Liyini Ikusasa Lomkhakha Wezokwelapha?

UKUBUZA ngekusasa lodokotela ngokuvamile kuholela ekuqageleni ngentuthuko yezobuchwepheshe nasekutheni ingabe le ntuthuko izobakhulula yini odokotela emisebenzini evamile ukuze bachithe isikhathi esengeziwe nesiguli ngasinye. Kakade, ikusasa lodokotela lihlobene eduze nendaba ebanzi yekusasa lesintu. Izincwadi ezimbili zeBhayibheli ezisikhanyisela ngalelo kusasa zilandisa ngomlando kaJesu nabaphostoli bakhe. Zombili zabhalwa udokotela.

Kungani kubaluleke kangaka ukuthi lezo zincwadi zomlando zinombono kadokotela? Zihlobene ngani nekusasa lodokotela neleziguli? Kungani odokotela abathile belangazelela isikhathi lapho ubuchwepheshe babo bungeke busadingeka khona?

Odokotela abaningi bayizingqapheli ezicophelelayo. Lezi zincwadi ezimbili zeBhayibheli zalotshwa uLuka, obizwa ngokuthi “udokotela othandekayo,” futhi wanikeza imininingwane yabantu abagulayo abaphulukiswa uJesu kanye nabaphostoli. (Kolose 4:14) Ngakho, uLuka usisiza ukuba sicabangele le mibuzo: Ingabe lezi zinto zenzeka ngempela? Uma kunjalo, lokhu kubathinta kanjani odokotela neziguli namuhla?

Ubufakazi Bezokwelapha Obuqinisekisiwe

ULuka waba nethuba lokuqinisekisa ukuthi lokho kuphulukiswa okuyisimangaliso kwenzeka ngempela yini ngokuxoxa nofakazi bokuzibonela. Ngaphezu kwalokho, wahamba kakhulu nomphostoli uPawulu. Kusobala ukuthi uPawulu waphulukisa abantu abaningi uLuka ekhona. Njengoba sicabangela ukulandisa kwalo dokotela ngezenzakalo ezimbili zokuphulukisa okunjalo, phawula ukuthi waningiliza kangakanani.

ULuka usinikeza isikhathi, usuku, nendawo yesenzakalo esilandelayo: Kwakuphakathi kwamabili ngosuku lokuqala lwesonto, futhi iqembu lamaKristu lalisegunjini esitezi sesithathu eTrowa, esifundazweni saseRoma esise-Asiya. (IzEnzo 20:4-8) Nakhu esikufundayo: “Insizwa ethile egama layo lingu-Evitiku yehlelwa ubuthongo obukhulu lapho uPawulu eqhubeka ekhuluma, futhi, ifofobaliswa ubuthongo, yawela phansi isuka esitezi sesithathu yathathwa isifile.” Khona-ke, ngamandla kaNkulunkulu, uPawulu welapha amanxeba ale nsizwa futhi wayivusa ekufeni. Sebedlile, “umfana bamthatha ephila futhi baduduzeka kakhulu.”—IzEnzo 20:9-12.

ULuka ubika ukuthi wayenoPawulu futhi eMelitha. Babamukelwe ngomusa uPhubhiliyu, “indoda evelele” yalesi siqhingi, lapho uPawulu enza esinye isimangaliso. Sasihilela indoda eyayisesimweni esasisongela ukuphila ngalezo zinsuku, engakabikho amaphilisi anamuhla. ULuka uyalandisa: “Uyise kaPhubhiliyu wayelele ecindezelwe umkhuhlane nesihudo, uPawulu wangena kuye wathandaza, wambeka izandla wamphulukisa. Ngemva kokuba kwenzeke lokhu, bonke abanye abantu ababegula esiqhingini nabo beza kuye belashwa.”—IzEnzo 28:7-9.

Yini Eyaqinisekisa Lo Dokotela?

