Umbono WeBhayibheli

Ingabe Ubunye BobuKristu Buyakuvumela Ukuhlukahluka?

UBUNYE ebandleni lobuKristu bubalulekile. Ukuhlukana ezinkolelweni ezingokwemfundiso kungabangela izimpikiswano ezivuthayo, ukungezwani, ngisho nobutha. (IzEnzo 23:6-10) IBhayibheli lithi “uNkulunkulu uwuNkulunkulu wokuthula hhayi wesiyaluyalu.” (1 Korinte 14:33) Ngenxa yalokho, amaKristu ayalwa ukuba akhulume ngokuvumelana futhi ahlangane emqondweni ofanayo nasendleleni efanayo yokucabanga.—1 Korinte 1:10.

Ingabe la mazwi nezindima zeBhayibheli ezifana nawo kukhuthaza ukuba amaKristu afane nsé kuzo zonke izici? (Johane 17:20-23; Galathiya 3:28) Ingabe ubuKristu beqiniso njengoba buchazwe eBhayibhelini abukuvumeli ukuhlukahluka ezindabeni zomuntu siqu? Ingabe wonke amaKristu kulindeleke ukuba abe ngaphansi kwesimo esithile esingaguquki?

UNkulunkulu Uyakhanga Kithi Ngabanye

Abanye abantu bakholelwa ngokuqinile ukuthi iBhayibheli limane nje lingelinye ithuluzi lokulawula uquqaba. Kuyavunywa, liye la-setshenziswa kabi ngaleyo ndlela ngamahlelo athile. Nokho, uJesu wanikeza umbono ohluke kakhulu ngokuphathelene nemiBhalo noMlobi wayo waPhezulu. Wachaza uNkulunkulu njengonesithakazelo esijulile kuleso naleso sidalwa sakhe.

KuJohane 6:44, uJesu wachaza: “Akekho umuntu ongeza kimi ngaphandle kokuba uBaba ongithumile, emdonsa.” Isenzo esisetshenziswe lapha asisikiseli ukuthi uNkulunkulu uhudula abantu ngenkani. Kunalokho, uNkulunkulu ubakhanga kahle, ethinta izinhliziyo zabo. Njengoba esinye isazi seBhayibheli sikubeka, kukhona ‘ithonya elivela kuNkulunkulu lokuthambekisela ingqondo yethu ekukholweni.’ UMdali akabheki umkhaya wesintu njengoquqaba nje lwabantu. Uhlola umuntu ngamunye abese edonsela kuye labo abanenhliziyo ethambekele ngokufanele.—IHubo 11:5; IzAga 21:2; IzEnzo 13:48.

Phawula indlela umphostoli uPawulu ayevumelana ngayo nezimo. Wayeqaphela izidingo ezikhethekile zabantu ngabanye futhi eqaphela ukuthi imibono ethile yayivamile ezizweni ezithile noma izizinda. Wabe esevumelanisa indlela yakhe yokukhuluma nemibono yazo. Wabhala: “KumaJuda ngaba njengomJuda, ukuze ngizuze amaJuda . . . Kwababuthakathaka ngaba buthakathaka, ukuze ngizuze ababuthakathaka. Ngiye ngaba yizinto zonke kubantu bazo zonke izinhlobo, ukuze ngazo zonke izindlela ngisindise abathile.”—1 Korinte 9:20-22.

Ngokusobala, uPawulu akazange enze abantu babe ovuma-zonke noma abaphathe ngendlela efanayo bonke. Wabanikeza lesi sikhuthazo: “Amazwi enu ngaso sonke isikhathi mawabe nomusa, ayoliswe ngosawoti, ukuze nazi ukuthi kufanele nimphendule kanjani umuntu ngamunye.” (Kolose 4:6) Yebo, uPawulu namanye amaKristu kwakumelwe baqaphele futhi bahloniphe ukuhluka komuntu ngamunye ukuze bakwazi ukumsiza.

