Ngiyakujabulela “Ukuhamba Elinye Imayela”
NJENGOBA ILANDISWA NGUCLAIRE VAVY
ISIQHINGI saseMadagascar, esicishe sibe amakhilomitha angu-400 ukusuka ezweni laseMozambique eMpumalanga ye-Afrika, sinezintaba nezinindolo zamahlathi. Ngazalelwa endaweni engasempumalanga yalesi siqhingi emzaneni waseBetoko II. Ngo-1987, ngineminyaka engu-15 ubudala, ngahamba ngayofunda edolobhaneni laseMahanoro elingasogwini lolwandle.
EMahanoro ngangihlala nomfowethu omdala uCelestin, owayeseqale ukufunda iBhayibheli noFakazi BakaJehova. Eminyakeni emibili kamuva nami ngaba nguFakazi. Ngangizimisele ukuba ngikhonze uJehova uNkulunkulu ngokugcwele kangangokusemandleni ami.
Imizamo Yokufinyelela Imigomo Yami
Omunye wemigomo yami eyinhloko kwakuwukusiza umkhaya wakithi lé emuva eBetoko II, futhi ngangithandaza njalo kuJehova ngalesi sifiso sami. Kodwa ngangikwazi ukuya ekhaya ngamaholidi esikole kuphela. Kwakuwuhambo olunzima lwamakhilomitha ayikhulu. Amakhilomitha okuqala angu-40 ngangingawahamba ngemoto, kodwa amakhilomitha asele angu-60 ngangingawahamba ngezinyawo endleleni ewumngcingo esentabeni.
Kwakudingeka ngidonse imimango eminingi, futhi ezinye izingxenye zendlela emangelengele zaziwumngcingo zingangonyawo lwami. Ngokuvamile ngangiye ngikwazi ukuhamba amakhilomitha angu-40 uma ngiluqale ekuseni uhambo lwami laze langishonela ngisendleleni. Ngangiphatha umthwalo ongamakhilogremu angu-15—omunye ngangiwuthwala, omunye ngiwubelethe bese kuthi osele ngiwubambe ngezandla. Ngokuyinhloko ngangiphatha izincwadi zeBhayibheli, engangizipha izihlobo zami nabanye abantu abathanda ukufunda. Abantu abahlala ngakule ndlela base bengibiza ngokuthi “intombi yemithwalo eminingi.”
Ekuqaleni, naphezu kwentshiseko yami, umkhaya wakithi wawenqaba ukungilalela lapho ngiwuxoxela ngezinkolelo zami ezintsha. Nokho, kwathi kungekuphi waqala ukushintsha futhi wangihloma imibuzo eminingi kangangokuthi ngezinye izikhathi sasilala ngehora lesibili ekuseni.
Ukuvakasha Okungenakulibaleka
Ngo-December 24, 1990, ngavakashela ekhaya eBetoko II. Bajabula kakhulu ekhaya lapho ngifika, becabanga ukuthi ngizodl’ uKhisimusi nabo. Injabulo yabo yaphenduka indumalo lapho ngibachazela ukuthi kungani ngingenakukwazi ukuhlanganyela nabo emicimbini yabo kaKhisimusi. Bazizwa benamahloni okuchaza le nto kubantu bendawo, lokhu umphakathi walapha wawubumbene kakhulu. Ngakho ngezwa kunesidingo sokuba ngithathe isinyathelo kuqala, ngikwenze mathupha lokhu. Kodwa kanjani?
Ngangingaqiniseki, ikakhulu njengoba ngangisemncane impela. Ngazibuza ukuthi kwakuzofaneleka yini ukuba ngichaze izinkolelo zami lapho umphakathi uhlangene esontweni ngosuku olulandelayo. Ngathandaza isikhathi eside kuJehova, ngimcela ukuba angiqondise. Ngemva kwalokho ngabuza umfowethu omdala uPaul, owayefundisa esontweni, ngathi, “Ucabanga ukuthi kuzofaneleka yini ukuba ngichazele abeze esontweni kusasa ukuthi kungani ngingawugubhi uKhisimusi?” Wahlanganisa ikhanda nabanye, babe sebesamukela isicelo sami.
