Ungazitholaphi Izimpendulo?

UKE wazizwa yini ucasulwa impikiswano eshubile emayelana nokuziphendukela kwemvelo nendalo? Uma kunjalo, awuwedwa.

Kakade, ngakolunye uhlangothi lwale ndaba kunososayensi abafundile nezazi, ngokuvamile abasebenzisa ulimi lobuchwepheshe, abaphikelela ngokuthi uma ufundile futhi ukhaliphile, kumelwe uyamukele njengeyiqiniso imfundiso yokuziphendukela kwemvelo. Ngakolunye uhlangothi kunabaholi benkolo abaqhosha ngendlela efanayo besebenzisa imibuzo engadingi mpendulo ethinta imizwelo bethi uma ukholwa ngeqiniso, kumelwe uyamukele imfundiso yabo ngendalo.

Imibono eyeqisa kanjalo yenza abantu abaningi abanengqondo baziqhelanise nale ndaba. Indaba yokuba khona kukaNkulunkulu idinga okungaphezu kokumane nje unamathele ngokungaguquki nangokungenangqondo emibonweni yakho. Khumbula, le ndaba ingaphezu kokumane nje ibe impikiswano, ingaphezu nje kwesivivinyo sokukhalipha kwengqondo. Le ndaba ingathinta ukuphila kwakho nekusasa lakho.

Inkinga Evamile Kososayensi

Njengoba sibonile, kunososayensi abaningana abadumile, abafundile abathi ubufakazi bubonisa ukuthi ukhona uMklami noma uMdali. Abanye benza okungaphezu kwalokhu. Bangabaza ubuqotho bozakwabo kwezesayensi labo ngokungenangqondo abakuchilizela eceleni ukuba khona kukaNkulunkulu.

Ngokwesibonelo, uJohn R. Baumgardner oyisazi sesayensi yokwakheka komhlaba uyaphawula: “Uma kucatshangelwa ukuthi ziningi kangakanani izizathu ezimelene nokuziphendukela kwemvelo, kwenzeka kanjani ukuba noma imuphi usosayensi oqotho athi ukuba yinkimbinkimbi esikubona ezintweni eziphilayo kumane nje kwazenzekela? Ukusho lokhu ube uzazi kahle lezi zizathu, kimi kuwukwephula imithetho yesayensi ngendlela engathi sína.”

Isazi sesayensi yemithetho yemvelo esaziwa kakhulu uRichard Feynman saveza esinye isici sokuba qotho esayensini. Enkulumweni yokuvula eyunivesithi sakhuluma “ngohlobo oluthile, olwenezelwe lobuqotho.” Sathi lolu hlobo luhlanganisa “ukugoba uvume ukuthi kungenzeka unephutha.” Sathi ukwenza kanjalo “kuwumthwalo wethu wemfanelo njengososayensi, ngokuqinisekile esinawo kwabanye ososayensi, nakubantu abavamile.”

Kukangaki sizwa abashisekela ukuziphendukela kwemvelo besebenzisa inkulumo enjengokuthi “kungenzeka nginephutha” emibonweni yabo? Ngokudabukisayo isizotha esinje sibonakala sintuleka kakhulu phakathi kwabo. Eqinisweni, isizotha nobuqotho kufanele kuholele ososayensi abengeziwe ukuba bavume ukuthi isayensi, elinganiselwe ekucwaningeni ngendawo ebonakalayo kuphela, ayikuhlomele ukuphendula imibuzo emayelana nokuba khona koMdali. Nokho, kuthiwani ngabaholi benkolo abashumayela ngendalo eyathatha izinsuku ezimbalwa?

Inkinga Evamile Ngabaholi Benkolo

Isizotha nobuqotho kuntuleka kakhulu nakubaholi benkolo. Ngoba buphi ubuqotho uma umuntu egomela ngokuthi iBhayibheli lifundisa lokho elingakufundisi? Siphi isizotha uma ubeka imibono yakho namasiko owathandayo ngaphezu kweBhayibheli? Yilokhu kanye abafundisa ngendalo eyathatha izinsuku ezimbalwa abakwenzile.

