Ingabe Unemilenze Eyaluzayo?
KUSEBUSUKU. Ulele kamnandi embhedeni wakho. Nakho-ke sekuqala—sengathi kukhona okunwabuzela ngaphakathi emilenzeni yakho. Ngeke ukuzibe. Ukuphela kwendlela yokuthola impumuzo ukusukuma uthi ukuzulazula. Ukuhambahamba kuyasiza, kodwa uma uphinde ulala, kuyabuya. Ufuna ukulala kodwa ubuthongo abehli. Uma lokhu kuzwakala njengento eyenzeka kuwe, awuwedwa. Ngokwesibonelo, cishe amaphesenti angaba ngu-15 omphakathi wase-United States aphila nale nkinga.
Nakuba odokotela abaningi namuhla behluleka ukupopola noma baselaphe kahle lesi sifo, asisisha. Ngo-1685, udokotela mumbe wabhala ngalabo okuthi uma sebelele bezwe “ukuyaluza okukhulu” ezingalweni zabo nasemilenzeni kangangokuthi “ababe besakwazi ukulala, kuba sengathi baseNdaweni embi Yokuhlushwa.”
Enye inkinga ekuboneni lesi sifo ukuthi alukho ucwaningo lwezemithi olungaveza ukuthi umuntu unaso yini noma cha. Sibonwa ngezimpawu. Udokotela onolwazi angase abuze: ‘Ingabe uzwa sengathi kukhona okunwabuzela ngaphakathi emlenzeni owodwa noma kuyo yomibili? Kuke kwenzeke ukuzwe nasezingalweni? Ingabe kuyaphela uma usukuma futhi uhambahamba, ugeza noma uhlikihla imilenze yakho? Ingabe kuyenzeka uma uhlezi isikhathi eside, njengasemotweni noma endizeni? Ingabe kukuhlupha kakhulu ebusuku? Ingabe ukhona emalungwini omkhaya wakini onenkinga efanayo? Ingabe owakwakho uthi ngezinye izikhathi imilenze yakho iyadluthula uma ulele?’ Uma impendulo yakho kunguyebo kweminye yale mibuzo, udokotela angase aphethe ngokuthi unesifo semilenze eyaluzayo (restless legs syndrome [RLS]).
Labo Abanalesi Sifo
Kwabanye, i-RLS iyisifo esingesibi kangako esiba khona ngezikhathi ezithile. Kwabanye, yimbi impela, iyabaqwashisa okwenza ukuba bakhathale emini bese bephazamiseka ekuphileni kwabo kwansuku zonke. Esinye isisulu sathi: “Ngizwa sengathi kunezinunu eziyaluza phakathi emilenzeni yami. Kufanele ngikhahlekhahlele ukuze iphele le mizwa.”
I-RLS ihlasela abesilisa nabesifazane futhi ivamile kanti imandla kwasebekhulile. Ivame ukutholakala kubantu abevile eminyakeni engu-50, nakuba izimpawu zibonakala kusasele amashumi eminyaka. Kokunye kungase kutholakale ukuthi izimpawu zaqala umuntu eseyingane. Kodwa i-RLS ayivamile ukubonakala ezinganeni. Ngenxa yokuthi azihlali zithule noma ziyaluza njalo, izingane ezine-RLS kuvele kuthiwe “zibulawa ukuqina.”
Nakuba ochwepheshe bethi i-RLS iyisifo esithinta izinzwa, kunzima ukusho imbangela yayo. Kwabaningi abanalesi sifo akwaziwa ukuthi sibangelwa yini. Nokho, i-RLS iye yahlanganiswa nezici ezithile. Ngokwesibonelo, i-RLS iyathathelwana emkhayeni, abazali bayidlulisela ngofuzo ezinganeni zabo. Abanye besifazane abakhulelwe baba nezimpawu ze-RLS ikakhulu ezinyangeni ezandulela eyokubeletha. Ngemva kokubeletha, lesi sifo sivame ukuphela. Ngezinye izikhathi i-RLS ivuswa yizinkinga zempilo, njengezinga eliphansi lokusansimbi noma ukuntuleka kwamavithamini emzimbeni. Izifo ezingelapheki nazo zingase zibangele izimpawu ze-RLS—ikakhulukazi ukuphathwa izinso, isifo sikashukela, isifo samathambo ne-peripheral neuropathy, ukulimala kwezinzwa ezandleni nasezinyaweni.
