Lapho Uphelelwa Umsebenzi Ungalindele!

“Lapho ngiphelelwa umsebenzi, ngazizwa sengathi othile wayengibhunyele ngamanzi abandayo. Ngaqala ukuzinyeza kakhulu.”—UTony, eJalimane.

“Ngazizwa sengathi ngithwele itshe elisindayo. Njengomzali ongayedwa, ngangikhathazeke ngokuthi ngizoyithathaphi imali yokondla izingane zami ezimbili neyokukhokha izikweletu.”—UMary, eNdiya.

“Ngadumala kakhulu lapho ngiphelelwa umsebenzi, futhi ngakhathazeka ngizibuza ukuthi ngizowuthola yini omunye.”—UJaime, eMexico.

EMHLABENI wonke, izigidi zabantu zibhekana nosizi olunjengolukaTony, uMary noJaime. Ngasekuqaleni kwaleli khulu leminyaka, kwakulinganiselwa ukuthi abantu abangamaphesenti ayishumi obekufanele ngabe bayasebenza eYurophu nase-Asia Ephakathi—abantu abangaba yizigidi ezingu-23—babefuna umsebenzi. Emazweni athile asathuthuka, abantu abangaphezu kwengxenye eyodwa kwezine abasebenzi. I-New York Times ka-July 2003 ithi e-United States, “cishe bayizigidi ezingu-2,6 abantu abaye balahlekelwa umsebenzi kulezi zinyanga ezingu-28 ezidlule.”

Emazweni amaningi ukufuna umsebenzi kunezingqinamba ezinkulu. Ngokwesibonelo, unyaka ngamunye inqwaba yabantu abaphothula esikoleni esiphakeme nasekolishi ifuna umsebenzi. Ngaphezu kwalokho, ukuba neziqu noma ukuqeqeshelwa umsebenzi akusona isiqinisekiso sokuthi umuntu uzowuthola umsebenzi emkhakheni awukhethayo. Ngakho, sekuyinto evamile ukuba abantu bashintshe umsebenzi kaningana phakathi neminyaka yabo yokusebenza. Abanye kuze kudingeke bashintshe ngisho nomkhakha womsebenzi ngokuphelele.

Uma uzithola uphelelwe umsebenzi, yini ongayenza ukuze ube namathuba angcono okuthola umsebenzi? Futhi lapho usuwutholile, yini ongayenza ukuze uwulondoloze?