Lapho Ngaqala Khona Ukuzwa Ngegama LikaJehova

Njengoba ilandiswa nguPavol Kovár

Phakathi nokuqhuma okuningi kwamabhomu, safika kanzima endaweni yokukhosela. Njengoba ukuqhuma kwamabhomu kuya kuqina futhi le ndawo esikhosele kuyo inyakaza, omunye esasiboshwe naye wathandaza ngokuzwakalayo: “O Jehova, sisindise! Ngenxa yegama lakho elingcwele, sicela usisindise!”

KWAKUNGU-JANUARY 8, 1945 futhi ngiyisiboshwa sempi edolobheni laseLinz e-Austria. Sasingaba ngu-250 kuleyo ndawo yokukhosela, futhi sonke sasinda kulokho kuqhuma kwamabhomu. Ngemva kokuphuma lapho, sabona umonakalo kuyo yonke indawo esizungezile. Umthandazo osuka enhliziyweni engawuzwa wagxila engqondweni, ngisho noma ngingazange ngazi ukuthi washiwo ngubani. Ngaphambi kokuba ngilandise ukuthi ngagcina ngaze kanjani ukuthi ngubani uJehova, ake nginithi fahla ngesizinda sami.

Ngazalwa ngo-September 28, 1921, emzini othile eduze nedolobhana laseKrajné, entshonalanga yeSlovakia, ngaleso sikhathi eyayiyingxenye yeCzechoslovakia. Abazali bami babengamaProthestani ayeyithanda kakhulu inkolo. Ubaba wayefundela umkhaya iBhayibheli njalo ekuseni ngeSonto, futhi umama kanye nathi zingane ezine sasilalelisisa. Kodwa angikhumbuli nakanye ubaba esebenzisa igama likaJehova. Ukuphila esigodini sakithi kwakulula, kodwa sasenelisekile ngokuncane esasinako.

Lapho kuqala iMpi Yezwe II ngo-1939, abantu babesaba. Abaningi babesakukhumbula kahle ukuhlupheka okwakubangelwe iMpi Yezwe I eminyakeni engaba ngu-20 ngaphambi kwalokho. Ngo-1942, ngabuthelwa ebuthweni lempi laseSlovakia. Nakuba ngokomthetho iSlovakia yayichema neJalimane, ngo-August 1944 kwenziwa umzamo wokubuyisela umbuso wentando yeningi. Lapho lowo mzamo uhluleka, ngaba phakathi kwezinkulungwane zamasosha aseSlovakia athunjwa abe esethunyelwa ezindaweni ezibuswa amaJalimane. Ngagcina ngiseGusen, ikamu elincane elakhelene nekamu lokuhlushwa elidumile laseMauthausen, eduze naseLinz.

Lapho Ngiyisiboshwa Sempi

Sabelwa ukusebenza esikhungweni sezindiza esasingekude nedolobhana laseSankt Georgen an der Gusen. Lapho, ngangisebenza efektri yokusaha amapulangwe. Sasidla amanembe, futhi ngo-January 1945 isilinganiso sethu sokudla sancishiswa nakakhulu, njengoba amabutho amaNazi ayehlulwa kuzo zonke izimpi. Okuwukuphela kokudla okushisayo esasikuthola kwakuyisobho elincane. Njalo ekuseni kwakufika izisebenzi zasekamu elikhulu laseMauthausen. Ngokuvamile onogada babezishaya zize zife iziboshwa ezazibuthaka kakhulu zingenakukwazi ukusebenza. Kamuva, ezinye iziboshwa nazo zaziphonsa izidumbu enqoleni ziziyise lapho kushiswa khona izidumbu.

Naphezu kosizi, sasinamathemba okuthi impi izophela maduze. Ngo-May, 5, 1945, ezinyangeni ezine ngemva kokuqhuma kwamabhomu okuchazwe ekuqaleni kwalesi sihloko, ngavuka ekuseni ngabona isiyaluyalu ngabe sengigijimela egcekeni. Onogada babengasekho, izibhamu zaziqoqelwe ndawonye, futhi amasango ayevuleke gengelezi. Sasikwazi ukubona elinye ikamu ngale kwemfunda. Iziboshwa ezazikhululekile zazibaleka kulo njengezinyosi zibaleka esidlekeni esishayo. Lokho kukhululeka kwakuhambisana nokuziphindiselela okunonya. Ukucekwa kwabantu okwenzeka lapho akuphumi engqondweni yami namanje.

