Okuphawulwa Abafundi Balo Magazini
UVasco da Gama Ngasijabulela kakhulu isihloko esithi “Uhambo Oluyingqayizivele LukaVasco da Gama.” (March 22, 1999) Sasicacile futhi sifundisa. Nabonisa ukuthi wayenemikhumbi emithathu ohambweni lwakhe, kodwa empeleni yayimine. Futhi, nathi uDa Gama wabuyela eLisbon ngo-September 8, 1499. Kanti wafika ekupheleni kuka-August.
P. N., Kenya
Kuyiqiniso ukuthi uhambo lukaDa Gama lwaqala lunemikhumbi emine. Nokho, ingxenye yohambo echazwe esingenisweni yenzeka ngemva kokuba umkhumbi wesine ubhujisiwe. Ngokuqondene nosuku afika ngalo eLisbon, imithombo eminingi ilubeka ekuqaleni kuka-September. Ngokuthakazelisayo, “i-Portugal and the Discoveries” ithi: “UVasco da Gama wafika ngo-August 29 noma ekupheleni kwakhe, wamukelwa iNkosi ngomkhosi ofanele ngo-September 8.” Lokhu kungalungisa lokho okubonakala sengathi kuyaphikisana.—ED.
Ingabe Uyazi? Ngithanda ukunibhalela ngezihloko ezithi “Ingabe Uyazi?” ezikuyi-Phaphama! Ngiyazijabulela ngoba zigcina ingqondo yami iphapheme, futhi umuntu oneminyaka engu-78, kufanele agcine ingqondo yakhe isebenza. Lapho sifunda iBhayibheli, izingqondo zethu ngokuvamile azikwazi ukugcina ukwaziswa okuningiliziwe okunjengalokhu okuboniswe kulezi zihloko ezithi “Ingabe Uyazi?” Ngakho ngichitha isikhathi ngibheka yonke imibhalo ekhonjiwe. Ngiyabonga ngale ngosi.
J. W., United States
UComenius Ngifundisa iqembu labantu abadala ukufunda. Isihloko senu esihle kakhulu esithi “UComenius—Umsunguli Wemfundo Yanamuhla” (May 8, 1999) sangisiza ukuba ngiqonde ukuthi kungani abanye benobunzima ekufundeni. Ukwaziswa okusebhokisini elihambisana naso elithi “Ezinye Zezimiso ZikaJohn Comenius,” zizoba usizo kakhulu.
N. A. F., Brazil
Ngiyabonga ngesihloko esifundisayo. Ngafunda okwengeziwe ngoComenius emakhasini amane e-Phaphama! kunengangikuthole eyunivesithi ezifundweni eziyishumi.
H. P., Germany
IBhayibheli LaboMdabu BaseMelika Lapho ngifunda isihloko esithi “AboMdabu BaseMelika NeBhayibheli” (May 8, 1999), isithakazelo sami sashukunyiswa ikakhulu ukubhekisela kwenu eBhayibhelini likaJohn Eliot ayelihumushele olimini lwamaNdiya aseMassachusett. Mina nomyeni wami sabona ikhophi yalelo Bhayibheli lapho sivakashele eHuntington Library, eSan Marino, eCalifornia. Lalivulwe encwadini yamaHubo, futhi igama likaJehova libonakala ngokuphindaphindiwe. Yeka injabulo esaba nayo lapho sibona igama likaNkulunkulu kuleli Bhayibheli lekhulu le-17!
B. J., United States
Ukugqilazwa Kwezingane Ngiyabonga ngochungechunge oluthi “Ukugqilazwa Kwezingane—Sekuzophela!” (May 22, 1999) Lapho ngibona isembozo okokuqala, umbono wami oqotho wawuwukuthi lezi zihloko azikhulumi ngezwe lakithi. Kodwa lapho ngiqala ukuzifunda, angikwazanga ukuyeka. Uma ngingagwegwesi, ngingathi ngashaqeka. Ngisanda kuthenga u-teddy bear ngemali encane kakhulu kunaleyo obekungaba yiyo uma bewenziwe eJapane. Kuyadabukisa ukucabanga ukuthi umsuka wentengo ephansi kungase kube ukuphathwa ngonya kwezingane ezincane.
S. O., Japan
Ukwehlisa Umzimba Ngineminyaka eyishumi ubudala. Ngiyabonga ngesihloko esithi “Intsha Iyabuza. . . Ngingakunqoba Kanjani Ukuhlale Ngicabanga Ngokwehlisa Umzimba Wami?” (May 22, 1999) Bengihlale ngicabanga ukuthi ngikhuluphele kakhulu. Ngokufunda lesi sihloko, ngaqonda ukuthi umzimba womuntu awuyona into eyinhloko. Okubaluleke kakhulu izimfanelo zakhe.
M. S., Russia