Izincwadi ZeBhayibheli Ziyaziswa Endaweni EyayiyiSoviet Union
Ngumlobeli we-Phaphama! eRussia
NGASEKUQALENI kuka-1991 iSoviet Union eyayikhona ngalesosikhathi yayakhiwa iRussia namanye ama-republic angu-14. Kusukela ngalesosikhathi, lama-republic aye aba amazwe azimele. Nokho, iRussia inenani labantu elingaphezu kwelalawa amanye amazwe angu-14 ehlangene futhi inkulu kunalamazwe ngaphezu kokuphindwe kathathu. Ngo-September 1994, kwakunoFakazi BakaJehova abangu-117 276 endaweni eyayiyiSoviet Union ababehlanganyela amaqiniso eBhayibheli nomakhelwane babo.
Namuhla kunyatheliswa amanani amakhulu omagazini INqabayokulinda ne-Phaphama! ngesiRussia inyanga ngayinye ukuze basetshenziswe endaweni eyayiyiSoviet Union. Ngaphezu kwalokho, kusakazwa amapheshana nezincwadi ezinoqwembe oluqinile eziningi lapho. Ukuthi lezizincwadi zeBhayibheli ziye zaziswa kakhulu kubonakala ngokucacile ezincwadini ezamukelwe ehhovisi loFakazi BakaJehova eliseRussia eduze neSt. Petersburg.
Omagazini Abanemibala Emihle Bayaziswa
Indoda ethile yasenkabeni yeSiberia yabhala: “Ngenhlanhla enkulu ngabona INqabayokulinda iphethwe omunye engisebenza naye. Ngamcela ukuba angibonise yona. Okokuqala ngamane ngabhekabheka imifanekiso egqamile, enayo yonke imibala. Khona-ke ngafunda okwengeziwe . . . Ngingaqaphele, ngase ngiwufunde wonke lomagazini. Imibuzo yayibuzwe ngendlela ethakazelisayo, eshukumisayo, nesangxoxo.”
Enye indoda yaseSiberia yachaza: “Ngenhlanhla ngithole umagazini wenu. Angifuni ukunithopha, kodwa lokhu ukwaziswa okungcono kakhulu kwengake ngakufunda okuphathelene nokholo.”
Umhlengikazi othile waseSt. Petersburg, idolobha laseRussia elingelesibili kwamakhulu kunawo wonke, wabhala: “Ngibonga kakhulu ngochungechunge olumangalisayo lwezihloko ezikhuluma ngokutubeka oluku-Phaphama! ka-January 8, 1995. Lezizihloko aziziqedanga izinkinga zami kodwa zanginika ukusekela engangikade ngikulindele futhi ngikufuna.”
Umfundi oneminyaka engu-17 ubudala wabhala: “Ngibonga kakhulu kubo bonke abanyathelisa izincwadi ezimangalisa kanjena. Lapho mina nabangane bami sesiphuma ebhayisikobho, sabona abambalwa balabomagazini beshiywe esihlalweni esingenamuntu. Sabacosha. . . . Njengoba ngangifunda INqabayokulinda, ngakhex’ umlomo. Ingabe ikusasa liyoba njalo ngempela? Manje ngifunda amaVangeli futhi ngizama ukuwaqonda. Omagazini benu bakuchaza ngokuningilizwe kahle lokho iBhayibheli elikushoyo.”
Indoda eneminyaka engu-26 ubudala yathi: “Ngibonga kakhulu ngesihloko esithi ‘Ingabe Ukuzibulala Kuyikhambi?’ esiku-Phaphama! ka-April 8, 1994. Ngenxa yokuthambekela kwami ekucindezelekeni nasemkhubeni wokushaya indlwabu, ngiye ngacabanga ukuzibulala izikhathi eziningi. Kodwa iZwi likaNkulunkulu nemithandazo eya kuJehova kwangivimba ekuqedeni ukuphila kwami. Lesisihloko saqinisa ukuthembela kwami esiheni sikaNkulunkulu nokukholelwa kwami ukuthi uNkulunkulu uyongisiza ukuba ngibhekane nezinkinga zami. Uyakubona ukuphenduka kwami. Ufuna ukuba ngiphile. Ngiyambonga ngokungisekela ngalesisihloko.”
