‘Wakhumbula UMdali Wakhe Ezinsukwini Zobusha Bakhe’
GASO sonke isikhathi u-Adrian wayethola ukunakekela okukhulu kwabazali,” kusho uyise. “Lapho eneminyaka emine washayisa isihlahla ngemoto yomkhaya, wabangela ukuba bonke baphuze ukufika emhlanganweni webandla. Eneminyaka emihlanu waqoqa amasele ayinqwaba futhi wawafaka endlini. Kwathatha izinsuku eziningi ukukhipha lezozinto. Sazizwa njengomkhaya waseGibithe phakathi nenhlupho yamasele engokweBhayibheli.
“Lapho eneminyaka engu-11, wathola amazinyane amathathu ama-raccoon eduze komgwaqo omkhulu futhi wawayisa esikoleni ewafake esikhwameni sakhe sezincwadi. Lapho uthisha engena, kwakunesiphithiphithi ekilasini—izingane zingunge isikhwama sika-Adrian, zichwaza ngenjabulo. Uthisha walunguza, wabona lama-raccoon, wabe esemthatha ngemoto nezilwane zakhe wamyisa esikhungweni esinakekela izilwane eziyizintandane. U-Adrian wachiphiza izinyembezi lapho ecabanga ukuthi wayezolahlekelwa abantwana bakhe, kodwa ngemva kokuhambahamba kulesisikhungo futhi ebona amazinyane ezimpungushe nezinye izintandane zinakekelwe kahle, wawashiya lapho ama-raccoon akhe.”
Uyise waqhubeka: “U-Adrian wayengeyena umfana omubi. Wayemane nje engumfana omatasatasa kakhulu. Wayenombono ophapheme owawenza ukuphila kuthakazelise.”
Unina ka-Adrian waveza olunye uhlangothi ngaye—umuntu othanda umkhaya, umnqolo, umfana onothando ngempela. Uyalandisa: “Izingane zesikole zazimchaza njengomuntu owayengalimazi muntu. Enye intombazane ekilasini lakhe yayilinganiselwe ngokwengqondo nakuba yayingesona isilima. Yayihamba no-Adrian ngebhasi lesikole. Ezinye izingane zaziyigcona, kodwa unina wasitshela ukuthi ngaso sonke isikhathi u-Adrian wayeyiphatha ngenhlonipho nangomusa okhethekile indodakazi yakhe. Wayenokuzimisela—umfana ocabangayo ngempela onemizwa ejulile ayengavamile ukuyiveza. Kodwa lapho eyiveza, wayesimangalisa ngamazwi ayebonisa ukuqonda izinto ngokujulile.”
Wayiphetha kanje indlela ayiqonda ngayo indodana yakhe: “Ukugula kwakhe kwamenza wavuthwa ngokushesha futhi waba nengokomoya elijulile.”
Wayengayekethisi—Engalifaki Igazi!
Ukugula kwakhe? Yebo. Kwaqala ngo-March 1993, lapho u-Adrian eneminyaka engu-14 ubudala. Esiswini sakhe kwatholakala isimila esasikhula ngokushesha. Odokotela babefuna ukuba ahlinzwe kuhlolwe izicubu kodwa babesaba ukopha ngokweqile futhi bathi kwakungase kudingeke ampontshelwe igazi. U-Adrian wenqaba. Wayengayekethisi. Egcwele izinyembezi emehlweni akhe, wathi: “Ngeke nje ngiphinde ngizihloniphe uma ngifakwa igazi.” Yena nomkhaya wakubo babengoFakazi BakaJehova, abenqaba ukumpontshelwa igazi ngenxa yezizathu ezingokweBhayibheli ezilotshwe kuLevitikusi 17:10-12 nakuzEnzo 15:28, 29.
Ngesikhathi eseDr. Charles A. Janeway Child Health Centre eSt. John’s, eNewfoundland, elindele ukuhlinzwa—okwakuzokwenziwa ngaphandle kwegazi—u-Adrian wacelwa isazi sezimila uDkt. Lawrence Jardine ukuba achaze ukuma kwakhe ngendaba yegazi.
“Bheka,” kusho u-Adrian, “bekungeke kusho lutho noma abazali bami bebengoFakazi BakaJehova noma cha. Bengingeke ngilamukele igazi.”
