Sasingabathunjwa Phakathi Nokuvukela Kwasejele

CISHE ngehora lesithathu ntambama, ngoMgqibelo, ngo-March 30, 1996, mina, no-Edgardo Torres, kanye noRubén Ceibel, safika eSierra Chica Maximum Security Prison, esifundazweni saseBuenos Aires, e-Argentina. Nakuba laliklanyelwe ukugcina iziboshwa ezingaba ngu-800, leli jele eliminyene lalinezigebengu ezigwetshiwe ezingu-1052. Amacala azo ayesukela ekuphangeni kuya ekubulaleni abantu abaningi. Sasivakashile.

Ku-Edgardo noRubén, lolu kwakungolunye lohambo lwangoMgqibelo lokuya kuleli jele elidumile. Njengabadala ebandleni lendawo loFakazi BakaJehova, babevame ukuvakashela lapho beyonikeza izinkulumo zeBhayibheli zamasonto onke eziboshweni ezingaba ngu-15. Kimina, njengombonisi ojikelezayo, leli kwakuyithuba eliyivelakancane, njengoba ngangingakaze ngiqhube umhlangano ejele.

Leli jele linezakhiwo ezingu-12 zezitokisi ezihlelwe njengesiphephetha-moya. Njengoba sasingena kulendawo, sabona buqamama iziboshwa ezine zisibingelela ngomdlandla. Lezi ziboshwa zase zithuthukile ekufundeni kwazo iBhayibheli kangangokuba zase zingabashumayeli abangabhapathiziwe bezindaba ezinhle zoMbuso kaNkulunkulu. Ngokushesha sayiswa esakhiweni sezitokisi 9, lapho sasizoqhuba khona umhlangano. Lapho, kwakunekamelo elipendiwe futhi lahlotshiswa ngamakhethini, okwakulenza lihlonipheke.

Ukuvukela Kuyaqala

Nokho, kukhona okwakungahambi kahle. Kwakuneziboshwa ezingu-12 kuphela esikhundleni sezingu-15 njengokujwayelekile. Sonke sazibuza ukuthi kungani. Umhlangano waqala njengokuvamile, ngengoma nomthandazo. Ngemva kwemizuzu embalwa, sethuswa ukuqhuma kwezibhamu okunomsindo okwalandelwa ukuqhuma kwezibhamu ezingontuluntulu. Khona-ke sezwa abantu bememeza futhi beklabalasa. Kwakusanda kuqala ukuvukela kwasejele!

Iziboshwa eziningana ezazifake izigqoko zihlome ngemimese yokuzenzela zagulukudela ekamelweni esasiqhubela kulo umhlangano. Zamangala lapho zisithola—izivakashi ezintathu! Ngokushesha saphelezelwa sihamba ephasishini eligcwele umusi. Kwakunomatilasi abavuthayo, iziboshwa ziphithizela, futhi kunonogada olimele olele phansi. Umbhoshongo wonogada omaphakathi negceke lasejele wawusha ubuhanguhangu ushaywe ngebhomu lokuzenzela. Sakhishelwa ngaphandle futhi saphoqelelwa ukuba sime endaweni engamamitha angaba ngu-50 ukusuka othangweni oluzungezile. Lapho sibheka ngakhona, sabona amaphoyisa nonogada basejele ngalé kothango, besikhombe ngezibhamu. Iqembu leziboshwa lalizifihle ngathi, lalisibeke imimese ezintanyeni. Lalisenza izihlangu ezingabantu.

Abathunjwa Abengeziwe

Emahoreni amahlanu kamuva, ngemva kokushona kwelanga, abaholi baleli qembu bavumela udokotela ukuba angene ejele azokwelapha abalimele. Naye lodokotela waba umthunjwa. Ekugcineni, cishe ngehora lesishiyagalolunye kusihlwa, sayiswa esibhedlela sasejele. Lapho sahlanganiswa neqembu lonogada nabo ababengabathunjwa. Manje laba bavukeli baphoqelela bonke abathunjwa ukuba bangene ngokushintshana basebenze njengezihlangu ezingabantu.

Ngemva kwesikhashana, umahluleli othile nonobhala wakhe bavunyelwa ukuba bahlangane nabavukeli, ngomzamo wokuxazulula izindaba ngokuthula. Kodwa lenhlekelele yabhebhetheka lapho iziboshwa ngesibindi zibavalela bobabili njengabathunjwa.

Kwakulokhu kuqubuka ukulwa ubusuku bonke. Sazama ukulala, kodwa kwakubonakala sengathi njalo lapho sizumeka, sasivuswa ukuklabalasa okukhulu. Khona-ke, entathakusa, lafika futhi ithuba lethu lokuba izihlangu ezingabantu.

