Ukufunda KumaKristu Ekhulu Lokuqala

“Xwayani: mhlawumbe kungase kube khona othile oyomuka nani njengezisulu zakhe ngefilosofi nenkohliso eyize ngokwesiko labantu, ngokwezinto zokucathula zezwe futhi hhayi ngokukaKristu.”—Kolose 2:8.

WAWAXWAYISA ngaleyo ndlela umphostoli uPawulu amaKristu ekhulu lokuqala ngezingozi zokulandela ifilosofi yabantu ngaphandle kokuthandabuza. Ayenganamathela esiqondisweni esinokwethenjelwa esanikezwa nguJesu nabaphostoli bakhe, izimfundiso kakade ezase ziwazuzise kakhulu, noma abe yizisulu zemibono yabantu ehlala ishintsha njalo, inkambo eyase ilethele izigidi ubuhlungu nosizi kakade.—1 Korinte 1:19-21; 3:18-20.

Ukuphila “NgokukaKristu”

Ababelwa ezimpini zenkolo eminyakeni engaba yinkulungwane edlule balahlekelwa yiphuzu lokuthi ukuphila “ngokukaKristu” kusho okungaphezu nje kokuzisholo komuntu ukuthi uqotho kuJesu Kristu. (Mathewu 7:21-23) Kusho ukuphila ngokuvumelana ngokuphelele nezimfundiso zikaJesu ezitholakala eZwini likaNkulunkulu eliphefumulelwe, iBhayibheli. (Mathewu 7:15-20; Johane 17:17) UJesu Kristu wathi: “Uma nihlala ezwini lami, ningabafundi bami ngempela.” (Johane 8:31) Wathi: “Bonke bayokwazi ngalokhu ukuthi ningabafundi bami, uma ninothando phakathi kwenu.”—Johane 13:35.

Eqinisweni, labo abalwa ezimpini zenkolo babebe yizisulu ‘zenkohliso eyize ngokwesiko labantu.’ Futhi akumangalisi ukuthi kungani abantu abavamile bakhohliseka lapho abaholi babo benkolo, bona kanye ababhishobhi, “bezuza udumo njengamaqhawe empi.” I-Cyclopedia of Biblical, Theological, and Ecclesiastical Literature kaMcClintock and Strong ithi “umoya wempi wawuvame kakhulu phakathi kwabefundisi kangangokuba noma nini lapho kunethuba lokuzuza [ngayo], babehlala beyilungele impi.”

Yini eyaholela kulesi simo esidabukisayo? Ngemva kokufa kwabaphostoli abangamaKristu bekhulu lokuqala, abaholi besonto abayizihlubuki baqhubeka bephambuka ezimfundisweni zikaKristu, njengoba nje iZwi likaNkulunkulu lalibikezele. (IzEnzo 20:29, 30) Isonto elase lonakele lagcina selingene shí embusweni wezwe. Kuthiwa uMbusi ongumRoma uConstantine waphendukela ebuKristwini lapho esegulela ukufa ekhulwini lesine leminyaka. I-Cyclopedia ithi khona-ke “ukusetshenziswa kwebhanela leSiphambano esikhundleni samafulege ayizithombe kwafaka wonke amaKristu ngaphansi kwesibopho sokukhonza njengamasosha.”

AmaKristu empeleni ayengenaso isibopho esinjalo. Kodwa ‘izinkulumo ezithonyayo’ zefilosofi yabantu zawaholela ekubeni ephule ngokuphelele konke lokho uKristu ayekumelele. (Kolose 2:4) Sekuyisikhathi eside kusetshenziswa ezinye izinkulumo ezikhohlisayo ukuze kuthethelelwe izimpi nezingxabano zabantu. Nokho, i-Cyclopedia ithi empeleni ukuthi umuntu onobuntu noma owesaba uNkulunkulu ahileleke “ezenzweni zempi zobudeveli, njengoba kwakuvame ukwenziwa ezikhathini zasendulo noma zanamuhla, akunakuvunyelaniswa nakancane . . . nezimiso zobuKristu.”

Izinkolo ezingezona ezeLobukholwa nazo ziye zaphendukela empini phakathi namakhulu eminyaka. Njengamasonto eLobukholwa, ziye zabulala amalungu ezinkolo zazo kanye nabanye ngenxa yokungafani kobuzwe, kwezombangazwe nokwenkolo. Ziye zasebenzisa ubudlova noma zesabisa ngabo ukuze ziguqulele abanye ezinkolelweni zazo. Ezinye ziye zabandakanyeka ekuchitheni amathantala egazi emlandweni ukuze zizame ukufinyelela imigomo yazo. Ziyefana nje nezinkolo zeLobukholwa.