UDkt. Jardine wabuza, “Uyaqaphela yini ukuthi ungase ufe uma ungakwamukeli ukumpontshelwa igazi?”
“Yebo.”
“Futhi uzimisele ukwenza lokho?”
“Uma kudingekile.”
Unina, naye owayekhona, wabuza, “Kungani uthatha ukuma okunje?”
U-Adrian waphendula: “Mama, akuyona inkambo enhle. Ukungamlaleli uNkulunkulu futhi ngizandisele ukuphila ngeminyaka embalwa manje bese ngenxa yokungalaleli kwami uNkulunkulu ngilahlekelwa uvuko nokuphila okuphakade emhlabeni wakhe oyipharadesi—lokho nje akulungile!”—IHubo 37:10, 11; IzAga 2:21, 22.
Wahlinzwa futhi wahlolwa izicubu ngo-March 18. Kwatholakala ukuthi u-Adrian wayenesimila esimisweni esithwala amanzi emzimbeni. Ukuhlolwa komongo wethambo okwalandela kwaqinisekisa ukuthi wayengenwe i-leukemia. Manje uDkt. Jardine wabe esechaza ukuthi isimiso esinzulu sokwelapha ngamakhemikhali nangokumpontshelwa igazi sasiwukuphela kwendlela eyayingasindisa u-Adrian. Nokho, u-Adrian wayesakwenqaba ukumpontshelwa igazi. Kwaqala ukwelapha ngamakhemikhali, ngaphandle kokumpontshelwa igazi.
Nokho, manje, njengoba sasiqhubeka lesisigaba sokwelapha esibucayi, kwakwesatshwa ukuthi i-Child Welfare Department yayingase ingenele futhi ithole imvume yasenkantolo yokuwina umntwana negunya lokumpompela igazi. Umthetho wawuvumela noma ubani oneminyaka engu-16 ubudala noma ngaphezulu ukuba azinqumele ngokwakhe ngokuphathelene nendlela yokwelashwa. Okuwukuphela kwendlela noma ubani oneminyaka engaphansi kuka-16 ayengathola ngayo lelolungelo kwakuyilapho ebhekwa njengomntwana osevuthiwe.
ENkantolo Ephakeme YaseNewfoundland
Ngakho ngeSonto ekuseni, ngo-July 18, owayebambele umqondisi we-Child Welfare wathatha isinyathelo sokuthola izinqumo zenkantolo zokuwina umntwana. Ngokushesha, kwaqashwa ummeli ovelele nohlonishwa kakhulu, uDavid C. Day, Q.C., wase-St. John’s, eNewfoundland, ukuba amelele u-Adrian. Ngaleyontambama, ngo-3:30, iNkantolo Ephakeme yaseNewfoundland yahlangana, kwengamele uMahlulel’ uRobert Wells.
Phakathi nalesimiso santambama, uDkt. Jardine wakwenza kwacaca kumahluleli ukuthi wayebheka u-Adrian njengomntwana osevuthiwe owayenenkolelo ejulile ngokumelene nokusetshenziswa kwegazi nokuthi yena, uDkt. Jardine, wayethembise u-Adrian ukuthi wayengeke ahlanganise ukumpontshelwa igazi kunoma iyiphi indlela yokumelapha. UMahlulel’ uWells wabuza lodokotela ukuthi ukuba bekushiwo inkantolo ukuba kumpontshelwe igazi, ingabe ubeyokwenza? UDkt. Jardine waphendula: “Cha, ngokwami bengingeke ngikwenze.” Wathi u-Adrian wayenomuzwa wokuthi kwakuzosongelwa ithemba lakhe elingokweBhayibheli lokuphila okuphakade. Ubufakazi obuqotho balodokotela ovelele babumangalisa futhi bufudumeza inhliziyo futhi balethela abazali baka-Adrian izinyembezi zenjabulo.
