Izithunywa Zokuthula EMpumalanga Yurophu

IZITHULU zazizwa! Iziboshwa zazithola inkululeko! Amaphoyisa cishe ayengenamsebenzi! Sikhuluma ngani? Sibhekisele kulokho okwenzeka emihlanganweni yezizwe yamuva nje yoFakazi BakaJehova eyayiseMpumalanga Yurophu phakathi kuka-July no-August ngonyaka odlule.

Isihloko salesi simiso sasithi “Izithunywa Zokuthula KukaNkulunkulu,” futhi abantu abaningi babona ukuthi naphezu kwezinkinga ezabangelwa abefundisi baseRomania,a oFakazi BakaJehova banokuthula okubangelwa ukwazi uNkulunkulu noKristu Jesu.—Isaya 26:2, 3; Filipi 4:7.

Imihlangano yaqhutshwa ePrague, eCzech Republic; eBudapest, eHungary; eWarsaw naseLodz, ePoland; eTallinn, e-Estonia; eBrasov naseCluj-Napoca, eRomania.

Izihambeli zomhlangano zasemazweni amaningi angaphandle zazikhona kulemihlangano futhi zenza lesi senzakalo sahlanganisa izizwe zamazwe ngamazwe. EPrague kwakunamaqembu amakhulu aseJalimane, eJapane, ePoland nase-United States. Umbiko wehhovisi legatsha le-Watch Tower Society laseCzech wathi: “Sakhuthazwa kakhulu abagcini bobuqotho abaningi kangaka abangabakhulekeli bakaJehova uNkulunkulu bakwamanye amazwe. Ngokwesibonelo, izihambeli zomhlangano eziningi zaseJapane zazingamaphayona, futhi ukugqoka kwazo okucocekile nokuhleleka kwakuyihlobise ngokubonakalayo ingxenye ezazihlezi kuyo enkundleni. Saphawula nomusa wezihambeli zomhlangano zasePoland, ukwazisa kwabafowethu baseSlovakia, ukuphana kwamaJalimane nokwanuleka kwamaMelika. Sathola isifundo kuzo zonke lezi zihambeli.”

Yabathinta kanjani lemihlangano labo abasanda kuhlanganyela? Isazi esithile esineminyaka engu-85 ubudala esingumlobi nesazi sezilimi, sasikhona naphezu kokuphathwa isifo sikashukela nomlenze. Kwase kuyizinyanga ezingaba yisithupha sifunda iBhayibheli ngosizo lwencwadi ethi Ulwazi. Phakathi nesimiso, sasingagxilisile ingqondo ebucikweni bolimi nasohlelweni lwezinkulumo, kodwa sasiyigxilise kokuthile. Sababaza: “Bewumnandi kakhulu! Uthando nokucabangelana eninakho phakathi kwenu kusho lukhulu.”—Johane 13:34, 35; 1 Korinte 13:1-8.

Izivakashi zakwamanye amazwe ePrague zajabulela ukuvakashela izindawo zomlando nokunikeza ubufakazi ngokwethukela ngaso sonke isikhathi. Enqabeni ethile ngaseningizimu yePrague, uFakazi othile waseMelika, ongumkammeli, wayelinde esiqongweni sombhoshongo walenqaba ukuze anikeze bonke abantu ababegibela izitebhisi amapheshana esiCzech. Abanye babekhipha amapheshana lapho behlangana neqembu lamantombazane esikole elalivakashele indawo yasendulo yamathuna amaJuda. Futhi-ke, bonke abaqondisi bezivakashi abangochwepheshe nabashayeli bamabhasi bathola izincwadi.—1 Petru 3:15.

Omunye umqondisi owazwakalisa ukwazisa ngoFakazi nangokuziphatha kwabo wabhala: “Angikaze ngaphambili ngihlangane nabantu abaningi kangaka abanobungane nomusa kukho konke ukuphila kwami. Nakuba ngingumKatolika, ngahlatshwa umxhwele isimo senu sengqondo esingokomoya. Nonke nanginikeza ithemba lokuthi lelizwe lisengalunga. Ngiyanibonga ngomusa wenu. UNkulunkulu anibusise!”

Nakuba kwana isibhidli semvula ngoLwesihlanu ePrague, imikhaya yayihlezi ngaphandle enkundleni, idla ukudla okungokomoya okwakunikezwa izikhulumi zendawo nezangaphandle. Kwakunabantwana abaningi kangangokuba ukuze kugwenywe izingozi emaphasishi, kwenziwa indawo ekhethekile yokupaka izinqola zabantwana ngaphandle kwenkundla.

