Ngemva Kokuqhuma
NGUMLOBELI WE-PHAPHAMA! E-ECUADOR
U-NOVEMBER 20, 2002, wawuwusuku oluhle edolobheni laseRiobamba, e-Ecuador. Izulu lalithé gqwa gqwa ngamafu. Ubuhle bezintaba-mlilo ezizungezile ezineziqongo zeqhwa babufanelekela isithombe sekhadi. Abantu abangu-124 000 abahlala lapho, endaweni engaba amamitha angu-2 700 phezulu eziNtabeni zase-Andes, babematasa nemisebenzi yabo evamile, bengazi ukuthi lesi simo esinokuthula sasesizophazamiseka kakhulu. Kungazelelwe, emini yantambama kuthule, kwezwakala ukuqhuma okuvala izindlebe! Kwaqala ukundindizela amafasitela nephansi lezindlu. Kwafuquka ifu elikhulu elisabekayo elisakhowe.
Kungakapheli nemizuzu eyishumi kwezwakala ukuqhuma kwesibili, okwakuhambisana nokundindizela komhlaba okwaphahlaza amafasitela kwakhumula nezicabha zezindlu. Kwabe sekuqubuka ifu lomlilo nentuthu—elaliphakeme kakhulu kunefu lokuqala. Kwalandela uchungechunge lokuqhuma nokubaneka.
UJosé nomkakhe, u-Ana—bobabili abangoFakazi BakaJehova—bawumbhangqwana owevile eminyakeni engu-60 ubudala ohlala ebangeni elingaba amamitha angu-400 ukusuka lapho ukuqhuma kwenzeka khona. Amandla alokhu kuqhuma abaqumba phansi endlini. U-Ana wayemi eduze komnyango wangaphambili lapho ukhumuka uyosakazeka odongeni ngemuva. Njengoba lo mbhangqwana owawethukile ubalekela engxenyeni engemuva yomuzi wawo, uphahla lwangaphakathi lwaqala ukuwela phezu kwawo. Ngandlela-thile wakwazi ukuphumela kuvulande omncane ongemuva, lapho waququbala ndawonye khona waqala ukuthandaza. Ngenhlanhla, ngemva kwemizuzu engu-15 kwafika indodana yawo izowulanda ngemoto baya endaweni ephephile.
Akubona bonke ababa nale nhlanhla. Ngemva kokuqhuma, amaphaphu ayephezulu. Izixuku zabantu zabaleka ngezinyawo. Kuleso sidumo sokumemeza nokuklabalasa, abanye babeshelela bewela phezu kwezingilazi ezazisakazeke emgwaqweni. Izimoto, amabhasi, namaloli ayephuma edolobheni edla amagalani, amanye ehamba ohlangothini lomgwaqo olungafanele! Abaningi ababaleka ezikoleni noma emsebenzini kwaphela amahora angaba ngu-24 bengazi ukuthi akuphi amalungu omkhaya.
Sasibangelwa yini sonke lesi siyaluyalu? Umlilo owaqubuka esikhungweni sezikhali esingaphansi komhlaba ekamu lamasosha eliseduze wawubangele uchungechunge lokuqhuma okukhulu kweziqhumane, amabhomu esandla namabhomu acitshwa ngombayimbayi. Njengoba ukuqhuma kwakuqhubeka, izimoto zamaphoyisa zazimemezela ngemibhobho ukuthi bonke abantu kwakufanele baphume edolobheni baye endaweni eqhele okungenani ngamakhilomitha angu-15.
