I-espresso Ikhofi Loqobo

‘Bekuyoba ngcono ukube ikhofi belinambitheka njengephunga lalo!’ Ingabe wake wawasho lawo mazwi? Khona-ke ungase uthande ukuzama i-“caffè espresso.” Izingcweti zithi “iyikhofi elingcono futhi elimnandi ukuwedlula wonke.”

INGABE usuke wayizama mhlawumbe i-espresso? Mhlawumbe wahlatshwa umxhwele ukushuba nokunambitheka kwayo okunothile. Ngakolunye uhlangothi, kungenzeka uye wanquma ukuthi: ‘Bengingeke ngathi ikhofi elimnandi leli. Akumangalisi ukuthi yenzelwa ezinkomishini ezincane kakhulu—ubani obengamelana nokuhabula isiphuzo esingacolisekile kahle futhi esibabayo? Ngaphandle kwalokho, ngokuqinisekile ine-caffeine eningi engenampilo!’

Nokho, ingabe i-espresso eyenziwe kahle iyababa? Futhi ingabe inkomishi eyodwa ye-espresso ine-caffeine eningi ukwedlula inkomishi yekhofi elivamile? Izimpendulo zingase zikumangaze.

Yini Eyenza Ibe I-espresso?

Nakuba amazwe namasiko ahlukahlukene enezindlela zawo zokuyenza, i-espresso isuka e-Italy. Inambitheka kanjani? Abathandi be-espresso bathi inephunga elimnandi, inothile, isasulubha, ibushelelezi, iyababababa, ine-caramel esashukela, futhi inamakha amnandi. Inkomishi ye-espresso eyenziwe kahle inongqimba ngaphezulu olubizwa ngokuthi i-crema—igwebu elinsundu ngokusagolide, ngokuvamile okunzima ukulenza, elinezela ubushelelezi nelilondoloza iphunga elimnandi.

Inkomishi eyodwa ingamamililitha angu-30-40 nje kuphela. Ngokuvamile iphuzwa noshukela ofakwa enkomishini ngokushesha ngemva kokuyenza—ukunambitheka okuqabulayo!

Yenziwa kanjani? Ukwenza i-espresso kuqala ngengxube kabhontshisi wokwenza ikhofi okhethekile, ogazingwa ube nsundu ngokumnyama (kodwa ungabi mnyama ngokuphelele) futhi ugaywe ucolisiswe ngaphezu kwalowo osetshenziselwa ukwenza ikhofi elivamile. Nokho, akukhona ngokuyinhloko ukugazinga noma ukugaya okwenza i-espresso—inqubo engavamile yokuyenza, esebenzisa ukucindezela kunamandla adonsela phansi. Cishe isilinganiso sekhofi okwenziwa ngalo inkomishi eyodwa silingana nezingxenye ezimbili kwezintathu zaleso okwenziwa ngaso ikhofi ngendlela yokuliconsisa, kodwa liba namanzi amancane kakhulu. Lenqubo yokulenza iwukhipha wonke umsoco kubhontshisi wokwenza ikhofi.

Ezindaweni zokudlela nasezitolo zekhofi eziningi ungabacela bakwenzele i-espresso engaxutshiwe enezithako okwenziwa ngazo inkomishi eyodwa noma enezithako okwenziwa ngazo izinkomishi ezimbili. Nokho, kudingeka ukuqapha: I-espresso engenziwe kahle iyababa. Ngakho lapho uphuza i-espresso endaweni yokudlela noma esitolo, ihlole. Uma inkomishi yakho igcwele kakhulu noma ikhofi lingenayo i-crema, cishe unikezwe ikhofi eliwumntanya.

Kuneziphuzo eziningi eziwuhlobo lwe-espresso. Uma uyithola inothe kakhulu i-espresso, kungani ungazami i-cappuccino emnandi noma i-caffe latte enokhilimu?

Izinto Zokwenza I-espresso Yasekhaya

Ungathanda ukuzenzela iziphuzo ze-espresso ekhaya? Ukucophelela kuyo yonke imininingwane kubalulekile ukuze kutholakale isiphuzo esinothile, esimnandi.

Luhlobo luni lomshini wokwenza i-espresso okufanele uluthenge? Ayikho indlela yokwenza ikhofi ngokuliconsisa engenza i-espresso yangempela, kungakhathaliseki ukuthi usebenzisa yiphi indlela yokugazinga noma ukugaya. Uyodinga umshini wokuyenza oklanywe ngokukhethekile.

Imishini yokuyenza esebenzisa isitofu ngokuvamile ishibhile. Abantu abaningi iyabanelisa i-espresso eyenziwe ngesitofu sasekhaya, cishe ngisho noma ikhofi lingashubile futhi lintula i-crema. I-espresso ekahle ungayenza ngokulinganisela ngokucophelela ubungako bamanzi owafaka ethangini lamanzi noma ngokushiya isivalo sivulekile futhi ususe ibhodwe emlilweni cishe phakathi nalenqubo.

