Ukubuka Okwezwe
Odokotela Abahlinzayo Bayesaba
Ziyimise emthumeni kodokotela abahlinzayo mayelana nokuhlinza iziguli ezitholakala zinengculaza (AIDS) UDr. W. Dudley Johnson; ongumhlinzi wenhliziyo ovelele uthi: “Okwamanje, inkambiso yethu iwukungakwenzi ukuhlinza. Sisebenza ngenqubo egxaza kakhulu igazi. Kukhona igazi yonke indawo. Kunengozi engokoqobo yezinaliti.” Inani elandayo lodokotela abahlinzayo libonakala linokwesaba okufanayo. Kokunye ukuhlola, odokotela abahlinzayo abangamaphesenti angaphezu kwama-90 abasabela bavumelana nendlela kaDr. Johnson yokuzibuyisela emuva iziguli ezinjalo. “Eqinisweni,” kuphawula umagazini INewsweek, “isifungo esidala sikaHippocrates noma uhlu lwesimanje lwemithetho yezokwelapha akudingi ukuba udokotela elaphe isiguli uma engafuni.” UDr. Johnson wavuma nokho ukuthi kuze kube manje ubengakezwa ukuthi ukhona udokotela osethathe ingculaza esigulini. “Ngifuna kube ngaleyondlela,” egomela.
Abefundisi Bayabhapathizwa
Abefundisi ababili bamaProthestani, uReinhart Weber ongumLuthela noKlaus Hoffman weBandla Elihlangene, “baphinde babhapathizwa futhi ‘ngokweBhayibheli’” eLensahn, eFederal Republic yaseJalimane, kubika uMnyango Wezindaba Zobumbano Lwezinkolo. Ubhapathizo lwezinsana, kuchaza umfundisi Weber osethole umhlalaphansi, “aluvumelani neBhayibheli.” UHoffman waze wacela ngisho nabaholi bezifunda beSonto Labavangeli “ukuba baluyeke ubhapathizo lwabantwana abasebancane kakhulu,” kuphawula lombiko. Kwaba yini ukusabela? Uye wakhishwa emsebenzini wakhe wobufundisi.
Okokuqala Ngqá NgoFakazi!
Iziphathimandla ezweni laseAfrika laseTanzania zinikeze oFakazi BakaJehova ngokokuqala ngqá imvume yokuba bahlangane ndawonye ngokukhululekile ekukhulekeleni kobuKristu. Phakathi kukaMay noJune ngonyaka odlule, baba nochungechunge lwemihlangano yesifunda emihlanu ngokuphumelelayo kulo lonke lelozwe. Inani elihlangene lababekhona kulemihlangano laliyizi-5 177, nabayi-124 ababhapathizwa—okuyinani eliphakeme kakhulu kunamanani okubhapathizwa ake abhalwa emlandweni womsebenzi woFakazi eTanzania. Ngabaningi ababekhona, lona kwakuwumhlangano wabo wokuqala. Omunye umhlangano wenzelwa ehholo elikhulu laseYunivesithi yaseDar es Salaam.
Bobabili Abalingane Bayabuzwa Ubuhlungu
Amadoda anezinkinga zomshado ashesha kakhulu ukungenwa yizifo kunalawo ajabulayo emshadweni, kusho abacwaningi uJanice Kiecolt Glaser nomyeni wakhe, uRonald Glaser, baseYunivesithi YaseOhio State. Nakuba ukuhlola kwangaphambili kuye kwabonisa ukuthi lokhu kuyiqiniso ngabesifazane abangajabuli emshadweni, kuze kube muva nje izinga isimiso somzimba sokuzivikela ezifweni samadoda esenziwe buthakathaka ngalo ukucindezeleka emshadweni lalingaziwa. Nokho, ukuhlolwa kwegazi lamadoda anemishado enezinkathazo kwabonisa ukuthi awakwazi ukulwisana nezifo ezimbili ezithathelwanayo zegciwane lesikhumba ezivamile. Ngaphezu kwalokho, ukuhlola okwenziwa umcwaningi uChristopher Coe, waseYunivesithi yaseWisconsin, kwasikisela ukuthi “ithonya elingokwemizwelo empilweni yomzimba lingaphikelela isikhathi eside ngemva kokuba lenkinga engokomzwelo isixazululiwe,” kubika iNew York Post.
Ukuhoxa KukaMongameli
Incwadi engokomthetho ekhululelwe abamaphephandaba evela eNxuseni LeRepublic YaseRwanda eCanada, yayazisa ukuthi umongameli waseRwanda, uJenene oMkhulu uJuvénal Habyarimana, uye wavumela “ukulengiswa ngokuphelele kwezigwebo” zabo bonke oFakazi BakaJehova ababeboshelwe izizathu ezingokwenkolo. Ngokwalencwadi yenxusa, lesinyathelo senzeka ngenkathi kugujwa unyaka wama-25 wenkululeko yaseRwanda. Ngemva kokukhululwa kwabo, oFakazi bavunyelwa ukuba baphindele emakhaya abo futhi babuyele emisebenzini yabo yokuziphilisa. Kubikwa ukuthi iziphathimandla zendawo ezahluleka ukusekela lokuhoxisa izigwebo kukaMongameli zasolwa uhulumeni omkhulu.