Ngosuku olulandelayo ngemva kokuba inkonzo yesonto isiphelile, kwathunyelwa othile ukuba azongibiza. Ngemva kokuthandaza futhi kuJehova, ngathatha izincwadi zeBhayibheli ngaqonda khona. Ngemva kokwethulwa, ngababonga bonke ababekhona ngengxenye ábaba nayo ekungisizeni ukuba ngikhule nginenhlonipho ejulile ngeBhayibheli. Ngachaza ukuthi lapho ngifika edolobheni ngaqhubeka ngifunda iBhayibheli. Ngabatshela ukuthi ngase ngitholé amaqiniso amaningi eBhayibhelini esasingawafundiswanga ngaphambili.
Ngasebenzisa leli thuba ukuba ngichaze ithemba leBhayibheli lokuphila phakade emhlabeni oyipharadesi (IHubo 37:29; IsAmbulo 21:3, 4), isizathu sokuthi kungani bembalwa abantu abathembekile emhlabeni abayokuya ezulwini (Johane 14:2, 3; IsAmbulo 5:9, 10; 14:1, 3) kanye nemfundiso yeBhayibheli yokuthi abafileyo bafana nabantu abalele abezwa lutho futhi ngenxa yalokho akunakwenzeka ukuthi bayahlupheka (UmShumayeli 9:5, 10; Johane 11:11-14, 38-44). Ngabuye ngababonisa nokuthi amaKristu okuqala ayengawugubhi uKhisimusi nokuthi lo mkhosi wawunomsuka wobuqaba.
Ngemva kokuphetha inkulumo yami, abaningi bavuma ukuthi engakusho kwakuyiqiniso. Abanye baze babuza nemibuzo eyengeziwe. Ngemva kwalokho ngababonisa izincwadi engangize nazo ngachaza ukuthi ziyizinsiza-kufunda zeBhayibheli ezinyatheliswa oFakazi BakaJehova. Ngabatshela ukuthi ngangizimisele ukusiza noma ngubani owayengathanda ukufunda iBhayibheli. Abaningi bazamukela izincwadi zeBhayibheli.
Ukuthola Okuthile Okumangalisayo
Owesifazane othile engangingamazi weza kimi wayesethi, “Udadewethu ohlala komunye umzana, ukanye nani kule nkonzo yenu.” Ngimangele ngabuza, “Uhlala kuphi?”
“E-Andranomafana,” ephendula. Le ndawo iqhele ngamakhilomitha angaba ngu-30 ukusuka eBetoko II.
Ngathi kulona wesifazane mhlawumbe udadewabo ungowenye inkolo ehlukile, lokhu oFakazi bayazana bonke kule ndawo. Nokho, lona wesifazane waphikelela ethi udadewabo wayemfundise zona kanye lezi zinto engangizichaze enkulumweni yami esontweni. Ngambuza igama nekheli likadadewabo, njengoba ngase ngimagange ukuba ngiye kuleyo ndawo ngaphandle kokupholisa amaseko. Nokho umama wanginxusa ukuba ngike ngithi ukulinda izinsukwana, ngoba lolu hambo lwalungelula neze, kwazise sasizoshaya ngonyawo. Ezinsukwini ezimbili kamuva mina nomfowethu uCharles sabhekisa amabombo e-Andranomafana.
Lapho sifika nje khona, sabuza abathile abahlala kuleyo ndawo ukuthi, “Ingabe bakhona oFakazi BakaJehova kule ndawo?” Ngadumala lapho bephendula bethi, “Kule ndawo kukhona amaKatolika, iSonto Likamoya nelama-Independent nje kuphela.”
Kwabe sekuvela owesifazane othile wathi, “Uma nifuna oFakazi BakaJehova, kungenzeka ukuthi nifuna uMarceline nomkhaya wakhe.” Yilelo gama kanye esasilifuna!
Othile wahamba wayombiza uMarceline. Wafika ngokushesha kodwa ebonakala ethukile ngandlela-thile. Umphakathi wonke wathí bu kithi wasingunga, ngoba wawucabanga ukuthi siyizisebenzi ezithile zikahulumeni ezazizomphenya. Kamuva ngezwa ukuthi yena nomkhaya wakhe babeshushiswa kakhulu kule ndawo ngenxa yokuqhuba ‘inkolo engaziwa.’
