Izintaba Ziyovikelwa Ubani?
IZINSUKU ezine ngo-2002, eBishkek eKyrgyzstan (enkabeni ye-Asia) kwabanjwa iNgqungquthela Yezintaba Yamazwe Ngamazwe. Kwakuyingqungquthela yokuqala yamazwe omhlaba eyayihloselwe ukuxazulula izinkinga ezithinta izintaba. Abagqugquzeli babenethemba lokuthi unyaka ka-2002 wawuyoqala inkathi entsha, eqaphela ukubaluleka kwangempela kwezintaba.”
Ababebuthene kule ngqungquthela bamukela ngazwi-linye “IZimiso Zezintaba ZaseBishkek,” eziqukethe iziqondiso zabo bonke abakhathalela ukulondolozwa kwezintaba. Kwathiwa umgomo wazo “ukuthuthukisa ukuphila kwabantu abakhé ezintabeni, ukuvikela imvelo esezintabeni nokusebenzisa imithombo yemvelo esezintabeni ngokuhlakanipha.”
Kuye kwafinyelelwa intuthuko ethile. Isimiso sezindawo zokulondoloza imvelo emhlabeni wonke sivikela izindawo zezinto eziphilayo ezinhlobonhlobo ezinobuhle obuyingqayizivele. Ezingxenyeni eziningi zomhlaba, amaqembu alondoloza imvelo aye aphumelela ngezinga elithile ekunqandeni igagasi lokucekelwa phansi kwemvelo. Omunye umqondo omuhle owasikiselwa yiNgqungquthela Yezintaba eBishkek kwaba yisivumelwano esiqinile sokususa imfucumfucu yenuzi elahlwe ezintabeni zaseKyrgyzstan. Le mfucumfucu enobuthi obuyingozi yayisongela imithombo yamanzi yabantu abangamaphesenti angu-20 abasenkabeni ye-Asia.
Yize kunjalo, kuselukhuni ukuxazulula izinkinga ezihambisana nokuvikela izintaba zomhlaba. Ngokwesibonelo, ngo-1995, iziphathimandla zaseCanada zaqala “ISimiso Sokuphathwa Kwamahlathi” ukuze zivikele ingxenye esele yehlathi lemvula laseBritish Columbia. Nokho, uphenyo olwenziwa ngemva kwalokho lwembula ukuthi izinkampani ezigawula imithi zazingasishayi mkhuba lesi simiso futhi ziqhubeka zigawula imithi ngisho nasemithambekeni emibi kakhulu. Lesi simiso sathi ukuxegiswa ngo-1997, ngoba imboni yokugawulwa kwemithi yathi siwumthwalo osindayo.
Akuzona ezohwebo kuphela eziyisithiyo. Amazwi okuphetha eNgqungqutheleni yaseBishkek aphawula ukuthi impi, ubumpofu nendlala kunendima ekucekelweni phansi okuqhubekayo kwemvelo esezintabeni. Izintaba, kanye nawo wonke umhlaba, kuyoqhubeka konakala kuze kube yilapho izimbangela zomonakalo seziphelile.
Ukukhathalela KukaNkulunkulu Indalo Yakhe
Yize isimo sisibi ngale ndlela, sinesizathu sethemba. UNkulunkulu uMninimandla onke uyakubona okwenzeka endalweni yakhe. IBhayibheli limchaza njengaLowo ‘oziqongo zezintaba zingezakhe.’ (IHubo 95:4) Uyazikhathalela nezilwane ezihlala ezintabeni. NgokweHubo 50:10, 11, uJehova uthi: “Zonke izilwane zasendle ezisemahlathini zingezami, izilo eziphezu kwezintaba eziyinkulungwane. Ngizazi kahle zonke izidalwa ezinamaphiko zezintaba, noquqaba lwezilwane zasendle lukanye nami.”
Ingabe uNkulunkulu unendlela yokuvikela imvelo yomhlaba esengozini? Ngokuqinisekile! IBhayibheli lithi ‘umisé umbuso ongeke neze uchithwe.’ (Daniyeli 2:44) UJesu Kristu, uMbusi omisiwe kahulumeni kaNkulunkulu wasezulwini, uwuthakazelela ngokukhethekile umhlaba nabantu abakhe kuwo. (IzAga 8:31) Ukubusa kwakhe kuyoletha ukuthula emhlabeni, kuqede konke ukuxhashazwa, futhi kulungise umonakalo owenziwe kule mbulunga.—IsAmbulo 11:18.
Uma ufuna ikhambi elinjalo, akungabazeki ukuthi uyoqhubeka uthandazela ukuba ‘umbuso kaNkulunkulu uze.’ (Mathewu 6:9, 10) Imithandazo enjalo iyophendulwa nakanjani. Maduzane uMbuso kaNkulunkulu uyoqeda ukungabi nabulungisa futhi ulungise umonakalo owenziwe emhlabeni. Lapho lokhu kwenzeka, izintaba ‘ziyokhamuluka ngenjabulo’ ngomqondo ongokomfanekiso.—IHubo 98:8.