Bamangala Ngalokho Abakubona
EHLOBO elidlule ezingxenyeni eziningi zaseMpumalanga Yurophu kanye naseKazakhstan ekude naseSiberia, oFakazi BakaJehova baphawulwa ngezindlela eziningi ababengakaze baphawulwe ngazo ngaphambili. Izakhamuzi zendawo nezihambeli zemihlangano kulezozindawo zahlabeka umxhwele, yebo, zamangala ngisho nokumangala, ngalokho ezakubona.
Izihambeli zaseZagreb zatshelwa ngokuphindaphindiwe: “Besingacabangi ukuthi niyofika!” Ezinye izivakashi eziningi zaziye zayeka amacebo azo okuhamba—kodwa hhayi oFakazi BakaJehova. ITimes yaseLondon yabika ngokuqondene nomhlangano wesigodi: “Eqinisweni, ungowokuqala ukuba uhlelwe oFakazi BakaJehova ezweni elilwa lodwa.”
Amaphoyisa ayemangele ngokukhethekile. Elinye eZagreb lathi: “Bekuyoba kuhle ukubonisa zonke ezokuxhumana lokho okwenzeka kulenkundla, khona kanye lapha, lapho sibona khona abaseSerbia, abaseCroatia, abaseSlovenia, abaseMontenegro, nabanye behlezi eduze komunye nomunye ngokuthula.”
EBudapest iphoyisa lacelwa ukuba liqhathanise oFakazi ababehlangene enkundleni enkulu nezixuku ezivamile zomdlalo kanobhutshuzwayo. Lamoyizela, labheka phezulu, futhi lathi: “Umehluko unjengalowo ophakathi kwezulu nomhlaba.”
“Usho ukuthini?”
“Nokho,” liphendula, “ake ubheke nje. Akekho obhemayo, azikho izibi nomaphi, futhi labantu banesimilo. Benza lokho obacela ukuba bakwenze.”
EKiev, inhlokodolobha yaseUkraine, abangu-14 654 bahlangana eDynamo Stadium, njengoba abambalwa babo bengase babonwe esembozweni salomagazini. UFakazi lapho wabuza omunye wokaputeni bamaphoyisa ukuthi amadoda akhe ayeye asebenza ngokuzikhandla yini phakathi nomhlangano. “Cha, ngesikhathi esilandelayo siyonithumelela amaphoyisa amabili kuphela.”
“Kungani niyothumela amabili?” ebuzwa.
“Uma elinye lilala,” ephendula ngokuntela, “elinye lingaligada.”
Umphakathi Wamangala
IPesti Hírlap, iphephandaba laseBudapest, yabika: “Abangaphezu kuka-40 000 bachitha lempelasonto eNépstadion. Akukho sicucu sephepha, namvuthuluka yesinkwa, noma isinqamu sikagwayi okwakusele.” IFehérvár Hírlap, elinye iphephandaba ledolobha, yathi: “Labo abadukela eNépstadion ngengozi phakathi kukaJuly 26 no-28 ngokuqinisekile babemangele ngenjabulo. . . . Babengabona isibonelo abangavamanga ukusibona sokuziphatha nendlela yokuphila kobuKristu.”
Ngempela-sonto iziwuhlula zemvula zasibekela iBudapest; kwana engaphezu kwamamilimitha angu-50. Kodwa ayizange ibanqande oFakazi. “Kumangalisa ngempela! Kuyaxaka!” iphoyisa lezwakala lisho kanjalo. “Babelokhu befiké njalo . . . Akukho okungabanqanda.” NgoMsombuluko elinye iphephandaba lalinesihloko esikhulu esithi “Umthandazo Emvuleni” futhi lacaphuna izihambeli: “Imvula imane nje iyasigeza, ayisikhukhuli!”
ELvov, lapho abangu-17 531 babehlangane eCentral Ukraine Stadium, isikhulu samaphoyisa satshela omunye woFakazi: “Kunoma isiphi isenzakalo somphakathi esinabantu abaningi kangaka, besingadinga amakhulukhulu amaphoyisa. Emhlanganweni wenu sibe nayishumi, futhi ebengadingekile ngempela.”