“Ngicela Ningihloniphe Futhi Nihloniphe Nezifiso Zami”
Lapho lenkantolo iphinde ihlangana ngoMsombuluko, ngo-July 19, uDavid Day waletha amakhophi esitatimende esifungelwe u-Adrian—owayengenakuvela enkantolo ngoba wayebangwa nezibi—ayewabhalile futhi wawasayina echaza izifiso zakhe ngokuphathelene nokwelashwa komdlavuza omphethe ngaphandle kokusetshenziswa kwegazi noma imikhiqizo yalo. U-Adrian wathi kuso:
“Lapho ugula ucabanga ngezinto eziningi, futhi uma uphethwe umdlavuza, uyazi ukuthi ungase ufe futhi ucabanga ngalokho. . . . Anginakukuvumela ukumpontshelwa igazi; kumnyama kubomvu. Ngiyazi ukuthi ngingase ngife uma lingasetshenziswanga igazi. Kodwa lokho kuyisinqumo sami. Akukho muntu ongiphoqelele. Ngimethemba kakhulu uDkt. Jardine. Ngikholelwa ukuthi uyindoda yezwi layo. Uthi uzongelapha ngokujulile engalisebenzisanga nakancane igazi. Ungitshelile ngezingozi. Ngiyaziqonda. Ngiyakwazi okubi kakhulu okungase kwenzeke. . . . Indlela engizizwa ngayo iwukuthi uma ngifakwa noma iliphi igazi lokho kuyofana nokungidlwengula, ukunukubeza umzimba wami. Angiwufuni umzimba wami uma lokho kwenzeka. Anginakukwenza lokho. Angifuni noma iyiphi indlela yokwelapha uma kuzosetshenziswa igazi, ngisho nokucabanga nje ngokulisebenzisa. Ngizomelana nokusetshenziswa kwegazi.” Isitatimende esifungelwe sika-Adrian saphetha ngalesicelo: “Ngicela ningihloniphe futhi nihloniphe nezifiso zami.”
Phakathi nokudingidwa kwalendaba u-Adrian wayesesibhedlela ekamelweni lakhe, futhi uMahlulel’ uWells ngomusa wafika ezombona lapho, kukhona noDavid Day. Lapho elandisa ngaleyongxoxo, uMnu. Day waxoxa nomahluleli ngendlela enobuciko u-Adrian akhuluma ngayo ngalendaba, empeleni ethi: “Ngiyazi ukuthi ngibangwa nezibi, futhi ngiyazi ukuthi ngingase ngife. Abanye abantu bezokwelapha bathi ukumpontshelwa igazi kuzosiza. Angicabangi kanjalo, ngoba kunezingozi eziningi engifunde ngazo ngokuphathelene nakho. Kungakhathaliseki ukuthi kuyasiza noma cha, ukholo lwami lumelene nokumpontshelwa igazi. Hloniphani ukholo lwami futhi nami niyongihlonipha. Uma ningaluhloniphi ukholo lwami, ngiyozizwa ngingahlonishiwe. Uma niluhlonipha ukholo lwami, ngingabhekana nokugula kwami ngesibindi. Ukholo luwukuphela kwento enginayo, futhi manje luyinto ebaluleke kunazo zonke engiyidingayo ukuze ingisize ngilwe nalesisifo.”
UMnu. Day wayenokukhulumela kwakhe okuthile ngo-Adrian: “Wayeyikhasimende elinekhono lokukusingatha ngesineke ukugula kwalo okubucayi, ngokuqinile, nangesibindi. Kwakunokuzimisela emehlweni akhe; ukuzethemba okujulile ezwini lakhe; isibindi endleleni yakhe yokwenza izinto. Ngaphezu kwakho konke, amazwi akhe nokushukuma komzimba kwangibonisa ukuthi unokholo oluqinile. Ukholo lwaluyisici sakhe esinamandla. Ukugula okungapheli kwamenza wayeka amaphupho obusha futhi wabhekana namaqiniso obudala. Ukholo lwamsiza ukuba enze kanjalo. . . . Ngokungangabazeki wayeqotho futhi, ngokwengqondo yami, eneqiniso. . . . Ngaqaphela ukuthi kungenzeka abazali bakhe [baye bafaka] kuye ukumelana kwabo ngokuphathelene nokusetshenziswa kwegazi endleleni yokwelashwa kwakhe. . . . Nganeliswa [ukuthi] wasebenzisa umqondo wakhe ekuchazeni isifiso sakhe ngendlela yokwelashwa ngaphandle kwegazi.”
Ngesinye isikhathi uMnu. Day waphawula ngezinkolelo zika-Adrian ukuthi “zaziyigugu kakhulu kuye kunokuphila ngokwakho,” wayesenezela: “Njengoba ibhekene nalezinkinga, lensizwa ethembekile ingenza ngibe nomuzwa wokuthi zonke izinsizi zokuphila kwami ziyize. Angisoze ngayikhohlwa naphakade. Ingumntwana osevuthiwe onesibindi esikhulu, ukuqonda, nokuhlakanipha.”
