Iculo Elagxila Kuye
“ESIKOLENI ngangihlabelela ingoma eyayinamazwi athi, ‘uJehova omkhulu ohlezi esihlalweni sobukhosi enkazimulweni yakhe.’ Ngangihlale ngizibuza, ‘Ubani lo Jehova?’”
La mazwi kaGwen Gooch, ongomunye woFakazi BakaJehova, futhi ondaba yokuphila kwakhe yanyatheliswa kuyi-Nqabayokulinda, afana nawomfundi othile.a UVera, waseSeattle, eWashington, e-United States, uyakhumbula, “Ngahlangabezana nokufanayo esikoleni esiphakeme.”
Ngemva kokuzwa ingoma ethile, uVera, njengoGwen, waba nelukuluku elikhulu lokwazi ukuthi kungaba ngubani lo Jehova. Ilukuluku lokufuna ukwazi likaVera laneliswa ngo-1949 lapho umfowabo emtshela okokuqala ngoJehova, okuyigama likaNkulunkulu siqu eliseBhayibhelini.
UVera usebe ngomunye woFakazi BakaJehova cishe iminyaka engu-50 manje. Kodwa akazange ayikhohlwe leyo ngoma ayeyicula esafunda esikoleni esiphakeme. “Iminyaka eminingi,” esho, “ngizama ukuthola umqambi wayo.” Ekugcineni, ngosizo lwesitolo somculo, waphumelela. Le ngoma yaqanjwa ngo-1825 uFranz Schubert. Amazwi ahambisana nezinsimbi adumisa uJehova ngempela. Ngokwesibonelo, kunalezi zisho ezilandelayo:
“Mkhulu uJehova, iNkosi! ngoba iZulu noMhlaba kumemezela amandla akhe amangalisayo. . . . Uwezwa endle, ezivunguvungwini, ekudumeni kwemifula . . . Uyawezwa ekububuleni kwamahlathi amancane namakhulu, uyawabona enyakazisa okusanhlamvu; ebuhleni bezimbali ezinamakha amnandi, ezinkanyezini ezigcwalisa isibhakabhaka esiluhlaza saseZulwini . . . Ukwesabeka kwawo kuzwakala ekudumeni kwezulu, namalangabi emibani yaKhe abaneka esibhakabhakeni. Kodwa okungaphezu kwalokho ukushaya kwenhliziyo yakho kusamemezela amandla kaJehova, . . . iNkosi uNkulunkulu ongunaphakade. Bheka Phezulu kuYe ube nethemba lomusa nesihe. . . . Mkhulu uJehova, iNkosi!”
UVera uyaphawula: “Ngezinye izikhathi ngiye ngasebenzisa izosha zale ngoma ukuze ngibonise abantu ukuthi ngawo-1800 bakhona ababelazi igama likaNkulunkulu futhi bemdumisa.” Iqiniso liwukuthi kusukela ezikhathini zasendulo amadoda nabesifazane bokholo baye bashukunyiselwa ukuba badumise uJehova ngamaculo. Kungumkhuba oyoqhubeka phakade, ngoba azinakubalwa izizathu zokudumisa uMdali wezulu nomhlaba.
[Umbhalo waphansi]
a Bheka INqabayokulinda ka-March 1, 1998.
[Isithombe ekhasini 25]
UVera