Khona-ke, sembula indlela umhlangano owawusihlabe umxhwele ngayo, lesikhulu saphawula: “Niphuma phambili ekufundiseni abanye okuhle, nikhuluma ngoNkulunkulu, futhi anihlanganyeli ebudloveni. Besixoxa ngokuthi kungani sasinishushisa, futhi siphethe ngokuthi sasinganilalelanga futhi singazi lutho ngani.”
Ngemva kokuhambela kwayo emhlanganweni eUsolye-Sibirskoye, eSiberia, intatheli yephephandaba laseSoviet iLeninskiy Put’, yabhala: “Kwakumangaza ukubona isimilo, kanye nekhono lokuqonda nokusabela ezidingweni zabanye, okwaboniswa izinceku zikaJehova komunye nomunye. Angisoze ngawakhohlwa amazwi ashiwo emhlanganweni athi: ‘Ungebi! Ungaqambi amanga! Ungaphuzi [ngokweqile]! Khuthala! Siza umakhelwane wakho!’ Phela, lezi yizimiso bonke abantu okufanele balwele ukuzifinyelela. Kodwa ngokuvamile siyazikhohlwa.
“Okunye okwakuhlaba umxhwele kwakuyisimo sobuzalwane esasiboniswa kwabanye, ukuzimisela ukusiza. Omunye wesifazane wasinikeza iphephandaba ukuze singahlali ebhentshini elinezintuli. Lapho liqala ukuna, owesifazane osemusha owayehlezi eduze kwami wanginika isambulela sakhe ngokumoyizela, futhi eduzane enye indoda ngokoqobo yadonsela umfanyana owayemanzi té ngaphansi kwesambulela sayo.
“Sona kanye isimo emhlanganweni ngandlela-thile senza umuntu waba ngcono kakhulu, waphucuka ngokwengeziwe, waba muhle ngokwengeziwe. Kwakungenakwenzeka ukungasabeli ngokumoyizela emseni owawuboniswa abantu ongabazi. . . . Sahamba enkundleni sizizwa sihlanjululiwe, sizwa ukuthi sasihlangene nokuthile okuhle.”
Emhlanganweni wesigodi owawuseKiev, abangaphezu kuka-2 000 babevela eMoscow nabangu-4 500 babevela eCaucasus. Umnyango wezokwaziswa wamiswa esikhumulweni sezindiza, futhi kwabekwa izincwadi zeBhayibheli. Abaningi babebuza imibuzo eyayiphendulwa ngomusa. Ngolunye usuku kusihlwa enye indoda yasondela yathi: “Sekuyisikhathi eside nginiphawula. Ngimangele ngomusa enikhuluma ngawo nabantu ngoMbuso. Sizani ningivumele ukuba nginiphe lezimbali njengesipho ngenxa yomsebenzi wenu omuhle ngokukhethekile.”
Phakathi nobhapathizo emhlanganweni wesigodi eUsolye-Sibirskoye, enye intatheli yahlabeka umxhwele lapho ibona abantu abaningi baseRussia banga futhi behalalisela umuntu owayesanda kubhapathizwa owayevela kubantu baseBuryat. Nakuba iSiberia cishe ingenalo ubandlululo lobuzwe, ubungane bangempela phakathi kwabantu baseRussia nabantu abanjalo abuvamile. “Nikwaze kanjani ukunqoba lemingcele engokobuzwe?” kubuza lentatheli.
“Ngokusebenzisa isimiso seBhayibheli esithi ‘wothanda umakhelwane wakho njengalokhu uzithanda wena,’” itshelwa.
Ubuzalwane Bezizwe Zonke
Okwakufudumeza inhliziyo kakhulu ikakhulukazi kulemihlangano emithathu yezizwe zonke kwakuwubudlelwane bothando phakathi kwezihambeli ezazivela kuwo wonke umhlaba. IBudapest yayinezihambeli ezazivela emazweni angu-35, eziningi zazo zivela ePoland naseJalimane, kodwa abameleli abambalwa nabo bafika bevela kwezinye izindawo eziningi, kuhlanganise nabacishe babe ngu-500 ababevela eSoviet Union. IPrague yayinezihambeli ezazivela emazweni angu-39, kuhlanganise nezingaphezu kuka-26 000 ezazivela eJalimane, ezicishe zibe ngu-13 000 ezazivela ePoland, nezingaphezu kuka-900 ezazivela eItaly, ezingu-570 ezazivela eNetherlands, ezingu-746 ezazivela eSweden, nezingu-743 ezazivela eJapane. IZagreb yayinezihambeli ezazivela emazweni angu-15, naphezu kosongo lwempi yangaphakathi.