Injongo KaNkulunkulu Yasekuqaleni

Le nhlonipho ngomuntu ngamunye iyaqhubeka ngemva kokuba umuntu eseyingxenye yebandla lobuKristu. Abantu bakaNkulunkulu abalona uquqaba olufanayo noluvumelana ngazo zonke izindlela ukuze luhambisane nentando yalabo abasegunyeni. Kunalokho bajabulela ukuba nobuntu obuhlukahlukene futhi banamakhono, imikhuba, kanye nemibono ehlukene. Ukuhluka komuntu ngamuye akubhekwa njengokucikayo noma okunesidina. Kuyingxenye yenjongo kaNkulunkulu yasekuqaleni.

Ngakho-ke, ezweni elisha elithenjiswe yiBhayibheli kwabalungileyo, ukuphelela kwabantu kuyovumela ukuhlukahluka okukhulu. (2 Petru 3:13) Ngaphansi kwesihloko esithi “Perfection,” i-encyclopedia yeBhayibheli i-Insight on the Scripturesa iphawula ngokufanelekile ngendlela elandelayo: “Nokho, ukuphelela akusho ukuphela kokuhlukahluka, njengoba abanye abantu bevame ukucabanga kanjalo. Izilwane, eziwumkhiqizo ‘womsebenzi ophelele’ kaJehova (Gen[esise] 1:20-24; Dut[eronomi] 32:4), zinezinhlobo eziningi.”

I-Insight iyanezela: “Ukuphelela kweplanethi ewuMhlaba nakho akuphambani nokuhlukahluka, ukuguquka, noma ukungafani; kuvumela ubulula nobunkimbinkimbi, ukungahlobi nokuhloba, ubumuncu nobumnandi, ubuhhadlahhadla nobushelelezi, izimfunda namahlathi, izintaba nezigodi. Kuvumela ubuncwaba obuqabulayo bokuqala kwentwasahlobo, ukushisa kwehlobo nesibhakabhaka salo esiluhlaza, ukukhanga kwemibala yasekwindla, nobuhle obuhlanzekile beqhwa elisanda kukhithika. (Gen[esise] 8:22) Ngakho-ke abantu abaphelele ngeke babe ovuma-zonke abanobuntu, amathalenta, namakhono afanayo.”

Ukukhathalela Abanye

Nokho, ubuKristu beqiniso abukukhuthazi ukungabanaki abanye okubangelwa ubugovu. Umphostoli uPawulu waqaphela ngokucophelela isici ngasinye sokuphila nokuziphatha kwakhe ukuze agweme ukukhubekisa abanye. Encwadini yakhe eyayiya ebandleni laseKorinte wathi: “Nangayiphi indlela asinikezi sizathu sokukhubeka, ukuze inkonzo yethu ingatholakali inephutha.” (2 Korinte 6:3) Ngezinye izikhathi, kumelwe silawule izifiso zethu siqu sibeke izidingo zabanye kuqala kunezifiso zethu. Ngokwesibonelo, uPawulu wabhalela amaKristu aseRoma: “Kuhle ukungayidli inyama noma ukungaliphuzi iwayini noma ukungenzi noma yini umfowenu akhubeka ngayo.”—Roma 14:21.

Ngokufanayo nanamuhla, umuntu angase akhethe ukungabuphuzi utshwala phambi komuntu onenkinga yokuzithiba ophuzweni. (1 Korinte 10:23, 24) Lokhu akwenziwa ngokumcindezela ukuba avumelane nalokho okuthandwa omunye, kodwa njengesenzo somusa nothando. “Ngisho noKristu akazijabulisanga yena.” UJesu wayenobuntu bakhe siqu, kodwa akazange aphoqelele izithakazelo zakhe kuyilapho elimaza imizwa yabanye.—Roma 15:3.

Noma kunjalo, esinye sezici eziqabula kakhulu zobuKristu beqiniso ukuhlonipha kwabo inkululeko yomuntu ngamunye nezithakazelo zakhe ngaphakathi kwemingcele yeziqondiso zeBhayibheli. Bufundisa ukuthi uNkulunkulu wasenza sahlukana, asangafana. Kweyoku-1 Korinte 2:11, siyafunda: “Ubani phakathi kwabantu owazi izinto zomuntu ngaphandle komoya womuntu okuye?” Sizama ngokusemandleni ukuqonda abanye. Kodwa le ndima ibonisa ukuthi ngamunye wethu unezici ezihlukile eziqondwa nguye noMdali wakhe kuphela. ‘Sinomuntu osithekileyo wenhliziyo’ esimembula ngokuthanda kwethu.—1 Petru 3:4.