Emhlanganweni wasePrague kwakunabantu abangaphezu kuka-22 000, futhi kwabhapathizwa oFakazi abasanda kuzinikezela abangu-432, kuhlanganise nabantu ababili abahamba ngezihlalo zabakhubazekile kanye nabanye abahlanu abakhubazekile emzimbeni.

Izithulu “Ziyezwa” EBudapest

Indawo ephahle uMfula iDanube idolobha elihle laseBudapest, lapho kwaqhutshelwa khona umhlangano wezizwe ngo-July. Kwakunenani eliphakeme labangu-23 893, kuhlanganise nezihambeli zomhlangano ezingu-3341 zasemazweni angu-11 ngaphandle kweHungary.

Etendeni elaliseduze kwesiteji, sonke isimiso sasihunyushelwa abantu abayizithulu, abangaba yikhulu. Emazwini okwamukela zonke izihambeli zomhlangano ezikhuluma olunye ulimi ngaphandle kwesiHungary, izithulu zamukelwa ngokukhethekile, ngalamazwi: “Olunye ulimi esingafuni ukulibala ukulusho sonke isimiso esizobe sihunyushelwa kulo ulimi lwabakhuluma ngezandla. Siyajabula ngokuba nezithulu phakathi kwethu.”

Ukuhlanganyela Iqiniso Nabanye

Kulemihlangano kwakhululwa izincwadi zeBhayibheli ezintsha, kuhlanganise nencwadi ethi Imfihlo Yenjabulo Yomkhaya. Ngemva kokuthola lencwadi, izihambeli zomhlangano zaseFrance zagibela ibhasi ziphindela ehhotela ezazilala kulo. Endleleni zabona umakoti nomkhwenyana benezimenywa zomshado wabo. Abafowethu bacela umshayeli ukuba amise ibhasi. Omunye walaboFakazi wehla futhi wanikeza lombhangqwana lencwadi entsha yesiHungary. Wayamukela ngenjabulo futhi ngokushesha waqala ukuyihlolahlola lencwadi. Cishe leyo kwakungenye yamakhophi okuqala ahanjiswa ngemva kokukhululwa kwalencwadi!

Ukusuka Ekubeni UmKatolika Nasekubeni IKhomanisi Kuya Ekubeni UFakazi

Abangu-510 ababhapathizwa kulomhlangano babemelela amaphesenti angaphezu kwamabili ababekhona. Abathathu kulaboFakazi abasha basesejele, badonsa isigwebo samacala abawenza ngaphambi kokuba bafunde iqiniso leBhayibheli. Abafowethu bendawo babavakashela njalo futhi baqhube izifundo zeBhayibheli nabanye. Kwelinye ijele eBudapest, kuqhutshwa izifundo zeBhayibheli ezingaba ngu-50 neziboshwa.

Enye indoda eyakhuliswa esikoleni samaKatolika sikaBenedict yaphelelwa ukholo eSontweni LamaKatolika futhi lapho ineminyaka engu-20 ubudala, yaba ilungu leQembu LamaKhomanisi. Kamuva, yajoyina ibutho lezempi futhi yakhushulelwa esikhundleni sokuba usigaxa-mabhande. Njengelungu leNhlangano YeButho Lezisebenzi Zempi, yafundisa izimfundiso zikaMarx noLenin eyunivesithi. Yahlatshwa umxhwele isiqubulo samaKhomanisi esithi “inkululeko, ubuzalwane, ukulingana.” Nokho, ukusetshenziswa kabi yilabo abaphethe kwesiqubulo esithi “uhulumeni wabantu” kwayibangela ukuba icabangisise ngobuKhomanisi. Yaba nomuzwa wokuthi yayiphuthelwa okuthile. Ekugcineni, yathatha umhlalaphansi. Lapho oFakazi befika emzini wayo, yayikulungele ukulalela. Iyabika: “Lapho ngiqala ukuvakashela eHholo LoMbuso, ngaqiniseka ukuthi ekugcineni ngibutholile ubuzalwane beqiniso. Ngangiphakathi kothando lwabalandeli beqiniso bakaKristu. Kwathatha iminyaka emine ukuba ngiyeke ukuba iKhomanisi ngibe uFakazi. Kodwa ngiye ngakhetha iqiniso.” Yabhapathizwa kulomhlangano.

