Intsha Iyabuza . . . 

Ngingabhekana Kanjani Nokucindezela Kontanga?

“Ukucindezela kontanga kukuyo yonke indawo.”—UJesse, oneminyaka engu-16 ubudala.

“Enye yezinto ezazinzima kakhulu okwakudingeka ngibhekane nazo ngisakhula kwakuwukucindezela kontanga esikoleni.” —UJohnathan, oneminyaka engu-21 ubudala.

NGOKUQINISEKILE kufanele sivume ukuthi ukucindezela kontanga kunamandla. Nokho, siyakuqinisekisa ukuthi ungamelana nakho. Eqinisweni, ungabhekana nakho uze futhi usizakale ngakho. Kodwa kanjani?

Esihlokweni esidlule kulolu chungechunge, saxoxa ngesinyathelo sokuqala esibalulekile: Qaphela ukuthi ukucindezela kontanga kunamandla nokuthi usengozini yokuthonywa yiko.a Yiziphi ezinye izinyathelo ezifanele ongase uzithathe? Isiqondiso esiwusizo osidingayo siseZwini likaNkulunkulu. IzAga 24:5 zithi: ‘Indoda enolwazi yandisa amandla.’ Nhloboni yolwazi engandisa amandla akho okumelana nokucindezela kontanga? Singakawuphenduli lo mbuzo, ake siqale sidingide inkinga engenza ukucindezela kontanga kube namandla kuwe.

Ukuntula Ukuzethemba—Kuyingozi

Intsha engoFakazi BakaJehova ngezinye izikhathi ikuthola kuyinselele enkulu ukucindezela kontanga ngenxa yokuthi indlela yayo yokuphila ihilela ukutshela abanye ngokholo lwayo. (Mathewu 28:19, 20) Ingabe ngezinye izikhathi ukuthola kunzima ukuxoxa ngokholo lwakho nenye intsha ohlangana nayo? Awuwedwa. UMelanie oneminyaka engu-18 ubudala uthi: “Ukutshela ezinye izingane ukuthi nginguFakazi kwakunzima kunalokho engangikucabanga.” Uyanezela: “Kwakuthi lapho sengiqunge isibindi sokuzitshela ukuthi nginguFakazi, ngigajwe uvalo futhi.” Kubonakala sengathi wayethiywa ukucindezela kontanga okubi.

IBhayibheli liyasiqinisekisa ngokuthi ngisho namadoda nabesifazane ababa nokholo oluvelele baye banqikaza ukukhuluma nabantu ngoNkulunkulu. Ngokwesibonelo, uJeremiya osemncane wayazi ukuthi wayezobhekana nokuhlekwa usulu nokushushiswa uma elalela umyalo kaNkulunkulu wokuba akhulume ngesibindi. Ngaphandle kwalokho, uJeremiya wayengazethembi. Ngani? Wathi kuNkulunkulu: “Bheka empeleni angikwazi ukukhuluma, ngoba ngisewumfana nje.” Ingabe uNkulunkulu wavuma ukuthi ukuba mncane kukaJeremiya kwakumenza angakufanelekeli ukukhuluma? Cha. UJehova wamqinisekisa lo mprofethi: “Ungasho ukuthi, ‘Ngisewumfana nje.’” UJehova wabe esenika le nsizwa emathintanyawo isabelo esibalulekile.—Jeremiya 1:6, 7.

Uma singazethembi, sizenyeza, kungaba nzima kakhulu ukumelana nokucindezela kontanga. Nemiphumela yocwaningo iyakufakazela lokhu. Ngokwesibonelo, emuva ngo-1937 usosayensi uMuzafer Sherif wenza isivivinyo esidumile. Wafaka abantu egumbini elimnyama, wababonisa intuba eyodwa engenisa ukukhanya, wabe esebabuza ukuthi leyo ntuba yayiqhele kangakanani.

Eqinisweni, ukukhanya kwakungaqhelanga nhlobo; kwakumane nje kuwutalagu. Lapho behlolwa, abantu babenikeza izilinganiso zabo ngebanga lokuqhela kwalokhu kukhanya. Nokho, lapho sebehlolwa njengeqembu babecelwa ukuba basho lezo zilinganiso zabo ngokuzwakalayo. Wawuba yini umphumela? Ngenxa yokungayethembi imibono yabo, babethonyana. Lapho behlolwa ngokuphindaphindiwe, izimpendulo zabo zaziya ngokuya zifana kwaze kwaba yilapho “sekunombono weqembu.” Ngisho nalapho kamuva behlolwa ngabodwa, laba bantu babesathonywe umbono weqembu lilonke.

