Wafinyelela Umgomo Wakhe
Intsha eningi namuhla ayinanjongo ekuphileni. Ngokuphambene, intombazane eyeve eminyakeni eyishumi nambili eItaly yazibekela umgomo futhi yawufinyelela, futhi siyajabula ngokuhlanganyela okuhlangenwe nakho kwayo nabafundi bethu.
ESIKHATHINI esingangenyanga ngizobe ngineminyaka eyi-14 ubudala. Yimi engimdala kubafowethu abane nodadewethu. Umkhaya wakithi uhlukene ngokomoya, ngoba ubaba akayena omunye woFakazi BakaJehova.
Umama waba uFakazi lapho nginezinyanga ezimbalwa kuphela ubudala. Zisuka nje, wawukhumbula umthwalo wakhe wemfanelo wokukhulisa thina bantwana “ngokuyala nangokuqondisa kweNkosi.” (Efesu 6:4; IzAga 22:6) Eqinisweni, uma ngisakhumbula kahle, wayelitadisha njalo iBhayibheli nathi, sasilungiselela imihlangano ndawonye futhi simphelezela enkonzweni yendlu ngendlu masonto onke. Futhi sasifakazela ukholo lwethu esikoleni.
Kusukela ngesikhathi sisebancane kakhulu, uMama wayezama ukugxilisa ezinhliziyweni zethu isifiso senkonzo yesikhathi esigcwele ngokusifundela okuhlangenwe nakho kwalaboFakazi ababeye baba yizinceku zesikhathi esigcwele iminyaka eminingi. Ngaphezu kwakho konke, wasibekela isibonelo. Eqinisweni, umama akazange asicele ukuba senze okuthile lokho yena ngokwakhe ayengakwenzi.
Nakuba abantu bengase babalalele ngenjabulo abantwana abafika emakhaya abo enkonzweni, ngezinye izikhathi bayabedelela abantu abadala abahamba nabo. Ngesinye isikhathi lapho ngineminyaka eyisishiyagalombili noma eyisishiyagalolunye ubudala, ngahambela amakhaya nomdala. Owesifazane wavula umnyango, futhi ngaqala intshumayelo yami. Ngendlela enokwedelela okukhulu, owesifazane wathi kumzalwane: “Niphoqa ngisho nalezingane ezingazi lutho ukuba zishumayele!” Ngaphendula ngokushesha, “Cha, Nkosikazi, ukuba kwami lapha, kungenxa yokuzithandela kwami!” Ngemva kwalokho, owesifazane engazi ukuthi uzothini, wayithatha incwadi engamhambisela yona.
Lapho ngineminyaka eyishumi, ngahlanganyela enkonzweni yesikhathi esigcwele phakathi namaholide esikole ngoJuly, nakuba ngangingakabhapathizwa. Lokhu kwakuhilela ukuzidela okuncane, njengoba kwakumelwe ngiyeke ukuyobhukuda olwandle. Nokho, angizange ngizisole ngakho, ngoba injabulo engayithola ekupheleni kwaleyonyanga yayingenakuchazwa.
Ngabhapathizwa ngoJune lapho ngineminyaka eyi-12 1/2 ubudala. Ehlobo lalowonyaka, ngahlanganyela futhi enkonzweni yesikhathi esigcwele, futhi kamuva, ngosizo lohlelo oluhle, ngakwazi futhi ukusebenzisa ngokunenzuzo amaholide kaKhisimusi. Ngenza lokhu ngenxa yokuthi ekuqaleni konyaka wesikole, ngangizibekele umgomo. Ngangenze isinqumo, futhi ngangitshele uJehova ngomthandazo, ukuthi ngangizoqeda lowonyaka wesikole ngempumelelo, ngithole isitifiketi sami seziqu sonyaka wesithathu esikoleni semfundo ephakeme, futhi ngingenele inkonzo yesikhathi esigcwele.
Kusukela ngesikhathi ngenza lesinqumo, ngangena ezinkingeni. Njengoba ngangikhaliphile ezifundweni ezithile, othisha bangicindezela ukuba ngiqhubeke nezifundo zami. Isilingo sasisikhulu kakhulu ngoba ngangisithanda isikole, kodwa ngangingawukhohliwe umgomo wami nesithembiso engangisenze kuJehova.
Lapho indaba yokuthi ngangingafuni ukuqhubeka nezifundo zami ifinyelela kothisha, ukucindezeleka kwakhula, ngisho nakuthisha owayengakaze abonise ukungithanda. Ukuze ngiphephe, ezinyangeni eziyisishiyagalolunye ngaphambili nganikeza abadala bebandla lakithi ifomu lesicelo senkonzo yesikhathi esigcwele. Ukucindezeleka esikoleni akuzange kudambe, kodwa ngalesikhathi ngangingasalaleli. Ukuzimisela kwami kwangisiza futhi ukuba nginqobe ukucindezeleka ngasohlangothini lwengifunda nabo.
Ekugcineni isikole savalwa ngoJune. Futhi ngoJuly, ngaqalisa njengesikhonzi esisizayo sesikhathi esigcwele. Kwaba khona izibusiso eziningi, kodwa ngalesosikhathi kwaphakama enye inkinga. Kwatholakala imisebenzi efektri okwakusebenza kuyo ubaba, futhi wayefuna ukuba ngiye kosebenza naye isikhathi esigcwele. Ngamane ngaxakeka nje ukuthi ngizokwenze njani, kodwa uJehova wangisiza. Ngangingakabi neminyaka eyi-14 ubudala, ngakho babengenakunginika umsebenzi.
Khona-ke ngoAugust ubaba wathi: “Ngo-October uzoza futhi usebenze nami.” Ukuba ngaya kosebenza kuleyofektri, ngangingeke ngibe nesikhathi esanele senkonzo yesikhathi esigcwele, futhi njengoba ngangizosebenza nasebusuku, ngangizophuthelwa nayimihlangano. Ngayisa indaba kuJehova ngomthandazo.
Impendulo kaJehova ayiphuzanga ukufika—cishe ngokushesha ngathola itoho! Ngakho, ngenjabulo, ngoSeptember 1, 1987, ngaqalisa inkonzo yesikhathi esigcwele evamile. Ngijabula kakhulu kangangokuthi anginakuwathola amazwi okuchaza injabulo enginayo. Nginomuzwa wokuthi uJehova useduze nami, futhi ngithandazela ukuthi aqhubeke ebusisa imizamo yami.—Inikelwe.