Zama “Izinti Ezisheshayo” Ezimbili!

NGUMLOBELI WE-PHAPHAMA! ETAIWAN

UYIBONA ebusweni nje le ntombazanyana ukuthi iyakujabulela ukudla kwayo. Esandleni sayo sobunxele kunesitsha esigcwele nswí ilayisi, nemifino nenhlanzi. Esandleni sayo sokudla kunezinti zoqalo ezincane ezimbili. Ibamba kahle lezi zinti ngeminwana yayo emincane, le ntombazane ithatha ukudla ekuthandayo okungaba umthamo oyilingene ikufake kahle emlonyeni. Ngezinye izikhathi iphakamisela isitsha ezindebeni, bese ikha ngokushesha ilayisi ngalezi zinti ilifake emlonyeni. Kubukeka kujwayelekile, kulula futhi kuhlanzekile.

Phela, lokho okuphethwe yintombazane yizinti zokudla ezidumile. NgesiShayina zibizwa ngokuthi k’uai tzu (ngesiPinyin, kuaizi) okusho ukuthi “ezisheshayo.” Nokho, zitholakala kuyo yonke imizi eNingizimu-mpumalanga ye-Asia. Mhlawumbe wake wazama ukuzisebenzisa lapho udla esitolo sokudla samaShayina. Kodwa ingabe uyazi ukuthi zaba khona kanjani izinti zokudla? Noma ukuthi zaqala nini ukusetshenziswa futhi kanjani? Futhi ingabe ungathanda ukwazi ukuthi ungazisebenzisa kanjani ngendlela yakhona?

“Izinti Ezisheshayo”

Izinti zokudla yizinti ezincane cishe ezingamasentimitha angu-20 kuya kwangu-25 ubude. Ngokuvamile ingxenye engenhla yothi iyisikwele. Lokhu kwenza kube lula ukuyibamba futhi ingagingqiki etafuleni. Ingxenye engezansi ivame ukuba yindilinga. Ngokuvamile izinti zamaJapane zimfushane futhi zicijile ngasekugcineni kunezamaShayina.

Kulezi zinsuku lapho imikhiqizo yenziwa ngobuningi khona, izitolo zokudla eziningi zinezinti zokudla esezigoqiwe ozithola zisahlangene ngenhla. Lowo odlayo kufanele azihlukanise ngaphambi kokuba azisebenzise. Ngenxa yokuthi zisetshenziswa kanye nje kuphela, izinti ezinjalo zenziwa ngokhuni nje oluvamile noma ngoqalo. Izinti ezisetshenziswa ezitolo ezibizayo noma emakhaya zivame ukuba zinhle, zenziwe ngoqalo olupholishiwe, ukhuni olupendwe ngokukhazimulayo, ipulasitiki, insimbi noma mhlawumbe ngisho nangesiliva noma uphondo lwendlovu. Zingase ziqoshwe amazwi athile enkondlo noma zihlotshiswe ngomdwebo.

Indlela Yokusebenzisa Izinti Zokudla

Izivakashi eziningi ezivakashela emazweni aseMpumalanga njengeChina neJapane ziyachazeka uma zibona ingane encane mhlawumbe eneminyaka emibili idla ngezinti ezibonakala zinkulu. Kungakabiphi, ingane isuke isikushaye yakubhuqa ukudla okusuke kusesitsheni. Kubonakala kulula ngempela.

Ungathanda yini ukuzama ukusebenzisa “izinti ezisheshayo” ezimbili? Ekuqaleni ungase ukuthole kunzima ukwenza izinti zinyakaze ngendlela ofuna ngayo, kodwa lapho uzijwayeza, kuba lula futhi izinti ziba njengesenezelo sezandla zakho.

