mbuzo. Wabe esebuza, “Yimuphi umbuzo ofuna ukuwuphendula?”

Ngaphendula, “Ngizophendula umbuzo ongahlangene nalo msebenzi.”

Ukushintsha Kwesimo

Ngasekupheleni kwawo-1980, saqala ukushintsha isimo eLithuania. Kwakungasadingeki ukuba sibalekele izithunywa zikahulumeni. Ngakho, ngo-1990, abanye baqala ukwenza umsebenzi wokuhumusha. Ngo-September 1, 1992, kwavulwa ihhovisi elincane lokuhumusha eKlaipeda, idolobha engagcina sengizinze kulo.

Uma ngisonga nje, ngasebenza njengomhumushi iminyaka engu-30 ezindaweni ezingu-16. Ngangingenawo umuzi wami. Kodwa ngijabula kakhulu ukubona izithelo zomsebenzi wethu! Namuhla sekunoFakazi BakaJehova abangu-3 000 eLithuania. Umsebenzi wokuhumusha engake ngawenza ngomshoshaphansi, manje wenziwa ngokukhululeka ehhovisi legatsha laseLithuania eduze nedolobha laseKaunas.

Ngisakukhumbula kahle ukuhlangana kwami noFakazi kuleliya jele elibandayo laseKlaipeda cishe eminyakeni engu-60 edlule. Kwashintsha ukuphila kwami. Ngiyohlale ngimbonga njalo uMdali omkhulu uJehova, ngokuthi ngathola iqiniso ngaye nangezinjongo zakhe nangokuthi nganikezela ukuphila kwami ekwenzeni intando yakhe.

[Amazwi acashunwe esihlokweni ekhasini 13]

Amaqiniso eBhayibheli ajabulisayo uLydia asifundisa wona ashintsha ukuphila kwethu sobane

[Isithombe ekhasini 12]

Ukuqulwa kwecala lami ngo-1962 kwaphuma nasephephandabeni laseSoviet

[Isithombe ekhasini 14, 15]

Ezinye zezincwadi zeBhayibheli engazihumusha ngisengcupheni yokuboshwa

[Isithombe ekhasini 15]

ULydia wangifundisa amaqiniso eBhayibheli ejele

[Isithombe ekhasini 15]

OFakazi ababili (ngakwesobunxele) abangifundisa okwengeziwe ngoNkulunkulu ejele laseKhabarovsk, eRussia, ngo-1956

[Isithombe ekhasini 15]

Umshini wokubhala engangiwusebenzisa ngesikhathi umsebenzi usavinjelwe