Emhlanganweni wezizwe zonke ngamunye, kwakumiswa izindawo zesikhulumi ezintathu enkundleni zibheke ezingxenyeni ezihlukahlukene zenkundla. Kulezindawo zesikhulumi sonke isimiso sasinikezwa kanye kanye ngezilimi ezintathu. EBudapest izilimi ezazisetshenziswa kwakuyisiHungary, isiPolish, nesiJalimane; ePrague kwakuyisiCzech nesiSlovak, isiPolish, nesiJalimane; futhi eZagreb kwakuyisiCroatia nesiSerbia, isiSlovenia, nesiNtaliyane. Phakathi nedrama yeBhayibheli efundisayo, eyayisekelwe kokuhlangenwe nakho kukaEzra wasendulo nabangane bakhe, izihambeli ezikhuluma izilimi ezihlukahlukene zazingabukela lomdlalo kunoma iyiphi ingxenye yezilimi ezintathu ezazikhetha ukuhlala kuyo.
Eziningi zezinkulumo zomhlangano eziyinhloko zazinikezwa ngesiNgisi amalungu ahlukahlukene eNdikimba Ebusayo yoFakazi BakaJehova ngesikhathi esisodwa. Ngalinye lalikhuluma kweyodwa yezindawo zesikhulumi ezintathu. Yebo, lezinkulumo zazihunyushwa ngokwenzuzo yamaqembu amathathu ezilimi eziyinhloko, futhi eBudapest nasePrague, zahunyushelwa nakwezinye izilimi eziningi.
Abahumushi abahlukahlukene balezingxenye zezilimi babemi enkundleni maqondana neqembu lolimi lwabo. Izikhulisa-zwi ezazibhekiswe kuleyongxenye yolimi ekhethekile zakwenza kwaba nokwenzeka ukuba umuntu ezwe ulimi lwakhe ngaphandle kokuphazanyiswa ngokungadingekile ukuhumusha okwakwenziwa kwezinye izilimi kwezinye izingxenye. Ngokwesibonelo, eBudapest izinkulumo ezanikezwa amalungu eNdikimba Ebusayo zahunyushelwa kusiDashi, isiFinnish, isiFulentshi, isiGreki, isiJapane, isiNorway, isiNtaliyane, isiPanishi, nangolimi lwaseSweden, ngaphandle kwezilimi eziyinhloko zesiHungary, isiPolish, nesiJalimane.
Emhlanganweni ngamunye wezizwe zonke, inkulumo yokugcina eshukumisayo yanikezwa amalungu amathathu eNdikimba Ebusayo. Inselele yawo yayiwukuqeda ngesikhathi esifanayo ngangokunokwenzeka. Ngemva kwalokho, amazwi ezizwe eziningi ahlanganyela engomeni, futhi ekugcineni izinhliziyo zahlangana emthandazweni wentshiseko wokubonga kuJehova uNkulunkulu ngokubusisa lemihlangano emangalisayo ngempumelelo.
Lapho kushiwo u“Amen!” wokuphetha, akekho owayefuna ukuhamba. Izinyembezi zehla ezinkulungwaneni zobuso. Ngapha nangapha kulezinkundla ezinkulu, amaduku, izikhafu, nezambulela kwakuvayizeliswa njengophawu lokuvalelisa abangane abathandekayo ababegcine ubuqotho kuNkulunkulu lapho bebhekene nokuvinjelwa nokuboshwa iminyaka eminingi. EPrague abangane abaningi bahlala isikhathi esingaphezu kwehora, behlabelela futhi bejabulela ubudlelwane.