Ubudlova Buyabhebhetheka

NgeSonto, ngo-March 31, usuku lwesibili lokuvukela, isimo saba sibi nakakhulu. Abaholi baleli qembu babengavumelani ngezimfuno zabo. Lokhu kwabangela isimo sentukuthelo nobudlova. Amaqembu abavukeli avuka umbhejazane, ecekela phansi futhi eshisa konke okusendleleni yawo. Izingxabano ezindala zaxazululwa ngobudlova nangokubulalana. Iziboshwa eziningi ezenqaba ukuhlanganyela ekuvukeleni zabulawa. Ezinye izidumbu zashiswa kuhhavini wokubhaka.

Ejele kwasakazeka amahemuhemu nemibiko eshayisanayo ngokukhululwa kwethu. Kwakudida ngokomzwelo kithina bathunjwa. Ngezinye izikhathi sasivunyelwa ukubuka izindaba kuthelevishini. Samangala lapho sithola ukuthi ukulandisa kwethelevishini kwakungelona kangakanani iqiniso. Kwakudumaza.

Sabhekana kanjani nalesi simo? Sagxila ekuthandazeni, ekufundeni iBhayibheli, nasekuxoxeni nabanye ngezithembiso zeBhayibheli zekusasa elijabulisayo. Leso kwakuyisihluthulelo sokuthola amandla angokomzwelo phakathi nalesi sikhathi esinzima.

NgoMsombuluko, abaholi baleli qembu bavuma ukuqala izingxoxo zokubonisana neziphathimandla. Kwabonakala sengathi lokhu kuvukela kwase kuzophela. Abavukeli babesebenzisa u-Edgardo nedlanzana labanye onogada basejele njengezihlangu lapho kuqubuka impi yezibhamu phakathi kwezinye iziboshwa. Phakathi naleso siphithiphithi, amaphoyisa, ecabanga ukuthi kwakudutshulwa abathunjwa, aqala ukudubula. U-Edgardo wasinda kuleli thala lezinhlamvu, kodwa abanye onogada ababethunjiwe badutshulwa.

Ukufa Kwabonakala Kuseduze

Thina bathunjwa basiyisa ophahleni ukuze babonise iziphathimandla ukuthi sasisaphila. Kodwa amaphoyisa aqhubeka edubula. Lokhu kwabathukuthelisa abavukeli. Bonke baqala ukumemeza kanyekanye. Abanye bamemeza: “Bulalani abathunjwa! Babulaleni!” Abanye banxusa: “Ningababulali! Ake sithi ukulinda!” Ukufa kwabonakala kuseduze. Mina noRubén sabhekana njengokungathi sithi, ‘Siyobonana ezweni elisha.’ Khona-ke sobabili sathandaza buthule. Ngokushesha, sezwa ukuzola kwangaphakathi nokuthula kwengqondo, okwakungavela kuphela kuJehova ngaphansi kwalezi zimo.—Filipi 4:7.

Ngokungazelele, amaphoyisa ayeka ukudubula, futhi omunye wabaholi babavukeli wathi singabe sisabulawa. Isiboshwa esisesisha esasingibambile sayalwa ukuba singihambise ophahleni, njengesixwayiso emaphoyiseni. Sasigajwe uvalo. Ngaso leso sikhathi, ngakwazi ukuqala ingxoxo eyasizolisa sobabili. Ngachaza ukuthi ukuhlupheka kwabantu kwakubangelwa uSathane namademoni akhe nokuthi maduzane uJehova uNkulunkulu uzoqeda konke ukuhlupheka okunjalo.—IsAmbulo 12:12.

Lapho sibuyiselwa esibhedlela sasejele, sathola ukuthi iningi labathunjwa lalethukile. Sazama ukuhlanganyela ukholo lwethu ezithembisweni zikaJehova nabathunjwa esasinabo. Saxoxa nabo ngethemba lethu elisekelwe eBhayibhelini lekusasa ePharadesi emhlabeni. Abanye babathunjwa baqala ukubiza uJehova ngegama. Udokotela wabonisa isithakazelo esikhethekile futhi wabuza imibuzo eminingi enengqondo. Lokhu kwaholela engxoxweni yeBhayibheli ende ngencwadi ethi Ulwazi Oluholela Ekuphileni Okumi Phakade.

Ukugubha ISikhumbuzo

NgoLwesibili, usuku lwethu lwesine sithunjiwe, kwakuyisikhumbuzo sokufa kukaJesu Kristu. Ngalolo suku izigidi zoFakazi BakaJehova nabantu abathakazelayo emhlabeni wonke babezohlangana ukuze bagubhe lesi senzakalo belalela umyalo kaJesu. (Luka 22:19) Nathi senza amalungiselelo okugubha iSikhumbuzo.