UMarceline wathi ukusiqhelisa kancane esixukwini, wasiyisa lapho sasingakwazi ukuxoxa khona. Lapho ngimbuza ukuthi unguFakazi KaJehova yini, wathi yebo unguye. Kwathi angasho lokho wahamba wayolanda incwadi ethi IQiniso Eliholela Ekuphileni Okuphakade, okwakuyincwadi yokuqhuba izifundo zeBhayibheli eyayisetshenziswa oFakazi BakaJehova ngaphambili, kanye namakhophi amadala e-Nqabayokulinda. Zonke lezi zincwadi zazizindala futhi zidabukile. Ngambuza: “Nifunde muphi umagazini ngeSonto elidlule?”
Ephendula wathi: “Yilab’ omagazini kuphela esinabo futhi siyaye sifunde bona ngokuphindaphindiwe.” Kungaleso sikhathi-ke lapho ngamtshela khona uMarceline ukuthi nami nginguFakazi. Wajabula kakhulu! Lapho ngimtshela ukuthi ngingathanda nokubona umuntu owayeqhuba imihlangano yabo, wachaza ukuthi wayehlala kwenye indawo, eqhele kakhulu kweyabo.
Ukuthola Okunye Okujabulisayo
Ngosuku olulandelayo sahamba sobabili noMarceline siyovakashela lo muntu. Wajabula kakhulu lapho esibona sifika futhi wamangala kakhulu. Kwahlaluka ukuthi naye empeleni wayenguye uFakazi futhi wayevela edolobheni laseToamasina elingasogwini, elingamakhilomitha angaphezu kuka-200 enyakatho-mpumalanga. Yena nomkhaya wakhe baphoqeleka ukuba bathuthe eToamasina babuyele lapha ngemva kokulahlekelwa umsebenzi kungazelelwe. Lapho esebuyile, waqala ukushumayela, eqhuba izifundo zeBhayibheli kanye nemihlangano.
Lo Fakazi nomkhaya wakhe bajabula kakhulu ukubona amakhophi amuva e-Nqabayokulinda engangiwaphethe. Ngababonisa nencwadi ethi Ungaphila Phakade EPharadesi Emhlabeni, esasiyisebenzisa ngaleso sikhathi njengencwadi yethu eyinhloko yokuqhuba izifundo zeBhayibheli. Babeqala ngqá ukuyibona. NgeSonto elilandelayo ngabuyela e-Andranomafana ukuze ngibe kanye nabo emihlanganweni. Ngabakhuthaza ukuba baxhumane nehhovisi legatsha loFakazi enhloko-dolobha yase-Antananarivo, njengoba ihhovisi legatsha lalingazi lutho ngaleli qembu labo elincane.
Kusukela ngo-January 1991, ngangisuka eMahanoro ngiye e-Andranomafana cishe nyanga zonke, ngibayisela amakhophi amuva e-Nqabayokulinda kanye nezinye izincwadi. Kwakuwuhambo olungamakhilomitha angaba ngu-130 ukuya nangaba ngu-130 ukubuya, futhi angaphezu kuka-85 awo ngangiwashaya ngonyawo—ngilokhu ngewusa ngiphinde ngidonse imimango emangelengele, nginqamula ezinindolweni zamahlathi, kuthi lapho lina, ngizabalaze obishini olushelelayo.
Umthwalo wami wawuya ngokuya usinda ngoba inani lalabo ababedinga izincwadi nalo laliya ngokuya landa. Nokho, ekupheleni kohambo ngalunye ngangiba nomuzwa ojulile wokwaneliseka nenjabulo okwakwenza ngingakushayi mkhuba ukukhathala nokuqaqamba kwemisipha. Yeka ukuthi kwakujabulisa kanjani ukubona indlela leli qembu elalijabula ngayo lapho lithola incwadi ngayinye entsha nokulibona lithatha isinyathelo maqondana namaqiniso eBhayibheli elaliwafunda!
Ukuqala Inkonzo Yesikhathi Esigcwele
Ngo-September 1, 1992, ngamiswa njengephayona, njengoba oFakazi bezibiza kanjalo izikhonzi zabo zesikhathi esigcwele. Ngaphayona eMahanoro kodwa ngangilokhu ngixhumana nezihlobo zami eBetoko II ngokuzibhalela. Ngokuhamba kwesikhathi ngaqala ukuziqhubela isifundo seBhayibheli ngokubhala izincwadi, futhi zangibuza ukuthi ngingethande yini ukubuyela ekhaya ngizozisiza. Ngangizimisele ukukwenza lokhu, kodwa ngangifuna ukuqale ngiqiniseke ukuthi zazingadlali ngami lapho zithi sezinqume ukufunda iBhayibheli ukuze zithuthuke ngokomoya. Ngakho ngake ngathi ukuqhubeka ngiphayona eMahanoro okwesikhashana.