Ahlukile Ezweni

Kungani amaKristu ekhulu lokuqala akwazi ukungazibandakanyi ezimpini ezichitha igazi nezombangazwe ngesikhathi sawo? Asizwa yizimiso ezimbili eziyisisekelo. Okokuqala, ayenomyalo uJesu awunika umphostoli uPetru lapho esebenzisa inkemba ukuze avikele uJesu: “Buyisela inkemba yakho endaweni yayo, ngoba bonke labo abaphatha inkemba bayobhubha ngenkemba.” (Mathewu 26:52) Okwesibili, asizwa amazwi uJesu awasho kuPilatu lapho ebuza uJesu ngobukhosi bakhe: “Umbuso wami awuyona ingxenye yalelizwe. Ukuba umbuso wami ubuyingxenye yalelizwe, izikhonzi zami beziyokulwa ukuze nginganikelwa kumaJuda. Kodwa, njengoba kunjalo, umbuso wami awuveli kulomthombo.”—Johane 18:36.

AmaKristu ekhulu lokuqala azisebenzisa kanjani lezo zimiso? Azigcina ehluke ngokuphelele ezweni, alondoloza ukungathathi-hlangothi okuphelele ezindabeni zezombangazwe nezempi. (Johane 15:17-19; 17:14-16; Jakobe 4:4) Enqaba ukuhloma ayolwa nomakhelwane. Umlando ukwenza kucace ukuthi amaKristu ekhulu lokuqala awazange azihlanganise namaqembu amaJuda ashisekela ubuzwe noma amabutho ombuso waseRoma. Ngesikhathi esifanayo, awazamanga ukutshela abaholi bezombangazwe okwakumelwe bakwenze, ngoba lokho kwakuwumthwalo wemfanelo walabo baholi bakahulumeni.—Galathiya 6:5.

Ekhulwini lesibili C.E., uJustin Martyr wabhala ukuthi amaKristu ‘ayekhande izinkemba zawo zaba amakhuba.’ (Mika 4:3) Ephendula labo ababesola umbono wamaKristu, uTertullian wabuza: “Ingabe kungaba semthethweni ukusebenza ngenkemba, kanti iNkosi ithi osebenzisa inkemba uyobhubha ngenkemba?”

‘Alalela UNkulunkulu Njengombusi Kunabantu’

Ukwenqaba ukuya empini kwawalethela ubunzima amaKristu okuqala. Kwakungqubuzana nezinkolelo ezazamukeleka ngaleso sikhathi. UCelsus, owayeyisitha sobuKristu, wawugxeka umbono wawo. Wayekholelwa ukuthi bonke abantu kwakufanele baye empini uma abanegunya befuna kanjalo. Naphezu kobutha obukhulu, amaKristu okuqala enqaba ukulandela noma iyiphi ifilosofi yabantu eyayingqubuzana nezimfundiso zikaKristu. Athi: “Kumelwe silalele uNkulunkulu njengombusi kunabantu.”—IzEnzo 4:19; 5:29.

OFakazi BakaJehova ezikhathini zanamuhla baye balandela isibonelo sawo. Ngokwesibonelo, eJalimane lamaNazi, benqaba ngokuqinile ukuhileleka ezimpini zikaHitler ezachitha igazi. Babezimisele ukukhuthazelela ushushiso olubi, ngisho nokufa uma kudingekile, kunokuba bephule ukungathathi-hlangothi kwabo njengamaKristu. Kubikwa ukuthi “isigamu senani labo sagqunywa ejele kanti ingxenye yesine yabulawa” ngamaNazi ngenxa yokunamathela kwabo ezimisweni zeBhayibheli. (Of Gods and Men) Ngakho, emashumini ezigidi ezabulawa eMpini Yezwe II, akekho noyedwa owabulawa uFakazi kaJehova. Kunokuba babulale abanye, oFakazi babezimisele ukudela ukuphila kwabo, njengoba abaningi kubo benza.

Isifundo Esingasithola

Zifundo zini esingazifunda emlandweni? Ngokuqinisekile, esinye sazo yilesi: Ifilosofi yabantu njalo iye yaholela enzondweni nasekuchitheni igazi phakathi kwabantu nezizwe. UmShumayeli 8:9 usho kufanele ukuthi: ‘Umuntu uye wabusa omunye kwaba ngukulimala kwakhe.’ Isizathu esiyisisekelo salokhu sitholakala kuJeremiya 10:23, lapho iZwi likaNkulunkulu lithi khona: “Indlela yomuntu ayikuye uqobo; akukuyo indoda ukuba ihambe, iqondise izinyathelo zayo.” Cha, uNkulunkulu wayengabadalanga abantu ukuba baqondise izindaba zabo ngokuphumelelayo, ngaphandle kwakhe. Babengawanikwanga la mandla. Wonke umlando ukufakazele lokho.