Ngokuvamile ukusebenza kwamaphoyisa emhlanganweni kusho ukuncipha komsebenzi wawo ovamile. Elinye iphoyisa elalabelwe ukusebenza esangweni lenkundla lathi ukusebenza emihlanganweni yoFakazi kunzima kakhulu. Ngani? Ngoba konke kuhamba kahle kangangokuba amaphoyisa adla ubuthongo!

Imibiko Emihle Yezindaba EPoland

Kwaqhutshwa imihlangano yezizwe emibili ePoland, eyayinabantu abangaphezu kuka-20 000 eWarsaw, inhloko-dolobha, kanye nabangaba ngu-12 000 eLodz, okuyidolobha lesibili elikhulu ePoland.

Iphephandaba eliphambili eWarsaw, i-Życie Warszawy, lalinalamazwi alandelayo: “‘Kunezindaba ezinhle okudingeka zimenyezelwe! Yizindaba zokuthula, ukuthula kwangempela. Ukuthanda kwethu uJehova nomakhelwane wethu kusishukumisela ukuba siqhubeke sishumayela singayeki kuze kube yilapho uNkulunkulu ethi umsebenzi sewenziwe,’ kusho uCarey Barber, oyilungu leNdikimba Ebusayo yoFakazi BakaJehova.”

Umlobeli wephephandaba i-Sztandar Młodych wathi: “Izinsuku ezimbili oFakazi BakaJehova abangaba ngu-12 000 bebebuthene emhlanganweni ongokwenkolo eLegia Stadium, eWarsaw. Kwakunokuhleleka okuyisibonelo, kanti ngisho noma sengibhekisisa, angizange ngizibone izimoto zamaphoyisa noma amaphoyisa ayeqondisa.

“Kuthiwa iPoland cishe iyizwe lamaKatolika. Kodwa lapho intsha yethu engamaKatolika ihlangana kulenkundla, kuhlala kunamaphoyisa amaningi, elungele ukuthatha isinyathelo.

“Ngokuqinisekile kuyamangalisa ukuthi izihlubuki zamaKatolika, abantu behlelo, kungakhathaliseki ukuthi ubabiza kanjani [oFakazi BakaJehova] bayakwazi ukuhlangana ngobuningi babo kodwa bangabi ingozi ekuhlelekeni nasekulondekeni komphakathi, kuyilapho intsha yethu engamaKatolika uma ibuthene iba ingozi, futhi kudingeka amaphoyisa ukuze kunqandwe ubudlwangudlwangu bayo. Kuningi okumelwe kucatshangwe ngakho.”

Futhi kwabhapathizwa amakholwa amasha lapha, angu-462 eWarsaw nangu-278 eLodz. Omunye walaba kwakunguSylwia oneminyaka engu-19 ubudala, owayebacwasa oFakazi. Ngolunye usuku lapho lina uFakazi othile waya kuye emgwaqweni. “Ngakwazi ukumxosha, ngabe sengihamba. Kodwa ngangenisa intombazane ethile eyayinethwa imvula ngaphansi kwesambulela sami. Nayo kwatholakala ukuthi yayinguFakazi! Yathi izongilethela incwadi ethi Intsha Iyabuza—Izimpendulo Ezisebenzayo. Ngenhlonipho ngayinikeza ikheli lami, futhi . . . ngibhapathiziwe namuhla!”

I-Estonia Encane Ithola UbuFakazi Obukhulu

I-Estonia, iLatvia neLithuania zakha amaZwe AseBaltic. Inani labantu base-Estonia cishe liyisigidi nengxenye kuphela, futhi inhloko-dolobha inezakhamuzi ezingaba ngu-450 000. Kwaqhutshwa imihlangano yezizwe emibili lapho ngo-August 1996.

Ithonya lalemihlangano lalilikhulu kangangokuba elinye iphephandaba lathi: “ITallinn igcwele ukukhulekela koFakazi BakaJehova. Kuthiwa umhlangano wabo owaqhutshelwa eLinnahall wahlanganisa inani labantu elikhulu kunalo lonke izinkolo ezake zaba nalo e-Estonia.” Wonke amahhotela ayenoFakazi.