Isinqumo—U-Adrian Umntwana Osevuthiwe
NgoMsombuluko, ngo-July 19, kwaphothulwa ukudingidwa kwalendaba, futhi uMahlulel’ uWells wakhipha isinqumo sakhe, kamuva esanyatheliswa kuyi-Human Rights Law Journal, ka-September 30, 1993. Okulandelayo izingcaphuno:
“Ngenxa yalezizathu ezilandelayo, ziyachithwa izicelo zoMqondisi we-Child Welfare; lengane ayisidingi isivikelo; akubonakalanga kubalulekile ukusetshenziswa kwegazi noma imikhiqizo yalo ngenxa yenjongo yokumpontshelwa igazi noma ukujova, futhi ikakhulukazi ezimweni zalendaba, kungalimaza.
“Ngaphandle kokuba ukushintsha kwezimo kwenze kufuneke esinye isinqumo, kwenqatshelwe ukusetshenziswa kwegazi noma imikhiqizo yalo ekwelashweni kwakhe: futhi lomfana ubhekwa njengomntwana osevuthiwe osifiso sakhe sokwelashwa ngaphandle kwegazi noma imikhiqizo yalo kumelwe sihlonishwe. . . .
“Akungabazeki ukuthi ‘lomuntu osemusha’ unesibindi kakhulu. Ngicabanga ukuthi usekelwa umkhaya onothando nonakekelayo, futhi ngicabanga ukuthi ubhekene nenhlupheko yakhe ngesibindi esikhulu. Ingxenye yenkolelo yakhe engokwenkolo iwukuthi akulungile ukuba asebenzise imikhiqizo yegazi ngokuthi ifakwe emzimbeni wakhe, kungakhathaliseki ukuthi ngaziphi izinjongo . . . Izolo ngibe nethuba lokufunda isitatimende esifungelwe esibhalwe u-A., futhi ngiye ngaba nethuba lokulalela unina, onikeze ubufakazi, futhi ngiye ngaba nethuba lokuxoxa no-A. ngokwakhe.
“Ngiyaneliseka ukuthi ukholelwa ngenhliziyo yakhe yonke ukuthi ukufaka igazi kungaba okungalungile nokuthi ukuphoqelelwa ukuba alifake kulezimo esikhuluma ngazo kungaba ukuhlaselwa komzimba wakhe, ukuhlaselwa kwenkululeko yakhe, nokuhlaselwa kwabo bonke ubuntu bakhe, kangangokuthi kuyoba nethonya elikhulu emandleni akhe nasekhonweni lakhe lokubhekana novivinyo olusabekayo okufanele abhekane nalo, kungakhathaliseki ukuthi uba yini umphumela.
“Ngiyavuma ukuthi udokotela ukhulume kahle lapho ethi isiguli kumelwe sibe sesimweni sengqondo sokubambisana nesiqondile ngokuphathelene nokwelashwa ngamakhemikhali nezinye izindlela zokwelapha umdlavuza ukuze kube nethemba elithile, ithemba langempela, lempumelelo, nokuthi isiguli okuphoqelelwe kuso okuthile okungahambisani nezinkolelo zaso eziyigugu esibambelele kuzo ngokujulile kungaba isiguli okungancishiswa ngokuphawulekayo ukufanelekela kwaso ukwelashwa. . . .
“Ngicabanga ukuthi lokhu okwenzeke ku-A. kuye kwamenza wavuthwa ngezinga obekungeke kwenzeke ngalo ngengane eneminyaka engu-15 engabhekani nengaphili ngezinto lona aphila ngazo futhi okumelwe abhekane nazo nabhekene nazo. Ngicabanga ukuthi okuhlangenwe nakho kwakhe kungokuhlangenwe nakho okubi kunakho konke engingakucabanga, futhi ngicabanga ukuthi ukholo lungenye yezinto ezimqinisayo nomkhaya wakubo. Ngicabanga ukuthi okwenzekile kuye kwenza u-A. wavuthwa ngaphezu kokulindelekile kumuntu oneminyaka engu-15. Ngicabanga ukuthi lomfana engikhulume naye ekuseni uhluke kakhulu kumuntu ovamile oneminyaka engu-15, ngenxa yalokhu okuhlangenwe nakho okudabukisayo.