Impumelelo emangalisayo yalemihlangano ayizange yenzeke ngaphandle komzamo. Ngokoqobo amakhulu ezinkulungwane zamahora asetshenziswa oFakazi BakaJehova bengenzi nje kuphela amalungiselelo okuba khona kodwa futhi benakekela amakhulu emininigwane edingekile okwenza lemihlangano ibe impumelelo.
Ukulungiselela Izindawo
IStrahov Stadium eyisithabathaba ePrague, eyayisineminyaka ingasetshenziselwa imibuthano emikhulu, yayikudinga ngempela ukulungiswa. Kwakunezihlalo ezisebenzisekayo ezicishe zibe ngu-55 000 kuphela, cishe zingenele ukuba zingasingatha inani elilindelekile lomhlangano wesigodi omkhulu kakhulu wasehlobo eMpumalanga Yurophu. Ngakho kwatholakala umshini ophukile wokulolonga amapulangwe, walungiswa, futhi wasetshenziswa ekwakheni amakhilomitha angu-18 amabhentshi okuhlala abantu abengeziwe abacishe babe ngu-30 000.
Yebo, ukwenza nokufaka amabhentshi, kwakumane nje kuyingxenye yomsebenzi. Ukupenda, ukuhlanza, nokusiphula ukhula, nokulungisa okuvamile nakho kwakudingeka. Ekugcineni, inkundla yayihlotshiswe ngezitsha ezingu-8 300 ezinezimbali ezingu-33 200 nezihlahla ezingu-1 357 ezinamaconifer. Ngezinye izikhathi kwakuba khona izisebenzi eziyinkulungwane. Sekukonke izisebenzi zokuzithandela ezazivela emabandleni angu-260 oFakazi BakaJehova zasebenza amahora angaphezu kuka-66 000.
Umsebenzi ofanayo wenziwa ukuze kulungiswe izinkundla eBudapest, eZagreb, nakwamanye amadolobha. Izisebenzi zokuzithandela ezicishe zibe ngu-4 000 zachitha amahora angaphezu kuka-40 000 zisebenza ezinkundleni zomhlangano eLvov. Umsebenzi wazo wabhekwa njengozokhokhela intela yalenkundla. Wonke amabhentshi enkundleni alungiswa futhi apendwa, futhi zonke izindlu zangasese zahlanzwa futhi zalungiswa. Futhi, kwakhiwa indlu yezitini engamamitha angu-33 ubude eyayinezinye izindlu zangasese. Ngokufanayo, eKhimik Stadium eUsolye-Sibirskoye, kwakhiwa ezinye izindlu zangasese ezingu-52 ukuze zisetshenziswe phakathi nomhlangano.
Unjiniyela oyinhloko enkundleni yaseLvov wathi: “Kukho konke ukuphila kwami, angikaze ngibone abantu abayinqaba kangaka. Nisebenza njengomkhaya owodwa omkhulu. Angikuqondi, kodwa ukusebenza nani akuve kumnandi.” Abaphathi benkundla balungiselela isitatimende ababebonga kuso oFakazi “ngokuzinikela kwabo emsebenzini abawenzile nangezimfanelo zabo ezinhle nomuzwa womthwalo wemfanelo.” Lesitatimende saphetha: “Sinifisela umhlangano ophumelelayo eLvov.”
EKiev iphansi lekamelo lapho kwakuzomiswa khona indawo yokudla lalidinga ukulungiswa. Umsebenzi waqedwa ngezinsuku ezimbili. Izisebenzi ezimbili zasenkundleni zafika zizobona “lesimangaliso,” esinye sithi kwesinye: “Ngezinsuku ezimbili baqede umsebenzi othatha abantu bethu ingxenye yonyaka ukuba bawuqede.” Umongameli weqembu lezemidlalo yasemanzini watshela umbonisi womhlangano: “Niguqule inkundla kakhulu kangangokuthi asisaboni ukuthi yiyo.”
Izisebenzi zasenkundleni eKiev zabhala ngokwazisa: “Sivuke amadlingozi ngokusuka enhliziyweni ngokuhleleka komhlangano woFakazi BakaJehova. . . . Njengoba izihosha zihlangana ukuze zakhe umfula odla izindwani, kanjalo umfula woFakazi BakaJehova kusukela kwabancane kuya kwabakhulu ugeleza ndawonye uya edilini labo. Lokhu kufanele ukuphawulwa. Siyaqala ngqá ukukubona. Siyanibonga ngokuthi nisifundise okuthile ngesibonelo senu.”
