“Idada Elimnyama” Emiselekazini YaseVenice

NGUMLOBELI WE-PHAPHAMA! E-ITALY

NJENGOBA kuzungezwe izindonga eziswakeme, amabhuloho anamakhothamo enziwe ngamatshe, amafasitela anemiklamo enhlobonhlobo, novulandi abanezimbali, kuzintwezela kamnandi phezu komselekazi. Kumnyama, kuhle futhi kuzithulele. Uma ukubukela kude kufana nedada elimnyama. Nakuba umzimba wako wenziwe ngokhuni, intamo iqinile futhi ingenazo izimpaphe, kodwa iyinsimbi, kuhamba kule miselekazi yaseVenice, e-Italy, ngendlela ezolile efana neyedada. Sikhuluma nge-gondola, ngokusho kwabanye eyisikebhe esidume kakhulu emhlabeni. Ivelaphi? Kungani idume kangaka? Yini eyenza ihluke kwezinye izikebhe?

Imvelaphi Yayo

Akulula ukusho ukuthi yavela nini i-gondola yokuqala, nakuba abanye bekholelwa ukuthi yavela ngekhulu le-11 C.E. Yaqala ukudwetshwa ngasekupheleni kwekhulu le-15. Kodwa, phakathi nekhulu le-17 nele-18 yaqala ukubukeka ngendlela ehlukile okuyenza idume kakhulu futhi ihluke kwezinye izikebhe. Lesi sikebhe sasiyisicaba ngaphansi, kodwa phakathi nale nkathi saqala ukuba side futhi saba nedlevu (prow) eliphawulekayo.

Kunzima nokuthola umsuka wegama le-gondola. Abanye bathi leli gama elithi “gondola” lithathwe egameni lesiLatini elithi cymbula, okwakuyigama lesikebhe esincane, noma elithi conchula, eliyisinciphiso selithi concha, elisho “igobolondo.”

Itholakala EVenice Kuphela

Esingaqiniseka ngakho ukuthi kunokuhlobana phakathi kwalesi sikebhe neVenice. Empeleni, i-gondola mhlawumbe iwuphawu olubaluleke kunazo zonke kuleli dolobha. Ake ucabange ngazo zonke izithombe zeVenice ezine-gondola.

Kunokunye okuhlanganisa leli dolobha nalesi sikebhe. Ukuhamba phakathi kwemiselekazi ngalesi sikebhe “kuyindlela ehluke kakhulu yokubona iVenice,” kusho uRoberto, umshayeli we-gondola ohambisa izivakashi kule miselekazi. “Awuboni nje kuphela izindawo ezivamile, ubona ubunjalo bangempela beVenice.” Umbhali odumile ongumJalimane uJohann Wolfgang von Goethe wathi ngesikhathi ephakathi kulesi sikebhe wazizwa “eyiNkosi yasoLwandle i-Adriatic, njengoba kuba njalo nganoma imuphi umuntu waseVenice lapho egibela kuyi-gondola.” URoberto uthi: “Ukuntweza okuzolile kwalesi sikebhe kuvumelana kahle nesimo saseVenice. Njengoba unethezekile ezihlalweni ezintofontofo, uzizwa sengathi unesikhathi esiningi kakhulu.”

