“Ukuhlakanipha Kwemvelo”

NGUMLOBELI WE-PHAPHAMA! EJAPANE

LESO kwakuyisihloko esigqamile e-Aichi, eJapane, indawo yombukiso i-Expo 2005, okwakuhlanganyele kuwo amazwe angu-121. Izivakashi zakhuthazwa ukuba zifunde emvelweni futhi “zenze imizamo emikhulu yokuthola izindlela zokulondoloza imvelo.” Kulo mbukiso owawuseNagoya, enkabeni yeJapane, kwakukhona amahlathi, amachibi nezimbali. Into eyingqayizivele eyakhanga abantu kwakuyindawo yokuhamba ephakeme, engamakhilomitha angu-2,6 okuthiwa i-Golden Loop. Njengoba yayingamamitha angaba ngu-21 ububanzi, yayiyindawo enhle yokubuka ukwelenyoni futhi ngesikhathi esifanayo ihloselwe ukulondoloza ubuhle bemvelo ngezansi.

Ukuba Munye Nemvelo

Kwakhiwa “isikhumba” soqalo oluphiciwe, esifana negobolondo elikhulu, ngezinti ezingu-23 000, esasimboze isakhiwo saseJapane ukuze sivikeleke elangeni. Lezi zinti zoqalo zazingaba amamitha angu-7 ubude, kanti isakhiwo sasingamamitha angu-19 ukuphakama, angu-90 ububanzi, nangu-70 ubude, okwasenza saba esinye sezakhiwo zoqalo ezinkulu kakhulu emhlabeni. Lesi sakhiwo sasinezithombe zama-video eziyindilinga ezibonakala nxazonke. Lapho zingaphakathi kwale ndawo eyindilinga engamamitha angu-12,8 futhi zizungezwe yimifanekiso enyakazayo nxazonke, izivakashi, ngomqondo ongokomfanekiso, zazizizwela ukuthi kunjani ukuba munye nomhlaba nezinto eziningi eziphila kuwo.

Kusetshenziswa imifanekiso enhlobonhlobo enyakazayo, esakhiweni saseMalaysia kwakunombukiso wamahlathi emvula nezixhobo zamakhorali zakulelo zwe. Esakhiweni saseThailand, kwakunemifanekiso edabukisayo ye-tsunami ka-December 26, 2004, eyakhumbuza izibukeli ukuthi “umuntu akayibusi imvelo.” Njengoba wawuveza usongo lokuqothulwa kwezilwane, umbukiso waseNingizimu Afrika wawunomfanekiso we-quagga, isilwane esinjengedube esasitholakala emathafeni aseningizimu ye-Afrika kwaze kwaba yilapho siqothulwa ngokuzingelwa ekhulwini le-19.

Embukisweni owawuseceleni kwesakhiwo se-Expo kwakuboniswa izinsalela zohlobo oluthile lwendlovu ezifakwe esiqandisini eyavunjululwa enhlabathini eyiqhwa eSiberia, eRussia, ngo-2002. Le ndlovu eyethiwa ngokuthi iYukagir Mammoth, kususelwa endaweni eyatholakala kuyo, yayiyisibonelo sendlovu eyaqothulwa enamazinyo amabili amakhulu agobile namehlo ayevuleke kancane. Ikhanda layo lalisenesikhumba noboya obuningi. Le ndlovu emangalisayo yayingesinye isikhumbuzo esibuhlungu somonakalo wokuqothulwa kwezilwane.

Ingabe Ikusasa Lizoba Ngcono?

Abantu bangabhekana kanjani nezinto ezisongela ikusasa lembulunga yethu, njengokungcola nokufudumala kwembulunga? Kwakukhona umbukiso owachazwa ngokuthi “uphawu lwe-Expo 2005,” owudonga olukhulu “oluluhlaza okotshani”—olubizwa nge-Bio-Lung (Amaphaphu Emvelo)—olungamamitha angu-150 ubude namamitha angaba ngu-15 ukuphakama. Wawunezitshalo ezingu-200 000 ezithathwe ezinhlotsheni ezingu-200, kuhlanganise nezimbali. Kwavezwa ukuthi idlanzana ‘lamaphaphu’ anjengaleli, angase ashintshwe ngokuvumelana nezinkathi zonyaka, angaba umthombo womoya edolobheni futhi awucwenge, amunce isikhutha abese ekhipha umoya-mpilo.

Kule Expo kwakubukiswa nangezinqola zokuthutha ezihlanganisa amabhasi ahamba ngamabhethri nangogesi. Njengoba zazehla zenyuka zithutha abantu, kwakuphuma amanzi kuphela emapayipini azo angemuva. Okunye okwajatshulelwa abantu abathanda ubuchwepheshe kwakuyisitimela somphakathi esinomzila kazibuthe esingesokuqala ngqá eJapane, okuthiwa i-Linimo. Njengoba isebenzisa uzibuthe onamandla, i-Linimo yayihamba buthule nangokushelela cishe amamilimitha angu-8 ngaphezu komzila wayo. Kwakunanombukiso wezinqola zesitimela ezihamba ngamabhethri, amabhayisekili angamathekisi nezinqola ezinjengamabhasi ezaziba nomshayeli noma zingabi naye. Njengoba zazihamba ngambili noma ngantathu ngokulandelana, lezi zinqola zobuchwepheshe zazisebenzisa igesi yemvelo, ehlanzekile kunophethiloli ovamile.