Ukunakekela Izihambeli
Omunye wemisebenzi emikhulu kakhulu kwakuwukulungiselela izindawo zokulala zezinkulungwane zezihambeli. OFakazi basendaweni bavulela izihambeli amakhaya abo. Emhlanganweni wasePrague, oFakazi baseCzechoslovakia balalisa abangu-6 280 ababevela ePoland emakhaya abo siqu. EBudapest, izihambeli ezingu-2 203 zahlala emakhaya abantu. Futhi oFakazi abangu-278 eKiev bangenisa izivakashi ezingu-750 kuya ku-800.
Ngaphezu kwalokho, izikole eziningi nezindawo zokuvivinya umzimba eBudapest nasePrague zasebenza njengezindawo zokuhlala. Kwasetshenziswa izikole ezingaphezu kuka-40 eBudapest ukuze kuhlaliswe abantu abangu-7 930. EPrague, abangu-12 530 balala ezikoleni nasezindaweni zokuvivinya umzimba. Kwatholakala izinkulungwane zomatilasi abafuthwayo ukuze basetshenziswe kulezindawo. Abangaphezu kuka-29 000 ababa semhlanganweni wasePrague bahlala ezindaweni zokulala zabafundi nasemahositela entsha, futhi izinkulungwane ezengeziwe zahlaliswa emahhotela avamile.
Kweminye imihlangano, kwenziwa amalungiselelo okuba izihambeli zilale ezitimeleni ezazifike ngazo. OFakazi abacishe babe izinkulungwane ezimbili ababevela eZakarpatskaya Oblast basebenzisa izinqola zesitimela njengezindawo zabo zokulala eKiev. Abanye ababevela eCaucasus beya eKiev benza okufanayo. Ngokufanayo, oFakazi baseLithuania ababeya emhlanganweni waseTallinn, e-Estonia, balala ezitimeleni ababefike ngazo.
Ngisho nangemva kokuba zifike, izihambeli zanakekelwa ngezindlela eziningi abangenisi bazo abacabangelayo. Ngokwesibonelo, ePrague kwenziwa amalungiselelo okusebenzisa amabhasi angu-40 ukuze kuqiniswe umzila ngokuvamile ohanjwa ibhasi elilodwa kuphela. Ngaphezu kwalokho, ngenxa yokukhokha kusengaphambili, izihambeli zazikwazi ukuhamba mahhala ezintweni zokuhamba zomphakathi ziye emhlanganweni ekuseni futhi ziye ekhaya kusihlwa ngokumane nje zibonise amabheji azo omhlangano. ESoviet Union, amabhasi angu-11 ayeya emhlanganweni eUsolye-Sibirskoye esuka eAngarsk eseduze aphelezelwa ngomusa izimoto ezimbili zamaphoyisa omgwaqo, enye phambili nenye ngemuva!
Imizamo Yokuba Khona
Ngokukhethekile izihambeli zemihlangano ethile yaseSoviet zahamba amabanga amade ngezindleko ezinkulu zazo siqu. Ezinye zalondoloza imali wonke unyaka ukuze zikhokhele uhambo lwazo. Izihambeli zazisuka kude lé ethekwini laseVladivostok elisoLwandlekazini iPacific, zihamba amakhilomitha angaphezu kuka-3 200 ziya eUsolye-Sibirskoye. Ezinye izihambeli eziyishumi elinambili zazivela esiqhingini saseSakhalin oLwandlekazini iPacific enyakatho yeJapane. Esinye sasingosemusha oneminyaka engu-20 owayehamba nabanye abasebasha abathathu abaqhubela izifundo zeBhayibheli.
