IBambouseraie—Ukufezeka Kwephupho

NGUMLOBELI WE-PHAPHAMA! EFRANCE

CISHE eminyakeni engu-150 edlule eningizimu yeFrance, u-Eugène Mazel, umthengi wezinongo zase-Asia, wayezimisele ukwenza indawo yezithombo zoqalo enkulu kunazo zonke emhlabeni, enezinhlobonhlobo ezingaba ngu-200 zalesi sitshalo esikhula ngokushesha, futhi esifeza imisebenzi eminingi. Kuze kube ngu-1855, isifiso sikaMazel sasivinjwe isithiyo esikhulu: Uqalo lwalungamili eYurophu.

Imizamo yokulanda lesi sitshalo e-Asia yabhuntsha. Nakuba uqalo lukhula kahle endaweni yalo (izinhlobo ezithile zingamelana namazinga okubanda afinyelela ku-11°C. ngaphansi kwezinga-qhwa futhi zingakhula endaweni engamamitha angu-5 000 ukuphakama), kwakungenakwenzeka ukugcina izimpande ziphila phakathi nohambo olude lokunqamula amazwekazi. Nokho, lapho kufika imikhumbi esheshayo, kwaphumelela ukuthumela izithombo zoqalo eNgilandi ngo-1827, futhi kamuva, eFrance. Kwakungasekude ukuba iphupho likaMazel lifezeke!

Manje uMazel weyesebhekene nenselele yokuthola indawo ekahle yokukhulisa lezi zithombo. Ngo-1855 wathenga indawo engamahektare angu-34 eduze nase-Anduze, eningizimu yeFrance, enesimo sezulu saseMediterranean futhi enomhlabathi omuhle. Kwadingeka asebenze kanzima edonsa amanzi okunisela ewasusa emfuleni oseduze. Kodwa imizamo kaMazel yokuzikhandla yaphumelela.

Ngokudabukisayo, ngo-1890, uMazel wayengasenamali futhi kwadingeka ukuba adayise insimu yakhe eyigugu. Nokho ngokujabulisayo, abanye baqhubeka lapho ayegcine khona, kangangokuthi manje unyaka ngamunye abantu abalinganiselwa ku-350 000 bavakashela iBambouseraie—ewukufezeka kwephupho likaMazel.

[Umthombo Wesithombe ekhasini 31]

All pictures: La Bambouseraie de Prafrance