Imishini kagesi esebenza ngesitimu isebenzisa isisi ukukhama amanzi ekhofini. Ungayithola kanjani imiphumela emihle? Ngokuvala ukungena kwekhofi ngemva kwamamililitha angu-30 kuya kwangu-60, ukuze ugweme ukulenza libe umntanya futhi wonge isitimu esanele sokwenza igwebu lobisi. Ngakho-ke, cinga umshini onenkinobho noma enye indlela yokuvala ukungena kwekhofi. Imishini esebenzisa isitimu yenza i-cappuccino ne-latte emnandi, kodwa njengemishini yokuyenza esebenzisa isitofu, ayikwazi ukwenza i-espresso engaxutshiwe eyehla esiphundu.

Imishini ye-“piston” ngokuvamile ibiza kakhulu futhi yenza i-espresso ehamba phambili. Ukuze umshini we-piston usebenze, ucindezela isibambo, esicindezela i-piston enesipilingi, ekhama amanzi ashisayo angena ekhofini. Abanye abantu bakhetha imishini ye-piston ngoba ishintshwa ngesandla futhi iyakhanga. Abanye bakuthola kunzima ukuyisebenzisa futhi iyephuza ukufudumeza amanzi.

Imishini esebenza ngesifutho nayo iveza umfutho owanele wokwenza i-espresso ehamba phambili. Kulula ukuyisebenzisa futhi iyashesha kunemishini ye-piston. Ngakho-ke, labo abafuna i-espresso engcono ngokuvamile bakhetha umshini osebenza ngesifutho. Izici ziyahlukahluka, futhi eminye imishini esebenza ngesifutho iyinguganaboya kuneminye. Ngakho bheka ezitolo ezihlukahlukene ngaphambi kokuba uthenge. Izitolo ezibonisa indlela imishini yazo esebenza ngayo zenza ukuba ukwazi ukukhetha ngokunengqondo.

Ikhofi Olithengayo

Khetha ubhontshisi ogazingiwe osemusha wokwenza i-espresso. Ikhofi elidayiswa ezitolo zokudla ezinkulu akuvamile ukuba libe lisha, ngakho funa izitolo ezidayisa ikhofi kuphela—kungcono kakhulu uma ukugazinga kwenzelwa khona esitolo. Ikhofi eligayiwe liyashesha ukonakala, kuyilapho ubhontshisi wokwenza ikhofi uhlala umusha amasonto ambalwa. Ngakho-ke, uma kunokwenzeka, thenga eliwubhontshisi kuphela futhi uligayele ekhaya, uma ulidinga. Eligayeke kahle licolekile, kodwa aliyona impuphu. Uma kumelwe uthenge ikhofi eseligayiwe, lithenge kancane futhi ulisebenzise ngokushesha.

Ukuze ikhofi lakho lihlale lilisha, ligcine esitsheni esingangenwa umoya esinesivalo esivala ngcí. Uma uzolisebenzisa phakathi namasonto ambalwa, gcina lesi sitsha sekhofi endaweni ebandayo, emnyama. Ngaphandle kwalokho, ligcine esiqandisini.

Ubungcweti Bokuyenza

Nakuba ungase ube nemishini nekhofi elingcono, ubungcweti bokwenza i-espresso kumelwe bufundwe, bungathengwa. Izindlela zokuyenza i-espresso ziyohlukahluka kuye ngohlobo lomshini owusebenzisayo, ngakho landela iziqondiso zawo. Sebenzisa ikhofi eligayiwe elanele. Isilinganiso esanele siyocishe sisigcwalise isisefo, kuyilapho sishiya isikhala ukuze likhukhumale. Kudinga ikhono elithile ukulifaka noma ukulimbambatha kahle ikhofi esisefweni, ukuze amanzi asesisefweni ehle kancane futhi alimanzise ngokulinganayo ikhofi, ukuze kukhishwe konke ukunambitheka.

Yiliphi iphutha okufanele uligweme? Ukwenza ikhofi eligayiwe eliningi kakhulu. Uma uzama ukwenza amamililitha angu-60 noma angu-90 ngekhofi elanele inkomishi eyodwa, liyoba umntanya futhi libabe. Kunokuba wenze i-espresso, wenza isiphuzo esifana nekhofi elijiyile elenziwe ngenqubo yokuconsisa—hhayi lokho obukulindele.