Umshayeli webhasi waseSayanogorsk, owayehlose ukubhapathizwa eUsolye, waphikelela ecela umqashi wakhe izinsuku ezimbalwa zokungasebenzi ukuze abe semhlanganweni, kodwa umqashi wakhe wayengazimisele ukumvumela ukuba ahambe. Ngakho lendoda yaya edolobheni laseAbakan futhi yathola ikhophi yencwadi yaseSoviet yangoMarch 27 odlule eqaphela ngokomthetho oFakazi BakaJehova njengenhlangano engokwenkolo. Naphezu kokubona lencwadi, umqashi wayo waqhubeka engayinikezi imvume yokuhamba. Ekuseni ngosuku lohambo lwayo, ngemva komthandazo oqotho, lendoda yacela futhi, kwathi ekugcineni yayithola imvume yokuhamba.
Ubhapathizo Nezincwadi Ezintsha
Ubhapathizo lwaluyisici esivusa amadlingozi sayo yonke lemihlangano yaseMpumalanga Yurophu. Ngesenzo esingokomfanekiso sokucwiliswa emanzini, abantu abangu-18 293 ababekulemihlangano bazibonakalisa phambi kofakazi ukuthi banikezele ukuphila kwabo ngokungagodli ekukhonzeni uJehova uNkulunkulu. Omunye osemusha owabhapathizwa ePrague, owayesanda kuthola isithembiso somsebenzi okhangayo, waphawula: “Ngazizwa sengathi kufanele ngikhethe phakathi kukankulunkulu onguziqu-zintathu owakhiwa idollar laseU.S., imark yaseJalimane, neshilling yaseAustria kolunye uhlangothi noJehova kolunye. Nganquma ukukhetha uJehova futhi ngasenqaba lesithembiso.”
Ubhapathizo eTallinn lwenzelwa echibini elingaphandle eduze koLwandle iBaltic lapho inqaba endala eyake yasetshenziswa njengejele ingabonakala khona emuva lé. Lapha kwagcinwa oFakazi abaningi base-Estonia ngaphambi kokuba bathunyelwe emakamu okusebenza eRussia ekuqaleni kwawo-1950. Yeka ukuthi kwakuvusa amadlingozi kanjani, ikakhulukazi ngabanjalo asebekhulile, ukubona abasanda kukholwa abangu-447 bebonakalisa ukuzinikezela kwabo kuJehova emkhosini wasobala!
Esinye isici esithakazelisayo salemihlangano kwakuwukukhululwa kwezincwadi ezintsha. Abangane baseLithuania eTallinn bagxuma ngokoqobo ezihlalweni zabo futhi bakhala lapho betshelwa ukuthi incwajana ethi “Bheka, Ngenza Konke Kube-Kusha” yayisitholakala manje ngolimi lwabo. Ngokufanayo, okwakuvelele emihlanganweni yaseRomania kwakuwukukhululwa ngesiRomania kwencwadi ethi IsAmbulo—Umvuthwandaba Waso Omkhulu Useduze!, futhi kumaCzech namaSlovak asePrague, kwakuwukwamukelwa kweNew World Translation of the Holy Scriptures ngezilimi zabo.
Nokho, kweminingi yalemihlangano, okwakhululwa kwaletha injabulo enkulu kakhulu kwakuyincwadi entsha ethi Umuntu Omkhulu Kunabo Bonke Owake Waphila. Kakade sekunyatheliswe amakhophi ayizigidi eziyishumi ngezilimi ezingu-59.
Ukusebenzisa Inkululeko Kahle
Namuhla, izincwadi zeBhayibheli zivunyelwe eMpumalanga Yurophu, kuhlanganise naseSoviet Union. Amaloli alayishe INqabayokulinda nePhaphama! ayasuka endaweni enkulu yokunyathelisa yoFakazi BakaJehova eSelters/Taunus, eJalimane, futhi anqamule imingcele eya emazweni aseMpumalanga Yurophu. Yeka ukuthi kuhluke kanjani ezikhathini lapho, bezifaka engozini yokuboshwa, oFakazi kwakudingeka bashushumbise izincwadi kulamazwe!
Ibonisa ngoshintsho olumangalisayo, ingxoxo elandelayo yenzeka phakathi kwesikhulu sokungeniswa kwezinto kwamanye amazwe nomunye woFakazi BakaJehova cishe ngesikhathi somhlangano eTallinn:
“Uphetheni kulelobhokisi elincane?”