Ake ucabange usukwazi ukushintsha imfucumfucu egayekayo, njengokudla, ibe ugesi nomanyolo. Kwakunomshini kule ndawo owawusebenzisa inqubo okuthiwa i-methane fermentation ukuze wenze lokho kanye. Esikhundleni sokushisa imfucumfucu, lo mshini wawuyivundisa bese uyiguqula ibe igesi i-methane, okukhishwa kuyo i-hydrogen. Ama-fuel cell, asebenzisa ingxube yamakhemikhali ukuze akhe ugesi, ayefaka umoya-mpilo kule hydrogen ukuze aphehle ugesi. Kwakusala amanzi nomanyolo kuphela. Empeleni, lo mshini wagaya yonke imfucumfucu ewukudla phakathi nalo mbukiso, futhi ugesi owatholakala kuwo wasetshenziswa kwezinye izakhiwo zombukiso.

Kwenziwa ucwaningo olunzulu emkhakheni wamarobhothi, ngomgomo wokwakha imishini engasindi ekwazi ukusebenza njengabasizi babantu. Ukuze kuboniswe intuthuko esifinyelelwe ebuchwephesheni bamarobhothi, kwesinye isakhiwo kwakunamarobhothi angu-7 ahamba aya esiteji futhi akhanga izixuku ngokudlala umculo. Amanye ayedlala izinsimbi zomculo ezifuthwayo, echofoza izinkinobho kalula “ngeminwe,” kuyilapho elinye lishaya izigubhu. Isibukeli esithile sathi: “Ayenyakaza ngaphandle kwenkinga kangangokuthi wawungacabanga ukuthi abantu abazifihlile.”

Ezinye izinto ezimbili ezintsha zobuchwepheshe kwakuyipulasitiki ebolayo eyenziwe ngesitashi nemikhiqizo efana nayo kanye nama-nanobubble—amagwebu amancane egesi anobukhulu obungaphansi kwama-nanometer angu-200. Unwele lomuntu lungaba ama-nanometer angu-50 000 ubukhulu. Amagwebu anjalo ngokuvamile awahlali futhi anyamalala ngokushesha. Kodwa, abacwaningi baseJapane baye bavela nobuchwepheshe bokukhiqiza amagwebu angapheli omoya-mpilo, athuthukisa “ikhono lezinhlanzi nezimbaza lokuzivumelanisa nokushintsha kwendawo ezungezile.” Empeleni, idamu elithile lokufuya izinhlanzi elaligcwaliswe ngala magwebu amancane omoya-mpilo lakwazi ukugcina izinhlobo ezithile zezinhlanzi zasemfuleni nezasolwandle! Abacwaningi banethemba lokuthi lobu buchwepheshe buzosetshenziswa ekufuyeni izinhlanzi, kwezolimo nakweminye imikhakha.

Ingabe Umhlaba Uyalalela?

Nakuba le Expo yagcizelela isidingo sokulalela “ukuhlakanipha kwemvelo,” iningi labantu emhlabeni alinaki. Kunabantu abaningi abangenandaba, abahahayo nabakhohlakele abaphikisayo. Ngenxa yalokho, njengoba kwashiwo komunye umbukiso, umhlaba “usuyiPlanethi Elimele.” Kodwa ngisho nabantu abanezinhloso ezinhle abanawo amakhambi anokwethenjelwa ezinkinga zesintu nezemvelo. NgokweBhayibheli, la makhambi awanakufinyelelwa ngolwazi nokuhlakanipha komuntu. (Jeremiya 10:23) Kodwa likhona ithemba. Sikusho ngani lokho?

IBhayibheli lisitshela ukuthi uMthombo wokuhlakanipha ophakeme kunayo yonke—uMdali wethu—uzongenela ezindabeni zomhlaba ngaphambi kokuba abantu babhubhise umsebenzi wezandla zakhe. (IsAmbulo 4:11; 11:18) IHubo 37:10, 11 lithi: “Sekuyisikhashana nje, omubi abe engasekho . . . Kodwa abamnene bayodla ifa lomhlaba, futhi ngempela bayothola injabulo enkulu ngokuchichima kokuthula.” Yiqiniso, siyobe sihlakaniphile uma silalela imvelo, kodwa siyobe sihlakaniphe nakakhulu uma silalela uMdali ngokufunda nangokusebenzisa iZwi lakhe, iBhayibheli. (2 Thimothewu 3:16) Bonke abenza kanjalo bayobona imbulunga yethu egulayo iluleme ngokuphelele futhi iguqulwa ibe ipharadesi.—Luka 23:43.

[Isithombe ekhasini 24]

Umbukiso wamagwebu amancane

[Isithombe ekhasini 24]

Amabhasi angenabashayeli

[Isithombe ekhasini 24, 25]

Isimiso sezithombe zama-video eziyindilinga ezibonakala nxazonke

[Isithombe ekhasini 25]

I-Bio Lung eyakhiwa ngezitshalo ezingu-200 000 ezithathwe ezinhlotsheni ezingu-200

[Isithombe ekhasini 25]

Amarobhothi ayejabulisa izilaleli ngomculo