Leso sivivinyo siveza iphuzu elibalulekile. Ukungaqiniseki noma ukungazethembi kuchaya abantu ethonyeni lokucindezela kontanga. Kuyethusa, akunjalo? Kakade, ukucindezela kontanga kungathonya abantu ezindabeni ezibaluleke kakhulu, kuhlanganise nombono wabo ngobulili ngaphambi komshado, ukusebenzisa kabi izidakamizwa ngisho nemigomo abazoyiphishekela ekuphileni. Uma silandela “umbono weqembu” ezindabeni ezinjalo, ungonakalisa ikusasa lethu. (Eksodusi 23:2) Kungenziwani?

Ucabanga ukuthi wawungathini kulesi sivivinyo ukuba wawazi ukuthi intuba yokukhanya yayinganyakazi? Cishe wawungeke uthonywe yiqembu. Yebo, kudingeka sizethembe. Kodwa nhloboni yokuzethemba edingekayo, futhi singayifinyelela kanjani?

Yenza UJehova Abe Ithemba Lakho

Kuningi ongase uzwe abantu bekusho ngokwakha ukuzethemba. Kodwa kunemibono engqubuzanayo ngokuthi ungakufinyelela kanjani—nokuthi ukudinga ngesilinganiso esingakanani. IBhayibheli liqukethe lesi seluleko esinokulinganisela: “Ngitshela wonke umuntu lapho phakathi kwenu ukuba angazicabangi emkhulu kunalokho okudingeke ukuba akucabange; kodwa acabange ukuze abe nengqondo ehluzekile.” (Roma 12:3) Enye inguqulo yaleli vesi ifundeka kanje: “Ngingathanda ukutshela yilowo nalowo kini ukuba angazibeki esilinganisweni esingaphezu kwalokho ayikho ngempela, kodwa azilinganise ngendlela enesizotha.”—Charles B. Williams.

‘Ukulinganisa ngendlela enesizotha lokho oyikho ngempela’ kukuvimbela ukuba ungaqhoshi, ungazethembi ngokweqile noma uzikhohlise. Ngakolunye uhlangothi, umbono onjalo olinganiselayo uhlanganisa ukulithemba ngezinga elithile ikhono lakho langempela lokucabanga, ukuhlaziya isimo nokwenza izinqumo ezinengqondo. UMdali wakho wakupha “amandla okucabanga,” futhi leso akusona isipho esiwubala. (Roma 12:1) Ukukhumbula lokho kungakusiza ukuba umelane nokuthambekela kokuvumela abanye bakwenzele izinqumo. Nokho, kunohlobo lwethemba olungakwenzela lukhulu ukuze lukuvikele.

INkosi uDavide yaphefumulelwa ukuba ilobe: “Wena uyithemba lami, Nkosi EnguMbusi Jehova, ithemba lami kusukela ebusheni bami.” (IHubo 71:5) Yebo, uDavide wathembela ngokugcwele kuYise wasezulwini, futhi wayekwenze lokho kusukela esemncane. ‘Wayesengumfana’—mhlawumbe eseyibhungu—lapho isiqhwaga esingumFilisti uGoliyati sicela inselele kunoma iliphi isosha lakwa-Israyeli ukuba lihlangabezane naso bukhoma empini. Amasosha angenwa itwetwe. (1 Samuweli 17:11, 33) Mhlawumbe kwakunokucindezela kontanga okubi phakathi kwawo. Akungabazeki ukuthi akhuluma ngendlela engenathemba ngobukhulu bukaGoliyati nobuqhawe bakhe aze agomela ngokuthi noma ubani ongamukela le nselele wayezobe esangene. UDavide akazange athonywe ukucindezela okunjalo. Ngani?