Ngokushesha kwase kukhala ibhungane eRiobamba. Izinkulungwane zezakhamuzi zazigcwele emgwaqweni omkhulu ngaphandle kwedolobha, ziququbele ndawonye emakhazeni asebusuku—eziningi zingenawo namajazi noma amabhantshi. Ngemva kwamahora ambalwa ukuqhuma kwaqala ukudamba. Zishukunyiswa amakhaza ashubisa umnkantsha, izakhamuzi zaqala ukubuyela edolobheni ngokuqapha okukhulu. Ngakusasa, lapho sekusile, abaningi bathola ukuthi kwakudaleke umonakalo omkhulu emafasiteleni, ezicabheni, ophahleni lwangaphandle nolwangaphakathi kanye nasezindongeni zemizi yabo. Omunye umkhaya wathola izingcezu zezingilazi ezibukhali zingené shi kumatilasi ekamelweni lokulala. Abanye bathola izingcezu zeziqhumane ezindlini nasemagcekeni.
Imibiko yokuqala yathi kwakushone okungenani abangu-7, kwalimala abangu-538, konakala imizi engu-18 000. Phakathi koFakazi BakaJehova abangu-950 abahlala kule ndawo, akekho owashona, nakuba ababili belashelwa amanxeba amabi okusikeka.
Ukusiza Abathintekile
Ekuseni ngakusasa ngemva kokuqhuma, abadala bamabandla endawo oFakazi BakaJehova baqala ukuthintana nabafowabo abangamaKristu ukuze bazi ukuthi isimo sasinjani. Kamuva ngalolo suku umbonisi ojikelezayo woFakazi BakaJehova wahlangana nabadala bamabandla angu-13 endawo nezingxenye ezakhelene nawo ukuze athole ukuthi ungakanani umonakalo nabantu abalimele. Wakhuthaza abadala ukuba banakekele izidingo ezingokomzwelo nezingokomoya zabasindile. Kwakubalulekile ukuya emihlanganweni yobuKristu, ngisho nangaphansi kwezimo ezinzima ngale ndlela! (Hebheru 10:24, 25) Ngakho, amabandla endawo aqhuba imihlangano yawo evamile ngakusasa kusihlwa ngemva kwale nhlekelele.
NgoLwesine nangoLwesihlanu, kwahlanganiswa umbiko oningiliziwe womonakalo odaleke emizini yoFakazi wathunyelwa ehhovisi legatsha lendawo loFakazi BakaJehova eGuayaquil. Lo mbiko wakhuluma ngesidingo esiphuthumayo sokuvala amakhulukhulu amafasitela aphukile ukuze izakhamuzi zivikeleke emakhazeni. Kungakapheli namahora amangaki, ihhovisi legatsha lase lithenge inqwaba yepulasitiki ekhanyayo, izinto zokunamathelisa nezipikili zokubethela kukhonkolo, ukuze kuciciyelwe ngakho okwesikhashana.
Iloli elithwele impahla elalivela ehhovisi legatsha lafika ngo-9:00 ngoMgqibelo ekuseni. Kakade kwase kunamaqembu amadoda nabesifazane abangoFakazi ayesebenza esiza abanye oFakazi ukuba basuse izingilazi eziphukile emizini yabo ukuze kuqalwe umsebenzi wokufaka ipulasitiki. IHholo LoMbuso lendawo lasebenza njengesikhungo sokuqondisa. Kwadwetshwa izilinganiso phansi ukuze ipulasitiki isikwe ngokushesha. Kusetshenziswa izilinganiso ezazitholwe amalungu amaqembu osizo, kwakusikwa amapulasitiki osayizi abafanele abesedilivwa emaqenjini ayelindile okuyiwona ayezowafaka.
UJosé, okukhulunywe ngaye ekuqaleni, uyalandisa: “Lapho sifika ekhaya ngakusasa ntambama ngemva kokuqhuma, safica abafowethu sebeqalile kakade ukususa imfucumfucu. NgoMgqibelo kwafika umakhelwane wababaza umsebenzi omuhle owenziwe ngokufakwa kwepulasitiki emzini wami, wayesebuza, ‘Ukhokhe malini ngakho konke lokhu?’” Yeka indlela umakhelwane amangala ngayo lapho ezwa ukuthi kwakwenziwe ngaphandle kwenkokhiso!