Ngakho-ke, isici esibalulekile ukwazi ukuthi kumelwe uyeke nini ukulenza. Izingcweti zisikisela ukuthi inkomishi eyodwa ye-espresso esemanzini angamamililitha angu-30 kuya kwangu-40, cishe kuthatha imizuzwana engu-20 kuya kwengu-25 ukuyenza. Kuleli qophelo ikhofi liyenzisiswa futhi kufanele lilahlwe elisalayo.

Ngisho nalapho wenza i-double espresso, “Ukusebenzisa ikhofi elincane kuletha imiphumela emihle.” Uma wenza ikhofi elincane, kulapho uthola isiphuzo esimnandi. Incazelo yokwenza i-double espresso iyahlukahluka, kodwa cishe kusho ukwenza inkomishi eyodwa ye-espresso usebenzisa ikhofi ebelingenza izinkomishi ezimbili.

Kuthiwani Nge-caffeine?

Inkomishi eyodwa ye-espresso ingase ibe ne-caffeine encane kunenkomishi yekhofi evamile. Ingabe lokhu kuyakumangaza? Kungenzeka kanjani, njengoba i-espresso ishubile?

Esinye isici ubumnyama bukabhontshisi wokwenza ikhofi. Ubhontshisi omnyama wokwenza ikhofi une-caffeine encane. Futhi, izitolo eziningi ezithengisa ikhofi kuphela zisebenzisa ubhontshisi wokwenza ikhofi i-arabica, one-caffeine encane kakhulu kunobhontshisi i-robusta osetshenziswa ekhofini elisemathinini elitholakala ezitolo zokudla.

Kodwa isici esikhulu ubungako balo. Nakuba i-espresso ine-caffeine eningi kuyimililitha ngalinye kunekhofi elivamile, empeleni amanzi aba mancane enkomishini ngayinye. Ngakho, okunye ukuhlola kubonisa ukuthi inkomishi evamile yekhofi engamamililitha angu-180 ingase ibe ne-caffeine engamamiligremu ayikhulu noma ngaphezulu, nakuba inkomishi eyodwa ye-espresso ngandlela-thile ingase ibe nencane.

Noma kunjalo, imiphumela yokuhlola iyahlukahluka, futhi ubungako be-caffeine buxhomeke kubhontshisi osetshenzisiwe nayo yonke inqubo yokwenza. Yiqiniso, i-double espresso iyoba ne-caffeine encane kune-single. Isiqondiso sakho esingcono kakhulu sokuthola izinga le-caffeine mhlawumbe indlela ozizwa ngayo ngemva kokuyiphuza. Uma ufisa ukunciphisa i-caffeine oyidlayo futhi uqhubeke ujabulele i-espresso, ungasebenzisa ubhontshisi wokwenza i-espresso ongenayo i-caffeine noma uwuxube nobhontshisi ovamile wokwenza i-espresso, kuye ngokwamaphesenti owafisayo.

Ingabe usukulungele ukuzenzela i-espresso ekhishini lakho? Imiphumela emihle itholakala ngokuphikelela—zama ukuzenzela ngaphambi kokuba uyiphe abangane bakho. Kudingeka ujwayele ukuze ukwazi ukwenza i-crema nobisi oluyigwebu. Nokho, ukuphikelela kwakho kuyovuzwa lapho usujabulisa abangane bakho ngalezi ziphuzo ze-espresso eziqophisana nalezo ezitholakala esitolo sekhofi sangakini. Ungase uvume ngisho nokuthi i-espresso ikhofi loqobo.

[Ibhokisi ekhasini 22]

Iziyalezo Zokwenza Ubisi Olunegwebu

Ukwenza igwebu noma ukubilisa ubisi ukuze wenze i-cappuccino ne-latte, kudinga isitsha sensimbi, ubisi olubandayo, nomshini wokubilisa ubisi. Uma umshini wakho wokwenza i-espresso ungenayo induku yokubilisa ubisi, ungase uyithenge.

1. Thela ubisi olubandayo esitsheni kodwa ungalugcwalisi.

2. Faka induku yokubilisa obisini, futhi uvule isivalo sesitimu.

3. Gcina ichopho lenduku lingaphansana kobisi, wehlise isitsha sensimbi futhi ufake umoya owengeziwe njengoba wenza igwebu.

4. Izinga lokushisa elifanele ngokuvamile litholakala lapho isitsha sensimbi sesishisa kakhulu ukuba ungasithinta.

5. Vala isivalo sesitimu, futhi ukhiphe isitsha ngaphansi kwaso. Khona-ke vula isivalo sesitimu ukuze ususe ubisi olusele, futhi usisule ngendwangu emanzi.

[Izithombe ekhasini 23]

Ubhontshisi wokwenza ikhofi uhlala isikhathi eside kunekhofi eligayiwe

Umshini oboniswe lapha wokwenza i-“espresso” usebenzisa isitimu