Lezi zinti zibanjwa ngesandla esisodwa kuphela, ngokuvamile isandla sokudla. (Bheka imifanekiso ekhasini 15.) Okokuqala, goba isandla sakho njengenkomishi, isithupha sakho usihlukanise kweminye iminwe. Beka uthi olulodwa phakathi kwesithupha neminwe, uluncikise esiqwini sikankomba nasesihlokweni somunwe wendandatho. Bese ubeka uthi lwesibili luqondane nolokuqala, ulubambe ngesithupha nonkomba neminwe ephakathi, njengoba ubungabamba ipeni. Ziqondanise ezansi ngokuzishaya etafuleni. Manje, ukuze ugcine uthi olungaphansi lunganyakazi, nyakazisa olungaphezulu ngokwehlisa wenyusa unkomba neminwe ephakathi. Qhubeka wenza lokhu kuze kube yilapho izihloko zezinti zihlangana kalula. Manje usukulungele ukusebenzisa la mathuluzi anemisebenzi eminingi ukuze usine uzibethele kulokhu kudla kwamaShayina okwehl’ esiphundu—kusukela ohlamvwini olulodwa lwelayisi kuya eqandeni lesigwaca! Izinti zihambisana kahle nokudla kwamaShayina ngoba kuvame ukusikwa kube izingcezu.

Kuthiwani ngesidlo senkukhu, idada noma isinqe sengulube, lapho kungasikiwe kwaba amaqatha amancane? Ngokuvamile inyama iphekwa ngendlela yokuthi kube lula ukusebenzisa izinti ekuhlukaniseni amaqatha. Inhlanzi, evame ukubekwa iphelele, idleka kahle ngezinti; ungawagwema kalula amathambo, okuyinto engelula kangako uma usebenzisa ummese nemfoloko.

Kuthiwani ngokudla ilayisi? Uma kudliwa nje ngokukhululekile, ungathatha isitsha selayisi ngesandla sobunxele, usiphakamisele emlonyeni, bese ukha ilayisi ngezinti ulifake emlonyeni. Nokho, uma kuyisimo esihloniphekile, uyokukha ilayisi ngezinti kancane kancane.

Kuthiwani ngomhluzi, ovame ukungasali ekudleni kwamaShayina? Kuvame ukuba khona ukhezo lobumba olulula. Kodwa uma umhluzi unama-noodle, noma amadombolo noma imifino, amaqatha enyama noma enhlanzi, zama ukuthatha ukudla ngezinti zakho ezisesandleni sokudla nokhezo esandleni sakho sobunxele ukuze ukusekele kuye emlonyeni.

Imikhuba Emihle Nezinti

Uma umenyelwe isidlo emzini wamaShayina, kuyasiza ukwazi imikhuba emihle yasetafuleni yamaShayina. Okokuqala, kubekwa ukudla okuningi phakathi netafula. Linda kuze kube yilapho okumemile noma inhloko yomkhaya ithatha izinti zayo bese ibonisa ukuthi bonke sebengaqala. Leso isikhathi esifanelekile ngalabo abamenyiwe ukuba bamukele isimemo, bathathe izinti zabo basine bazibethele.

Ngokungafani nezinye izindlela zokudla zaseNtshonalanga, izitsha zokudla azidluliswa etafuleni. Kunalokho, bonke abasetafuleni bayazithathela. Uma kudla umkhaya, kuwumkhuba ukuba ilungu ngalinye lisebenzise izinti zalo lizithathele ukudla ezitsheni zokudla likufake emlonyeni. Noma kunjalo, kubhekwa njengomkhuba omubi ukuhubuluza ukudla, ukhothe izihloko zezinti zakho, noma uqhwande ukudla ufune iqatha olithandayo. Omama eMpumalanga bafundisa izingane zabo ukuba zingazilumi izihloko zezinti zazo, hhayi nje kuphela ngenxa yokuthi bakhathazeka ngokuhlanzeka kodwa futhi ngenxa yokuthi kuzenza zibukeke kabi izinti.

