Ibhuloho Elaqanjwa NgoVasco Da Gama
NGUMLOBELI WE-PHAPHAMA! EPORTUGAL
INDABA eyayisematheni emaphephandabeni asePortugal kwakuwukuvulwa kwelinye lamabhuloho amade kunawo wonke eYurophu ngokuqhunyiswa kweziqhumane zokudlala. U-March 29, 1998 kwakuwusuku lokuvulwa kweBhuloho iVasco da Gama elingamakhilomitha angu-17,2 ubude. Njengoba laqanjwa ngetilosi elingumPutukezi elavula indlela ehamba olwandle esuka eNtshonalanga Yurophu iye eNdiya ngekhulu le-15 leminyaka, leli bhuloho elisha livula izindlela ezintsha eziya enyakatho yezwe enezimboni, emabhishi anesihlabathi esimhlophe aseningizimu ye-Algarve neziya eSpain.
Leli bhuloho, elingelesihlanu emabhulohweni amade kunawo wonke emhlabeni, lisuka enhloko-dolobha yasePortugal, iLisbon, linqamule phezu kwesizalo soMfula iTagus lize lifike edolobheni laseMontijo, ogwini oluseningizimu. Ingxenye yalo engamamitha angu-826 engabanjiwe izinsika yenza ukuba izinto ezinkulu ezihamba olwandle ebangeni elingamamitha angu-45 ngaphansi zikwazi ukudlula.
Ukuqala Komcimbi
Umcimbi wokulivula empeleni waqala njengendumezulu yedili ngesonto elalendulela ukuvulwa kwalo ngokomthetho. Yebo, abantu babejabule kakhulu ngeSonto, ngo-March 22, njengoba abantu abangu-15000 babemenyelwe esidlweni somdabu samaPutukezi se-feijoada noma isishebo sikabhontshisi. Babezodlelaphi laba bantu abaningi kangaka? Njengokulindelekile, ebhulohweni elisha! Yeka umbukwane okwakuyiwo ukubona itafula lidekwe endaweni yebhuloho engaphezu kwamakhilomitha amahlanu! Kwadliwa kahle futhi abantu babonga kakhulu ngendlela ehloniphekile okwakwenziwe ngayo.
Isidingo Esikhulayo
Kungani kwakudingeka ibhuloho elinjalo? Kusukela ngo-1966, iLisbon ibisebenzisa ibhuloho elibanjwe amakhebula elingamamitha angu-1013 elibizwa ngokuthi i-25th of April. Isilinganiso sezimoto ezazidlula kulo nsuku zonke sasingu-130 000. Ungacabanga ukuthi kwakuminyana kanjani ngesikhathi okudlula ngaso izimoto eziningi nangezimpelasonto? Kwakuyinto ejwayelekile ngabagibeli ukuba bachithe ihora noma amabili benqamula lapha kuleli bhuloho eliphakathi kweLisbon neningizimu yePortugal. Ngakho-ke yayidingeka enye indlela. Imizila yokuhamba eyisithupha yaleli bhuloho elisha esebangeni elingamakhilomitha angu-13 enhla nomfula ukusuka kwelidala, yenzé izinto zaba ngcono. Liklanywe ngendlela yokuthi lapho izimoto zifinyelela ku-52 000 ngosuku kwenezelwe omunye umzila ohlangothini ngalunye. Kwethenjwa ukuthi izimoto zizohamba ngokushelela ngejubane lamakhilomitha ayikhulu ngehora.
Ukuwela Ibhuloho
Hamba nathi njengoba singena ebhulohweni sivela ngaseningizimu, eMontijo. Sishiya izwe nexhaphozi ngemuva, manje sesigamenxe ngamakhilomitha ayishumi eMfuleni iTagus. Sekuyinkathi yokuphakama kwamanzi futhi sizungezwe amanzi nxazonke. Sizizwa silondekile ngoba le ndawo yabahamba ngezinyawo ayisheleli futhi kukhona nezinsika ezingu-1500 ezisekele lonke ibhuloho.
Manje sesifika engxenyeni yaleli bhuloho engasekelwe izinsika. Le ngxenye isekelwe amakhebula aqinile asuka phezulu ezinsikeni ezimbili eziphakeme ngamamitha angu-150 asabalale njengezinto zokugwedla umkhumbi. Izisekelo zezinsika zishona phansi ngamamitha angu-50 kuya kwangu-65. Ukuze livikeleke ngokwengeziwe, leli bhuloho lakhiwa ngendlela yokuthi likwazi ukumelana nezivunguvungu ezivunguza ngamakhilomitha angu-220 ngehora nokundindizela kokuzamazama komhlaba okukwedlula izikhathi ezine nengxenye ukuzamazama komhlaba okwabhubhisa ingxenye yeLisbon ngo-1755.
