Ingabe Abafa EkuQothulweni Kwesizwe Bayobuya?
INGABE likhona ithemba ngezigidi zezisulu ezafa ekuQothulweni Kwesizwe? Ingabe kungalindelwa ukuthi uNkulunkulu angathatha isinyathelo esiphakeme sokulunga ngenxa yalezisulu zobuNazi?
ImiBhalo yesiHeberu inikeza ithemba elasekela abaprofethi nezinceku ezithembekile zikaNkulunkulu ezinkulungwaneni zeminyaka edlule. Ingabe lalisekelwe emcabangweni wamaGreki asendulo womphefumulo ongafi owawuyosinda lapho umuntu efa? Lutho neze, njengoba imiBhalo nezimfundiso zesiHeberu zandulela ifilosofi yamaGreki ngamakhulu amaningi eminyaka.
Umphefumulo Womuntu Uyafa
Ukulandisa kwesiHeberu kuGenesise kusitshela ngokudalwa komuntu wokuqala: “INkosi uNkulunkulu yakha umuntu ngothuli lomhlabathi. Yaphefumlela emakhaleni akhe umoya wokuphila, futhi umuntu waba umuntu ophilayo [ngesiHeberu, leneʹphesh].” (Genesise 2:7, Tanakh) Inguqulo yeNhlangano Yezincwadi ZesiJuda ka-1917 ithi “umphefumulo” endaweni yelithi leneʹphesh. Ngakho-ke, umphefumulo, noma ineʹphesh, umuntu, isidalwa, kungakhathaliseki ukuthi isilwane noma umuntu.
Akukho ndawo emiBhalweni yesiHeberu lapho ukungafi kuhlanganiswa khona neneʹphesh,. Eqinisweni, igama elithi “ukungafi” aliveli nokuvela emiBhalweni yesiHeberu. Kunalokho, iBhayibheli lesiHeberu libonisa ukuthi ineʹphesh, umuntu, umphefumulo ophilayo. (Hezekeli 18:4, 20) Ngakho-ke, ukufa kuwukuphela, okungenani kwesikhashana, komuntu njengomphefumulo ophilayo. Kuyisimo sokungenzi lutho ngokuphelele, njengobuthongo obukhulu, njengoba umhubi uDavide akubeka: “Ngibheke, ungiphendule, O Nkosi, Nkulunkulu wami! Buyisela ukukhanya emehlweni ami, funa ngilale ubuthongo bokufa.”—IHubo 13:4, Tanakh.
Ilandela umqondo ofanayo olula, imiBhalo yesiHeberu iyasitshela: “Abafileyo abazilutho; abasenawo umvuzo, ngoba ngisho nenkumbulo yabo isifile. Noma yini esemandleni akho ukuyenza, yenze ngamandla akho wonke. Ngoba akukho kusebenza, nakucabanga, nakufunda, nakuhlakanipha eSheoli [ithuna elivamile lesintu], lapho uya khona.” (UmShumayeli 9:5, 10, Tanakh) Lokhu kuyavumelana nomuzwa kaJobe phakathi nokuhlupheka: “Kungani ngingafanga ngizalwa? . . . Ngoba manje ngabe ngizilalele, ngisebuthongweni futhi ngiziphumulele.” (Jobe 3:11, 13, Tanakh) Ngokuqinisekile, uJobe wayengacabangi ‘ngokuphila ngokubonakalayo’ njengomphefumulo ongafi ngemva kokufa, njengoba kugomela “Inkulumo Yezimiso Zesiko LobuJuda.”
Khona-ke, ingabe lokho kusho ukuthi ukufa kusho ukulibaleka ngokuphelele? Bambalwa kakhulu abantu namuhla abangakhumbula amagama okhokho babo ababephila ezizukulwaneni eziyisihlanu noma eziyishumi ezidlule, kodwa kuthiwani ngoNkulunkulu? Ingabe uyabakhumbula? Ingabe uyobakhumbula? Ingabe uyozikhumbula izigidi zezisulu ezashushiswa amaNazi? Izigidi eziye zafa ezimpini zokungabi nangqondo? Umprofethi uDaniyeli wayekholelwa ukuthi uNkulunkulu angabakhumbula abafile. Isiprofetho sakhe sabonisa ukuthi kwakuyoba khona ukuvuka kwabafileyo, ngoba wathi: “Abaningi balabo abalele othulini lomhlabathi bayovuka, abanye bavukele ekuphileni okuphakade, abanye ehlazweni, ekunengweni kwaphakade.”—Daniyeli 12:2, Tanakh.
Ukuvukela ekuphileni kwasemhlabeni kwesikhathi esizayo kwakuyithemba eliqinisekile labaprofethi abathembekile namakhosi akwaIsrayeli wasendulo. Babengenawo umqondo wokuzulazula njengemiphefumulo engafi engabonakali esikhathini esizayo. Lelothemba elifanayo lokuvuselwa ekuphileni okuphelele emhlabeni lisasebenza nanamuhla. Sikwazi kanjani lokho?
Ithemba Ngezisulu ZokuQothulwa Kwesizwe
Eminyakeni engaphezu kwe-1 900, umfundisi ongumJuda wanikeza ithemba elinjalo lapho ethi: “Ningamangali ngalokho, ngokuba isikhathi siyeza, lapho bonke abasemathuneni [okukhunjulwa,] beyakulizwa izwi layo, abenze ukulunga baphumele ekuvukeni kokuphila, abenze okubi ekuvukeni kokulahlwa.” (Johane 5:28, 29, qhathanisa neNW.) Amazwi athi ‘amathuna okukhunjulwa’ abonisa ukuthi labo abakuwo bagcinwe enkumbulweni kaNkulunkulu kuze kube usuku lokuvuka kwabo nokubuyiselwa ekuphileni emhlabeni.
Ngakho-ke, ngalomqondo “Inkulumo Yezimiso” eyakhishwa iSiko lobuJuda eUnited States iyiqiniso: “Umqondo weolam ha-ba (isikhathi esizayo) unganikeza ithemba lokuthi ngeke sishiywe emathuneni, nokuthi ngeke silibaleke.” Umusa kaNkulunkulu wothando nokulunga usho ukuthi labo abavusiwe bayoba nethuba, ngokulalela uNkulunkulu, lokukhetha ukuphila okuphakade ngaphansi kokubusa koMbuso kaJesu Kristu, uMesiya.
Ngakho, konke lokhu kuzithinta kanjani izigidi zamaJuda, amaSlav, nezinye izisulu zokuQothulwa Kwesizwe? Basenkumbulweni kaNkulunkulu, belindele ukuvuswa, lapho beyonikezwa khona ukukhetha—ukulalela uNkulunkulu benombono wokuphila noma ukungamlaleli benombono wokwahlulelwa okungekuhle. Siyethemba ukuthi izigidi zabo ziyokwenza ukukhetha okuqondile!
Kungakhathaliseki ukuthi ungumJuda noma awusiye, uma uthanda ukwazi okwengeziwe ngalelithemba labafileyo, thintana nebandla loFakazi BakaJehova endaweni yakini, noma bhalela abashicileli balomagazini ukuze uzitholele ikhophi yencwadi enamakhasi angama-256 enemifanekiso, ethi Ungaphila Phakade EPharadesi Emhlabeni ngomnikelo kaR3 encane noma uR6 enkulu.
[Isithombe ekhasini 20]
IBhayibheli lithembisa ukuthi kuyoba novuko nokuthi “izinto zakuqala aziyikukhunjulwa, zingene enhliziyweni.”—Isaya 65:17