Kwakhethwa igumbi elithile lendlu ukuze lisetshenziswe. Sasingekho isinkwa esingenamvubelo noma iwayini elibomvu okwakungasetshenziswa njengezifanekiselo. Kodwa sobathathu sajabulela ukuhlabelela izindumiso zikaJehova, ukuthandaza, nokubukeza ukulandisa kweBhayibheli ngobusuku bukaJesu bokugcina nezinye izenzakalo ezihlobene nokufa kwakhe. Sazizwa sisondelene nemikhaya yethu nabafowethu nodadewethu abangokomoya njengoba babegubha iSikhumbuzo ngesikhathi esifanayo kulo lonke izwe.

Ukuphela Kosizi

Kwakunesimo esishubile, ukwesaba, novalo phakathi nezinsuku ezine ezalandela. Nokho, saduduzwa izincwadi eziningi ezazivela ezihlotsheni nakubangane, iziboshwa ezasivumela ukuba sizithole. Ngesinye isikhathi saze savunyelwa ngisho nokuba sithinte imikhaya yethu ngocingo. Yeka indlela okwakuqabula ngayo ukuzwa amaphimbo abo nokufunda amazwi abo othando nokukhathalela!

NgoMgqibelo, usuku lwesishiyagalombili sithunjiwe, abavukeli bavumelana neziphathimandla. Satshelwa ukuthi sasizokhululwa ngakusasa. NgeSonto, ngo-April 7, ngo-2:30 ntambama, sathola izwi elithi: “Lungelani ukuhamba!” Iziboshwa zalungiselela ‘abaqaphi basemkhosini’ ukuze basiphelezele lapho sikhululwa! Lapho siphuma esibhedlela, umkhulumeli wabaholi baleli qembu waya ku-Edgardo wathi: “Mfowethu, kungihlabe umxhwele kakhulu ukuziphatha kwenu. Ngiyathembisa ukuthi kusukela manje kuqhubeke ngizoba khona emihlanganweni yenu yangoMgqibelo ejele. Nisazoyiqhuba lemihlangano ngisho nangemva kwalokhu okwenzekile, akunjalo?” U-Edgardo wamomotheka wayesephendula: “Nakanjani!”

Ngaphandle kwakukhona okwakuzosimangalisa. Ngokushesha lapho siphuma esakhiweni, zonke iziboshwa zashaya ihlombe zisincoma. Lena kwakuyindlela yazo yokubonisa ukuthi zazixolisa ngalokho okwakwenzekile. Kwakuyisikhathi esithinta inhliziyo. Ngokungangabazeki ukuziphatha kwethu kobuKristu phakathi nezinsuku ezingu-9 ezazandulele kwakuzihlabe umxhwele zonke, kwaletha udumo kuJehova.

Ngaphandle kothango lwasejele, sahlangana nemikhaya yethu nabafowethu nodadewethu abangokomoya abangaba ngu-200. Sangana ngenjabulo enkulu. Sasisindile! Omunye wabathunjwa waya kumkami wathi kuye: “Ngicabanga ukuthi uJehova ufinyelele inhliziyo yami futhi ufuna ukuba ngimkhonze.”

Mina, no-Edgardo, kanye noRubén safunda ngendlela ekhetheke ngempela ukuthi uJehova angaziphasa izinceku zakhe, ngisho naphakathi kobunzima obukhulu kakhulu. Sabona indlela okukuhle ngayo ukuthandaza kuJehova nokuzwiwa nguye. Njengomhubi, singathi: “Ngiyakuphakamisa, Jehova, ngokuba ungikhuphulile; awuvumanga ukuba izitha zami zijabule phezu kwami. Jehova Nkulunkulu wami, ngakhala kuwe, wangiphilisa. Jehova, umphefumulo wami uwukhuphulile endaweni yabafileyo, wangiphilisa phakathi kwabashona emgodini.” (IHubo 30:1-3)—Njengoba ilandiswa uDarío Martín.

[Amazwi acashunwe esihlokweni ekhasini 19]

Iziboshwa eziningana ezazifake izigqoko zihlome ngemimese yokuzenzela zagulukudela ekamelweni esasiqhubela kulo umhlangano

[Amazwi acashunwe esihlokweni ekhasini 20]

Abavukeli babesebenzisa u-Edgardo nedlanzana labanye onogada basejele njengezihlangu

[Amazwi acashunwe esihlokweni ekhasini 21]

Iziboshwa zalungiselela ‘abaqaphi basemkhosini’ ukuze basiphelezele lapho sikhululwa!

[Isithombe ekhasini 18]

Abashumayeli abathathu ababevakashile (kusuka kwesobunxele kuya kwesokudla): U-Edgardo Torres, uRubén Ceibel, noDarío Martín