Lokho Okwaziwa Umntwana Ongakazalwa

UKUHLOLA kwamuva kuqinisekisa ukuthi umbungu ongakazalwa uthintwa yizinto eziningi kakhulu ngaphezu kokudla okudliwa unina, izidakamizwa angase azisebenzise, noma ukuthi uyabhema yini noma akabhemi. Umbungu futhi uzwa lokho unina akulalelayo futhi ngokusobala uyathinteka.

Ukuze kuboniswe lokhu: “Umqondisi womculo weHamilton Philharmonic Orchestra eOntario, eCanada, wabika ukuthi lapho esemncane, izinhlobonhlobo zamakhophi omculo ayewuprakthiza zazibonakala zijwayeleke kakhulu, nakuba ayengakaze awabone ngaphambili. Ngokuvamile kwakuyingxenye yecello eyayibonakala ijwayeleke ngokuyisimanga. Watshela unina, umdlali wecello okufundele, ngalokhu. Lapho, ekumbuzeni kukanina, emtshela amagama omculo ayewuprakthiza, imfihlakalo yaxazululwa. Ngesikhathi unina emkhulelwe, wachaza, lezi kwakuyizo kanye izingoma ayezidlala!

Manje, ngokomlobeli wephephandaba uErma Bombeck, leliphephabhuku lezokwelapha laseBrithani libika ngokuphathelene nenkinga iphephabhuku eliyibiza ngokuthi “ukuluthwa kombungu imidlalo yasemoyeni.” Abantwana abangakazalwa baluthwa imidlalo ewuchungechunge yeTV elalelwa omama babo. UBombeck uyaphawula: “Ngifisa sengathi ngabe ngangikwazile lokhu ngesikhathi ngisakhulelwe abantwana bami, ngangiyohlala ngithe njo ‘kwabakwaWaltons,’” uhlelo oluhlanzekile lwethelevishini lweminyaka ethile edlule. Uyenezela: “Akumangalisi ukuthi sinabantwana abafuna ukuqhunjuswa izindlebe beneminyaka emi-2, baphole nowobulili obehlukile beneminyaka eyi-9 futhi bazitholele indawo yokuhlala beneminyaka eyi-13.”