Izinto Ezingavamile Nge-gondola

Njengoba usibuka lesi sikebhe, kungase kukumangaze ukuthi sihamba siqonde, uma ucabanga ukuthi sigwedlwa ngomphini owodwa kuphela otholakala ngakwesokudla njalo. Lokho kungase kukwenze ucabange ukuthi ngenxa yokugwedlwa ohlangothini olulodwa lesi sikebhe singase sitshekele nganxanye bese sijika ndawonye—kodwa asikwenzi lokho. Kungani? Uchwepheshe wezikebhe zakudala uGilberto Penzo, uyabhala: “Uma singasebenzisa isingathekiso esiqhathanisa umklamo wesikebhe nokuma komzimba bese isiqu okwakhelwa kuso umkhumbi sifanekisele umgogodla nohlaka lwaso lufanekisele izimbambo, besingasho ukuthi i-gondola inesifo esibi sokugoba komgogodla.” Ngamanye amazwi, izinhlangothi zalesi sikebhe azilingani—uhlangothi lwesokudla luncane kunolwesobunxele ngamasentimitha angu-24. Ngenxa yalokho, lapho lesi sikebhe sintanta uhlangothi lwaso lwesokudla luthi ukucwila kakhudlwana emanzini kunolwesobunxele. Lokhu kungalingani kwenza ukuba isisindo somphini wokugwedla singasitshekiseli nganxanye futhi nesisindo somshayeli waso oma maduze nemaphakathi laso senza ukuba sihambe siqonde.

Okunye okulenza lihluke leli “dada” yintamo yalo noma idlevu. Ngaphandle kwengxenye yalo engemuva yensimbi, leli dlevu yilona kuphela eliyinsimbi. Umbhali uGianfranco Munerotto uthi: “Liyakhanga futhi lihluke kakhulu, kangangokuthi liyahlala engqondweni yanoma ubani olibona okokuqala ngqa.” Ekuqaleni, leli dlevu lensimbi lalenza isisindo somshayeli ogwedla esengxenyeni engemuva silingane, kodwa manje seliwumhlobiso nje. Ngokwesiko kuthiwa idlevu lifanekisela izigceme eziyisithupha zaseVenice, kuyilapho izinyo elincane elingemva kwentamo lifanekisela isiqhingi saseVenice iGiudecca. Le ntamo emise okuka-S ifanekisela ukuma koMselekazi Omkhulu waseVenice.

Enye into engavamile ngalesi sikebhe “izimpaphe” zaso ezimnyama. Kuye kwaba nezincazelo eziningi zokuthi kungani lezi zikebhe zimnyama. Ngokwenye incazelo, phakathi nekhulu le-16 nele-17, ukubukisa, imibala, nokuhlotshiswa kwalezi zikebhe kwakweqisa kakhulu kangangokuthi emzamweni wokukhuthaza ukulinganisela, iSigele saseVenice saphoqeleka ukuba sihlawulise abanikazi bama-gondola ahlotshiswe ngokweqile. Kodwa abaningi babencamela ukukhokha inhlawulo kunokususa imihlobiso yabo. Ngenxa yalokho, imantshi yanquma ukuba zonke lezi zikebhe zipendwe ngombala omnyama. Enye incazelo iwukuthi umbala omnyama wawuwuphawu lokulilela izinkulungwane ezabulawa isifo esibhubhisayo i-Black Death. Abanye bathi umbala omnyama walezi zikebhe wawugqamisa ubuhle babesifazane baseVenice abahloniphekile abampofu ngebala. Kodwa incazelo eyiqiniso ayiyona inkimbinkimbi. Okungenani ekuqaleni, umbala omnyama wavela etiyeleni elalisetshenziselwa ukuvimba amanzi ukuba angangeni kulesi sikebhe.

Ngemva kokuntweza emanzini amile ngaleli dada elimnyama, uphindela ezitebhisini eziseceleni komselekazi lapho luqale khona uhambo lwakho. Njengoba amehlo akho ebuka lesi sikebhe sihamba size siphele emehlweni, ungase uzibuze okwesikhashana nje, ukuthi leli dada lizoyiphendula yini intamo yalo ende lilalise izimpaphe ezihlakazekile.

[Isithombe ekhasini 24]

Uhlaka lwe-“gondola” lunezinhlangothi ezingalingani

[Isithombe ekhasini 25]

Idlevu eliyingqayizivele

[Isithombe ekhasini 25]

URoberto, ongumshayeli we-“gondola” emiselekazini yaseVenice

[Umthombo Wesithombe ekhasini 25]

© Medioimages