“Omagazini.”
“Baphi omagazini? Ingabe bangomagazini bakaNkulunkulu?”
“Oh, yebo, bayibo.”
“Omagazini bakaJehova uNkulunkulu?”
“Yebo!”
“Jaa’a, kuhle lokho. Ungaqhubeka.”
Ngemva komhlangano waseBudapest, uArpad Goncz, umongameli waseHungary, wamema uFakazi ayenaye ejele ngesikhathi sokucindezela kwamaKhomanisi. UMnu. Goncz wachitha ihora enaye futhi ngemva kwalokho wacela ayevalelwe naye adlulisele izilokotho zakhe ezinhle koFakazi BakaJehova. Abathandi benkululeko yokwesaba uNkulunkulu kuyo yonke indawo babonga ngempela ngokuthi izikhulu zamanje, njengoMnu. Goncz, manje seziyayivumela inkululeko yokukhulekela eMpumalanga Yurophu.
Ibonisa ukuthi abantu bakaJehova bayisebenzisa kahle inkululeko yabo, iNew York Times kuloSeptember yachaza isenzakalo eSt. Petersburg (eyayiyiLeningrad), ichaza: “Amanothi anensayo engoma kaGershwin ethi ‘Summertime’ awela uMfula iNeva . . . Amanothi antanta adlule kwabethamela ilanga abacebile, izinsana ezixosha izinja, abathengisi abathengisa amabalazwe eSt. Petersburg endala noFakazi BakaJehova abafuna abangabaguqula.”
Yebo, oFakazi bayisebenzisa ngentshiseko inkululeko yabo ukuze bashumayele izindaba ezinhle! Ingabe ungathanda ukuzwa okwengeziwe ngesigijimi sabo? Iphephandaba laseSoviet iVostochno-Sibirskaya Pravda lachaza: “Ukwaziswa okuningiliziwe ngemisebenzi yabo kungatholakala ezindaweni zemfundo engokweBhayibheli yoFakazi BakaJehova kunoma iliphi idolobha.” Kungakhathaliseki ukuthi uhlalaphi ezweni, ungangabazi ukubuza.
[Ishadi ekhasini 13]
IMIHLANGANO EMPUMALANGA YUROPHU NASESOVIET UNION
Izwe
Inani Eliphakeme Lababekhona
Ababhapathizwa
ECzechoslovakia (ePrague) 74 587 2 337
EHungary (eBudapest) 40 601 1 134
EPoland (emadolobheni angu-12) 131 554 4 250
ERomania (emadolobheni angu-8) 34 808 2 260
ESoviet Union (emadolobheni angu-7) 74 252 7 820
EYugoslavia (eZagreb) 14 684 492
Ingqikithi yemihlangano engu-30: 370 486 18 293
[Izithombe ekhasini 8, 9]
Kwesokudla: Ukuhumushela amaqembu ezilimi ezihlukahlukene ePrague
Ngezansi: IStrahov Stadium ePrague igcwele izihambeli ezingaphezu kuka-74 000
[Izithombe ekhasini 10]
Ngenhla: Umhlangano eTallinn, e-Estonia
Umhlangano waseBudapest, lapho, lina noma libalele, izihambeli ezingu-40 000 zajabulela khona isimiso
[Izithombe ekhasini 15]
Ngenhla: Ezinye izindlu zangasese ezakhelwe ukusetshenziswa emhlanganweni waseUsolye-Sibirskoye, eSiberia
Ukupenda inkundla nokwenza izihlalo ezengeziwe ePrague
[Izithombe ekhasini 16]
Idrama yeBhayibheli nobhapathizo eZagreb
[Izithombe ekhasini 17]
Ngenhla: Ukunikezelwa kweHholo LoMbuso lokuqala elakhiwa oFakazi eHungary ngoJune 1991
Phakathi nendawo: Abangaphezu kuka-20 000 balala ezikoleni nesezindaweni zokuvivinya umzimba eBudapest nasePrague
Ngezansi: Ukusakazwa kwencwadi ethi “Umuntu Omkhulu Kunabo Bonke Owake Waphila” eUsolye-Sibirskoye, eSiberia