Umbono WeBhayibheli

Indlela Yokukhetha Umngane Womshado

OWESIFAZANE ONGASHADILE WABUZWA, “INGABE UKE UCABANGE NGOKUSHADA?” “NGICABANGE?” EPHENDULA NGOKUSHESHA. “NGIYAKHATHAZEKA.”

AMAZWI ambalwa alona wesifazane abonisa ngokucacile ukuthi kwabanye abantu sinamandla kangakanani isifiso sokuthandwa nokuba nomngane. Abaningi babheka ukuthola umngane womshado njengenye yezinto ezibaluleke kakhulu ekuphileni. Ngakho, emhlabeni wonke, kuye kwaba nokwanda okusheshayo kwezinkonzo eziklanyelwe ukusiza abantu ukuba bathole umngane womshado. Nokho, ezingxenyeni eziningi zomhlaba, inani lemishado engaphumeleli liba ngaphezu kwenani laleyo ephumelelayo.

Emazweni aseNtshonalanga kuvamile ukuba abantu bazikhethele umngane womshado. Ngakolunye uhlangothi, imishado ehlelwa abazali isalokhu iyisiko kwezinye izingxenye zase-Asia nase-Afrika. Kunoma yikuphi, le ndaba akufanele ithathwe kalula. Zimbalwa ezinye izinqumo umuntu azenzayo ekuphileni ezingamenza athole injabulo noma ukudabuka njengomshado. Umshado onothando ungaba ocebisa kakhulu nowanelisayo. Ngokuphambene, umshado onokuxabana ungaba umthombo oqhubekayo wobuhlungu nokucindezeleka.—IzAga 21:19; 26:21.

Njengabanye, amaKristu eqiniso, afuna ukuba imishado yawo ilethe injabulo nokwaneliseka. Kodwa futhi afisa ukujabulisa noNkulunkulu futhi amdumise. (Kolose 3:23) Njengoba enguMdali noMsunguli womshado, uNkulunkulu uzazi kahle izidingo zethu zangempela nokuthi yikuphi okungcono kithina. (Genesise 2:22-24; Isaya 48:17-19) Ngaphandle kwalokho, uye wabona izigidi ngezigidi zemishado, emihle nemibi, phakathi nezinkulungwane zeminyaka umuntu ekhona. Uyakwazi okuphumelelayo nokungaphumeleli. (IHubo 32:8) NgeZwi lakhe, iBhayibheli, usinikeza izimiso ezicacile neziqondile, ezisiza noma yimuphi umKristu ukuba akhethe ngokolwazi oluhle. Yiziphi ezinye zalezi zimiso?

Bheka Ngalé Kokubukeka

Lapho abantu bekhululekile ukuba bazikhethele lowo abafuna ukushada naye, kungase kuzenzekele nje bazane nalowo abangase bashade naye noma bathulwe abangane noma yizihlobo. Ngokuvamile, isithakazelo sothando sibangelwa ukukhanga okungokomzimba. Nakuba lokhu ngokuqinisekile kuyisisusa esingokwemvelo nesinamandla, iBhayibheli lisikhuthaza ukuba sibheke okungaphezu kokubukeka lapho sicabanga ngomshado.

“Ubuhle buyinkohliso, nokubukeka kuyize, kepha owesifazane owesaba uJehova uyakudunyiswa,” kusho izAga 31:30. Umphostoli uPetru wakhuluma “ngesambatho esingenakonakala somoya othule nomnene, ongowenani elikhulu emehlweni kaNkulunkulu.” (1 Petru 3:4) Yebo, izimfanelo ezingokomoya zalowo ongaba umngane womshado—ukuzinikela kwakhe kuNkulunkulu nothando lwakhe ngoNkulunkulu kanye nobuntu bakhe bobuKristu—zibaluleke ngaphezu kobuhle bomzimba. Kubalulekile ukuba nesikhathi esanele sokukhetha ngaphandle kokukhohliswa imizwa yakho ngalowo muntu, ukhethe umuntu eninemigomo engokomoya efanayo naye futhi ozama ukubonisa izithelo zomoya kaNkulunkulu. Lokhu kuyosiza kakhulu ekubeni nomshado ojabulisayo.—IzAga 19:2; Galathiya 5:22, 23.