“Ngicabanga ukuthi uvuthwe ngokwanele ukuba aveze umbono oqinile, futhi uye wawuveza kimi . . . Futhi ngiyaneliseka ukuthi kufanelekile . . . ukuba ngicabangele izifiso zakhe, futhi ngenza kanjalo. Izifiso zakhe ziwukuthi kungasetshenziswa imikhiqizo yegazi, futhi ngiyaqiniseka ukuthi izithakazelo zakhe ezinhle ziyothinteka kabi kakhulu nangendlela esobala uma uMqondisi eziguqula ngandlela-thile ngaphansi kwesinqumo saleNkantolo . . . Ngaphezu kwalokho, uma—futhi lokhu kungenzeka—engase afe ngempela ngenxa yalesifo, uyofa enesimo sengqondo leso, uma kucatshangelwa izinkolelo zakhe ezingokwenkolo, okungaba esidabukisa kakhulu, esiyishwa elikhulu, futhi esingenakufiseleka nakancane. Ngicabangela zonke lezinto. . . .
“Kuzo zonke lezimo, nginomuzwa wokuthi kufanele ngisenqabe isicelo sokuba kusetshenziswe imikhiqizo yegazi ekwelapheni u-A.”
Isigijimi Sika-Adrian Esiya KuMahlulel’ UWells
Kwakuyisigijimi esinengqondo ngokuphawulekayo lomfana osemncane, owayazi ukuthi uzofa, asithumela kuMahlulel’ uRobert Wells, esadluliselwa nguMnu. David Day, esasithi: “Ngicabanga ukuthi kuyobe ngiyadebesela uma, ngenxa yekhasimende lami engikhulume nalo ngamafuphi ngemva nje kokuba uhambile esibhedlela namuhla, ngingalibongeli ngokusuka enhliziyweni yalo, okuyinhliziyo enomusa kakhulu, ngokusingatha lendaba ngokushesha nangozwelo nobuqotho obukhulu. Likubonga liyanconcoza, Mhlonishwa, futhi ngifisa ukuba lobufakazi bukuveze lokho. Ngiyabonga.”
Unina ka-Adrian ulandisa izenzakalo zokugcina zalendaba.
“Ngemva kokudingidwa kwalendaba u-Adrian wabuza uDkt. Jardine, ‘Ngizophila isikhathi eside kangakanani?’ Impendulo kadokotela: ‘Isonto elilodwa noma amabili.’ Ngabona indodana yami ichiphiza, icimeza kakhulu. Ngasondela ukuze ngiyigone, kodwa yathi: ‘Ungangigoni, mama. Ngiyathandaza.’ Ngemva kwemizuzwana embalwa, ngabuza, ‘Ubhekana kanjani nalokhu, Adrian?’ ‘Mama, ngisazophila ngisho noma ngingafa. Futhi uma ngizophila amasonto amabili nje kuphela, ngifuna ukuwajabulela. Ngakho kumelwe ujabule.’
“Wafuna ukuvakashela igatsha le-Watch Tower eGeorgetown, eCanada. Wakwenza lokho. Lapho wabhukuda echibini nomunye wabangane bakhe. Wahamba wayobuka umdlalo weqembu le-baseball i-Blue Jays futhi wathatha isithombe nabadlali abathile. Okubaluleke kunakho konke, enhliziyweni yakhe wayezinikezele ukukhonza uJehova uNkulunkulu, futhi manje wayefuna ukubonakalisa lokho ngokucwiliswa emanzini. Manje kwase kwembulwa kwembeswa, futhi wabe esephindele esibhedlela engasenakuphinde aphume. Ngakho ngomusa abahlengikazi bamvumela ukuba asebenzise elinye lamathangi ensimbi asegunjini le-physiotherapy. Wabhapathizwa lapho ngo-September 12; washona ngosuku olulandelayo, ngo-September 13.