ULuka wabhala lezi zenzakalo encwadini yezEnzo lapho abafundi bencwadi yakhe babesengakwazi ukuqinisekisa okwakwenzekile ngokuxoxa nabantu abahilelekile. Ngokuphathelene nalokho akubhala encwadini yeBhayibheli ebizwa ngaye, uLuka wabhala: “Ngiye ngazilandela ngokunembile zonke izinto kusukela ekuqaleni . . . ukuze ubazi ngokugcwele ubuqiniso bezinto.” (Luka 1:3, 4) Lokho lo dokotela akubona nakucwaninga kwamqinisekisa ukuthi izimfundiso zikaJesu zaziyiqiniso. Ukuphulukiswa ngokuyisimangaliso kwakuyingxenye yalezo zimfundiso, okunikeza isisekelo sokukholelwa esiprofethweni seBhayibheli sokuthi ekugcineni uNkulunkulu uyozinqoba izifo. (Isaya 35:5, 6) Njengodokotela owayejwayele ukubona ukuhlupheka kwabantu, kumelwe ukuba kwamduduza kakhulu uLuka ukucabanga ngesikhathi lapho ulwazi lwakhe lwalungeke lusadingeka khona. Ingabe liyakukhanga ithemba elinjalo?

Ngokuthakazelisayo, yilokho ikusasa elikuphathele labo abathanda uNkulunkulu, kungakhathaliseki ukuthi bahlalaphi. IBhayibheli lithembisa ukuthi ngaphansi koMbuso kaNkulunkulu, “akekho ohlala khona oyothi: ‘Ngiyagula.’” (Isaya 33:24) Odokotela abaningi banamuhla baye baphetha ngokuthi kunesisekelo esizwakalayo sokukholelwa ezithembisweni zeBhayibheli.

“Langithakazelisa Kakhulu”

“Njengeningi labantu, ngafundela ubudokotela ukuze ngisize abantu abahlushwa yizifo,” kusho uDkt. Jon Schiller, ongudokotela wemindeni eNyakatho Melika. “Ithemba lezwe elingenazifo langithakazelisa kakhulu. Ngaqala ukuya emihlanganweni yoFakazi BakaJehova ngemva kokwenza izifundo zasekolishi zomlando wempucuko yamazwe aseNtshonalanga. Lezi zifundo zabonisa ukuthi izinkolo ziyimbangela yezinkinga eziningi, futhi kimi kubonakala sengathi zazisebenzisa neBhayibheli ngobuzenzisi. Ngakho ngazibuza, ‘Lithini ngempela iBhayibheli?’

“EHholo LoMbuso LoFakazi BakaJehova, ngaqale ngakhangwa abantu abanobungane, ababehluke ngempela kubantu abaningi engibajwayele. UFakazi othile weza kimi wacela ukuba angivakashele sizoxoxa ngeBhayibheli. Okwangihlaba umxhwele ukuthi kungakhathaliseki ukuthi yini engangiyibuza, wayengibonisa impendulo eBhayibhelini.

“Njengoba ngikhula, ngiya ngikwazisa nakakhulu ukuba omunye woFakazi BakaJehova. Lapho usemusha uqala ukuba udokotela, usuke unethemba lokufinyelela okuthile okukhulu. Kodwa ngivame ukubona abantu abadumele abanomuzwa wokuthi akukho lutho ngempela abalufinyelele. Ngicabanga ukuthi into evelele ngokuba omunye woFakazi BakaJehova ukuthi sinethemba lekusasa nenjongo ekuphileni. Kungakhathaliseki ukuthi singodokotela, omakhenika, noma abahlanzi, siyazi ukuthi lokho esikwenzayo enkonzweni yethu kuNkulunkulu kuyazuzisa; kukhona okuthile esikwenzela uJehova. Futhi lokho kuyasanelisa.”

“Ukusebenzisa Izimiso ZeBhayibheli Kwathuthukisa Ukuphila Komkhaya Wethu”

UDkt. Krister Renvall ungudokotela eFinland, futhi uyathanda ukuxoxa nezingane njalo. Uthi: “Ngelinye ilanga ngaxoxa nentombazane eneminyaka engu-12 eyayinomdlavuza osuqhubeke kakhulu. Yanginika incwadi ethi Ukuthula Kweqiniso Nokulondeka—Kuvela Kumuphi Umthombo?a Lokho eyakusho ngokholo lwayo kuyilapho igulela ukufa kwangihlaba umxhwele, kodwa angizange ngisithole isikhathi sokufunda le ncwadi. Empeleni, ngaleso sikhathi, ngangisebenza emtholampilo eHelsinki ngimatasa kangangokuthi lokhu kwakuphazamisa ukuphila komkhaya wami.