Phawula lokho uDavide akutshela uGoliyati: “Wena uza kimi nenkemba nomkhonto nengcula, kodwa mina ngiza kuwe negama likaJehova wamabutho, uNkulunkulu wezinhlu zempi yakwa-Israyeli, oye wamklolodela.” (1 Samuweli 17:45) Akukhona ukuthi uDavide wayengabuboni ubukhulu, amandla noma izikhali zikaGoliyati. Kodwa kukhona ayekwazi, okwakuqiniseke njengesibhakabhaka esingaphezu kwakhe. Wayazi ukuthi uGoliyati akalutho uma eqhathaniswa noJehova uNkulunkulu. Uma uJehova ayengasohlangothini lukaDavide, wayezomesabelani-ke uGoliyati? Ukuthembela kuNkulunkulu ngale ndlela kwamqinisa uDavide. Akukho ukucindezela kontanga okwakungamenza antengantenge.

Ingabe umethemba ngendlela efanayo uJehova? Akakashintshi kusukela esikhathini sikaDavide. (Malaki 3:6; Jakobe 1:17) Uma uqhubeka ufunda ngaye, uyoqiniseka nakakhulu ngakho konke akushoyo eZwini lakhe. (Johane 17:17) Kulo, uyothola izindinganiso ezingaguquki nezinokwethenjelwa zokukuqondisa ekuphileni zikusize nokuba umelane nokucindezela kontanga. Ngaphezu kokwenza uJehova ithemba lakho, kunokunye futhi ongakwenza.

Khetha Abeluleki Abahle

IZwi likaNkulunkulu ligcizelela isidingo sokufuna isiqondiso esihle. IzAga 1:5 zithi: ‘Umuntu onokuqonda nguye ozuza ukuqondisa okunekhono.’ Abazali bakho, abazikhathalela ngokujulile izithakazelo zakho, bangaba umthombo wesiqondiso. U-Indira ukwazi kahle lokhu. Uyalandisa: “Ngenxa yokuthi abazali bami babengiqondisa ngemiBhalo njalo benza noJehova waba ngokoqobo ekuphileni kwami, ngihamba endleleni yeqiniso namuhla.” Intsha eningi izizwa ngendlela efanayo.

Uma uyilungu lebandla lobuKristu, unomthombo omuhle wezeluleko—ababonisi noma abadala abamisiwe kanye namanye amaKristu avuthiwe. UNadia osemusha uthi: “Ngangibahlonipha ngempela abadala basebandleni. Ngikhumbula umbonisi owengamele enikeza inkulumo eyayilungiselelwe intsha ngokukhethekile. Ngemva komhlangano mina nomngane wami sasijabule ngoba ayekushilo kwakuyilokho esasibhekene nakho.”

Esinye isikhali esinamandla sokumelana nokucindezela kontanga okubi ukucindezela kontanga okuhle. Uma ukhetha abangane ngokuhlakanipha, bangakusiza ukuba unamathele emigomweni emihle nasezindinganisweni ezifanele. Singabakhetha kanjani kahle? Khumbula lesi seluleko: “Ohamba nabahlakaniphile uyohlakanipha, kodwa osebenzelana neziphukuphuku kuyomhambela kabi.” (IzAga 13:20) UNadia waqikelela ukuba akhethe abangane abahlakaniphile esikoleni—amanye amakholwa, ayenezindinganiso zokuziphatha ezinjengezakhe. Uyakhumbula: “Lapho abafana esikoleni ‘bezoxoxa’ nathi, sasisekelana.” Abangane abahle bangaveza kithi izimfanelo ezinhle. Ngeke uzisole ngokubafuna.

Ngakho, siyakuqinisekisa ukuthi uma wakha ukuthembela kwakho kuJehova, ufuna isiqondiso kumaKristu avuthiwe, ukhetha nabangane ngokuhlakanipha, ungabhekana ngokuphumelelayo nokucindezela kontanga. Eqinisweni, ungaba yingxenye yethonya elihle kubangane bakho futhi ubasize bahlale kanye nawe endleleni eya ekuphileni.

[Umbhalo waphansi]

[Amazwi acashunwe esihlokweni ekhasini 16]

Funa abangane abahle, abamthanda njengawe uNkulunkulu nezindinganiso zakhe

[Izithombe ekhasini 16]

“Ukuzihlanganisa nababi konakalisa imikhuba emihle.”—1 Korinte 15:33

“Ohamba nabahlakaniphile uyohlakanipha.”—IzAga 13:20