Ngokwesibonelo, abathi indalo yathatha izinsuku ezimbalwa ngokuvamile bathi indawo yonke yadalwa ngezinsuku eziyisithupha ezingokoqobo zamahora angu-24 eminyakeni engaba ngu-6 000 edlule. Ngalezi zimfundiso ezinje, balimelela kabi iBhayibheli, elithi uNkulunkulu wadala izulu nomhlaba “ekuqaleni”—esikhathini esithile esingashiwongo ngaphambi kokuba kuqale “izinsuku” zokudala ezicace ngokwengeziwe. (Genesise 1:1) Kuyaphawuleka ukuthi ukulandisa okukuGenesise kubonisa ukuthi igama elithi “usuku” lisetshenziswe ngomqondo ohambisana nomongo. KuGenesise 2:4, kubhekiselwa kuyo yonke inkathi yezinsuku eziyisithupha echazwe esahlukweni esandulelayo ngokungathi usuku olulodwa. Ngokunengqondo, lezi kwakungezona izinsuku ezingokoqobo ezinamahora angu-24, kodwa kunalokho ziyinkathi ende yesikhathi. Kusobala ukuthi ngalunye lwalezi zinsuku lwathatha izinkulungwane zeminyaka.

Ngeshwa, abafundisi benkolo ngokuvamile nabo bayaphaphalaza ezindabeni zokholo. Abanye kubonakala sengathi basikisela ukuthi ukuba nokholo kuhlanganisa ukushukunyiswa imizwelo ukuba ukholelwe entweni ethile yize bungekho ubufakazi obuqinile obuyisekelayo. Kubantu abaningi abacabangayo lokhu kuzwakala njengokuthatheka. IBhayibheli liluchaza ngokuhlukile ukholo: “Ukholo luwukulindelwa okuqinisekisiwe kwezinto ezithenjwayo, ukuboniswa okusobala kwezinto ezingokoqobo nakuba zingabonakali.” (Hebheru 11:1) Ngakho ukholo lwangempela alukona ukuthatheka nje. Lusekelwe ebufakazini obuqinile, ekuqinisekisweni okunengqondo.

Pho-ke, ukholo kuNkulunkulu lusekelwephi? Kunamaqoqo amabili obufakazi anohlonze ngendlela elinganayo.

Ukuhlolisisa Ubufakazi

Umphostoli uPawulu washukunyiswa ukuba alobe ukuthi “izimfanelo [zikaNkulunkulu] ezingabonakali zibonakala ngokucacile kusukela ekudalweni kwezwe kuye phambili, ngoba ziqondakala ngezinto ezenziwe, ngisho namandla akhe angunaphakade nobuNkulunkulu bakhe.” (Roma 1:20) Sekuyizinkulungwane zeminyaka amadoda nabesifazane abahlakaniphile beqaphela ukuthi imvelo ibonisa ukuthi uNkulunkulu ukhona.

Njengoba sibonile, isayensi ingaba ithuluzi eliwusizo kule ndaba. Lapho sifunda ngokuba yinkimbinkimbi nokuhleleka kwendawo yonke, siba nezizathu ezengeziwe zokubabaza Lowo owayiklama yonke. Abanye ososayensi bazimisele ukubuvuma lobu bufakazi futhi buyabakholisa. Akungabazeki ukuthi bayothi isayensi iye yabasiza ukuba bazi uNkulunkulu. Kubonakala sengathi abanye ososayensi, kungakhathaliseki ukuthi lobu bufakazi bungaba buningi kangakanani, abasoze bakholwa. Kuthiwani ngawe?

Uma uzimisele ukuhlola ubufakazi ngale ndaba, sikukhuthaza ukuba wenze kanjalo. Incwadi ethi Is There a Creator Who Cares About You? iklanyelwe ukukusiza kulo mkhankaso obalulekile wokufuna izimpendulo.a Ngaphezu kwalokho, iyokusiza ukuba uhlole iqoqo lesibili lobufakazi bokuba khona kukaNkulunkulu: iBhayibheli.

IBhayibheli liqukethe ubufakazi obuningi bokuthi laphefumulelwa umuntu ohlakaniphe ngaphezu komuntu. Ngokwesibonelo, liqukethe iziprofetho eziningi noma imilando eyabhalwa ingakenzeki. Ezinye zalezi ziprofetho zichaza zona kanye izimo zezwe lethu lanamuhla! (Mathewu 24:3, 6, 7; Luka 21:10, 11; 2 Thimothewu 3:1-5) Abantu abakwazi ukubikezela ikusasa ngendlela enokwethenjelwa. Ubani omunye ngaphandle kukaNkulunkulu ongayenza into enje?