Kamuva uMfoweth’uCarey Barber wanikeza umbiko athi kuwo: “Yingakho abafowethu baseFinland nabanye ababelwe e-Estonia bekuthanda ukuba lapho. Lelizwe elincane kodwa elihle liye lanqotshwa futhi lacindezelwa amazwe amakhulu futhi liye labekezelela ukuhlupheka okukhulu. Manje abase-Estonia . . . babheke phambili ekubeni nekusasa elinokuthula nokulondeka okuhlala njalo okuvela kuJehova.” KunoFakazi abangaphezu kuka-3100 abakhuthele e-Estonia, ingxenye yabo ekhuluma isiRussia.

Lemihlangano yasiza abase-Estonia, abase-Estonia abakhuluma isiRussia nabaseLatvia, abaseLithuania nezihambeli zomhlangano ezazivakashile zasemazweni angu-15, kuhlanganise nezingu-155 zaseBrithani nezingu-300 zaseFinland.

Nezithulu “Ziyezwa” E-Estonia

Eminyakeni emithathu edlule umdala othile oyisithulu waseFinland waya eTallinn, e-Estonia, ukuze abone ukuthi yini ayengayenzela izithulu kulelozwe. Wayengazi ngisho nomuntu oyedwa oyisithulu lapho, ngakho waya endaweni yezithulu eTallinn, ephethe inqwaba yomagazini INqabayokulinda nezinye izincwadi. Abase-Estonia abayizithulu bamemukela futhi babelangazelela ukubona ukuthi wayephetheni. Wazihambisa zonke lezo zincwadi ekuhambeleni kwakhe kokuqala wayesebhala phansi amagama namakheli abantu abathakazelayo, abangu-70 sebebonke.

Cishe bonke babefuna ukuqhutshelwa isifundo seBhayibheli, futhi lomfowethu waqaphela ukuthi wayengenakuziqhuba zonke lezo zifundo. Ngakho kwadingeka akhethe abantu ababenesithakazelo esikhulu. Ngokushesha ngemva kokuhambela kwakhe kokuqala e-Estonia, wayesenezifundo zeBhayibheli ezingu-30 nohlu lwabangu-40 ababelindile! Sekunabahumushi abane bolimi lwabakhuluma ngezandla eTallinn.

‘Isigcawu Esisha Sokulandisa KweTestamente Elisha’

UFakazi othile wayesebenza emtateni ebingelela izihambeli zomhlangano. Waya kumqondisi wezivakashi wase-Estonia futhi wambuza ukuthi wayecabangani ngalesi senzakalo somhlangano omkhulu. Lomqondisi wamtshela ukuthi wayeqondise amaqembu oFakazi amaningana asemazweni aseYurophu futhi wayeqaphele ukuthi oFakazi bangabantu abaziphatha kahle njalo nabanomusa. Wayemenyelwe ukuyobona ihhovisi le-Watch Tower Society ePuhangu Street, futhi wabamba ongezansi lapho ebona ukuhleleka okuhle kanye nabantu abasebasha abanomusa futhi abajabulile. Wayengaqondi ukuthi kungani oFakazi bebhekana nokuphikiswa okunzima kangaka nokumangalelwa ngamanga lapho amaqiniso ebonisa ukuthi lokhu kumangalelwa kungamanga. Wathi: “Kimi, umsebenzi wenu, inkonzo yenu, kunjengesigcawu esisha sokulandisa kweTestamente Elisha.”

Ngokuqinisekile, njengezithunywa zokuthula kukaNkulunkulu, oFakazi BakaJehova banethemba lokwakha idumela elihle emhlabeni wonke ngenxa yokuziphatha kwabo okunenhlonipho nokuba nomusa kwabo kubantu abangabafokazi. (1 Petru 3:16) Lemihlangano eMpumalanga Yurophu ibonisa ukuthi naphezu kokunyundelwa nokuhlanjalazwa izitha zenkolo nezihlubuki, oFakazi BakaJehova banesibusiso sikaNkulunkulu njengoba bememezela isigijimi sokuthula izwe lethu eligcwele izimpi nenzondo elisidinga kakhulu.—Isaya 2:2-4; Marku 13:10.

[Umbhalo waphansi]

[Isithombe ekhasini 23]

Naphezu kokuba lalina, imikhaya yasilalelisisa isimiso

[Isithombe ekhasini 24]

OFakazi abajabulile basePoland nezincwadi zabo ezintsha

[Isithombe ekhasini 25]

OFakazi abajabulayo base-Estonia bevunule ngezakubo