Iziboshwa zaziziphindiselela ngokubulala ama-kapo, iziboshwa ezazisebenzisana nonogada beziboshwa. Ngokuvamile ama-kapo ayenonya kakhulu kunonogada bamaNazi ngokwabo. Ngabukela lapho isiboshwa sishaya i-kapo laze lafa, silokhu simemeza sithi: “Ubulale ubaba. Besindawonye lapha sisindile, kodwa umbulele ezinsukwini ezimbili ezidlule!” Kwathi kuhlwa imfunda yabe isigcwele izidumbu zama-kapo nezezinye iziboshwa—amakhulu ngamakhulu azo. Kamuva, ngaphambi kokuba sihambe, sahambahamba ekamu, sihlola izindawo okwakubulawelwa kuzo abantu—ikakhulukazi amagumbi esisi esibulalayo—kanye nohhavini.

Ukufunda NgoNkulunkulu Weqiniso

Ngangisekhaya ngasekupheleni kuka-May 1945. Phakathi naleso sikhathi, abazali bami babengagcinanga nje ngokufunda ngegama likaNkulunkulu, igama engalizwa endaweni esasikhosele kuyo, kodwa futhi base bengoFakazi BakaJehova. Ngemva nje kokuba ngibuyile, ngahlangana no-Oľga, intombazane ethanda izinto ezingokomoya, futhi ngemva konyaka sashada. Intshiseko yakhe ngeqiniso leBhayibheli yangishukumisela ukuba ngiqhubeke ngifunda ngoJehova. Phakathi nomunye wemihlangano yethu yokugcina ngaphambi kokuba umbuso omusha wamaKhomanisi uvimbele umsebenzi wethu ngo-1949, mina no-Oľga, kanye nabanye abangaba ngu-50, sabhapathizwa eMfuleni iVáh ePiešťany. Ngokuhamba kwesikhathi, saba namadodakazi amabili, u-Oľga noVlasta.

UJán Sebín, uFakazi owaba nesandla ekuhleleni umsebenzi wokushumayela ngemva kweMpi Yezwe II, wayesivakashela njalo futhi ngangishumayela naye njalo. Naphezu kokwanda kokushushiswa amaKhomanisi, saqhubeka sishumayela. Sasisebenzisa ubuhlakani lapho sikhuluma nabantu ngamaqiniso eBhayibheli, futhi ngokushesha saba nezifundo eziningi zeBhayibheli. Lapho uJán ehamba endaweni yakithi, mina nomkami saqhubeka nalezi zifundo. Kamuva, emihlanganweni yethu, sasivame ukuhlangana nalezi zifundo zethu ezithandekayo, kanye nezingane nabazukulu bazo. Yeka ukuthi kwakusijabulisa kanjani lokho!

Inkonzo Ekhethekile

Ngo-1953, oFakazi abaningi ababehola emsebenzini wokushumayela babeboshiwe. Ngakho ngacelwa ukuba ngisize ensimini endaweni eyayiqhele ngamakhilomitha angaba ngu-150 ukusuka emzini wethu. Njalo ngemva kwamasonto amabili, ngemva kokushayisa emsebenzini wokuziphilisa ngoMgqibelo ntambama, ngangihamba ngesitimela ngisuka edolobheni laseNové Mesto nad Váhom ngiye eMartin, enyakatho emaphakathi neSlovakia. Lapho, ngangifundisa abantu iBhayibheli kuze kuhlwe naphakathi kwalo lonke usuku lwangeSonto. NgeSonto kusihlwa ngangibuyela eNové Mesto ngesitimela. Ngangivame ukufika cishe phakathi kwamabili bese ngihlala nombhangqwana osukhulile owawungingenisa emzini wawo kuze kube sekuseni. Ngangisuka lapho ngiqonde emsebenzini bese ngibuyela emkhayeni wami, edolobhaneni laseKrajné, ngoMsombuluko kusihlwa. Phakathi nezimpelasonto lapho ngingekho ekhaya, u-Oľga wayenakekela amadodakazi ethu.

