Usuku Lombukiso Wezilwane Omkhulu Kakhulu EAsia

Ngumlobeli wePhaphama! eNdiya

AMAHARAJA (amakhosi amaHindu) akhwele phezu kwezindlovu ezihlotshiswe kahle noma umlimi owumfokazana ugibele izinkunzi ezimbili ezinezimpondo ezinkulu—izenzakalo ezinjalo ngokuvamile zithathwa izithombe lapha eNdiya. Kodwa zitholakalaphi izilwane ezinkulu kanjalo neziyigugu?

Ukuze uphenduleke, hamba nathi siye eSonepur ezweni laseBihar, enyakatho-mpumalanga yeNdiya. Lapho singavakashela umbukiso mhlawumbe ongafani nanoma yimuphi owake wawubona ngaphambili. Kubikwa ukuthi ungumbukiso wezilwane omkhulu kakhulu eAsia, ngokunokwenzeka ngisho nasemhlabeni wonke. Uba khona cishe amasonto amabili phakathi kukaOctober noNovember.

Isenzakalo Esihlaba Umxhwele

Yeka izixuku! Abesifazane bagqoke osari abagqamile, namatshe ayigugu amaningi. Abesifazane abashadile bavelele ngokukhethekile ngempuphu ebomvu abayigcobe emgqeni lapho izinwele zihlukaniswe khona. Abaningi babo bagone izingane, futhi enye ingane noma ezimbili zibambelela kosari babo njengoba bephuthuma ukuze bahambisane nabayeni babo.

Njengoba kunezixuku eziningi kangaka, sasimangala ukuthi izingane zazenza kanjani ukuba zingalahleki. Iqiniso liwukuthi, eziningi ziyalahleka. Ngesonto elilodwa nje, sathola ukuthi izingane ezingu-50 zazilahlekile, futhi kwatholakala ezingu-17 kuphela. Siyathuka uma sicabanga lokho okwenzekayo kwezidukile, njengoba siye sezwa ukuthi ngokuvamile abantu abayizindlavini bayazibamba futhi baziphoqe ukuba zibe izinxibi futhi bazenzise imikhuba yokuziphatha okubi.

Izindawo zokuthengisa ezingasemigwaqweni ziyanezela ekucinaneni kodwa kuyathakazelisa ukuzibona. Kwenye indawo yokudayisa, uma ufaka uhlamvu lwemali, inyoni encane iphumela ngaphandle kwekheji layo bese icosha ikhadi. Owesilisa ophethe lapho ukuchazela ikusasa lakho esebenzisa ikhadi. Ingabe udinga ukushefa okusheshayo? Khona-ke mane ugobe phambi komuntu ogundayo, futhi insingo yakhe ende, ebukhali yehla kancane ebusweni bakho obunegwebu. Ngemizuzu emithathu nje kuphela, uthola ukushefa mhlawumbe okucishe kufane nalokho okunganikezwa yinoma yimuphi umshini wesimanje.

Ezindaweni zokudayisa kutholakala izinhlobonhlobo eziningi zamasongo okuhlobisa, lawo abesifazane baseNdiya abakujabulelayo ukuwagqoka engalweni ngayinye, anemibala ehlangene ehambelana nosari babo. Umdayisi onokuhlangenwe nakho ulinganisa amasongo engalweni yomthengi ewashintshashintsha kuze kube yilapho ethola elimlinganayo nohlobo olufanelekile. Engalweni ngayinye owesifazane waseNdiya angase agqoke amasongo amaningi, enziwe ngengilazi, ngensimbi noma ngepulasitiki.

Izindawo zokudayisa zidayisa futhi izinto zokuhlobisa izilwane. Kakade, lona umbukiso wezilwane. Izinto eziningi zithengwa ngokushesha ngoba abantu basemaphandleni bayathanda ukuhlobisa izilwane zabo. Izinto zokuhlobisa zihlanganisa ubuhlalu bezintamo zezilwane kanye nezinsimbi ezikhalayo ezinemibalabala nobukhulu obuhlukahlukene.