Nokho, iBhayibheli aligcini nje ngokusiphendulela umbuzo othi ukhona yini ngempela uNkulunkulu. Lisifundisa negama lakhe, lichaze ubuntu bakhe, futhi lisitshele indlela aye wabonisa ngayo ukusikhathalela isintu phakathi nayo yonke le minyaka. Lembula ngisho nalokho asigcinele kona esikhathini esizayo. Kuzo zonke lezi zici, isayensi ayinamandla okusisiza sithole izimpendulo. Ngempela, isayensi yomuntu ngeke ilethe ithemba elihlala njalo ekuphileni kwethu. Kunjalo nje ngeke futhi isibekele izindinganiso nezimiso ezifanele zokuziphatha.

Isisekelo Sezindinganiso Nezimiso Zokuziphatha

Ngokudabukisayo, umkhuba wesayensi esiwubona ulandelwa abathile namuhla kubonakala kuwukubukela phansi izimiso nezindinganiso zokuziphatha okuhle. Isazi sezinto eziphilayo uRichard Dawkins, esenqaba umqondo wokuba khona kukaNkulunkulu, sathi: “Lapho amandla emvelo eziqondisa wona nezici zofuzo zizandisa ngokwazo, abanye abantu bazolimala, abanye bazoba nenhlanhla, futhi ngeke uthole sizathu esizwakalayo sako, nanoma ibuphi ubulungisa.” Ingabe lokhu kukwenza ukhwantabale lapho ucabanga ngomhlaba? Awucabangi yini ukuthi umphakathi wabantu udinga umthetho obanika umvuzo abaziphatha kahle kodwa obajezisayo abenza okubi?

Yilokhu okuwumahluko omkhulu phakathi kombono weBhayibheli ngesintu nombono wokuziphendukela kwemvelo othi uNkulunkulu akekho. IZwi likaNkulunkulu ligcizelela ukuthi abantu banendawo ekhethekile endalweni; ukuziphendukela kwemvelo kuthi abantu bawumkhiqizo wezinqubo zemvelo ezazingaqondisiwe. IBhayibheli lifundisa ukuthi abantu benziwa ngomfanekiso kaNkulunkulu onobulungisa nothando futhi bangaziphatha kahle futhi bajabulele ukuphila; ukuziphendukela kwemvelo kona ngombono wako wokuthi kusinda ezinamandla, akukwazi ukuchaza ukuthi kungani umuntu enezimfanelo zothando futhi ekhathazeka ngenhlalakahle yabanye.

Ukuziphendukela kwemvelo akukwazi ukunikeza noma iliphi ithemba eliphathekayo noma injongo. IBhayibheli lisinikeza injongo enhle yoMdali ngekusasa lethu. Uyishó ngokucacile injongo yakhe: “Ngizonibusisa ngekusasa eligcwele ithemba.”—Jeremiya 29:11, Contemporary English Version.

Funda NgoMdali

Umhubi ohlakaniphile washukunyiswa ukuba avume ngokuthobeka: “Yazini ukuthi uJehova unguNkulunkulu. Nguye osenzile, akuthina.” (IHubo 100:3) Kubantu abaningi abacabangayo, la mazwi athobekile anengqondo kakhulu kunemibono yanamuhla ethi ukuphila kwabantu kuvelé ngokuzenzakalelayo.

Isayensi yanamuhla ngezinye izikhathi ithuthukisa umqondo wokuqhosha wokuthi ukucabanga nolwazi lomuntu yiko okufanele kube yisiqondiso esingcono. Ngokudabukisayo, amasonto amakhulu aye enza iphutha elifanayo izikhathi eziningi. Nokho, ulwazi lomuntu lulinganiselwe futhi luyohlala lunjalo. Umphostoli uPawulu wayenolwazi olujulile ngezindaba ezingokomoya, kodwa waqhubeka ethobekile. Ebhekana namaqiniso wathi: “Manje sibona isithombe esilufifi esibukweni . . . Ulwazi enginalo manje aluphelele.”—1 Korinte 13:12, The Jerusalem Bible.

Yebo, ukholo lwangempela kuNkulunkulu aluxhomekile esayensini yanamuhla. Kodwa engqaphelini ebukhali, isayensi ingaluqinisa ukholo. Ukholo lwangempela nengokomoya kubalulekile ukuze uphile ukuphila okugculisayo nokujabulisayo. (Mathewu 5:3) Uma usebenzisa iBhayibheli ukuze uthole ulwazi olujulile ngoJehova nangenjongo yakhe ngesintu nomhlaba, uyothola isisekelo senjongo yangempela yokuphila kanye nesisekelo esiqinile sethemba.