Njengabantu ngabanye, asinakukushintsha lokho abaholi bezizwe abakwenzayo lapho bephinda izinhlekelele zesikhathi esidlule, futhi asinagunya lokuzama ukubaqondisa ukuba bathathe inkambo ethile. Kodwa akudingekile ukuba sikhukhuleke nabo ezingxabanweni zabo futhi sibe yingxenye yazo. UJesu wathi ngabalandeli bakhe: ‘Abayona ingxenye yezwe, njengoba nje nami ngingeyona ingxenye yezwe.’ (Johane 17:14) Ukuze sigweme ukuba yingxenye yezingxabano zaleli zwe, kumelwe sivumele iZwi likaNkulunkulu, iBhayibheli, kube yilo eliqondisa ukuphila kwethu—hhayi ifilosofi yabantu ehlala ishintsha njalo.—Mathewu 7:24-27; 2 Thimothewu 3:16, 17.

Ikusasa Eliqhakazile

IZwi likaNkulunkulu elinokwethenjelwa aligcini ngokusikhanyisela ngesikhathi esidlule nesamanje. Linikeza isiqondiso esiqinisekile sekusasa. (IHubo 119:105; Isaya 46:9-11) Linikeza nombono ocacile wenjongo kaNkulunkulu ngale planethi. Ngeke avumele abantu ukuba babhubhise umhlaba ngokusebenzisa ngobuhlanya amandla amakhulu abawanikwe yisayensi nobuchwepheshe. Uyoqiniseka ngokuthi lo mhlaba ufinyelela esimweni sokuba iPharadesi ayelihlosile ekuqaleni.—Luka 23:43.

Likhuluma ngalokhu, iZwi likaNkulunkulu lithi: “Abaqotho bayakuhlala ezweni, abapheleleyo basale kulo. Kepha ababi bayakunqunywa ezweni, nabambuluzayo bayakusishulwa kulo.” (IzAga 2:21, 22) Lokhu kuzokwenzeka maduze, ngoba lezi zikhathi ezinzima zinikeza ubufakazi bokuthi siphila “ezinsukwini zokugcina” zalesi simiso sezinto esibi samanje. (2 Thimothewu 3:1-5, 13) Ngokuqinisekile, zibaliwe lezi zinsuku zokugcina; seziya ekupheleni. Isiprofetho seBhayibheli siyasifundisa: “Izwe liyadlula kanjalo nesifiso salo, kodwa lowo owenza intando kaNkulunkulu uhlala kuze kube phakade.”—1 Johane 2:17; Daniyeli 2:44.

Maduze uNkulunkulu ‘uyochitha abachitha umhlaba’ futhi esikhundleni saleli zwe lamanje elinobudlova alethe izwe elisha lapho ‘kuyohlala khona ukulunga.’ (IsAmbulo 11:18; 2 Petru 3:10-13) Khona-ke, kwabayosinda, uyobe ‘esesula zonke izinyembezi emehlweni abo, futhi ukufa ngeke kusaba khona, noma ukulila noma ukukhala noma ubuhlungu ngeke kusaba khona.’ (IsAmbulo 21:1-4) Izimpi nobudlova kuyobe sekuphele phakade, njengoba isiprofetho sika-Isaya 2:4 siyogcwaliseka ngokuphelele: “Bayakukhanda izinkemba zabo zibe ngamakhuba, nemikhonto yabo ibe ngocelemba; isizwe asiyikuphakamisela isizwe inkemba, zingabe zisafunda ukulwa.” Lelo kusasa eliqhakazile, laphakade kungaba ngelakho nawe uma ufunda kulokho umlando osifundisa kona.—Johane 17:3.

[Amazwi acashunwe esihlokweni ekhasini 27]

OFakazi BakaJehova baye bafunda kumaKristu ekhulu lokuqala

[Isithombe ekhasini 24, 25]

UJesu wathi uMbuso wakhe awuyona ingxenye yaleli zwe

[Isithombe ekhasini 26]

IZwi likaNkulunkulu lithembisa ukuphila okuphakade emhlabeni oyipharadesi lapho abantu beyobe bephelele khona