Ubani lowo omemezayo? Phela, isinxibi! Njengoba sigoqene futhi sigcwele izintuli, sigaqa emgwaqweni futhi sihudula isitsha saso sokunxiba. Uma ucabanga ngobuningi babantu abakhona, kuyamangalisa ukuthi asigxotshwa! Phakathi nombukiso, abantu bayazipha izinxibi, ngakho-ke isitsha salowesilisa sesicishe sigcwale izinhlamvu zemali. Eduze nethempeli kunamakhulu ezinxibi ezicela izipho—izinyonga, izimpumputhe, nabanochoko. Ezinye ziqalekisa izimo ezizithola zikuzo, ezinye zibiza amagama onkulunkulu, ezinye zisho izibusiso kulabo abaziphayo.

Okunye okuya embukisweni izilwane zezinhlobo eziningi. Izindlovu zipendiwe futhi zihlotshiswe ngokujabulisayo. Ngayinye inomgibeli phezulu oyinikeza iziyalezo eziqondile zokuba iqhubeke noma ihambe kancane, ngokuthi ngezinye izikhathi ayithinte ngenduku ngemuva kwamadlebe. Izinyathi, amakhanda ebheke phezulu, zihamba kancane, zingazinakile ngokuphelele izimoto ezinqwabelana ngemva kwazo.

Endleleni sibona futhi izinkomo eziningi namakamela ambalwa. Izinkawu ziningi, ikakhulukazi ezohlobo lwelangur. Lezi zinamashiya ayihlathi nezilevu eziyishoba. Izidalwa ezinezinsiba ziningi ngokufanayo, zisukela ezimpigogweni ezihlotshisiwe nopholi kuya kopholi abanezisila ezinde namajuba. Zonke zize embukisweni zisuka kude naseduze.

Ezinye Izinto Ezikhethekile Ezikhangayo

Izinkomo ezivelele ezivela ePunjab ziphakathi kwezinto ezikhethekile ezikhangayo. Ezinye zikhipha ubisi olungaba amalitha angu-25 kabili ngosuku. Ngokuqinisekile, ziyizilwane ezinhle! Abantu abaningi bafikela nje ukuzobuka zona, kuyilapho abanye bazimisele ukuthenga. Noma nini lapho kudayiswa, umnikazi uyamemeza, “Bolo Hariharnath Ki,” ngaleyondlela edumisa unkulunkulu wakuleyondawo, nezixuku zisabela ngokuvumelana, “Jai.” Isilinganiso senani lenkomo yaseNdiya singase sibe phakathi kwamarupee angu-3 000 kuya kwangu-5 000, kodwa lezinhlobo eziphawulekayo zakwamanye amazwe zidayiswa ngamarupee angu-20 000 kuya ku-40 000.a

Kulonyaka kunamakamela angu-15 kuphela adayiswayo emakethe. “Lemikhumbi yasogwadule” ibiza amarupee angu-5 000 umunye. Ingasebenza amahora amaningi futhi ingabhekana nokushisa namakhaza nokoma nendlala ngaphandle kokucasuka. Amakamela angasetshenziselwa ukudonsa amakalishi namageja nokuphendula amasondo aphehla amanzi, umsebenzi ngokuvamile owenziwa izinkabi.

Izilwane ezithandwa kakhulu izinkabi. Cishe akunakwenzeka ukuhamba emigwaqweni yaseNdiya ngaphandle kokubona ikalishi okuthenjelwa kulo njalo elidonswa izinkunzi lithutha izimpahla zomlimi nomkhaya likuyisa edolobheni. Omunye umdayisi oshisekayo usebeke uphawu oluthi “Izinkabi Zekhethelo.” Futhi ngempela zibukeka zingezekhethelo! Uma kwenzeka noma ubani ecabanga ukumkhohlisa noma ukumphanga, umdayisi unezibhamu ezimbili ezihlotshisiwe. Inkabi yekhethelo idayiswa ngamarupee angu-35 000.

Ngokulandelayo amahhashi akhalayo adonsa ukunakekela kwethu, futhi yeka ukuthi ayizilwane ezinhle kanjani! Amanye angawokugitshelwa amaphoyisa noma abezempi, kuyilapho amanye kungawomjaho. Amahhashana okugitshelwa nawokudonsa ikalishi nawo ayatholakala. Kwenye indawo yokudayisa kudlala iqembu lomculo elijabulisa ihhashi eliqeqeshiwe, elidansayo lihambisana nomculo.