Ukufuna Impumuzo
Ngokudabukisayo, alikho ikhambi le-RLS futhi izimpawu zivame ukuba zimbi kakhulu uma iminyaka iqhubeka. Nokho, izindaba ezinhle ziwukuthi i-RLS ingalapheka ngokuphumelelayo, ngokuvamile ngaphandle kwemithi. Alikho ikhambi elilodwa; lokho okusiza omunye umuntu kungase kungamsizi omunye. Labo abanayo kudingeka bathole ukuthi imiphi imikhuba, imisebenzi noma imithi eyenza izimpawu zibe zimbi kakhulu noma ezenza zibe ngcono.
Isinyathelo sokuqala sokuyelapha ukunquma ukuthi sikhona yini isimo esingokwempilo esingalungiseka esibangela izimpawu ze-RLS. Labo abantula okusansimbi noma amavithamini, kungase kube ukuthi kudingeka bathasisele okusansimbi novithamini B12 ekudleni kwabo ukuze baqede izimpawu ze-RLS. Kodwa ukudla amavithamini namaminerali amaningi kungase kulimaze impilo yomuntu. Ngakho-ke, umuntu kufanele athintane nodokotela lapho enquma ukuthi angazidla yini izithasiselo zokusansimbi namavithamini noma cha.
Kwabanye, i-caffeine ibhebhethekisa izimpawu ze-RLS. Ikhofi, itiye, ushokoledi neziphuzo ezibandayo eziningi zine-caffeine. Ukunciphisa i-caffeine noma ukuyiyeka kungase kusize noma kuqede izimpawu ze-RLS. Uphuzo oludakayo nalo luvame ukuziyisa phambili izimpawu. Ngokunciphisa uphuzo oludakayo noma ukuluyeka, abanye bathola impumuzo.
Ukuphila Ne-RLS
Uma une-RLS, ukushintsha indlela yokuphila kungase kukusize. Njengoba ukukhathala nokozela kwenza izimpawu zibe zimbi nakakhulu, kungase kukusize ukuba nesimiso sokulala esingaguquki. Uma kungenzeka, kungcono ukulala endaweni ethulile, epholile nenethezekile. Ukulala ngesikhathi esifanayo njalo ebusuku nokuvuka ngesikhathi esifanayo njalo ekuseni nako kuyasiza.
Ukuvivinya umzimba njalo kuyokusiza ukuba ulale kahle ebusuku. Nokho, ukuzivivinya kakhulu phakathi namahora ayisithupha ngaphambi kokuba ulale kungase kube nomphumela omubi. Abanye abane-RLS bathola ukuthi ukuvivinya umzimba okusesilinganisweni ngaphambi nje kokuba balale kuyabasiza ukuba balale kahle. Zama izindlela ezihlukahlukene zokuvivinya umzimba ubone ukuthi iyiphi ekulungele.
Ungalwisani nomuzwa wokunyakaza. Uma uzama ukuwucindezela, izimpawu zivame ukuba zimbi kakhulu. Ngokuvamile kungcono ukuba uvuke uhambahambe. Abanye bathola ukuthi kuba ngcono uma bezulazula, bazelule, bageze ngamanzi ashisayo noma abandayo noma bazihlikihle imilenze. Uma kudingeka uhlale isikhathi eside, njengalapho uhamba ibanga elide, kungase kukusize ukugcina ingqondo yakho imatasa ngokufunda.
Kuthiwani ngemithi? I-Restless Legs Syndrome Foundation, eseRaleigh, eNyakatho Carolina, e-U.S.A., ithi “kungase kudingeke ukuqala indlela yokwelapha [ngemithi] yodokotela.” Njengoba lingekho ikhambi elilodwa elisiza bonke abaphethwe yi-RLS, udokotela wakho kungase kudingeke athole elizokusiza kangcono. Abanye bathola ukuthi ukuhlanganisa imithi ethile kuyaphumelela. Ngezinye izikhathi umuthi okusizayo isikhathi esithile uphelelwa amandla. Njengoba ukuphuza imithi ikakhulukazi ukuyixuba kunezingozi ngokwempilo, kubalulekile ukusebenzelana eduze nodokotela ukuze uthole ukuthi ikuphi okungcono kuwe.