Khona-ke, ngo-1956, ngacelwa ukuba ngikhonze njengombonisi wesifunda, umsebenzi owawuhilela ukuhambela amabandla endaweni yakithi ukuze siwaqinise ngokomoya. Njengoba abaningi ababekhonza kuleso sabelo babekade beboshiwe, ngabona isidingo sokwamukela lowo mthwalo wemfanelo. Mina nomkami sasiqiniseka ngokuthi uJehova uzowusekela umkhaya wethu.

Ngokomthetho wamaKhomanisi, zonke izakhamuzi kwakumelwe zisebenze. Uhulumeni wawubheka labo abangasebenzi njengezinxibi bese ubagquma ejele. Ngakho ngaqhubeka ngisebenza. Ngezimpelasonto ezimbili enyangeni ngayinye ngangiba nomkhaya wami, sihlanganyela emisebenzini engokomoya nakweminye; kodwa ezinye izimpelasonto ezimbili, ngangihambela elinye lamabandla ayisithupha aseduze esifundeni.

Ukukhiqizwa Kwezincwadi Lapho Sivinjelwe

Ababonisi bezifunda babenomthwalo wokuhlela ukuba ibandla ngalinye esifundeni lithole izincwadi zeBhayibheli. Ekuqaleni, omagazini babekopishwa ngesandla noma babhalwe ngomshini. Kamuva sakwazi ukuthola amafilimu e-Nqabayokulinda bese siwathumela emabandleni. Omagazini babebe sebekopishelwa ephepheni lokushicilela. Njengoba ukuthenga iphepha eliningi kangaka kwakungase kusolise, labo ababethenga kwakudingeka babe nesibindi futhi baqaphe.

UŠtefan Hučko wahlakulela uthando lokwenza lo msebenzi, futhi wayenekhono lokuwenza. Ngokwesibonelo, ngesinye isikhathi, uŠtefan wabuyela esitolo sezithombe edolobheni elalikude nakubo eyothenga iphepha lokushicilela kodwa wayesezohamba ngoba lalingekho. Nokho, wabe esebona umthengisi owayemthembise ukuthi uzoli-oda. Njengoba uŠtefan ayesethi uyasondela kuye, wabona iphoyisa lingena esitolo. Ngawo lowo mzuzu, umthengisi wambona wayesememeza ngenjabulo: “Mnumzane! Unenhlanhla. Sinalo iphepha owawulidinga.”

Ecabanga ngokushesha, uŠtefan waphendula: “Ngiyaxolisa Nkosazana, kumelwe ukuba ungifanisa nothile. Ngifuna ifilimu nje elilodwa.”

Ngemva kokubuyela emotweni yakhe, uŠtefan wacabanga ukuthi akanakukwazi ukubuyela emuva ngaphandle kwaleli phepha lokushicilela elibalulekile ayezolilanda. Ngakho kamuva, ngemva kokukhumula ibhantshi nekapisi ezama ukushintsha indlela abukeka ngayo, waphindela esitolo waqonda ngqo kumthengisi. Wachaza: “Bengilapha esontweni elidlule, futhi wangithembisa ukuthi uzongi-odela iphepha lokushicilela. Ingabe selikhona?”

Umthengisi waphendula: “Yebo likhona. Kodwa uyazi Mnumzane, emizuzwini embalwa nje bekukhona umuntu ofana nawe. Isimanga—bekungathi yiwele lakho!” UŠtefan wathatha lawo maphepha amaningi ngokushesha wahamba, ebonga uJehova ngokulenza litholakale.

Ngawo-1980 saqala ukusebenzisa imishini enciphisa amagama nemishini emincane yokunyathelisa ukuze sikhiqize izincwadi zeBhayibheli emagumbini angaphansi kwezakhiwo nakwezinye izindawo eziyimfihlo. Ngokuhamba kwesikhathi, inani lamakhophi kamagazini wethu ngamunye—kanye nenani lezincwadi nezincwajana—lalingana futhi laze ladlula inani loFakazi.