“Umngcwabo wakhe wawumkhulu kunayo yonke isikhungo sezemingcwabo esake saba nayo—abahlengikazi, odokotela, abazali beziguli, ayefunda nabo ekilasini, omakhelwane, neningi labafowabo nawodadewabo abangokomoya basebandleni lakubo nabakwamanye amabandla. Njengabazali, asizange siziqaphele zonke izimfanelo ezinhle ezazibonakala endodaneni yethu njengoba yayibekezelela ukuhlupheka kwayo okukhulu noma umusa nokucabangela okwakuyingxenye yobuntu bayo bobuKristu obukhulayo. Umhubi ophefumlelwe wathi: ‘Abantwana bayifa elivela kuJehova.’ Ngokuqinisekile lona wayeyifa, futhi sibheke phambili ekumboneni ezweni elisha lokulunga likaJehova, elizomiswa ngokushesha emhlabeni oyipharadesi.”—IHubo 127:3; Jakobe 1:2, 3.
Sengathi singalindela ukugcwaliseka kwesithembiso sikaJesu ku-Adrian esikuJohane 5:28, 29: “Ningamangali ngalokho, ngokuba isikhathi siyeza, lapho bonke abasemathuneni beyakulizwa izwi layo, abenzé ukulunga baphumele ekuvukeni kokuphila, abenzé okubi ekuvukeni kokulahlwa.”
Ngokwenqaba ukumpontshelwa igazi okwakucatshangwa ukuthi kwakuzokwandisa ukuphila kwakhe kwamanje, u-Adrian Yeatts wazibonakalisa engomunye wentsha eningi ebeka uNkulunkulu kuqala.
[Ibhokisi ekhasini 5]
‘Ukuphila Kusegazini’
Igazi liyinkimbinkimbi ngokuyisimangaliso, lifinyelela wonke amangqamuzana asemzimbeni. Econsini elilodwa, amangqamuzana egazi abomvu angu-250 000 000 athwala umoya-mpilo futhi akhiphe isikhutha; amangqamuzana amhlophe angu-400 000 afuna futhi abulale abahlaseli abangadingekile; izinhlayiyana zegazi ezingu-15 000 000 zihlangana ngokuphazima kweso lapho kusikeke khona futhi ziqale ukwakha uqweqwe lokuvala ukusikeka. Konke lokhu kuntanta kuyi-plasma, enombala ophaphathekile, eyakhiwe izakhi eziningi ezinezindima ezibalulekile emisebenzini yegazi ewuhide. Ososayensi abakuqondi konke lokho okwenziwa igazi.
Akumangalisi ukuthi uJehova uNkulunkulu, uMdali waloluketshezi olumangalisayo, uthi ‘ukuphila kusegazini.’—Levitikusi 17:11, 14.
[Ibhokisi ekhasini 7]
Ukufakela Inhliziyo Ngaphandle Kwegazi
Ngo-October nyakenye, uChandra Sharp oneminyaka emithathu ubudala walaliswa esibhedlela saseCleveland, e-Ohio, e-U.S.A., enenhliziyo eyayingavuvukele nje kuphela kodwa futhi eyayibuthakathaka. Wayengondlekile, ebhashile, isisindo sakhe singamakhilogremu ayisishiyagalolunye kuphela, futhi kwakudingeka ukuba afakelwe inhliziyo. Wanikezwa amasonto ambalwa kuphela okuphila. Abazali bakhe bavuma ukuthi afakelwe inhliziyo kodwa hhayi ukuba ampontshelwe igazi. BangoFakazi BakaJehova.
Lokhu akubanga inkinga kudokotela ohlinzayo, uDkt. Charles Fraser. Ngo-December 1, 1993, i-Flint Journal yaseMichigan yabika: “UFraser uthe iCleveland Clinic nezinye izikhungo zokwelapha sekuba izingcweti ezinhlotsheni eziningi zokuhlinza—kuhlanganise ukufakela izitho—ngaphandle kokuba isiguli sifakelwe igazi labanye abantu. ‘Sesifunde okwengeziwe ngendlela yokuvimbela ukopha, nokuthi singawusebenzisa kanjani umshini wamaphaphu nenhliziyo ngolunye uketshezi ngaphandle kwegazi,’ kusho uFraser.” Wabe esenezela: “Sekungamashumi amaningi eminyaka ezinye izibhedlela zobuchwepheshe zenza ukuhlinza kwemithambo yenhliziyo ngaphandle kokusebenzisa igazi. . . . Ngaso sonke isikhathi sizama ukuhlinza ngaphandle kokusebenzisa (ukumpompela) igazi.”
Ngo-October 29, wafakela inhliziyo kuChandra ngaphandle kokusebenzisa igazi. Ngemva kwenyanga kwabikwa ukuthi uChandra usengcono.