UDeveli—Ingabe Ungumuntu Omubi Ongokoqobo?
EZINKOLWENI eziningi, uDeveli usebhekwa ngokuyinhloko njengomqondo oyinkolelo-ze—umbono oqanjwe abantu. Ngakho uDionigi Tettamanzi, umbhishobhi omkhulu waseGenoa—ongomunye wokhadinali abavelele e-Italy—wavusa isiyaluyalu ngencwadi yakhe enamakhasi angu-40 ayibhalela abefundisi ephathelene nendlela yokulwa noDeveli. Yayiqukethe “imiyalo eyishumi.”
Owokuqala: “Ningakhohlwa ukuthi udeveli ukhona,” ngoba “amanga akhe okuqala” awukuba “asenze sikholelwe ukuthi akekho.”
Owesibili: “Ningakhohlwa ukuthi udeveli ungumvivinyi. . . . Ningacabangi ukuthi niphephile noma ukuthi ngeke anihlasele.”
Owesithathu: “Ningakhohlwa ukuthi udeveli uhlakaniphe ngempela futhi uyiqili. Uyaqhubeka ecashile ngokuthi ayenge abantu, njengoba enza ngomuntu wokuqala.”
Owesine: “Niqaphe: ngamehlo nangenhliziyo. Niqine: emoyeni nasebuhleni.”
Owesihlanu: “Yibani nokholo oluqinile ekunqobeni kukaKristu umvivinyi” ngoba lokhu “kuyonenza nilondeke futhi nibe nokuthula ngisho naphambi kokuhlaselwa okunonya kakhulu eningase nibhekane nakho.”
Owesithupha: “Nikhumbule ukuthi uKristu unenza abahlanganyeli ekunqobeni kwakhe.”
Owesikhombisa: “Qhubekani nilalela iZwi likaNkulunkulu.”
Owesishiyagalombili: “Thobekani futhi nivume ukuthotshiswa.”
Owesishiyagalolunye: “Thandazani njalo, ningaphezi,” ukuze ninqobe ukuvivinywa.
Oweshumi: “Thandani iNkosi uNkulunkulu wenu futhi nikhulekele yena yedwa.”
Le ncwadi eya kubefundisi yaba namuphi umphumela? ICenter of Theological Studies yaseMilan ayizange isithande iseluleko sayo. Lesi sikhungo saphikisa ngokuthi lo “mbhalo wezimfundiso zenkolo wawufuze izincwadi zangenkathi ephakathi.” Ngokomkhulumeli othile, “ukusola udeveli ngakho konke kungenza abantu bangawuthwali umthwalo [wabo] wemfanelo.”
Nakuba iBhayibheli lingabakhululi abantu ecaleni lezenzo zabo, limchaza ngokucacile uSathane uDeveli ngokuthi “unkulunkulu walesisimiso sezinto,” owavivinya uJesu. Lembula namandla kaSathane nenhloso yakhe ‘yokuphuphuthekisa izingqondo zabangewona amakholwa.’—2 Korinte 4:4; Mathewu 4:1-11.
Yebo, njengoba umphostoli uPetru abhala, uSathane ‘unjengengonyama ebhongayo, efuna ukushwabadela othile.’ (1 Petru 5:8) Yingakho umphostoli uJohane akhumbuza amakholwa: “Lonke izwe lisemandleni omubi.” (1 Johane 5:19) Siyobe sihlakaniphile uma singazishalazeli lezi zixwayiso ezingokomBhalo.