Ngasekupheleni kuka-1993, ngaba nelungelo lokuyofunda amasonto amabili esikoleni samaphayona e-Antananarivo. Ngemva kwalokho, ngakhuthazwa ukuba ngifake isicelo sokuba yiphayona elikhethekile, okwakungase kuhilele ukuba ngabelwe kunoma iyiphi indawo kuleli zwe. Nokho, ngaba manqikanqika ukusamukela lesi sikhuthazo kwazise ngangifuna ukusiza izihlobo zami eBetoko II, ezazihlala endaweni eqhelelene kakhulu nebandla ezazingaya kulo. Ngakho ngabuyela esabelweni sami sokuphayona eMahanoro.
Ekugcineni, lapho sihanjelwe umbonisi ojikelezayo woFakazi BakaJehova, ngambuza ngokubuyela ekhaya ngiyosiza izihlobo zami. Ngaleso sikhathi lase likhona ibandla elimisiwe e-Andranomafana, ngakho wasikisela ukuba ngiye khona ukuze ngikwazi ukukhonza kulelo bandla kodwa ngishumayele ensimini yaseBetoko II. Ngaqala kuleso sabelo ngo-September 1, 1994. Ngayo leyo nyanga, ngaya emhlanganweni wesigodi nomfowethu uPaul, owayefundisa esontweni. Ngokushesha nje abangu-30 base behlanganyela emsebenzini wokushumayela e-Andranomafana, futhi kwakuba nabantu abangaba ngu-65 emihlanganweni yethu ngeSonto.
Angizange Ngiyeke Ukuhamba
Ngemva nje kokubuyela eBetoko II, abafowethu nodadewethu abane bafanelekela ukuba bahlanganyele enkonzweni yasensimini njengoFakazi BakaJehova, futhi ngokushesha ngemva kwalokho babhapathizwa. Ngemva kokubuyela eBetoko II, ngangiya njalo e-Anosibe An’ala ngiyolanda izincwadi nomagazini, okwakuwuhambo lwezinyawo olungamakhilomitha angu-50 ukuya nangu-50 ukubuya. Nakuba kwakuwuhambo olukhandlayo, injabulo engangiba nayo lapho ngibona ukwanda okungokomoya kuleyo ndawo yayivele yenze konke lokho kube yize.
Namuhla, kunebandla elichumayo eBetoko II, elinabantu abangaba ngu-45 ababa khona emihlanganweni ngeSonto. Zonke izihlobo zami eziseduze kule ndawo sezingoFakazi, futhi eziningi kuzo zingamaphayona avamile. Umfowethu omncane uyiphayona elikhethekile. Ngo-November 1, 2001, nami ngamiswa njengephayona elikhethekile, futhi ngabelwa emzini wase-Antanambao-Manampotsy. Kodwa ngahamba eBetoko II ngeneme enhliziyweni.
Lapho ngiqala ukufunda amaqiniso eBhayibheli ngo-1987, kwakunoFakazi abangaphansi kuka-3 000 eMadagascar. Manje kunabangaphezu kuka-14 000. Njengabaningi kubo, ngiyajabula kakhulu ngethuba eliyingqayizivele lokukwazi ukusebenzisa amandla ami “ngihambe elinye imayela” ngiyosiza abanye abantu. Futhi ngibonga uJehova ngokuthi uye wayibusisa imizamo yami kulokhu.
[Isithombe ekhasini 24, 25]
Ngokuvamile ngangihamba amakhilomitha angu-60 ngiphethe umthwalo ongaphezu kwamakhilogremu angu-15 ngiya ekhaya emaphandleni
[Isithombe ekhasini 25]
Umfowethu omdala uPaul
[Isithombe ekhasini 26]
Umfowethu uCharles
[Isithombe ekhasini 26]
Ngikanye namalungu athile omkhaya wakithi. Bonke laba sebengoFakazi BakaJehova