Ngokuphathelene naso lesosihloko se-Phaphama!, intombazane eneminyaka engu-15 ubudala yachaza: “Lomagazini ube nendima enkulu ekuphileni kwami. Lapho ngineminyaka eyisishiyagalombili ubudala, ngaqala ukuba nomuzwa wokuthi kwakungekho muntu owayengidinga. Abazali bami babengenaso isikhathi sokukhuluma nami, futhi ngazama ukuzixazululela ngokwami izinkinga zami. Ngaba unkom’ idla yodwa. Ngangihlala ngixabana nezihlobo zami. Kwabe sekufika umcabango wokuzibulala engqondweni yami. Yeka indlela engajabula ngayo ngokuhlangana noFakazi BakaJehova!”
Owesifazane othile wasengxenyeni yeRussia eseYurophu wathi: “Ngake ngezwa ingxoxo yeBhayibheli phakathi kwezinsizwa ezimbili esitobhini sebhasi. Ngaba nesithakazelo futhi ngaya kuzo. Zanginika ikhophi ye-Nqabayokulinda. Ngenjabulo nesithakazelo ngawufunda lomagazini, futhi ngifuna ukwazi okwengeziwe ngeBhayibheli. Ngingathanda ukuxhumana nani ngomagazini benu, futhi ngifuna ukufunda nokutadisha iBhayibheli njalo.”
Ezinye Izincwadi Ziyaziswa
Owesifazane osemusha waseCaucasus wabhala: “Owesifazane othile wafika ehhovisi lethu wayeseqala ukukhuluma ngomhlangano othile. Ngabona injabulo nentshiseko ayenayo, ngase ngiba nesithakazelo. Ngakusasa wanginika incwadi ethi Ungaphila Phakade EPharadesi Emhlabeni. Ngayifunda ngokushesha nangokuzimisela. Yayingokuthile okukhexis’ umlomo. Ngaba nomuzwa wokuthi ngemva kokuzulazula ebumnyameni, ngase ngiwutholile umnyango oholela ekukhanyeni. Ngemva kokufuna isikhathi eside kangaka, ngathola izimpendulo zemibuzo yami encwadini eyodwa vó. Lena injabulo engenakuchazwa.”
Indoda ethile yase-Asia Ephakathi yaphawula: “Ngiyilungu leGood News Church yobuvangeli. Siqaphela ukuntuleka okukhulu kwezincwadi zezinto ezingokomoya. Sinicela ngokuphuthumayo ukuba nisithumelele izincwadi, izincwajana [ezingangomagazini], nezincwajana zokutadisha nezokusakazwa ngokwengeziwe.”
Umuntu othile wase-Armenia, eduze koLwandle Olumnyama, wabhala: “Ngifunde incwajana ethi Ingabe UNkulunkulu Uyasikhathalela Ngempela?, futhi beyiqabula. Ekugcineni ngiye ngazithola izincwadi ezizongisiza ukuba ngitadishe iBhayibheli. Ngiyaninxusa ukuba ningithumelele izincwadi zokutadisha okunjalo.”
Owesifazane othile waseSiberia wathi: “Omunye woFakazi BakaJehova wasivakashela emzini wethu futhi washiya ikhophi yencwadi ethi Umuntu Omkhulu Kunabo Bonke Owake Waphila. Nakuba ngangiye ngaba ongakholelwa ebukhoneni bukaNkulunkulu kusukela ngisesesikoleni, lokho engakufunda kwangikhuthaza ukuba ngizindle ngokujulile nokuba ngiqale ukutadisha iBhayibheli.”
Umama onezingane ezimbili wazwakalisa ukubonga kwakhe ngalencwadi efanayo ephathelene nokuphila kukaJesu Kristu futhi wachaza: “Iyaqondakala ezinganeni futhi iyathakazelisa kuzo. Yakha isifiso sokuqhubeka utadisha iBhayibheli futhi ufunda izincwadi zenkolo. Lencwadi inyatheliswe futhi yenziwa ngendlela enhle kakhulu.”
Ngonyaka odlule, abantu abangu-34 608 endaweni eyayiyiSoviet Union babonisa ukwazisa kwabo ngalokho ababekufunda ngokuba babhapathizwe. Kwangathi lezizincwadi ezisekelwe eBhayibhelini ezinyatheliswa oFakazi BakaJehova zingasakazwa ngokugcwele nakabanzi kulengxenye yomhlaba, futhi kwangathi izinkulungwane eziningi ezengeziwe zingasabela emaqinisweni eBhayibheli eziwaqukethe!