Njengoba sifika ngasemaphethelweni eBhuloho iVasco da Gama, sikhangwa izihlahla zesundu ezisemngceleni osenyakatho-mpumalanga yeLisbon. Uma sithanda singaqhubekela emgwaqweni omkhulu osiyisa enyakatho yaleli lizwe. Leli bhuloho elisha lenza ukuba umuntu akwazi ukuhamba emgwaqweni omkhulu omuhle esuka e-Algarve eseningizimu eya esifundazweni saseMinho esisenyakatho, ngaphandle kokuba kudingeke abanjezelwe ukuminyana kwezimoto eLisbon!
Izinyathelo Zokuphepha
Ngesikhathi kwakhiwa leli bhuloho, kwanakwa ngokukhethekile ukuphepha. Ukwephuka nje kwemoto okuncane kungabangela ukuminyana okukhulu kwezimoto. Nokho, njengoba kunemishini yokuthatha izithombe ze-video engu-87 ebekwe ngobuhlakani kuleli bhuloho nasemigwaqweni engenela kulo, konke okungahambi kahle ezimotweni kudluliselwa kuma-video asesiteshini samaphoyisa nasesikhungweni sokuqondisa izimoto. Uma imoto ima, kukhala inhlabamkhosi endlini yokuqondisa.
Ngaphezu kwalokho, kukhona izingcingo ezingambili ezingu-36 zokuhlaba umkhosi ezibekwe zaqhelelana ngamamitha angu-400 kulo lonke ibanga elingamakhilomitha angu-17. Isimiso sezimo eziphuthumayo sisebenza kanjani? Kunezimoto ezikhethekile ezihlale zizulazula ebhulohweni ukuze zinakekele izinkinga ezingase zivele, kuhlanganise nokudonsa izimoto noma ukucima umlilo.
Kuthiwani ngokushintsha esikhaleni kwesimo sezulu? Iziteshi zesimo sezulu zikala ijubane lomoya, ukuthi unamandla kangakanani nokuthi uya ngakuphi bese zigada isimo sezulu nezimo zomgwaqo, zinciphise ijubane elibekiwe ngokwezimo zezulu.
Le mizila elinganisene enezibani zasemigwaqweni emikhulu ezingu-1200 iba mihle kakhulu lapho sezikhanya ebusuku.
Izinselele Ezibekwa Izinto Eziphilayo
Kwakungelula ukunquma ukuthi leli bhuloho lizoba kuphi. Yiziphi izici ezazihilelekile?
Indawo elalizoba kuyo yabeka inselele enkulu mayelana nezinto eziphilayo. Lokho kwabangelwa ukuthi leli bhuloho linqamula endaweni yokulondoloza izinyoni, ekwesinye sezizalo ezinkulu eNtshonalanga Yurophu. Kwakudingeka kucwaningwe kabanzi ukuze kuvikelwe izitshalo, izinhlanzi, izinyoni, okutholwe ezemivubukulo, amanzi nomoya omuhle kanye namahektare amaningi ezindawo ezinosawoti. Kungani isizalo somfula iTagus sithandwa izilwane zasendle? Singenye yezindawo ezinomswakamo ezibaluleke kakhulu ePortugal naseYurophu, okusenza sibe yindawo ekahle yokuzalela izinyoni ezithuthayo ezivikelwa umhlaba wonke, njenge-stilt enamaphiko amnyama, i-Kentish plover, ne-tern encane. Ekwindla nasebusika, izinkulungwane zezinyoni zisebenzisa leli xhaphozi elinosawoti njengesivikelo enkathini yokuphakama kwamanzi.
Kwakudingeka kucatshangelwe nezindawo zezinhlanzi ezase zinesikhathi eside zikhona. Lokhu kwakusho ukuthi kufanele kuqashelisiswe ukuze kungaphazanyiswa izinhlanzi. Izinhlanzi ezingu-3000, ngokuyinhloko izinhlanzi ezincane neziyizicaba zafakwa uphawu ukuze kunakekelwe izindawo zokuzigcina.
Ngokungazelelwe, le ndawo yemvelo enokuthula ehlala izilwane isisondezwe eduze nedolobha. Indawo yemvelo ezungezile izothinteka kangakanani? Kuthenjwa ukuthi lokho okwenziwe ukuze kulondolozwe ugu oluyigugu olungaseningizimu kuzosiza ekuvikeleni imvelo ngangokunokwenzeka.
Ngempela intuthuko yezobunjiniyela, ubuhle bezokwakha nezilinganiso ezilinganiswe kahle kufeze lukhulu eBhulohwe-ni iVasco da Gama. IPortugal ingaziqhenya kufanele ngebhuloho elaqanjwa ngoVasco da Gama!
[Amabalazwe/Isithombe ekhasini 15]
(Ukuze ubone ukuthi indaba ihlelwe kanjani, bheka encwadini)
PORTUGAL
SPAIN
[Ibalazwe]
PORTUGAL
Lisbon
Montijo
IBhuloho IVasco da Gama
[Umthombo]
Courtesy of Lusoponte/Sonomage