Yasindisa Ukuphila Kwakhe
I-“Phaphama!” ka-December 22, 1999 yayinesembozo esithi “Okwenza Ukuthumba Kube Usongo Lwembulunga Yonke.” UWilliam Louis Terrell wathi le “Phaphama!” yasindisa ukuphila kwakhe.
LAPHO nje kusanda kushaya ihora leshumi ekuseni ngoLwesihlanu, ngo-March 10, 2000, uTerrell wathunjwa ekwakhe nguJoseph C. Palczynski, Jr. emkhombe ngesibhamu. Lezi zihloko ze-Phaphama!, uTerrell athi wayelokhu ezikhumbula phakathi nosizi abhekana nalo, zazinalezi zeluleko ezivela kochwepheshe ngalokho okufanele ukwenze uma uthunjwa:
“Bambisana nabathumbi; ungabi nenkani. Abathunjwa abanenkani bavame ukuhlukunyezwa, futhi baba sengozini enkulu yokubulawa noma bajeziswe bodwa.
“Yehlisa umoya. Khumbula ukuthi izisulu eziningi ziyasinda ekuthunjweni.”
“Hlanganyela engxoxweni elula uma kungenzeka, uzame ukuxoxa. Uma abathumbi sebekubona ukuthi unjani, kungenzeka bangakulimazi noma bangakubulali.
“Batshele [abathumbi] izidingo zakho ngomoya okahle.”
“Ukuxoxa kuye kwaba yisivikelo kothunjiwe, njengoba incwadi ethi Criminal Behavior ichaza: ‘Lapho umthunjwa nomthumbi beqala ukwazana, kulapho beqala ukuthandana. Lokhu kubonisa ukuthi ngemva kwesikhathi esithile umthumbi kungenzeka angamlimazi umthunjwa.’”
UWilliam Terrell, oneminyaka engu-53 ubudala futhi ongomunye woFakazi BakaJehova, wenza okusemandleni akhe ukulandela izeluleko ezinjalo phakathi namahora acishe abe ngu-14 ethunjiwe, isikhathi esiningi ekhonjwe ngesibhamu. Usizi lwaqala ngokushesha ngemva kokuba uPalczynski engqongqoze kwaTerrell emaphandleni eduze noMgwaqo u-Interstate 95, lapho imoto uPalczynski ayeyintshontshile yaphelelwa khona uphethiloli.
Ngemva kokuzwa ukuhlupheka kwalesi sihambi, uTerrell wabonisa isifiso sokusiza. UPalczynski wacela amanzi nento yokuhamba ezomyisa eBaltimore, eMaryland, e-U.S.A. UTerrell wathi uzohlela ukuba othile amyise edolobheni laseFredericksburg, eVirginia, lapho ayengathola khona ibhasi elizombeka lapho ayeya khona. Lapho uTerrell ebuya nengilazi yamanzi, isihambi sase simkhombe ngesibhamu. UPalczynski wayala uTerrell ukuba amthathe ngemoto amyise lapho ayeya khona.
Ukulalela Iseluleko
Lapho behamba ngo-I-95, uTerrell walandela iziqondiso zikaPalczynski zokuba angeqi ijubane lomgwaqo futhi angashayeli ngendlela ezosolisa. UTerrell wehlisa umoya, waxoxa noPalczynski oneminyaka engu-31, wabonisa isithakazelo esiqotho kuye nasezimweni ezibangele ukuba bahlangane. UPalczynski wamlandisa ukuthi ezinsukwini ezintathu ngaphambili wayekade eyobona intombi yakhe uTracy, eyayisimalile. Lapho, wadubula futhi wabulala abangane bakaTracy ababili nomakhelwane ababezama ukumphazamisa lapho emthatha. Kamuva uTracy waphunyuka.
Ngobusuku obulandelayo, lapho uPalczynski ezama ukuduna imoto, inhlamvu yashaya ingane eneminyaka emibili, yayihlakaza umhlathi. Yashaya nemoto eyayishayelwa uJennifer Lyn McDonel. Ngokudabukisayo wafa, futhi enye inhlamvu yashaya isihlalo somntwana wabo ononyaka owodwa esasingenalutho. UJennifer nomnyeni wakhe, uThomas, babeya eHholo LoMbuso LoFakazi BakaJehova, lapho bobabili babenezabelo khona emhlanganweni wangalobo busuku. USarah Francis, unina kaJennifer, wachaza: “Babeqala ngqá ukushiya ingane bangayi nayo eHholo LoMbuso. [Ngalé kwalokho] ngabe sililela abantu ababili.”
Njengoba uTerrell ayeqhubeka exoxa kahle nomthumbi wakhe, uPalczynski wathi wayengahlose kulimaza muntu futhi wayemthanda ngempela uTracy efuna ukuba naye. UTerrell wachaza: “Ngamtshela ukuthi ngeke akushintshe osekwenzekile kodwa angakushintsha okusazokwenzeka, futhi ngamkhuthaza ukuba azinikele emaphoyiseni. Ngamtshela ukuthi ngizomvakashela ejele ngifunde naye iBhayibheli.” Kamuva kwabikwa ukuthi selokhu aqeda esikoleni ngo-1987, ziyishumi kuphela izinyanga uPalczynski azichitha engekho ejele noma ezikhungweni zabagula ngengqondo noma engalengiselwe sigwebo.
Esebenzisa ulwazi lwakhe njengomdala ongumKristu ongumakad’ ebona, uTerrell waqhubeka enxusa le nsizwa exakekile ngokusebenzisa izibonelo ezingokoqobo eziseBhayibhelini. Ngokwesibonelo, wayitshela ngendaba yendoda enhle, iNkosi uDavide yakwa-Israyeli, eyakhanuka umka-Uriya, omunye wamasosha amabutho kaDavide. Lapho uDavide ekhulelisa lona wesifazane, wahlela ukuba u-Uriya abulawe empini. Lapho uDavide eqasheliswa izono zakhe ngobuciko, waphenduka ngobuqotho futhi wathola umusa kaNkulunkulu.—2 Samuweli 11:2–12:14.
UTerrell wakha ubuhlobo nomthumbi, embiza ngegama lakhe eliyisifekethiso elithi Joby. Lapho bema esitolo futhi uTerrell ethunywa ukuba ayothenga ukudla nethelevishini ephathekayo, uPalczynski wathi uzobulala abantu abaningi uma uTerrell engazama ukuxwayisa noma ubani. Eqaphela isimo somthumbi esiguquguqukayo, uTerrell wavuma. Ekugcineni, ngemva kokubuka umbiko wezindaba zika-11 ngobugebengu bukaPalczynski, uPalczynski wanga uTerrell wayesenyamalala engena emizini yedolobha laseBaltimore.
Esikhathini esingangesonto kamuva, uPalczynski wabanjwa endlini ayethumbele kuyo abantu. UTerrell, umthumbi ayekhulume ngaye, wabizwa ukuba azosiza ezingxoxweni zokubonisana. Ngeshwa, aziphumelelanga, futhi ngo-March 22, uPalczynski wadutshulwa wafa amaphoyisa ahlasela kulo muzi. Akekho omunye owalimala.
Ngemva kwalokhu uTerrell wathola amakhophi angu-600 ale Phaphama! athi yasindisa ukuphila kwakhe. Usehambisele abantu amakhulu ayo. UTerrell uyabonga ngokuthi usekwenze umkhuba ukufunda ukwaziswa okuwusizo okukuyi-Phaphama!, futhi sinomuzwa wokuthi nawe uzokwenza kanjalo.
[Isithombe ekhasini 26]
UWilliam Terrell