‘Shada ENkosini Kuphela’

Ukuba nemigomo kanye nezinkolelo ezifanayo nomuntu ofuna ukushada naye kubaluleke kakhulu. Umshado uyinselele ngempela, ufuna ukulungisa okuningi ekuziphatheni nasesimweni sengqondo kini nobabili. Kunengqondo ukuphetha ngokuthi lapho kukuningi enifana ngakho nalowo ozoshada naye, yilapho kuba lula khona lokho kulungisa.

Lokhu kusisiza ukuba sibone ukuthi kungani umphostoli uPawulu anxusa amaKristu ukuba agweme ukuboshelwa “ngokungalingani ejokeni nabangewona amakholwa.” (2 Korinte 6:14) UPawulu wayazi ukuthi ukushada nomuntu ongenalo ukholo olufanayo nongaziqondi ngendlela efanayo izimiso zeBhayibheli, kungadala ingxabano nokungezwani. Isiyalo ‘sokushada kuphela eNkosini’ sinengqondo. (1 Korinte 7:39) Sibonisa ukucabanga kukaNkulunkulu. Labo abasilandela ngokuhlakanipha bagwema izinkathazo nezinkinga eziningi ezingathi sína.—IzAga 2:1, 9.

Imishado Ehlelwa Abazali

Kuthiwani ngezindawo lapho imishado ehlelwa abazali isalokhu iyisiko? Ngokwesibonelo, eningizimu yelaseNdiya, balinganisela ukuthi amaphesenti angu-80 ayo yonke imishado, ahlelwa abazali. Ukuthi abazali abangamaKristu bayalilandela leli siko noma cha kuyisinqumo somuntu siqu. Nokho, ukuhlelwa okunjalo kwemishado kuphumelela kakhulu uma kubusa izindinganiso ezingokomoya.

Labo abathanda imishado ehlelwa abazali banomuzwa wokuthi lokhu kwenza ukuba isinqumo sibe sezandleni zabantu abanokuhlangenwe nakho nasebevuthiwe. “Abanye abazali banomuzwa wokuthi ngenxa yeminyaka yezingane zabo nokuntula okuhlangenwe nakho, abanakuzethemba ukuthi zikwazi ukwahlulela kahle ngokuphathelene nokuvuthwa okungokomoya komuntu ezizoshada naye,” kuphawula omunye umdala ongumKristu e-Afrika. “Intsha ayinakho okuhlangenwe nakho ekuphileni futhi ingase inqume izinto ngokomzwelo,” kunezela umbonisi ojikelezayo eNdiya. Njengoba abazali bebazi kangcono kunanoma ubani ubuntu bezingane zabo, banomuzwa wokuthi basesimweni esingcono kakhulu sokukhethela izingane zabo ngokuhlakanipha. Kungaba ukuhlakanipha ngabo ukucabangela imibono yensizwa kanye nentombi.

Nokho, uma abazali bengazinaki izimiso zeBhayibheli, bangase bazithole bebhekene nemiphumela emibi kamuva uma lowo mshado uba nezinkinga. Ngenxa yokuthi kunamathuba amancane okwazana kahle kusengaphambili kwalabo abazoshada, izinkinga zingase zibe umphumela. Uma ziba khona, kuchaza ubaba ongumKristu eNdiya, “ukuthambekela kuwukuba kusolwe abazali.”

Kubazali abangamaKristu abahlelela izingane zabo umshado, kumelwe kucatshangelwe nesisusa. Uma ukukhetha umngane womshado kubuswa imigomo yokuzuza izinto ezibonakalayo noma isifiso sokuvelela, kuba nezinkinga. (1 Thimothewu 6:9) Ngakho-ke, labo abahlelela abanye imishado kumelwe bazibuze, ‘Ingabe lokhu kukhetha kwenzelwe ukuqinisekisa ukuthi kuyoba nenjabulo kanye nenhlalakahle engokomoya kubo bobabili? Noma ingabe kumane kuwukwandisa udumo lomkhaya noma ingcebo noma ukuzuza ngokwezimali?’—IzAga 20:21.

Iseluleko seBhayibheli sicacile futhi sinenzuzo. Uma kucatshangelwa umngane womshado, isimilo nesimo esingokomoya kumelwe njalo kube okubaluleke kakhulu, kungakhathaliseki ukuthi ukhethwa kanjani. Uma lokhu kwenziwa, uJehova uNkulunkulu, uMsunguli welungiselelo lomshado uyadunyiswa, futhi labo abashadayo bangaba nesiqalo esihle nesiqinile ngokomoya. (Mathewu 7:24, 25) Lokhu kuyosiza kakhulu ekubeni umshado ube ojabulisayo nonezibusiso.