NgoMgqibelo kusihlwa, izisebenzi zokuzithandela ezingaba ngu-200 zasemabandleni endawo zase zivale amafasitela emizini engu-91 yoFakazi. Abaningi abangebona oFakazi nabo bazuza. Iphephandaba lendawo lalinesithombe somuzi oFakazi ababesebenzé kuwo, laphawula ukuthi munye kuphela kwabangu-8 abahlala kulowo muzi onguFakazi KaJehova.
Kwanikezwa Ukusekela Okungokomzwelo
Kusobala ukuthi lokhu kuqhuma kwabangela ukucindezeleka okukhulu ngokomzwelo. Ukuze kududuzwe oFakazi bendawo, kwahlelwa umhlangano okhethekile ngoMsombuluko, ngo-November 25, ngo-5:00 ntambama. Kwathunyelwa abameleli behhovisi legatsha lendawo ukuzoqhuba lo mhlangano. Ngenxa yokuthi zazingekho izibani zikagesi, lo mhlangano wawungenakuqhutshwa sekuhwalele kakhulu. Ngenxa yokuthi lesi sikhathi sasibonakala singabalungele abaningi, kwakulindelwe inani elincane labangaba ngu-600. Kodwa isixuku sabangu-1 421, esasihlanganisa nomakhelwane abangebona oFakazi, sagcwalisa iHholo LoMhlangano LaseRiobamba! Umbhalo oyisihluthulelo okwagxilwa kuwo esimisweni kwakuyiHubo 4:8: “Ngiyocambalala ngilale ngokuthula, ngoba wena wedwa, Jehova, ungenza ngihlale ngokulondeka.” Bonke ababekhona bazwakalisa ukubonga ngesimiso esingokomoya esiduduzayo.
Ekuphetheni kwesimiso abazali banikezwa amakhulukhulu amakhophi esihloko esivela kuyi-Phaphama! esithi “Izinhlekelele Ezingokwemvelo—Ukusiza Ingane Yakho Ukuba Ibhekane Nazo.” (June 22, 1996) Esinye isigaba kulesi sihloko sithi:
“I-U.S. Federal Emergency Management Agency (FEMA) iphawula ukuthi ngokushesha ngemva kwenhlekelele, izingane ngokuvamile zesaba ukuthi (1) zizoshiywa zodwa, (2) zizohlukaniswa nomkhaya, (3) isenzakalo sizophinde senzeke, futhi (4) kuzolimala noma kufe othile.” Ngokusekelwe kulesi sihloko, abazali bakhuthazwa ukuba:
1. Bazame ukugcina umkhaya ndawonye.
2. Bazinike isikhathi sokuchaza isimo ngesineke.
3. Bakhuthaze izingane ukuba ziveze imizwa yazo.
4. Bahilele izingane emsebenzini wokuhlanza indawo.
Kamuva amakhophi engeziwe alesi sihloko se-Phaphama! anikwa omakhelwane nabantu abafundelwa iBhayibheli.
Ngemva kwamasonto amathathu kwenzeke lokhu kuqhuma, kwathengwa izinto zokulungisa kwangempela, okuhlanganisa ukufaka amafasitela amasha, uphahla lwangaphakathi nolwangaphandle. Ngemva kwamanye futhi amasonto amathathu, le misebenzi yayisiqediwe, kanye nokulungiswa kwamaHholo OMbuso amabili. Abaningi babonga bengaqedi ngala malungiselelo othando.
Izinhlekelele ezihlukahlukene zivamile kulezi ‘zinsuku zokugcina.’ (2 Thimothewu 3:1-5) Nokho, indlela oFakazi BakaJehova abasekelana ngayo futhi basekele nomakhelwane ifakazela amandla obuKristu beqiniso. UJosé wakubeka kahle lapho ethi: “Inhlangano kaJehova ayizindeli ukusisiza lapho sidinga usizo.”
[Izithombe ekhasini 15]
OFakazi abangaba ngu-200 bazinikela ngokuzithandela ukuzohlanza indawo. Kwalinganiswa, kwasikwa, futhi kwafakwa amafasitela amasha. Kwafakwa nophahla olusha