Siyaqhubeka siya ngalapho kukhala khona izindlovu. Lapho, phakathi kwezihlahla zikamango, kunezindlovu, ezingu-250 sezizonke. Yeka izidalwa ezinkulu! Zivela kuyo yonke iNdiya neNepal. Nokho, zibukeka ziyaluza, ngokunokwenzeka kungenxa yesixuku esikhulu ngokufanayo nokuba khona kwezinye eziningi kangaka zohlobo lwazo.

Lapha sihlangana noHarihar Prasad, indlovu eyiduna eneminyaka engu-25 ubudala ikhala ngokungalawuleki. Umnikazi wayo, uGangabux Singh, usanda kuyidayisa ngamarupee angu-70 000. Uma sicabangela izinga lamanje lasemakethe lamarupee angu-130 000 ngendlovu ephile kahle, lelinani liphansi ngempela. Kodwa kunzima ukulawula uHarihar.

UHarihar wahamba izinsuku ezingu-22 ukuze afinyelele embukisweni, futhi manje umnikazi wakhe udabukile ngokuhlukana naye. Kodwa ibhizinisi liyibhizinisi, futhi izibopho ezingokomzwelo kumelwe zinqanyulwe. Sasizibuza ukuthi ingabe uHarihar naye udabukile yini ngokushiya umqeqeshi wakhe omdala. Lapho umqeqeshi wakhe omusha ezama ukumbamba, uHarihar wagqashula izintambo zakhe, ngakho-ke useboshwe ngamaketanga.

Ukuze ehliswe ulaka futhi adluliselwe kahle kumqeqeshi omusha, umqeqeshi wakhe omdala uzohamba naye aye ekhaya lakhe elisha. Lapho, bobabili abaqeqeshi bazosebenza ndawonye kuze kube yilapho omusha esemjwayele uHarihar nentukuthelo yakhe. Sithola ukuthi umnikazi omusha akazimisele ukugcina uHarihar isikhathi eside. Ngakho-ke angase abuyiselwe emuva eSonepur futhi aphinde adayiswe ngonyaka ozayo.

Kungenzeka ukuthi uHarihar uyothengwa abantu abavela eRajasthan ukuze abe indlovu yasethempelini kwezinye izindawo ezikude. Khona-ke uyohlotshiswa ngokuphelele bese esetshenziselwa ukudonsa inqola yasethempelini. Noma angase agcine esethutha amapulangwe emahlathini akude eziQhingi zaseAndaman naseNicobar, kude lé eBay of Bengal.

Umbukiso Onomlando Omude

Nakuba kungekho muntu obonakala eqiniseka ngokuthi umbukiso wezilwane ngempela waqala nini futhi kanjani eSonepur, kubonakala sengathi waqala ukuvelela phakathi nokubusa kombusi waseMogul u‘Alamgīr (1658-1707). URajeshwar Prasad Singh, induna yendawo, uthi kusukela ngo-1887 umkhaya wakhe ubulokhu uqashisa ngezinkundla zombukiso ukuze kube nendali yamahhashi. Kusukela ngekhulu le-19 leminyaka kuqhubeke, abatshali bezihlahla i-indigo beRaj yaseBrithani babebuthana lapha phakathi nombukiso ukuze badlale ipolo, babe nomjaho wamahhashi, futhi badanse.

Amaharaja ayeze embukisweni nezinduna eziningi futhi ehlala ematendeni akhethekile ayenezela injabulo embukisweni ezinsukwini zakuqala. Nokho, uma nje isidingo sezilwane sisaqhubeka, umbukiso waseSonepur uyoqhubeka wenziwa. Sajabula ngokuthi sachitha isikhathi esithile kulombukiso ohluke kakhulu, lapho izilwane ezinhlobonhlobo kuyizona ezikhangayo.

[Umbhalo waphansi]

[Isithombe ekhasini 23]

Ihhashi elihlotshisiwe libukiswa ababukeli

[Isithombe ekhasini 24]

UHarihar Prasad ngemva kokuba esedayisiwe