Ubunye Nokuhlukahluka —Ukulinganisela Ngokucophelela

Umphostoli uPawulu wabeka isibonelo esihle sokulinganisela kobuKristu. Nakuba ayenegunya njengomphostoli kaKristu, wayeqaphela ukuba anganqumeli abanye ngemibono yakhe.

Ngokwesibonelo, uPawulu wayenombono oqinile ngezinzuzo zokungashadi kuleli lizwe elingaphelele. Yena luqobo wayengashadile ngesikhathi ebhala: “Labo [abashadayo] bayoba nosizi enyameni yabo,” futhi, “[umfelokazi] ujabula ngokwengeziwe uma ehlala enjengoba enjalo, ngokombono wami.” Iqiniso lokuthi amazwi akhe aba ingxenye yeZwi LikaNkulunkulu eliphefumulelwe libonisa ukuthi umbono wakhe wawumuhle. Nokho, wachaza: “Ngisho noma ungashada, uyobe awenzi isono.”—1 Korinte 7:28, 40.

Ngokusobala, abaningi babaphostoli babeshadile, njengoba uPawulu akuvuma ngalawa mazwi: “Sinalo igunya lokuhola udade njengomfazi, njengabo bonke nje abanye abaphostoli nabafowabo beNkosi noKhefase, akunjalo?” (1 Korinte 9:5) AmaKristu ayazi ukuthi kule ndaba ayengenza ukukhetha okuhlukile kokukaPawulu kodwa naphezu kwalokho wayeyowahlonipha.

Ngaso sonke isikhathi abakhulekeli bakaNkulunkulu baye bavunyelwa ukubonakalisa ukholo lwabo ngokuvumelana nobuntu babo obuhlukene. Eqinisweni, uNkulunkulu waze wavumela ngisho nabalobi beBhayibheli ukuba basebenzise izindlela zabo ngabanye ekubhaleni. Ngokwesibonelo, nakuba uNehemiya ayethobekile wabhala elandisa ngaye siqu. (Nehemiya 5:6, 19) Ngakolunye uhlangothi, ngenxa yesizotha, umphostoli uJohane akazange alisebenzise nakanye igama lakhe ekulandiseni kweVangeli lakhe futhi akazange abhekisele kuye ngokwakhe. UNkulunkulu wazivumela zombili lezi zindlela futhi wenza ukuba zigcinwe eBhayibhelini.

Izibonelo ezifanayo zokulinganisela nokuqonda zitholakala kuyo yonke imiBhalo. Ngokukhanyayo, ubunye bobuKristu buyakuvumela ukuhlukahluka. Yiqiniso, ukuhlukahluka kwezizinda nemibono kungase kuholele ekuhlukaneni uma izimfanelo ezingokomoya zintuleka. (Roma 16:17, 18) Kodwa lapho ‘sigqoka uthando, oluyisibopho esiphelele sobunye,’ sifunda ukwamukela futhi sijabulele ubuntu babanye obuyingqayizivele.—Kolose 3:14.

“Ngakho-ke yamukelanani,” kusho iBhayibheli, “njengoba nje noKristu asamukela, ninombono wokuba kube inkazimulo kuNkulunkulu.” (Roma 15:7) Ngosizo lomoya kaNkulunkulu, amaKristu angafinyelela ukulinganisela ngokucophelela kokulondoloza ubunye kuyilapho ejabulela izinhlobonhlobo zobuntu obuhlukene ebandleni.

[Imibhalo yaphansi]

[Amazwi acashunwe esihlokweni ekhasini 14]

UMdali akabheki umkhaya wesintu njengoquqaba nje lwabantu

[Amazwi acashunwe esihlokweni ekhasini 15]

Ngamunye wethu unezici ezihlukile eziqondwa nguye noMdali wakhe kuphela