Ngenxa yokucabangela izivakashi, ngezinye izikhathi kubekwa izinkezo zokuphaka noma izinti ezengeziwe. Lezi zisetshenziselwa ukuphaka ukudla ezitsheni eziphakathi netafula, ukuphakele kwesinye isitsha noma esitsheni sakho selayisi. Nokho, ungacasuki uma okumemile esebenzisa izinti zakhe athathe iqatha elihle alibeke esitsheni sakho. Phela, ufuna ukuqiniseka ukuthi isivakashi sakhe esikhethekile sithola okungcono kakhulu!

Kubhekwa njengomkhuba omubi ukukhomba ngezinti, njengoba kunjalo ngemimese nezimfoloko. Kubhekwa njengemikhuba emibi futhi ukuthatha okuthile usaphethe izinti ngesandla. Ngakho-ke uma kudingeka usebenzise ukhezo lokuphaka noma uthathe indwangu yokusula noma inkomishi yetiye, qale ubeke phansi izinti. Kuvame ukuba kube khona izinto ezincane ezikhangayo zokubeka izinti.

Uma uqeda ukudla, beka izinti zakho phansi ngobunono, bese uyaphumula, ulinde. Kuwumkhuba omubi ukusuka etafuleni bengakaqedi bonke abantu. Nalapha futhi, yilowo okumemile noma inhloko yomkhaya ovala ukudla ngokusukuma, abese esho ukuthi bonke sebengasuka etafuleni.

Manje njengoba sewazi ukuthi zisetshenziswa kanjani, okudingayo nje ukuzitholela izinti futhi uzijwayeze ukuzisebenzisa. Ngokuzayo lapho othile ekumemela esitolo sokudla samaShayina noma emzini wakhe ukuba uzodla ukudla kwamaShayina, kungani ungazami “izinti ezisheshayo” ezimbili? Zingase zenze ukudla kunambitheke nakangcono!

[Ibhokisi ekhasini 14]

Umlando Omfushane Wezinti Zokudla

Ezinye izazi ezingamaShayina zikholelwa ukuthi izinti zokuqala zazisetshenziselwa ukupheka, hhayi ukudla. Ukudla okuluhlaza kwakusongwa ngamahlamvu, futhi izinti zazisetshenziselwa ukuthatha amatshe ashisayo ayiswe kulokhu okugoqiwe. Ngale ndlela ukudla kwakuphekwa kodwa umpheki angashi! Kamuva emlandweni, izinti zasetshenziselwa ukukhipha ukudla ebhodweni.

Kungenzeka ukuthi izinti zakuqala zazenziwa ngokhuni olushayo noma uqalo.a Leso esinye sezizathu esenza ungakwazi ukusho ngokuthe ngqó ukuthi zaqala nini ukusetshenziswa. Abanye bakholelwa ukuthi izinti zazisetshenziswa eChina phakathi nokubusa kohlanga lwamakhosi amaShang (cishe ngekhulu le-16 kuya ekhulwini le-11 B.C.E.). Incwadi yomlando osukela ngemva nje kwesikhathi sikaConfucius (551-479 B.C.E.) ikhuluma ngokuthatha ukudla emhluzini, okubonisa ukuthi kwakusetshenziswa izinti zohlobo oluthile.

Ngokusobala ekuqaleni kohlanga lwamakhosi aseHan (206 B.C.E. kuya ku-220 C.E.), ukudla ngezinti kwase kuwumkhuba ovamile. Kwambiwa ithuna langaleyo nkathi eChangsha, eSifundazweni saseHunan, lapho kwatholakala khona izinto zokudla ezipendwe ngopende okhazimulayo, kuhlanganise nezinti.

AmaJapane, abaseKorea, abaseVietnam nabanye baseMpumalanga nabo basebenzisa izinti, ikakhulu ngenxa yethonya lesiko lamaShayina.

[Umbhalo waphansi]

[Izithombe ekhasini 15]

Ukuzijwayeza kukwenza umpetha