IQuebec Ibonisa Inhlonipho Ngenkululeko
UMSAKAZI eMontreal eQuebec, muva nje uphawule ezindabeni zakusihlwa ukuthi oFakazi BakaJehova sekuyisikhathi eside behlushwa kulesosifundazwe saseCanada “ngoba bahlukile.” Wagxila ekuhlaseleni kwamuva okwenziwa ngomsakazo nguYvon Picotte, ungqongqoshe wezindaba zikamasipala. Umsakazi wabika ukuthi uPicotte “wabiza oFakazi ngokuthi ‘izimbungulu eziphila ngegazi lomphakathi’ labo, ezimweni eziningi, abaphila ngokuthembela kwezenhlala-kahle. Ngaleyondlela, uPicotte akethukanga oFakazi BakaJehova kuphela kodwa nanoma ubani onesidingo sokuthembela osizweni lwezenhlalo.”
Umsakazi waphikisa ukugxeka kukaPicotte ngokuphawula ukuthi ingxenye yoFakazi kwezenhlala-kahle ayiphakeme ukwedlula eyanoma iyiphi inkolo. “Abakufanelekele ukubizwa ngokuthi ‘izimbungulu eziphila ngegazi labanye’ ukwedlula uMnu. Picotte,” esho. “Empeleni, ake ucabange nje ngakho, kunalabo abaphikisa ngokuthi izimbungulu zangempela eziphila ngegazi labanye emphakathini wethu abezombangazwe.”
“Okwangithinta ngokugxeka kukaPicotte okujivazayo,” kuqhubeka umsakazi, “kwakuyisici sakho ‘sokubuyisa izinto zesikhathi esedlule’ noma ‘ukungazichazi ngendlela eyiyo.’ Emuva ekupheleni kwawo-1940, uMaurice Duplessis, undunankulu ongumashiqela waseQuebec nomvikeli ozibekile wokholo lwamaRoma Katolika, wafaka ejele oFakazi BakaJehova abangaba ngu-400, hhayi ngenxa yokungqongqoza eminyango—uPicotte amelana nakho ngokuqinile—kodwa ngokumangalelwa ‘ngokuvukela umbuso.’ Emthethweni ngokukaDuplessis, ukusakaza amapheshana enkolo kwakuyisenzo sokuvukela umbuso! Izindawo zokuhlangana zoFakazi zahluthulelwa ngengidi futhi babhekana nokushushiswa okunonya ngamaphoyisa esifundazwe.”
Isimemezelo sikaDuplessis sango-1946 “seMpi Engenalo Uzwela KoFakazi BakaJehova” naso sahlaselwa abacosheli bezindaba. Izihloko zezindaba zamemezela: “INkathi Yobumnyama Iyabuya EQuebec,” “Ukubuya Kokuthethwa Kwamacala Ezihlubuki,” nesithi “Iphunga Elibi LobuFasi!”
Manje, eminyakeni engu-50 kamuva, lomsakazi waseMontreal waphetha: “Nakuba sisenabezombangazwe benkathi yeNeanderthal abambalwa, izinkulumo zabo ezijivazayo ngeke zisabekezelelwa. Empeleni, uPicotte, owayeyotuswa nguDuplessis, uyalwe uMnu. Bourassa [undunankulu ophethe manje waseQuebec] ukuba axolise ngezinkulumo zakhe ePhalamende namhlanje. Balweli benkululeko yesizwe yimani isibindi. Sekuyisikhathi eside ukusuka lapho abantu kulesifundazwe babeboshelwa ukuthuthukisa ukholo lwabo.”