Ukuvakashela Ezindaweni Engingazithandi

Ngolunye usuku phakathi neminyaka yawo-1960, kwathiwa angifike emnyango wezempi wenkampani engangiyisebenzela. Amadoda amathathu ayegqoke izingubo ezivamile angibuza imibuzo, ethi: “Sekuyisikhathi esingakanani uhamba noFakazi BakaJehova? Futhi obani abanye enihlangana nabo?” Lapho ngingayivezi imininingwane ayifunayo, athi azongithinta kamuva. Ngangiqala ngqa ukuvela phambi kwamaPhoyisa Ombuso.

Ngokushesha ngemva kwalokho, ngathathwa emsebenzini ngayiswa esiteshini samaphoyisa. Nganikwa iphepha elingabhalwe lutho, ngacelwa ukuba ngibhale amagama abanye oFakazi. Lapho le ndoda ibuya ngemva kwehora, ngangingakabhali lutho kuleli phepha ngabe sengichaza ukuthi ngeke ngiwabhale amagama. Ngesonto elilandelayo, kwaphinda sona leso. Kodwa kulokhu ngashaywa, futhi lapho sengihamba, ngakhahlelwa ngaze ngayophuma ngephasishi.

Ngemva kwalokho, bangiyeka unyaka wonke. Amaphoyisa abe esethumela indoda ethile ukuba ingivakashele. Sasikade siboshwe nayo ekamu lokuhlushwa lamaNazi. Yathi kimi: “Kufanele sishintshe indlela esiniphatha ngayo. Uma sivalela uFakazi oyedwa ejele, baphuma sebebahlanu.” Uhulumeni wayefuna ukulawula umsebenzi wethu ngezinga elithile. Kodwa, ngangizimisele ukungabanikezi ngisho nemincane imininingwane yokwenza kanjalo.

Kwaphela iminyaka eminingi ngiphakathi kwabantu ababevela phambi kwamaphoyisa ombuso ngezikhathi ezithile. Ngezinye izikhathi ayesiphatha njengabangane, kodwa ngezinye izikhathi ayefaka omunye wethu ejele. Ngibonga ukuthi angizange ngiboshwe, kodwa lezo zikhathi zokuhlangana namaphoyisa zaqhubeka kwaze kwaba ngo-1989, okuwunyaka okwawa ngawo ubuKhomanisi eCzechoslovakia.

Ngemva kwamasonto ambalwa buwile, ngavakashelwa isikhulu samaPhoyisa Ombuso sivela eBratislava. Saxolisa sathi: “Ukuba bekuya ngami, ngabe asizange sikuhluphe.” Sabe sesinginika izikhwama ezimbili ezazinezithelo ezisemathinini esazikhipha emotweni yaso.

UJehova, Ungumbhoshongo Onamandla

Nakuba ngachitha iminyaka yokuqala engu-40 ngingomunye woFakazi BakaJehova ngaphansi kokuvinjelwa, ngijabulele ukuphila okujabulisayo nokuzuzisayo. Izinto esahlangabezana nazo ngaleyo minyaka zasenza sasondelana namanye amakholwa athembekile. Sasibazisa ubuhlobo bethu futhi sasincike ekuthembekeni komunye nomunye.

Ngo-March 2003, ngalahlekelwa kakhulu lapho kushona umkami engimthandayo, u-Oľga. Wayengumngane othembekile phakathi naso sonke isikhathi sishadile. Sasimatasa sisebenza ndawonye enkonzweni yobuKristu kuyo yonke leyo minyaka. Manje, ngisakhonza njengomdala ongumKristu ebandleni lethu futhi ngisabafuna abafanelekayo engingabatshela amaqiniso eBhayibheli. Igama elithi Jehova, engaqala ukulizwa ngisendaweni yokukhosela phakathi neMpi Yezwe II, lisengumbhoshongo onamandla kimi.a—IzAga 18:10.

[Umbhalo waphansi]

[Isithombe ekhasini 12]

Ngo-1942 lapho ngisebuthweni laseSlovakia

[Isithombe ekhasini 12]

Kamuva, ngavalelwa eGusen (ebonakala ngemuva)

[Umthombo]

© ČTK

[Isithombe ekhasini 12]

UBaba weyesifundela iBhayibheli ngeSonto ekuseni

[Isithombe ekhasini 13]

Ngosuku lwethu lomshado ngo-1946

[Isithombe ekhasini 15]

Ngino-Oľga ngaphambi nje kokuba ashone