[Umbhalo waphansi]

[Ibhokisi/Izithombe ekhasini 17]

Lokho abakushoyo

Ososayensi abaningi abanqikazi ukusho ukuthi bakholelwa kuMdali. Yize abanye benombono ovamile nongacacile ngokuthi uNkulunkulu ungubani, basavuma ukuthi ubufakazi bubonisa ukuthi kunoMklami okhaliphile. Phawula la mazwi alandelayo:

“Njengososayensi, ngibheka izwe elingizungezile ngibone ubunjiniyela obuyinkimbinkimbi ngendlela emangalisayo kangangokuthi ngifinyelela esiphethweni sokuthi ukuhleleka okuyinkimbinkimbi ngale ndlela kumelwe ukuba kuwumphumela womklamo wobuhlakani.”—U-ANDREW MCINTOSH, ISAZI SEZIBALO, EWALES, E-UNITED KINGDOM

“Ukuba yinkimbinkimbi kwemvelo kubonisa ngokucacile ukuthi kunoMdali. Inqubo ngayinye yezinto eziphilayo noma yomthetho wemvelo, lapho uqala ukuyiqonda, ibonisa ukuba yinkimbinkimbi ngendlela engakholeki.”—UJOHN K. G. KRAMER, ISAZI SAMAKHEMIKHALI EZINTO EZIPHILAYO, ECANADA

“Ukuhleleka okusezintweni eziphilayo kusobala ngendlela ecacile. Kwahlelwa uSomandla ophakeme kunabantu mina engimbiza ngokuthi uNkulunkulu. Yilapha lapho ukholo luvumelana khona nesayensi efakazelwe. Kunokuba luphikisane nayo, luyayiphelelisa, lusinikeze ukuqonda okuyisisekelo ngendawo esizungezile.”—UJEAN DORST, ISAZI SEZINTO EZIPHILAYO, EFRANCE

“Angikwazi ukucabanga ngendawo yonke nangokuphila kwabantu njengokwaqala ngaphandle kokuqondisa komuntu okhaliphile, ngaphandle komuntu womoya ‘owayenemfudumalo’ ongalé kwendalo ebonakalayo nemithetho yayo.”—U-ANDREY DMITRIYEVICH SAKHAROV, ISAZI SESAYENSI YENUZI, ERUSSIA

“Isilwane ngasinye ngandlela-thile siklanywe ngendlela ehlukile evumelana nendawo esiphila kuyo, futhi angikwazi ukwenza ngokunye ngaphandle kokuba ngithi lo mklamo oyinkimbinkimbi wenziwa uMdali, hhayi amandla athile azenzakalelayo okuziphendukela kwemvelo.”—UBOB HOSKEN, ISAZI SAMAKHEMIKHALI EZINTO EZIPHILAYO, E-AUSTRALIA

[Ibhokisi/Isithombe ekhasini 18]

Ukulandisa okukuGenesise kuyahlaziywa

UGerald Schroeder, owake waba uprofesa emkhakheni wesayensi yenuzi, uyabhala: “IBhayibheli lilandisa ngamavesi angamashumi amathathu nanye, ngamazwi ambalwa, izenzakalo zeminyaka eyizigidi eziyizinkulungwane eziyishumi nesithupha. Lezi yizenzakalo ososayensi abaye babhala ngazo amazwi ayizigidigidi ezingokoqobo. Yonke inqubo yokuvela kokuphila kwezilwane ifingqwe ngemisho eyisishiyagalombili eBhayibhelini. Uma ucabangela ubufushane bokulandisa kweBhayibheli, ukuvumelana kwamazwi nesikhathi okukuGenesise 1 kanye nalokho okutholwe yisayensi yanamuhla kuyamangalisa, ikakhulukazi lapho siqaphela ukuthi yonke le ncazelo yeBhayibheli enikezwe lapha yalotshwa eminyakeni engamakhulu, ngisho neyizinkulungwane esikhathini esidlule, ngakho ayizange ithonywe izinto ezitholwe isayensi yanamuhla nganoma ngayiphi indlela. Yisayensi yanamuhla eye yavumelana nokulandisa kweBhayibheli ngesiqalo sethu.”—THE SCIENCE OF GOD—THE CONVERGENCE OF SCIENTIFIC AND BIBLICAL WISDOM.

[Izithombe]

IBhayibheli lichaza izinkathi eziyi-sithupha zokudala

[Isithombe ekhasini 20]

IBhayibheli liqukethe ubufakazi obunamandla bokuthi liphefumulelwe nguNkulunkulu