“Nokho, ngemva kwesikhathi esithile, umkami wathatha le ncwadi eshalofini waqala ukuyifunda. Zisuka nje wabona ukuthi lokhu ayekufunda kwakuyiqiniso. Omunye woFakazi BakaJehova wamvakashela futhi waqala ukumfundela iBhayibheli. Ekuqaleni umkami wayesaba ukungitshela ngalokhu. Kodwa lapho engitshela, ngathi, ‘Noma yini engasiza umkhaya wethu yinhle.’ Ngaqala ukuhlanganyela esifundweni. Ukusebenzisa izimiso zeBhayibheli kwathuthukisa ukuphila komkhaya wethu futhi kwasinika umbono omusha ngokuphila. Ngajabula lapho ngifunda ngethemba lezwe elingenazifo; kwakubonakala kunengqondo ukuthi uNkulunkulu unaleyo njongo ngesintu. Ngokushesha mina nomkami, futhi ekugcineni nawo wonke umkhaya wethu, sabhapathizwa. Leya ntombazanyana eyaxoxa nami ekuqaleni yashona, kodwa empeleni, ukholo lwayo lusaphila.”

Ukuphila kodokotela kuya kucindezela nakakhulu ezweni lethu elishintsha ngokushesha, okwenza ukuzidela kwabo ekusizeni abagulayo kuncomeke ngempela. Kodwa maduze nje kuzofika izinguquko ezinkulu kunazo zonke ezake zathinta isintu. Odokotela abaningi namuhla babheke phambili ngokuqiniseka esikhathini esizayo esithenjiswa yiZwi likaNkulunkulu—izwe elingenazifo! (IsAmbulo 21:1-4) Lena yindaba okuyokusiza ukuzicwaningela yona mathupha.

[Umbhalo waphansi]

[Ibhokisi/Izithombe ekhasini 24, 25]

“NGAQAPHELA UKUTHI UKUPHILA KUNENJONGO”

“Lapho ngisebenzelana nezingane zesikole ezikhubazekile, ngaqaphela indlela abazali abangoFakazi BakaJehova ababehluke ngayo. Babebonakala bebhekana kangcono nokuba nengane ekhubazekile kunabanye abazali abasesimweni esifanayo. Ngaqaphela nokuthi babefunde kakhulu kunalokho obungakulindela uma ubheka imisebenzi ababeyenza. Ukholo lwabo lwalungihlaba umxhwele. Ukholo lwami lwalushabalele ngokuphelele ngenxa yabantu ababefundisa ngokuziphendukela kwemvelo. Nokho, lapho ngifundela ubudokotela ngamangala kakhulu ngesimangaliso sokuphila.

“Ngaso leso sikhathi, ngase ngiqale ukuqaphela ukuthi ngangingayazi indlela yokukhulisa izingane zami. Yini okungafanele ngiyivumele? Yikuphi okufanele ngikukhuthaze? Ngingazikhuthaza ukuba zibe nayiphi injongo ekuphileni? Kwamina ngangingasenanjongo ekuphileni. Ngaze ngathandazela nosizo.

“Kungaleso sikhathi-ke lapho oFakazi BakaJehova bangilethela khona umagazini okhuluma ngendlela yokukhuza nokusola izingane ngothando. Ngazithola ziwusizo kakhulu izimiso zeBhayibheli ezazichazwa kuwo, ngakho ngavuma ukuqhutshelwa isifundo seBhayibheli. Njengoba ngifunda ukuthi kungani uJehova adala ukuphila nokuthi kungani uJesu afa, ngaqaphela ukuthi ukuphila kunenjongo. (Johane 3:16; Roma 5:12, 18, 19) Ukuziphendukela kwemvelo kwakusonte imicabango yami. Yeka indlela engajabula ngayo lapho ngifunda ukuthi izifo nokufa kwakungeyona ingxenye yenjongo kaNkulunkulu yasekuqaleni! Namuhla, kusangenelisa ngempela ukufundisa abantu abaqotho ukuthi maduzane uNkulunkulu uzozelapha kanjani zonke izifo.”

[Isithombe]

UHelena Bouwhuis wayengudokotela wezingane zesikole eNetherlands

[Izithombe ekhasini 23]

ULuka owayengudokotela futhi engumlobi weBhayibheli wayehamba noPawulu lapho lo mphostoli ephulukisa uyise kaPhubhiliyu futhi evusa u-Evitiku

[Izithombe ekhasini 24]

UDkt. Jon Schiller, wase-United States

[Izithombe ekhasini 24]

UDkt. Krister Renvall, waseFinland